أنا نهاية قصتك (باللهجة الجزائرية)

♡ بارت 11 ♡

[ نضال ]

نضت الصباح مقنوط .. معلاباليش علاش راني فهاد الحالة من البارح .. لازم ننحي الطاقة السلبية من داخلي ..

صليت وقريت القران باش نريح روحي .. وبدلت قشي وحبطت لعند العايلة نستقهوا معاهم .. اليوم ويكاند وما نخدمش ..

بابا : اليوم نروحو عند فضيل باش نتفاهمو

يما : ان شاء الله .. وقتاش ؟

بابا : بعد صلاة الظهر ..

درنالو براسنا ايه وكملنا ماكلتنا .. ماشي وقتو قاع ، الواحد ماهوش فعقلو وهوما يصدعولي راسي بالخرطي تاعهم ..

غير كملت القهوة ، نضت جبت مفتاحي وتيليفوني وجيت خارج ..

يما : وين بيها ؟

نضال : رايح انا وسعيد لعند صاحبي الطبيب

يما : ايه ربي يسهل ..

خرجت من الدار ورحت بطونوبيلتي .. جزت على سعيد باش نروحو نتلاقاو بمنير ، عندنا شحال ما درناش قعدة كيما تاع زمان ..

لحقنا للسبيطار ..
حبطنا ورحنا للبيرو تاعو .. غير كنا جايزين ، شفت يونس .. وش راهو يدير لهنا ؟ اااووب ، زعما بهاء جاب نيرة لهاذ السبيطار ؟؟

نضال : سعيد .. روح نتا دوك دقيقة ونتبعك

سعيد : وين بيها ؟

نضال : دقيقة ونجي ..

طلع سعيد كتافو وراح .. وانا تبعت يونس ، حتى شفتو دخل لوحد الشمبرة ، وانا بقيت نخزر من الباب لي كانت مفتوحة شوية ..
حتى شفت نيرة ناضت وسقمت الخيمار مليح ..

يونس : خلاص ريحتي دوكا ! الطبة قالو بلي الطفل ماراحش يطيح .. (دارلها بصبعو لراسها) ما نزيدش نعاود هدرتي ، الطفل ما يطيحش ، نتي حبيتي موتي موتي ، المهم تولدي الطفل .. ونزيد نعاود نسمعك قلتي حايبة نطيحو ، وجهك نخسرو .. هايا نرجعو للدار ..

ناضو بين زوج وجاو خارجين ، وانا بعدت نجري بصح نيرة شافتني ، وكوفت روحها وكملت تمشي معاه ..

راها حايبة طيح الطفل ؟! علاااش ؟! مزال ما نفهم الطفلة هاذيا ! وعلاش ممكن تحب طيحو ! ياخي هي لي تزوجت بيه باش تعيش معاه ويجيبو دراري ! وعلاش ماهيش حايبة البيبي ؟!

كنت نخمم ونمشي .. حتى لحقت للبيرو تاع منير .. دخلت سلمت عليه وقعدت ..

منير : هكدا ليجان ، حتى نعيطلكم انا باش تجيو لعندي ..

سعيد : اااه خو ، والله وتشوف المشاكل لي راهم فالخدمة ، مخك يدور ..

منير : مام حنا عندنا الضغط ولاشارج .. (خزر فيا) واش نضال ، وين راك ؟ ماكش تبان مليح

سعيد : والله ما فهمتو هاد اليامات ، نهار كامل غايس ومقلق ، وغير تهدر معاه يطير فيك ..