دكتور احمد مشاكل

تجمع العائله

من الايام المحببه لقلبي يوم ما اروح عند جدتي
العيله كلها بتتلم علي سفره جدتي المليانه بكل ما لذ و طاب و كل ما هو مميت و ملئ بالكوليسترول و اليورانيوم المشع بدايه من المحشي المسد للشرايين اللي مرمي فيه حتت دهنه عشان تدي طعم او حتي الفراخ البانيه اللي حجمها يقارب مساحه بلد في حجم كينيا و يمكن تقريبا كانت نفس شكلها علي الخريطه كمان 😅😅
معرفش ليه امي بتخلينا نجيب  دايما و احنا رايحين موز و تفاح حتي و لو مش في الموسم بتاعهم لازم تسحلني معاها لحد ما اجيبهم و المصيبه ان جدتي بتخبيهم و تنسي لحد ما يبوظوا يعني محدش هياكلهم يبقي نجيبهم لييه 😂😂
بس كفايه نظره داعش من امي تخليني اثبت في مكاني اصل كده ميت و كده ميت 😅
وصلنا و الحمد لله و لسه هخبط لقيت امي بتديني الوصايا العشره ( حد يقنعها اني كبرت يا جماعه 🙈)
اول لما دخلت لقيت في وشي الحجه منال( ابله نظيفه) دي يا جماعه تبقي مراه خالي و انا مش مسميها نظيفه من فراغ اصلها منظمه اوي و نضيفه اوي و قرفانه خالص
  جيت امد ايدي اسلم لاقيتها بتسلم عليا بطرطوف ايديها و رجعت شمتها ( طب هي بتشم ايه) و ماسكه كل حاجه بمنديل و امي بتبص لها بصه للاسف مش عارف اوصفها بس انت اكيد عارفاها جنبها علي طول علي السرير لقيت جوزها ( اللي هو خالي) و ده من يوم ما عرفته و هو واخد وضع السقوط الحر ما بيقومش ابدا و علي طول بيطلب طلبات مستفزه زي " ابو حميد روح اعمل لي كوباية شاي و غير المحطه و هات لي الريموت و هات طفايه من المطبخ و بعدين اطفي النور و سيبني انام " اللي هو هشغلك هشغلك 😒😒
قلت هفكس للناس دي و رحت سايب لهم الاوضه بحالها و داخل اوضه تانيه لقيت اصوات عاليه و شكل كده في خناقه ( العقل يقول اهرب لكن ازاي مبقاش احمد مشاكل لو مدخلتش)
لقيت اتنين ستات معرفهمش ( قرايبك دول!!؟) عمالين يتخانقوا و واحده منهم كلت دراع التانيه و التانيه ضربت الاولي بوكس لوحتها
كل ده و انا واقف افتكر جمله " البنات الطف الكائنات " و اضحك من كتر الرقه 😂😂
و لمحت طفلين بيلعبوا ورا فهمت بعدين ان الاطفال اتخانقوا سوا فالامهات اتدخلوا يصلحوا بس متعرفش حصل ايه 💁
(مش فاكره اي حاجه عن الفصل ده بس انا لقيته محفوظ فقررت انزله زي ما هو  😂)