دكتور احمد مشاكل

20 رمضان

قاعد في اوضتي في امان الله بسمع تامر عاشور اللي منكد عليا حياتي و شويه و هقوم ارمي نفسي من البلكونه عشان يرتاح
طب  انا ذنبي ايه افضل اسمع " ليالي عذابي معاك و جيت علي كرامتي و محظوظ و افترقنا" وانا  اقصي حد جارحني في الحياه  هو سواق الميكروباص اللي كل عليا 2 جنيه امبارح
هتقولي بتسمعه ليه هقولك بحبه ( مقنع انا مش كده 😌)
و في وسط حاله الشجن اللي انا فيها الاقيك امي ست الكل داخله عليا شبه التنين المجنح بالظبط ناقص بس تطلع نار من بؤها
_ انت نايم هنا و مش داري بالمصيبه اللي احنا فيها
_ حصل ايه بس
_ طبعا ما انت يا نايم يا بتاكل يا في الشارع و مش شايل هم حاجه، كله علي دماغي انا 😢 و مفيش حد بيساعدني
_ طب عرفيني في ايه و انا هعمله لك
_ لأ، انا مابحبش حد يعمل شغل بيتي غيري
( طب انا اساعد و لا مساعدش انا اتلخبطت)
_ يعني انتي عايزه ايه يا امي
_ نسيت عايزه ايه، هو انا مخي دفتر ما كفايه اني ........و انت........( قعدت تهزأني حوالي نص ساعه)
و راحت سيباني و مشيت
و انا لسه في صدمتي بحاول افهم ايه اللي حصل هو انا اتهزأت بس معرفش ليه 🤔🤔
* بعد شويه
_ انا افتكرت، قوم كده كلمني و ركز معايا
_ خير يا امي
_ ناقص شهرين علي رمضان و انا لسه مجهزتش حاجه
_ تجهزي ايه مش فاهم
_ عايزه اجيب الكرنب و البسله و........
( انا سبت امي ترغي و رجعت بالذاكره ل10 سنين ورا يوم 20 رمضان)
كان عمري وقتها 18 سنه و كنت لسه في اولي جامعه و امي وقتها سابتني و راحت عند اختي تقعد عندها يومين لان حمدي (جوز اختي) مسافر و قعدت تتحايل عليا اروح معاها و انا رفضت مش فاكر اتحججت بأيه بس في النهايه قعدت لوحدي يومين
اول يوم قضيته نوم ثم نوم ثم فطار ثم نوم معملتش اي حاجه
جه تاني يوم وانا قاعد علي السرير بتأمل في جمال السقف ( كان شكله حلو والله 😅) نطت في دماغي فكره رهيبه
ارتب الشقه للعيد زي ما امي و اختي بيعملوا (انا بحكي دلوقتي و انا نفسي ارجع اضرب نفسي بالشبشب علي الفكره دي)
اول حاجه عملتها نزلت الستاير بالحلقات بتاعتها و عملت فيها ناصح 😂 و فصلت البيضا عن الملونه و قلت هغسلهم بس لاني عمري ما استخدمت الغساله ف شغلتها اي حاجه و حطيت اي حاجه  بعدين حطيت الستاير بحلقاتها ، فهمت بعدين اني حطيت اريال صح بس شغلت مياه سخنه فحولت الستاير الي حاجه مكرمشه كده و ملهاش ملامح 😂😂 سبحان اللي رجعها ستاير تاني
مهمنيش قلت هعمل حاجه سهله و امسح الشقه بس اللي حصل اني ملقتش المكنسه ف قررت امسح علي طول معرفش ايه اللي حصل فجأه لقيت الشقه كلها طينه و ملهاش ملامح زي الستاير كده، برضوا مهمنيش
قلت خلاص اخر حاجه هعملها اني انضف الحيطه جبت جردل المياه و قعدت ارمي علي الحيطه اول مره تمام، تانى مره تمام، تالت مره المياه جت على كوبس النور و الشقه ضلمت كلها مره واحده 🙈🙈
واحد غيري المفروض يروح يجيب كهربائي يصلح النور و اجيب سعديه ( مراه البواب) تنضف اللي عملته🙄🙄
لكن انا غير اي حد😅 ، علي نور الشمعه لميت هدومي و رحت عند امي و ياسمين و سبت الشقه زي ما هي
طبعا عملت حوار ان البيت وحش من غيرها عشان كده روحت لها و قدرت اقنعها تاني يوم انها مترجعش لوحدها و تاخد ياسمين معاها ( ناصح انا)
و علي باب العماره سبتهم و جريت ( سبتهم يتصدموا بشكل الشقه لوحدهم)
و مرجعتش الشقه غير لما ياسمين كلمتنى وقالت اني امي نامت و دفعوا 200 جنيه للكهربائي اللي قعد 3 ساعات يصلح اللي انا عملته  ،فاكر طبعا ال 200 جنيه لان امي خصمتهم من مصروفي ( كنت طالب وقتها و محلتيش غير المصروف)
فقت من القصه دي علي صوت امي لسه بتكمل كلامها علي طلبات رمضان 😂😂
( مبتخلصش الطلبات دي ابدا)
_ احمد
_ نعم يا ست الكل
_ هاتهم يلا
_ ايه دول
_ 400 جنيه عشان رمضان
_ لأ كفايه عليا ال 200 جنيه ( كانوا من مصروفي 😭😭)
_ ؛!؟؟؟!
و سبتها و مشيت و هي مش فاهمه حاجه و لا عارفه ايه اللي عصبني بس انتوا عارفين مش كده 😂😂