دكتور احمد مشاكل

ليله السفر

طبعا انت اول ما تسمع كلمه مصيف مخك علي طول يجيب البحر و السما و نجومه و قمره 🎼🎼
ده الناس الطبيعيه لكن في حاله امي ست الحبايب المصيف يعني مطبخ
هتقولي مطبخ اقولك اه مش مصدقني طب تعالي معايا كده تعالي متخافش
انا هوريك بنفسك هي مجهزه ايه لسفرنا بكره
كميات فراخ 🍗و لحوم🥓 تكفينا شهر مش اسبوع و طبعا السمك ده احنا بنجيبه من هناك
غير المكرونات و الخضار 🍅🥕بس اللي لفت نظري الصراحه البذنجان🍆 (شكلها ناويه تعمل محشي)
و انا خايف اسألها ليه بس مضطر لأني انا اللي بشيل في الاخر
_ امي هو انتى واخده الحاجات دي معاكي ليه
احنا رايحين اسبوع واحد بس
_ ما انا عارفه انه رايحين اسبوع،  حد قالك اني ناسيه
و ايه مالها الحاجه قول ما شاء الله
انا اصلا خايفه ميكفوش
_ ميكفوش ايه يا ماما ده احنا 2 بس
_ لا يا حبيبي احنا 5 ، ما انا نسيت اقولك انا عزمت اختك و ابنها و جوزها  يطلعوا معانا
_ يطلعوا معانا فين ( امي دي عليها حركات غريبه بشكل 😂)
_ المصيف يا حبيبي
_ حتي لو اختي جايه برده اللي وخداه ده كتير
_ يووووه بقي ، طب تعالي احسبها معايا كده
يوم فراخ و يوم سمك و يوم كشري بلا بلا بلا
(  ايه ده في  ايه ده لو انا  باكل الاكل ده في القاهره، والله ما هسافر)
_ ماشي يا ماما اللي يريحك، عايزه حاجه مني
_ طبعا يا حبيبي، عايزه شاي و سكر و علبه نسكافيه و ربع بن محوج و فاصولياء........................................
_ اروح اجيب لك السوبر ماركت كله اسهل
_ ما هي لماضتك دي اللي هتوديك في داهيه و بعدين انا لسه مخلصتش بعد كل ده تروح تجيب عيش يكفينا اسبوع و الفينو عشان سندويتشات بكره
_ هتعملي لنا ايه يا ماما 😛😛
_ جبنه بالخيار
_ ☹️☹️( no comment)
_ طب اشتري شيبسي و عصير لابن اختي (و خاله)
_ لا، الحاجات دي غلط انا هعمل كركديه
_ 😞😞 ( نفس ال no commen اللي فوق)
و فعلا نزلت اشتريت كل الطلبات دي اللي مش بتنتهي ابدا صدقتني بقي ان المصيف مطبخ
* بعد فتره مش طويله
_ احمد،  انت نمت
_ 😴😴😴😴😴
_ احمد اصحي الساعه 8 و الاتوبيس فاتنا
_ 😱😱😱😱
ابص فجاه في تليفوني الاقي الساعه 12 بليل
_ امي الساعه 12
_ بجد 😈😈 مخدتش بالي، علي العموم اصحي يلا عشان تشتري باقي الحاجه
( انا دلوقتي عرفت ابويا مات صغير ليه اكيد مات من الخضه ، مش كنت تاخدني معاك يا حج)
_ طلبات ايه تاني
_ حاجات خفيفه : اريال للهدوم و شامبو شعر و ازازه بريل.......... ( انت خلاص فهمت ان النقط دي معناها انها لسه بتتكلم و اظن انك مش لازم تعرف كل طلبات بيتنا لازم خصوصيه شويه)
_ حاضر يا امي، في حاجه كمان ولا خلاص
_ نسيت اهم حاجه 3 ازايز بيرسول
_ لييييييييه هتطهري العماره كلها( ألشت مني دي)
- ما انت عارف يا حماده اني بتقرف من الحشرات ( امي طالما قالت حماده يبقي في مصيبه، استر يا رب)
علي فكره يا حماده، جوز اختك اعتذر انه مش هيقدر ييجي معانا عشان عنده شغل 🙂🙂 ( انا لو منه اتنازل عن اختي و ابنها العمر كله )
و قوم يلا هات اللي طلبته منك.
و هيلا هوب قبل ما افكر ارد لقيت نفسي علي السلم و باب الشقه اتقفل
و لان الوقت اتأخر ف تعالي نرغي لحد ما نلاقي محل فاتح.
اظن اننا دلوقتي زودنا كلمه حمام جنب كلمه مطبخ يبقي مسمعكش مره تانيه تقول علي المصيف بحر
صح كنت عايزه اسألك هو انت والدتك برده بتحط 6 معالق و 6 شوك و سكاكين و كنك و طقم الصيني بتاع جارتكوا و ضلف المطبخ و باب التلاجه و  هي مسافره و لا انا امي حاله خاصه
مش ده اللي مضايقني آبسلوتلي ( بصوت محمد سعد) اللي مضايقني ان كل الحاجات دي بتتحط في شنطتي و في الاخر يتقال لي هدومك كتير
انا بفكر والله اخد هدومي في بؤجه احسن و اسيب لها الشنطه كلها
ايه بتقول ايه،  عايز تعرف وصلت لفين، انا في شارع ضلمه كحل يعني لو الحرامي طلع هيسرقني وش 😂😂
يا فرج الله، في محل فاتح اهوه
خلاص هروح انا اشتري و ارجع اشرب كوبايه قهوه و اسهر مع ست الكل و انت روح نام  عشان عندنا سفر بكره
ايه بتسأل مسافرين فين
_ لما تكبر هقولك 😈😈😈