أنا نهاية قصتك (باللهجة الجزائرية)

♡ بارت 40 ♡

[ مارية ]

حتى نسمعو الدقديق فالباب .. ناض بهاء فتح الباب ، حتى لحقنا صوت الانسان لي جا عندنا .. دارت نيرة خزرت فيا وجهها كحل وزيرتلي على يدي ، طل بهاء من الباب من وجهو باين بلي بلي ماهوش فرحان وقالنا وهو يخزر فينا حنا زوج ..

بهاء : جا باباكم ..

خزرو فينا كامل ، وانا ونيرة نضنا وخرجنا لعند الباب وورانا خرجو كامل .. لقينا بابا عند الباب واقف يخزر فينا بخزرات يحرقو ..

[ نيرة ]

بابا : على سلامتكم ا سيدي ، هايا معايا نهدر معاكم

نضال (قرب وقف قدامنا) : ماعندهم وين يروحو

بابا : جابلي ربي هدرت مع بناتي مشي معاك

جا نضال رايح يهدر مي انا درتلو يدي قدامو باش يسكت ..

نيرة : معليش تهدر هنا بابا ؟ الناس كامل علابالهم بحكايتنا

بابا : دقيقة نهدر معاكم مانيش رايح ناكلكم

مارية : مانجيوش ..

بابا نسف شغل يكالمي روحو ، اول مرة نشوفو حايب يحكم الغضب تاعو علينا ، باسك مالف حاجة تاع والو يتقلق ويقلب علينا الدار ..

بابا : هكدا تروحو لالمانيا وماتقولوليش ؟

تخلعنا قاع شكون قالو هذا ؟!

نيرة (عاقدة حواجبي) : شكون قالك ؟

بابا : عندي معارفي مايهمش .. وانا مانيش باباكم باش تروحو وماتقولوليش ؟ يماكم هاذيك كانت مرتي واحد النهار ، ماقلتوش نعطيو لبابا حقو تاع الورث ؟ ماخممتوش فيا وقلتو بابا تعب وشقى على جالنا ؟

كنت نخزر فيه حرفيا مشوكية ، هاذ الشي جا على جال الدراهم وانا راني نقول كيفاش جا حتى لهنا وطيح يروحو وحوس على بناتو ..
ضحكت بسخرية ووجيعة في نفس الوقت ..

نيرة : بابانا ؟ مازلت تقول فيها ؟ رجعت تشوف روحك بابانا دوكا ؟ السنين لي جازو ونتا شايفنا كلبات عندك فالدار وين راحو ؟ دوك على جال زوج دورو رجعنا نبانو عيباد وبناتك ، ايه عندك الحق ، هكدا الطمع ولا مكاش

خزرو فيا كامل مخلوعين وبابا كثر منهم ، عينيه وساعو وقريب يسوطي عليا يشرب من دمي .. ايه زيدو تخلعو زيدو ، رايحين تبداو ان شاء الله تشوفو نيرة جديدة ، نيرة وحدخرا ، لي ماهيش رايحة تزيد تسكت على الظلم والحقرة لي عاشتها و كبرت معايا ، نيرة رايحة تتبدل .. راني رايحة ندير وش انا نحب ووش يريحني ، رايحة نسمع لكرامتي مشي لعقلي ومشي لقلبي ، ولي يعفس فيا نعفس فيه ولوكان نعرف نطيح القدر قاع .. كل حاجة عشتها وجزت عليها ماكنتش في باطل ، كانت حروب كنت نعيشها باش نرجع اقوى ونرجع صلبة وقاسحة و واحد مايهزني ..

نيرة (قربت عندو شوية) : واش ؟ تخلعت كيفاش رجعتلك ؟ والفت نيرة مسكينة طرف طرف ، اضربها ، ابزق عليها ، سبها ، ديرلها كلش وماهيش رايحة تتحرك ، تقول حاضر وتسكت .. بصح دوكا خلاص خلاصو هاذوك اليامات ، خلاص ..