أنا نهاية قصتك (باللهجة الجزائرية)

♡ بارت 15 ♡

****بعد يومين****

[ نيرة ]

جازو ذوك اليومين عادي .. طاطا صليحة ومارية يجيو الصباح مع نضال يجيبولي الغذا ، والعشية تجي رنا مع بهاء يجيبولي العشا .. والله حشمت منهم بزاف ، حسيت روحي ثقلت ، عييت نحاول فطاطا ما تجيبش الماكلة مي محبتش .. وحد لدوك مزال ما قلتلهم اذا نروح معاهم ولا لالا ..

.....

لحق النهار لي نخرج فيه واخيرا من السبيطار .. خاطري ضاق لهنا ..

نضت الصباح ، صليت وبقيت قاعدة نستنا فيهم ..

مع العشرة ، لحقت مارية هي اللولة ..

مارية : صبااااح الخير ..

نيرة : صباح النور .. ما قاتلك والو هدايات ؟

مارية : راها تعيط على الروطار كي العادة .. اليوم قلتلها رح نقضي ..

نيرة : اممم ..

مارية : مالا كيفاش ؟ تروحي معاهم ؟

نيرة : وش رايك نتي ؟

مارية : مازلتي تسقسي على رايي ؟ باينة روحي ..

نيرة : بصح والله حشمانة منهم بزاف ..

مارية : خااه ، وعلاه تحشمي ، ياخي طاطا هي لي بروبوزات عليك ..

حبطت راسي وما قلت والو ..

... شوية هكدا حتى لحقت طاطا صليحة مع بهاء ..

ط.صليحة/بهاء : سلام عليكم ..

نيرة/مارية : وعليكم السلام ..

ط.صليحة : ها نيرة ؟ تجي معانا ؟

نيرة : طاطا والله حشمت منكم بزاف ، كثرت عليكم ..

ط.صليحة : نيرة والله نزعف منك اذا زدتي عاودتي هاذ الهدرة .. عمك المختار راهو يرحب بيك وقالي ماعندي حتى مشكل .. هايا بنتي ، تعيشي ..

نيرة : لي تشوفيها طاطا ..

تبسمت معايا وعنقتني ..

نيرة : صحا طاطا معليش نقولك حاجة ؟

ط.صليحة : وشنو ؟

نيرة : تعيشي ، ما تخليش نضال وبهاء يخرجو من الدار ، والله عيب ، جاية لداركم ونزيد نخرجهم من دارهم .. (خزرت فبهاء) تعيش بهاء ، ما تخرجوش والله ماني حابة نديرونجيكم ..

بهاء : ماكاين حتى ديرونجمون ..

نيرة : لالا كاين ، تعيشو .. باش يبقا ضميري مرتاح ..

ط.صليحة : اومبعد نحكيو على هاذ الموضوع .. هايا دوكا نروحو .. (خزرت لبهاء) وليدي روح جيب اوراق الخروج ..

راح بهاء ، وانا جبت التيليفون وخرجنا بين ثلاثة ..

مارية : طاطا يعطيكم الصحة كي رح تخلوها عندكم ، والله هكدا بالي يبقا مرتاح .. ونتهنا عليها