အချိန်ခဏတာလောက် ငါ အိပ်မွေ့ချခံလိုက်ရသလိုပဲ။ ပြန်ပြီးအသိဝင်လာတဲ့အချိန်မှာ အချိန်ကာလတစ်လျှောက်လုံး ပြောခဲ့ကြတဲ့ ပုံပြင်ကိုပြောင်းလဲမိသွားပြီထင်တယ်။မင်းသမီးက နဂါးကိုပြန်ခိုးတယ်ဆိုပြီး ပြောင်းသွားပြီလေ။
အတော်လေးခရီးရောက်ပြီးချိန်မှာ ငါ နှေးကွေးတဲ့နဂါးကို လှည့်ကြည့်လိုက်မိတယ်။ အဆုံးမှာတော့ သည်းမခံနိုင်တော့ဘူး။
“ နင် ဒီနားလာခဲ့ ! ”
နဂါးလေးက သူပြေးနိုင်သမျှ အားကုန်သုံးပြီး ငါ့ဆီပြေးလာတယ်။
“ အစ်မ …… အစ်မကြီး ”
ငါလည်း ကြမ်းတမ်းစွာ ဆောင့်ဆွဲပြီး ကြိုးကိုဖြတ်ကာ နဂါးလေးရဲ့ခါးကို ငါ့လက်မောင်းတွေကြားသွင်းပြီး ကောက်မလိုက်တယ်။
တကယ်ပါပဲ !
သူက အရမ်းပေါ့တာပဲ !
ပြီးတော့ နုလည်း နုညံ့သေးတယ် !
အိုကေ... သူ ငါ့ကိုမသယ်နိုင်ဘူးလို့ပြောတာကို မေ့ထားလိုက်ပါတော့မယ်။
နဂါးလေးက အံ့သြတကြီးဖြင့် သူ့ပါးစပ်ကို လက်လေးနဲ့အုပ်ကာ နားရွက်လေးတွေကလည်း နီရဲလာပြီး အထစ်ထစ်အငေါ့ငေါ့နဲ့ပြောတယ်။
“ အစ် …… မ …… အစ်မကြီး ခင်ဗျား ဘာလုပ်တာလဲ။ ”
ငါ သူ့ကိုချီရင်း ခြေလှမ်းကျဲကြီးနှင့် လွှားခနဲခုန်ကာ အရှိန်မြှင့်လိုက်ရင်း ပေါ့ပေါ့ပါးပါးပဲ ပြန်ဖြေလိုက်တယ်။
“ နင်က အရမ်းနှေးတာပဲ။ အဲ့ဒီတော့ နင့်ကိုချီပြီး လျှောက်ရတော့မှာပေါ့။ မင်းသားက ဘယ်မှာရှိနေလဲဆိုတာ နင်သိလား။ ”
နဂါးလေးက လမ်းကြောင်းတစ်ခုကို လက်ညှိုးထိုးပြတယ်။
ဆန့်တန့်ထားတဲ့ သူ့လက်ချောင်းလေးတွေကို ငါကြည့်လိုက်မိတယ်။
လက်ချောင်းလေးကတောင် နှင်းလိုဖြူဖွေးနုညံ့ပြီး သွယ်လျကာ ဖြောင့်တန်းနေတယ်။
သူ့ကိုသယ်ထားတဲ့ ငါ့လက်ကိုငါ ပြန်ငုံ့ကြည့်လိုက်မိတယ်။
……
ထားလိုက်ပါ... ကြည့်မနေနဲ့တော့။
နဂါးနဲ့ လူသားတွေကြားမှာ ကိုယ်ပိုင်အားသာချက်တွေရှိကြတာပဲ။ မတူတာကိုယှဉ်နေရင် စိတ်ပျက်စရာတွေပဲ ရှိလာမှာပေါ့။
နဂါးလေးက တီးတိုပြောတယ်။
“ ငါတိုင်းပြည်တစ်ခုသိတယ်။ သူတို့ဆီမှာ မင်းသားတစ်ပါးရှိတယ်လို့လည်း ကြားဖူးတယ်။ ”
ငါ စိတ်ကိုအသင့်ပြင်လိုက်တယ်။
“ ဒါဆိုလည်း အဲ့ဒီတစ်ယောက်ပေါ့။ ”
နဂါးလေးကိုသယ်လျှက် ခြေလှမ်းကျယ်ကျယ်လှမ်းကာ လမ်းအခြေအနေကို စုံစမ်းလိုက်တယ်။
“ နင် မင်းသားနဲ့သိလား။ ”
နဂါးလေးက ခေါင်းခါတယ်။
“ မသိဘူး ”
“ ဒါဆို သူ့ကချောရဲ့လား။ ”
“ ချောမှာပါ ”
နဂါးလေးက ဒီစကားပြောရင်း နည်းနည်းရှက်ရွံ့ရွံ့ဖြစ်သွားတာကြောင့် ငါမေးလိုက်တယ်။
“ ဘာဖြစ်လို့လဲ။ ”
“ မင်းသားလေးက ဝတ်စုံလှလှလေးတွေဝတ်ရတာကိုကြိုက်ပြီး ဆံပင်ကလည်း အရှည်ကြီးပဲတဲ့။ တစ်ခါတစ်လေ ပန်းပွင့်လေးတွေကိုကြည့်ပြီး ငိုတတ်သလို နုညံ့လွန်းလို့ ပဲစေ့လေးပေါ်မှာ အိပ်မိရင်တောင် မသက်မသာခံစားရတယ်တဲ့။ ”
သူက ဆက်ပြောတယ်။
“ အစက ကျွန်တော် အဲ့ဒီတိုင်းပြည်ကိုသွားပြီး သူ့ကိုဖမ်းဖို့ စီစဥ်ထားခဲ့တာ။ ”……
ငါ့မျက်နှာက ခံစားချက်မဲ့သွားပြီး နောက်ပြန်လှည့်ကာ ဦးတည်ရာကိုပြောင်းလိုက်တယ်။
နဂါးလေးက ငါ့ကို အံ့သြတကြီးနှင့် မေးတယ်။
“ ဘာလို့ဆက်မသွားတော့တာလဲ။ ”
“ ဘာမှမဖြစ်ဘူး... တခြားမင်းသားတစ်ပါးရှိတဲ့နေရာကို သိသေးလား။ ”
YOU ARE READING
အတင်းအဖျင်း! အရှက်မရှိတဲ့ မင်းသားနဲ့ နဂါးတို့အတွဲ ✔️
FantasyTitle Gossip! The Prince and the Dragon, That Shameless Couple အတင်းအဖျင်း! အရှက်မရှိတဲ့ မင်းသားနဲ့ နဂါးတို့အတွဲ အတင္းအဖ်င္း! အရွက္မရွိတဲ့ မင္းသားနဲ႕ နဂါးတို႔အတြဲ Author 元甜 圆甜 English Translator Sleepy Potato Status in 14 Chapters +1 Extra (Comp...