أنا نهاية قصتك (باللهجة الجزائرية)

♡ بارت 5 ♡

***بعد سمانة***

[نيرة]

جازت السمانة هاذيا جحيم .. الشغل فالدار محبش يخلاص ، رجليا رشااو وطابو .. كل يوم نبات نمسد فيهم ..

نضت الصباح ..
لبست غوب تاعي وخيماري ، وصليت ووجدت فاليزتي ، درت فيها غوب وحدة ، باسك هذا وش نسعا ، ياخي الدوزيام راني لبستها .. وزوج بيجامات ، هذا وش عندي اصلا .. والباسكات المقطعة كنت ديجا لابستها ، وزدت حطيت خيماري الدوزيام فالفاليزة تان والمشطة وال brosse à dents.. هاذو هوما قشي وجهازي يا عالم ..

مارية كانت قاعدة قدامي وتبكي .. تاع الصح راح نتوحشها ، وزيد دوك رح نخليها وحدها مع الشيطان ، ومعلاباليش اذا ممكن نتلاقاو ولا لالا .. نضت وعنقتها وبستها وبكينا شحال في حضن بعضنا .. ومن بعد رفدت الفاليزة وحبطت للتحت .. لقيت انس وبابا واقفين ، عنقت انس وسلمت عليه وبكينا حتى شبعنا ..

خزرت فالدار لي معمرة ذكريات حزينة وقاسية عليا وتنهدت .. خرجت مع بابا ورحنا للبلدية .. غير لحقنا لقينا ربعة رجال لتم .. يعني حد الدوك معلاباليش شكون السيد لي نتزوج بيه ..

دخلنا عند المير ، واخيرا جا قعد معايا واحد ، مالا هذا هو كابوسي الجديد لي رح يخلف هدايات .. من شهادة الميلاد شفت بلي عندو ثلاثين عام ، عندو لحية خفيفة وشعرو كحل ، وعينيه ماغون ، يعني شكلا لاباس بيه ، ما فيه ما ينعاب ، الحق يتقال ..

المهم ..
عقدنا ، وخلاص دوكا ، السيد هذا لي عرفت اخيرا اسمو ، يونس ، رجع راجلي وانا مرتو !! مبارك نيرة راكي ندفنتي ونتي حية .. يعني دوك رح نخوض الجولة الثانية من العذاب بعدما جزت على جولة الشيطان ..

غير خرجنا ، خزرت فبابا لقيتو راح للطونوبيل تاعو وديجا ديمارا ، ما خسرش عليا حتى كلمة .. ايه معليش ..

درت خزرت فيونس ، لقيتو يخزر فيا ..

يونس : هايا ..

رفدت الفاليزة ، ودرتها من اللور وركبت معاه وانا قلبي يخبط .. اول مرة نكون قريبة لراجل هكدا ..

يونس : اسمعي .. فالدار كاين يما وبابا وخياتي ، نحبك تحتارميهم وديريهم فوق راسك .. فهمتي ؟

درتلو براسي بمعنى ايه ..

يونس : وانا كي نهدر منحبش نكثر الهدرة ونعاود ، نحبك تسمعيلي وديري وش نقول ، والراس الخشين ما يخدمش معايا ..

درتلو براسي ايه تان .. بسم الله ، رانا بدينا .. من اللول ما كنتش مرتاحتلو الانسان هذا ، واحساسي كان في بلاصتو ..

لحقنا للدار ، كانت فيلا كبيرة من ربعة تاع الايتاجات ، باينين ناس مرفهين .. بيان سور هدايات هذاك هو الهدف تاعها ، ترميني لناس كيما هاذو باش هي تدي الدارهم والصوالح ..

دخلنا وانا قلبي يخبط .. بين ليلة ونهار رح نعيش مع ناس جداد ، منعرفش اذا ملاح ولا لالا ، وزيد نتحمل مسؤولية كبيرة فوق ظهري .. ربي يكون معايا ..