صدفة ... ثم نصيب

البارت 12

صدفه ...ثم نصيب

روسكان الجبوري

البارت 12

رَجَفَ الفُؤادُ أمامَ حُسنِكِ مِثلَما ،
رَجَفَتْ بِكَفِّ الثَامِلينَ كُؤوسُ 🌾💚

٢٠٦

أجانه أزهر بسيارته حتى يرجعنه للبيت...
صعدنه بالسيارة ... هو صعد بالصدر و أني وراه وماما وخاله بصفي...
ظلت عينه عليه بالمرايا الجانبية.. جنت هادئة ونوعاً ما ضايجة ... مرات أحس بتأنيب الضمير ومرات أحس كولشي بذوالفقار ينرفزني أو هو يتقصد يسوي اشياء تنرفزني...

كلما تصير عيني ع المرايه الجانبية اشوفه يباوعلي.. وصلونه للبيت أول .. ماما عزمتهم يدخلون ويتعشون ماقبلوا ان شاءالله الجايات هواي...

النيشان بقى يمهم هيج ماما طلبت .. علمود يقدموه بالعقد ويلبسونياه..
سلمت ونزلت... جان مبين عليه مطنگرة...

بس دخلت للبيت اتلگتنه سماهر استجواب... سؤال وره سؤال وماما تجاوبهه لأن اني جنت مدري شبيه معقوجه...

رادت تشوف نيشاني گالتلهه ماما بقيناه يمهم..
التفتتلي...
_شنو أخذتي تخم لو فرط ورهمتي؟
_تخم
_ماصورتيه؟

٢٠٧

_لا... راح من بالي...
_لكن شبيج هيج مطنگرة؟
_ماكو شي تعبانه...
_شنو افتريتو كثيغ ؟
_لا...
_لكن منين التعب؟
_شحجي وياهه بله هاي غير من الدوام للسوك والبارحه منايمه هواي...
_هااا....

ماما ظلت تحجيلهه كولشي بالتفصيل الممل...
أني صعدت لغرفتي...
_لحد يصيحني ع العشا... راح اسبح وابدل وانام..
ماما ردت عليه...

_باجر أخذي اجازة هم ياله نلحك نكمل شغلاتج..
_أداوم واكمل شغلي وبعدين أخذ اجازة...
_المهم حسبي حسابج باجر نروح للسوك..
_اوك..

صعدت..
وصلتني رسالة من ذوالفقار صورة نيشاني خاف أريد أشوفه لخواتي أو مرة أخويه ...
فتحت الصورة ومارديت

٢٠٨

بدلت ودخلت سبحت..
طلعت لفيت رأسي ونمت..
الصبح گعدت كالعادة للدوام..
لگيته دازلي مسج ثاني...
_صباح الخير... لاتنسين حلقتج..
غسلت وبدلت ولبستهه...

نزلت تريگت... بابا وصلني للمحكمه
الي شاف حلقتي من البنات باركلي وحتى الزملاء المحامين .. الكل متفاجئ ومصدوم شلون قبلت وشوكت انخطبت ...

سولفت لرند كولشي صار البارحة ساعه وياه وساعة وياي ..وكل شويه تضحك لان عبالك الصدمة كل شويه وجاي أحد يباركلي بس مصدوم...

خاصةً الشباب... صدوك طيف انخطبت وهي كل ميسألون هالسؤال تخرب ضحك...
لعد لو يدرون السبت زواجي شيگولون...

خلصت شغلي واخذت أجازة أربعاء وخميس وگلت بابا ياخذلي أجازة الزواج .... لان نوعاً بعد ماشفت صدمتهم أستحيت أخذ اجازة الزواج وهمَ اصلاً مينطون غير أسبوع واحد اجازة الزواج..
بعدين نشوف شلون يرهموهه علمود أجازة سفري