دكتور احمد مشاكل

الجوع كافر

انا جعااااان!!؟😖😖
_ في ايه يا ابني مالك، صوتك عالي كده ليه
_ جعان يا امي
_ طب ما تاكل هو انا مسكاك، ولا انا مخبيه الاكل مثلا 😅( امي بتألش)
_ ما انتي معملتيش غداء انهاردا
_ و اعمل ليه و الاكل موجود في التلاجه
_ لأ ده بايت
_ هو يعني بايت عند  حد غريب 😅😅
( امي بتألش تاني)
_ كمان ده سمك و انتي عارفه اني مبحبوش
_ يا سلام، ما انت كنت بتاكله امبارح
_ اديكي قولتي امبارح 😌، انهاردا بقي انا عايز اكل جديد
معرفش ليه  يا اخي بعد الجمله دي سابتني و دخلت اوضتها ، هو انا قلت حاجه غريبه 🙄
و لان الجوع كافر و ملهوش كبير قررت ادخل المطبخ اعمل لنفسي اي حاجه 💪💪
هو انا كان في نيتي اعمل بطاطس  🙈🙈
جبت حله ( متركزش) و حطيت شويه زيت صغيرين اوي لاني بحافظ علي صحتي و الدهون غلط 🤓 و سبتها تسخن براحتها
بعدين حطيت البطاطس
( اللي انا رميت نصها اصلا و انا بقشر 😅😅)
معرفش ليه يا اخي اول لما حطيت البطاطس في الزيت،  الحله طلعت نااااار زي بتاعت الفنادق بس علي كبير 🔥🔥
( واضح اني طباخ ممتاز و هياخدوني في cbc سفره)
طفيت عليها و زي ما هي حطيتها في شنطه و رميتها من البلكونه 😅😅
( تقريبا نزلت علي دماغ واحد اقرع بس انا جريت جوه و عملت عبيط)
واحد غيري كان حمد ربنا ان الحجه مخدتش بالها من نار الفنادق 😅 ، و يروح يقعد خلاص
لكن انا قلت لكم الجوع كافر و مشافش يوم تربيه 😅
دخلت تانى على المطبخ و انا كلي حماس و قلت هعمل بيض، حاجه سهله اهوه
جبت حله برده ( معرفش ايه حكايتي مع الحلل)
حطيت شويه مياه و بعدين البيض و سبتها ( مفيش حوادث اهو)
في الوقت ده جالي تليفون من حموءه اللي متخانق مع..........( ميهمكش تعرف مشاكل صحابي كفايه عليك مشاكلي)
و قعدنا نرغي يا اخي و محستش بالوقت و نسيت الجوع و نسيت نفسي و نسيت البيض 😳😳
و اول لما افتكرت جت في بالي صوره امي🙈 هطلع بره من اوضتي ازااي!!؟
(في اوقات زي دي الواحد مننا بيبدأ يفكر في اجراءات الهجره)
و يا دوبك لسه هخرج من اوضتي و لقيت ست الكل في وشي و عنيها بتطلع نار😤😤 ( ريحه الشياط اللي في الشقه عامله ميكس رعب و ساسبينس  مع امي مطلعين احلي شغل، ده المنظر لوحده كفيل يجيب لي صرع 🤕🤕 )
_ اعمل فيك ايه، حرقت لي المطبخ و الحلل
_ و نسيتي البيض 😁😁
( هي مردتش، انا بس لقيت فرده شبشب لزقت في وشي 🤐🤐)
و اديني اهوه واقف علي الحوض بغسل الحلل اللي انا حرقتها و انا متأثر و بغني " و الله يا زمن لا بأيدينا زرعنا الشوك" اللي هي بتاعت شاديه دي
و لأني لسه جعان دخلت اصالح امي 😍😍
_ يا امي، يا ست الكل، يا ست الناس كلها
_😑😑😑
_طب عشان خاطري
_😑😑😑
( واضح ان المواجهة هي الحل الوحيد 🤔)
_ امي، انا  لسه جعان
_ يخرب بيتك .... ......(ام بتهزق ابنها ، مالك انت بينا!!؟)
بص يا احمد انت تاخد هدومك يا حبيبي و تروح تقعد عند اختك 😡
_ مش هينفع يا امي، ياسمين منعاني اروح عندها من ساعه ما اكلت البيتزا بتاعت بندق 😒😒
_ يخرب بيتك، بتاكل اكل الواد
عامل عقلك بعقل عيل صغير
بص يا ابني انت تاخد الباب في ايدك و تطلع بره احسنلك
(انا شاكك اني انا اتطردت ،  هل ده حقيقي🙄🤔)
قعدت افرك لي ساعتين ما انا لسه جعان يا جماعه و اليوم بيخلص و انا مفطرتش حتي 😭😭
قلت هطلب دليفري و هحط امي قدام الامر الواقع و اخليها تحاسب 😈😈
و قد كان ( حلوه العربيه الفصحي اللي بتطلع فجأة دي)
و بتاع الدليفري علي السلم رحت قلت لامي، أينعم رفضت في الاول و هزقتني شويه بس في الاخر اديتني احاسب عشان بس برستيچي قدام بتاع الدليفري 😂😂
و يا دوبك بحط الاكل علي الترابيزه لقيت امي قاعده قبلي 😬😬
_ ايه ده انتي هتاكلي معايا
_ اه، اصلي جعانه
_ طب ما تقومي تاكلي السمك 😅
_ لأ انا هاكل ده، مش بفلوسي
( مقنعه اوي الست دي)
روح انت بس هات لي  مخلل من المطبخ رحت و رجعت لقيتها بدأت اكل
_ بالهنا و الشفا 🤐🤐
_ روح كمان هات لي خس من التلاجه
رحت جبته لقيتها خلصت نصه
_  بالهنااااا و الشفااااا  برده 🤐🤐
_ روح بقي صب لي بيبسي عشان اهضم يا حبيبي
سمعت الكلام و جبت البيبسي 😒😒
رجعت ملقتش الاكل اصلا 😱😱
و امي بتقولي :
_ الراجل ده ضحك عليك، الاكل طعمه ماسخ، ده انا اعمل احلي منه 100 مره
ايه ده مالك يا احمد وشك اصفر ليه
(انا بتجلط صح 🤢🤢🤢 انا بتشل مش كده)
و هوووب اغمي عليا 😪😪
_ افهم من كده انك مبقتش جعان خلاص
طب خلاص تصبح على خير و ابقي رتب الترابيزه مكانك 🤓🤓
( دوروا علي حد يفوقني يا جماعه 😥😥)