أريد رجلآ

ج١٠

أكو أشياء متحبها بحياتك وأول مرة تعتقد ان هم وحمل ومشاكل بس بعدين تحس ان هذا الشي ماتحبه او حطيت كل توقعاتك السيئة منه هو مصدر سعادتك وانسك بالحياة..

جنت ماخذه موقف من أبوية ومن البيت كله مااعرف الوراثة ورثتها من أمي لمت تزعل يصير التحديد عالكل تم الغضب عليكم اليوم واني راجعة بالطريق واني عندي نظام بدماغي كانو مفكرة يوميا اكتشف اشياء جديدة تعلمت اليوم ابدا مااحكم على احد اذا مااسمع منه وصار شهرين تقريبا اني مااحچي ويا الكل ع گد طراطيش حچي ..

وتملكني الخوف لأن امي توفت ومكدرت لا اودعها ولااستسمح منها ودائما اوصي الكل انو الزعل والغضب ممكن يخليك تفقد احبابك وبقلبهم عليك بالنهاية هاي أقدار ..

رجعت للبيت يوميا افوت بدون سلام ولطيفة الي هي ام جوان يوميا تسالني تريدين غدا تريدين عشا واني ماارد عليها ..

اليوم فتت كالعادة والبنية هم سالتني جاوبتها بحدة وبعدين تندمت اسلوبي محلو وياها ..

اي صبيلي ...

راسا فرحت ..وصبتلي شمرت الجنطة وغسلت أيدي ودا احضر وياها ..

لطيفة: گعدي ..خل اصبلج اني اكيد تعبانة انتي ..
صابرين: ام ...شسمها بنتج..

لا ماعندي اولاد..

صدگ لعد ليش ابوية يسميج ام جوان ..

لقب مثل بقية الالقاب ..

لعد شسمچ ..اني اريد اصيحج بااسمج لأن مو مال اگلج خالة ولااحد ياخذ مكان ماما..

لا ..طبعا ..الله يرحمها ..

الله يرحمها ..
يلة تعالي گعدي تغدي ..
صابرين : شنو مرح تتغدين لو متغداية ..
لطيفة: لا ..بعدين ..
وليش بعدين گعدي خ ناكل سوا لو تنتظرين أبوية يجي..

لطيفة: لا رح يتأخر ..

صابرين: لحگ يمل ..دكعدي ..اكلي وياي احسن ماكاعدة مثل البومة وحدي..

لطيفة : مااااشي ..(بفرح)
لحظة صمت ..وكلام يريد يطلع ..

انتي أكيد تكرهيني ؟

وليش اكرهج ..

لأن متزوجة ابوج ..

هاي انتي گلتي متزوجة ابوية مو انتي جريتي من ايدة وگلتيلة تعال زوجني ..

لطيفة: لعد ليش مقاطعة الكل وضايجة مني أحسج..
صابرين: لطيفة اني ضايجة من نفسي لان امي ماتت ماراضية عني ودمعتها ع خدها ..

لطيفة: الله يرحمها ..ويجعل مثواها الجنة..
صابرين: أمين يارب ..عاشت ايدج يالطيفة نفسج طيب بالاكل صار جكد مماكلة اكل هيج براسه حظ من توفت امي والعوبات الفوگ من ورا خشمهن يطبخن ..

لطيفة: بالعافية ..اني بعد استلمت الطبخ ..
ويوميا اللي بنفسج كليلي اسويلج ..

صابرين: لطيفة ..كتلج انتي مالج علاقة اني ماضايجة منچ والله ماكو داعي تجامليني ..