أنا نهاية قصتك (باللهجة الجزائرية)

♡ بارت 10 ♡

"في ملامح الهادئين اشياء مكسورة"

◇•◇•◇•◇•◇•◇•◇•◇•◇•◇

****غدوة من ذاك****

[ نيرة ]

نضت الصباح على العياط .. نضت مفجوعة تاع الصح ، ما فهمتش كامل وش صرا !

حتى تتفتح الباب ، تقول شي لابوليس دخلو عليا .. حتى يونس وناض ..

خ.جميلة (بالعياط) : الله يسود حلايسك ، الله يعطيك المرض ، الله يعيطك الهم الكحل ، يا المسخة يا المعفنة يا البقرة .. ديري فيها بلعاني ، زعما على لي خرجناك برا !! دخلناك لدارنا ووكلناك من ماكلتنا وراكي ترقدي تحت سقف ، وزيد مع عايلة **** لي الناس كامل تتمنا تعيش تحت كنفها ، هكدا تردينا الخير يا الحيوانة ، يا نكارة الخير ، يا لي ما تسوايش !!

يعني سمعت خطاب طويل وعريض تاع سب وترخاس وتبهديل ، وانا معلاباليش اصلا وش درت !! اصلا ما رجعتش نستغرب منهم ، قادرين يديرولي فيلم وقصة على والو .. يادرا وش السبة اليوم !

يونس (بالعياط) : وش دارت يماا ؟؟! اليوم نطرطقلها راسها ، وش دارت ؟

خ.جميلة : لالا ارواح ، ارواااح تشوف لالة وش دارت .. عمبالك رح نسيقو انا ولا بناتي ، نتي ، نتيا يا المسخة لي رح تمسحيه وتحكي الارض حتى ترجع خير من لي كانت عليه .. والله ما تسواي قاع !!

ناض يونس وراح ورا يماه ، وانا خرجت من البيت وطليت من الفوق برك باش نشوف وش كاين .. حتى نشوف الطريق من الكوزينة حتى الباب تاع برا كامل معمر ماء تاع لابوبال ، هذاك الماء المُسخ لي يقطر من الساشيات تاع الزبل (حشاكم) ، كان بزااااف ، وزيد صفر مخلط بالاورونج ، والريحة فايحة .. انا تخلعت من واش شفت ، الحالة كانت مبهدلة قاع بذاك الشي !!
بصح ماشي انا !! مانيش انا لي درت هكدا ! صح انا خرجت لابوبال ، بصح ماشي انا لي درت هكدا ! عاودت دخلت البارح حتى للكوزينة باش غسلت يديا ، ماكاش قاع كاين !! شكون لي دار هكدا ؟؟!!

خ.جميلة (تعيط من التحت) : اييه طلي طلي يا بنت الكلب ، يا الكلبة ، يا مطلسة الوجه !!

هي تعيط وانا فقت على روحي وجيت حا نرجع للبيت ، حتى نسمع فيل طالع فالدرج ويخبط رجليه مع الارض مليح ، حتى الغبار كان يطير وراه .. انا فشليا ركبو والتلفة هدرتلي ، حسيت الدم تجمد داخلي ..

لحق لعندي وهو عينيه يقطرو بالغش ، انا هربت نجري للبيت وغلقت الباب بالمفتاح ، بقا يدقدق الباب قريب يكسرها .. وانا بقيت نرعش وحاكمة قلبي بزوج يديا نبكي .. معرفتش وش ندير ولا وين نروح ، حا يجي يقتلني ولا يعيشني اسوء وقت فالعالم (بلاما ندخلو فالتفاصيل) .. بدا النفس يضيق فيا وما عرفتش وش ندير ..

بقالي حل واحد !! صح سمطتها وكثرت على ما وصاوني ، بصح لازم نسلك منو .. حتى يتهدن على الاقل ..