أنا نهاية قصتك (باللهجة الجزائرية)

♡ بارت 33 ♡

****غدوة من ذاك****

[ نضال ]

نضت الصباح حاس كلش في جسمي يسطر .. نضت بالعقل ، صليت ورجعت لبلاصتي باسك لقيت الفراملة عند راسي يوصوني باش مانوضش ومانتحركش على واش صرالي الليلة تاع البارح .. كلاولي راسي ..

حتى تفتحت الباب .. طلعت راسي عمبالي بهاء ولا هناء .. حتى يبست في بلاصتي والدم نشف فيا كي شفت نيرة واقفة تخزر فيا .. دخلت عندي للشمبرة عينيها في عينيا ، واحد ما قدر يبعد عينيه من لاخر .. دخلت وراها مارية وزاد بهاء وهناء وطبيبة لورا .. كامل يخزرو فينا وحنا نخزرو لبعضنا برك .. ماكنتش مستوعب شحال توحشتها حتى للدوك .. حاس روحي ماشفتهاش عندي عام .. حايب نوض ليها نعنقها ، نسلم عليها ، نحكيلها واش عشت في غيابها ، نشوف ضحكتها ونسمع صوتها .. معلاباليش شحال وحنا فهاذيك الحالة .. خزرتها كانت تخوف ، تحاسبني ، تعاتبني ، بزاف اسئلة في عينيها تطلب مني اجوبة مش جواب واحد برك ..

د.لورا : احم .. نضال ..

قاطعتنا لورا .. بسيف باش نحيت عينيا من نيرة وخزرت في لورا ..

د.لورا : كيما فهموك الفراملة ، لازم تبعد على الضغط واي حاجة تزيد فنبض القلب تاعك .. وماتنوضش من بلاصتك بزاف ، الا للضرورة ..

نضال : ايه ..

د.لورا : اوك .. انا نروح دوكا .. شوية ونرجع نشوف نتيجة الدوا فال24 ساعة هاذيا ..

راحت وخلاتنا .. وعم الصمت ، واحد ماكانت عندو الشجاعة ينطق ..

مارية : راك مليح نضال ؟

طلعت راسي خزرت فيها .. عندي شحال ماهدرتش معاها ، من نهار ضاربنا كي جات لعندي وبقات توصيني على نيرة ..

نضال : لاباس ..

مارية (متوترة) : نخرج شوية ونجي ..

وراحت ..

هناء : نروح نشوف دكتور ارثر انا ..

خرجت هناء ، معلاباليش اذا علابالها بحكاية نيرة ولا لالا .. اصلا حتى واحد ماعلابالو بلي نحب نيرة .. ماقلت لحتى واحد ..

تنهد بهاء ومسح على وجهو وخرج بلاما يهدر والو .. جات نيرة تان متبعاتو ..

نضال : علاش جيتي ؟

دارت خزرت فيا ، ضحكت بسخرية .. وااش هاذ السؤال التااافه لي سقسيتو !

نيرة : علاش جيت ؟ .. ايه علابالي راك تشوف فيا دوكا بلا حتى كرامة ، قاع واش قتلي وانا جيت نشوفك باسك تقلقت عليك كي عرفتك مريض .. بصح بالاك دير في بالك بلي سمحتلك ولا رايحة نحللك باش ترجعلي ولا زعما نخليك تحسبها مزية مني اني جيت ليك .. الله غالب ، ماقدرتش ننكر الخبز والملح ، هذا وسمو زيارة المريض ، ندي عليها اجر ، مايروحش بالك لبعيد .. سمعتك مليح وش قتلي هذاك النهار وفهمت مليح ماتخممش ، مانيش رايحة ندور بيك ولا نهدر معاك ولا نتعدا حدودي ، علابالي عندك زينب فحياتك مانيش هنا باش نفسد عليك ماتقلقش روحك .. ديرني شغل غير موجودة كيما كنت دايرني من قبل ..