أنا نهاية قصتك (باللهجة الجزائرية)

♡ بارت 16 ♡

****غدوة من ذاك****

[ نيرة ]

نضت الصباح ، درت روتيني كي العادة وحبطت لعند العايلة مع رنا .. وبقينا نستقهواو .. شوية وناض عمي مختار هو اللول وراح ..

نضال : يما ، بيسك نيرة حبت تخدم ....

ط.صليحة (قاطعاتو) : تخدم ؟!

نيرة : ايه طاطا حبيت نخدم ، مدام راطيت هاذ العام ومارحش نقرا ، حبيت نعوض هاذ العام فحاجة مفيدة ، وباش ما نكثرش عليكم المصروف ..

ط.صليحة : مازلنا نيرة ؟ خي قتلك راكي على الراس والعين ..

نيرة : علابالي طاطا ، ربي يخليكم ، بصح تعيشي ، والله حياتي كاملة نتمنا مصروف كيما العيباد ، عمري ولا كان عندي دارهم نشري ولا ، دايمن نشوف الحاجة ونجوز عليها ، ما عنديش الحق نشري .. ماكمش ملزومين باش تشريولي ولا ، باسك ما عنديش حق عليكم .. تعيشي طاطا ، اذا حبيتي نخدم غير نص نهار ..

خزرت فيا وتنهدت ، ورجعت تبسمت ..

ط.صليحة : ايه كيما تحبي ، بصح وش راح تخدمي ؟

نضال : هذا لي جيت نقولو وقاطعتيني يما .. انا ماعنديش سكرتيرة ، القديم لي كان لتم خرج .. مالا قلت تجي هي تخدم في بلاصتو خير ما نبدا نحوس على كاش واحد ، وزيد ما نقدرش نوظف لي جا ..

بهاء : تقدري تخدمي لتم نيرة ؟

نيرة : بعد اذن طاطا بيان سور ، نجرب ونشوف ، اذا شفتها صعيبة نحبس .. وش قلتي طاطا ؟

ط.صليحة : ايه ، كيما تحبو ..

تبسمت معاها ، وخزرت فنضال تبسمتلو من قلبي ، وهو بادلني التبسيمة ..

رنا : وقتاش تبدا ؟

نضال : من غدوة ، خلي نفريلها الورق اليوم ، وغدوة ان شاء الله تجي .. (خزر فيا) وش قلتي ؟

نيرة : ايه مليحة .. يعطيك الصحة ..

نضال : بلا مزية ..

ناض نضال وبهاء وراحو لخدمتهم .. وانا عاونت طاطا ورنا فالمواعن كي العادة ..

.....

لحقت العشرة ، رحنا انا ورنا بدلنا باش نخرجو مع طاطا ندورو شوية ..
جا بهاء لحقنا لوحد السونتر ورجع لخدمتو .. هو لي يقدر يخرج قاع كثر من خدمتو ، باسك عندهم بزاف اوقات الراحة ..

دخلنا للسونتر وبقينا ندورو ، وانا التبسيمة لاحقة لوذنيا من الفرحة ، عمري ولا خرجت درت شوبينغ .. اول مرة فحياتي .. درنا وضحكنا ، ورنا تقيس القش وتخرج عندنا توريلنا وحنا نضحكو عليها ..

رجلينا طابو بالمشية ..

كنا فواحد الحانوت تاع القش ، وبقيت نخزر فلي غوب تاع المحجبات ، شافتني رنا ، جات لعندي ..