Unicode -
" သေချာရဲ့လား "
" သေချာပါတယ်..
သွားတော့ ဂျော့ရှ် "
အဖေတူအမေကွဲ ညီလေးက
သူ့ကိုတော်တော်ဂရုစိုက်နေတော့
လက်ဖျံက ဆယ့်တစ်ချက်ချုပ်လိုက်ရတဲ့
လက်တစ်ဝါးစာဓားကွဲရာက ဘာမှမဟုတ်တော့သလို..
" မီလန်ကိုပြန်လိုက်ခဲ့ပါ "
" တော်ပါပြီ
ငါသက်သာရင်ပြန်လာခဲ့မယ်
ဒီတလောတော့နားချင်သေးတယ် "
" ဒါဆိုလဲ..
စိတ်အေးလက်အေးနားပါ "
ခေါင်းတချက်ဆတ်ပြပြီး
မျက်စိရှေ့ကပျောက်သွားတဲ့ ကျောပြင်အဆုံး
ဘေးကပ်လျက်က ပြတင်းကို လှမ်းကြည့်မိတော့
သံလွင်သီးတွေအတန်းလိုက်စီရီစိုက်ထားတဲ့
အစိမ်းရောင်အခင်းကြီးက မျက်စိတဆုံးလိုမျိုး..
မီလန်တို့ရုမ်းတို့က မိုးထိမတတ်
မြင့်မားနေတဲ့ ဆေးရုံတွေရဲ့ ကောင်းမြတ်မှုတွေဟာ
ဒီလိုတောရွာဒေသလေးရဲ့ကျန်းမာရေးစင်တာလေးမှာ
ဘယ်လိုများရနိုင်မတဲ့လဲ
လိုအီ သဘောပေါက်ပါတယ်။
ဒါပေမဲ့ မြင်ရတဲ့ ရှုခင်းကိုက
တစ်ဘဝလုံးစာစွဲမှတ်ထားဖို့ လုံလောက်နေတာ..
တက်စကန်နီရဲ့အောက်တိုဘာလဟာ
အီတလီမှာ အလှဆုံးလို့ တင်စားရတဲ့အထိ
ဝင်ခါနီးနေမင်းနီနီက
သံလွင်ခင်းကြီးထဲ ဖြာကျလို့
မျက်လုံးထဲ တည့်တည့်လာစူးတဲ့နေရောင်ဟာ
မှန်ပြတင်းကိုဖြတ်လို့ နွေးမြမြအသွင်ဆောင်တယ်။
" တက်စကန်နီကို အခုမှရောက်ဖူးတာလား "
ရုတ်တရက်ထွက်လာတဲ့အသံသြသြကြောင့်
ခပ်မြန်မြန်သတိကပ်လိုက်မိတယ်။
အီတလီ က သိပ်လှမှန်း
ဒီနိုင်ငံမှာကြီးပျင်းတဲ့သူ့လောက်ဘယ်သူများ
ပိုသိနိုင်မတဲ့လဲ။
ခုနကမြင်ကွင်းထဲမှာ
ပြတင်းနားတိုးလာတဲ့ အရိပ်ကလေးတစ်ခုက
ကာကီရောင်ဘောင်းဘီကို အင်္ကျီအပြာရောင်လက်ရှည်
တံတောင်ဆစ်နားပင့်ခေါက်လျက်သားနဲ့
သူတစ်ဦးတည်း ခိုလှုံနေတဲ့ နေအလင်းကျရာနေရာကို
တစ်လှမ်းချင်း တိုးဝင်လာတယ်။
