أنا نهاية قصتك (باللهجة الجزائرية)

♡ بارت 30 ♡

"وهذا الشرود في عينيه من كل ذلك الصراخ داخل رأسه"

◇•◇•◇•◇•◇•◇•◇•◇

[ نضال ]

كنت متكي فالسرير تاعي فالسبيطار نخزر للبلافون .. سعيد وبهاء قاعدين معايا ويخزرو فيا برك .. قلبي يوجعني وجسمي يوجعني ، عقلي يفيض بالتخمام ، حاس روحي مخنوق ، حاس حاجة تضغط على رقبتي تجيفني وتخنقني .. حاس روحي حايب نخرج من جسمي نشم الهوا ونعاود نرجع .. حايب نبعد من هاذ الدنيا ومن هاذ البلاصة ومن هاذ الاحاسيس لي راني نعيشهم .. أني نشوف روحي بين الحياة والموت وما عندي حتى حاجة نديرها .. اني نشوف ناس عزاز عليا يتعذبو ويتقسم قلبهم عليا وانا السبة وماعندي ما ندير .. على هذا قررت على الاقل نعفي نيرة من هاذ الشي ومن العذاب اللي ممكن تعيشو .. نييرة ، نيرة ديالي ، نيرة الطفلة اللي طيحتني على راسي ، حبيتها وعشقتها ، بكل تفاصيلها ، بحنانتها ، بقلبها ، بكل حاجة فيها ، عينيها وخزرتها يجذبوني ليها ، حركتلي قلبي وخلاتني نعيش اوقات ماننساهمش معاها .. خلاتني نشوف شحال انا ضعيف مالغري انا الراجل وهي الطفلة ، تعلمت معاها القوة ، الصبر ، التبسيمة في وقت الشدة .. حبيت طفلة قوية ، طفلة تبان من برا هشيشة وضعيفة ، بصح لي يعرفها صح يكتشف شحااالها قوية وشحال قادرة تضحي وتصبر باش تكمل حياتها وما تستسلمش .. نيرة كانت اضافة حلوة لحياتي ، زادت فيها بزاف معاني ، ورايحة تبقا هكدا لاخر لحظة من حياتي .. تمنيت نقدر نقولهالها اخر مرة ونفرغ قلبي لاخر مرة قبل ما نودع هاذ الدنيا ، تمنيت نقولها بلي نحبها وبلي بلاصتها في قلبي وحدها ..

يما (تبكي) : نضااال !!

خرزت للباب ، لقيت بابا ويما ورنا داخلين عندي .. خايفين ويرعشو .. سوطات عليا يما تعنق وتسلم وقلبها يخبط .. مانحملش نشوف يما العزيزة تبكي ، ومانحملش روحي كي نكون انا السبة ..

نضال : يماا علاش راكي تبكي دوكا ؟ تعيشي حبسي من البكا !

يما (تشهق) : كيفااااش حبيتني ما نبكيش كيفااااش ، والطبيب يقولي بلي خلااااص نضال وليدك خلااااص .. يااا ربي وش درت انا في حياتي باش راك تعاقبني بوليدي ، يااا ربي اديني انا ولا هو .. علااااش يا ربي علاااش ..

بدات تزيد فيها وبدات تدخل فحالة هستيرية من البكا ، كان علابالي بلي مشي لازم نقولها ..

نضال : يماا اتقي الله وش بييك .. وشنو الهدرة هاذيا ؟

بهاء : يماا هذا ابتلاء من عند ربي ، وش بيك تهدري هكدا ؟ خي نتي انسانة مؤمنة لالا ؟ رانا كامل ندعولو ، وان شاء الله ما يكون غير الخير ..

بداو كامل يهدنو فيها وهي غير تزيد تبكي .. غير تسكت تخزر فيا وتعااود تطرطق بالبكا ، قلبي تقطع عليها ..

رنا (تبكي) : نضاال .. عيطت لنيرة ؟

نضال (زبطت وجهي) : لالا .. اسمعوني كامل .. مانسحق حتى واحد فيكم يقولها ، لي يقولها مكلاه يجي يهدر معايا ..