صدفة ... ثم نصيب

البارت 27

مساء الخير ...

قناة قصه صدفه:
٥٤١

مرت الأيام واجه يوم الأحد و رجعت لدوامي .. رند كانت بالاستقبال لأن طول أيام رجعتي ما أجتني بس خابرتني تحمدتلي بالسلامة ..

الي صار بيني وبين ذوالفقار ما سولفته لأحد أبد ليش ؟ لان جنت خايفه يلوموني .. خايفه يصير الحق مو بجانبي خايفه أخسر دعم الناس الأحبهم وأهمهم بابا ..

الصبح أجي ويا الخط .. عمو أبو كريم بابا خابره وأتفق وياه .. يوصلني أول لان المحكمة أقرب من الجامعة والظهر أرجع ويا رند ..

ومن أرجع اتغده وأنام .. من بعد ما جان يومي فووول بالانشغال هسه صرت أنام .. هواي أنام .. أگعد العصر تدزلي رند قسم من شغلها بالمكتب يعني الشغلات الكتابية عليه واضبطلها المواعيد بالمفكرة وأصورهن وادزهن الها ..

بالعشرة ب١١ أكثر شي أنام .. أتخذت النوم هرب .. بطلت أنتظر منه أتصال او رسالة .. أمي بدت تضايقني ع گعدتي يمهم .. وصارت تسأل شو ماشوفج تخابرين زوجج ..

وأتحجج يوميه عذر .. أتواصل ويا سما هواي وأخذ معلومات عن ذوالفقار .. وهي هم تاخذ معلومات مني اله هيج احس .. ومن كثر اسألتي صارت تجاوب بدون متسأل ليش لان أتوقع جواب سؤالها مال ذاك اليوم .. أنتوا متزاعلين .. صار واضح جوابه .. وكلامي ويا سما يساعدني بأعذاري لامي ..

٥٤٢

بابا ساكت .. يراقب بصمت .. أحس نفسي دااذبل .. حسيت بذلة .. حسيت بنفسي تحت رحمته .. شكم مرة كتبتله رسائل انو مشتاقتله او أستفقده .. شكم مرة أعتذرت عن الي صار .. كان يشوف وبس .. ابد ميجاوب .. هو هم أتخذ وضع الصمت ..

حبل الكذب قصير .. ويمي أقصر .. واحس حبل ملفوف ع ركبتي ويوم بعد يوم يضيق أكثر ويخنكني .. ما أكدر احجي لأحد ومااعرف شسوي ..

حتى فرقد شكم مرة سألني عن ذو الفقار .. وأكوله يطول وعنده شغل بين ميسافرله أزهر يلا ..

يمكن مر شهر وطفح الكيل .. حطيت رند وحجيتلها كولشي ردة فعلها جانت خليط بين لامتني ع غلطتي وبين واستني ..

اوك هي فضفضة صديقات بس جان لازم أمسح كولشي وختمت كلامها أنو الحمدلله من تمم زواجنا حتى لو بالطريقة الي تم بيها بس هذا جان افضل وسألتني سؤال غريب ..

كالت .. أنتي شتريدين لان أثنين متزوجين وعادي صارت مشكلة بيناتهم والرجال بلحظة عصبية قفل ع الطلاك زين واني ؟؟

نصحتني اعتذر وابرر بوقتها دزيتله رسائل اعتذار وتبرير يمكن للمرة الالف

٥٤٣

المسألة جانت عند ذوالفقار اتوقع مسألة كرامة و و رجولة مو غلط بسيط بين ٢ متزوجين ..

شرحت لرند شنو كالي أخر مرة .. گالت حقه .. بس أحنه مبتعدين من شهر والزمن كفيل بأنو ينسي ويطيح الحطب هو يحبني بس ليش هالمرة ما سامح ؟