أنا نهاية قصتك (باللهجة الجزائرية)

♡ بارت 34 ♡

"بعيدا عن الحقد ، انا لا اغفر لمن تعمد كسري"

◇•◇•◇•◇•◇•◇•◇•◇•◇•◇

[ نيرة ]

بعدما تهدنت في حضن مارية وانا نبكي بعدما سمعت بلي نضال مارجعش يخدم فيه الدوا ولازملو عملية .. لقيت دكتور عمر واقف عند باب البالكون يخزر فينا ..

مارية : انا نروح نشوف لورا وش رايها فالهدرة تاع دكتور ارثر ..

نيرة : اوك روحي وقوليلي تعيشي ..

دارتلي براسها تاع ايه وراحت .. دخل دكتور عمر متبسم ، رجعتلو التبسيمة ووقفت نخزر قبالة .. جا وقف بعيد عليا شوية يعني بحوالي زوج ميترات وبقا يهدر بلاما يخزر فيا ..

د.عمر : ماتقلقيش روحك نيرة .. يبرا ان شاء الله

نيرة : راني ندعيلو ربي هذاك وش عندي ندير ..

د.عمر : نلقاولو برك متبرع وكلش ساهل باذن الله ، مزالو صغير وقادر يتحمل عملية صعيبة هكدا ..

نيرة : المشكل راهو فهاذ العضو الجديد اللي رايحين يحطوه بلاصة قلبو الحقيقي ، قاتلي لورا ممكن مايخدمش القلب هذا ، ممكن جسم نضال مايتقبلوش ويرفضو على اساس جسم غريب ، كاين بزاف احتمالات سلبية تاع هاذ العملية ، بلاما ننساو خطورتها كي يديرها الانسان ..

د.عمر : علابالي ، هاذو كامل نعرفهم ، بصح خليك متفائلة وكامل رانا ندعولو ربي يشفيه ..

نيرة (تنهدت) : ايه ان شاء الله ..

سكتنا شوية ..

د.عمر (دار خزر فيا) : نيرة ، قاتلي لورا حايية تقراي طب لهنا ..

درت لعندو ..

نيرة : ايه ان شاء الله ، غدوا رايحة نبدا نقرا فمدرسة باش نجيب الéquivalent تاع الباك تاعي ومن بعد نقرا طب باذن الله ..

د.عمر (تبسم) : ايه مليح ، تحبي نعاونك ونعطيك فكرة ؟ يعني بيسك راكي تجي للسبيطار ، باش ماتبقايش دوري برك ، انا كي نكون فاضي نريحو ونعطيك فكرة على السيستام لهنا وكامل وغير تبداي تقراي راني لهنا اذا كشما سحقيتي ..

نيرة : ياا صح ؟ يعطيك الصحة باسك علابالي رايحة ندخل في حيط مع اللغة الالمانية هاذي ..

ضحك وخزر فيا ، خزرتو كانت بيزاغ ، حبطت راسي ورجعت نخزر قبالة ..

عمر : المهم نتيا الله يبارك عليك قادرة على شقاك ، ماتقلقيش روحك قاع ، راني هنا ..

نيرة : علابالي .. ربي يخليك ويعطيك ما تتمنى ..

عمر : راكي فاضية اليوم العشية ؟

نيرة : ايه ماعندي والو ..

انا جيت نقولو اذا باش يبدا يفهمني ، ونلقى الوحش تاع نضال قاعد يعيط وياكل في روحو .. ولقيتو يجبد فيا ومعلاباليش ..
الانهيار لي صرالي السبة تاعو الوحيدة اني كرهت روحي وعفت روحي كيفاش بلمسة صغيرة منو قدر يرجعلي مشاعر قوية كنت نحاول ندفنها ونخبيها وننساها ، غير جبدني ليه وخلاني فحضنو ماقدرتش نقاوم ورجعو مشاعري ليه .. كرهت روحي كيفاش مانيش قادرة نكرهو بعد الشي لي قالهولي ، كيفاش مانيش قادرة نمحيه من حياتي ومن تخمامي .. كرهت وعييت ومليت ..