مجنونتي نيار

42

حلم عيون تَوصيفك
لا أگدر اجيبك وكت ما اشتـاگ
لا أكدر امر ضيفك..
ولا أكدر اردّك من تجي بكيفك💙

_________________________نيار

سبحان الخلق بنيار شعور الأمومة
حركاتها وتصرفاتها مال ام عاقلة ومابيها اي خلل يعني مرات اذا انسة الحفاضة شوية تطول هي متعلمة من بيبيتها جم كلمة تخبصني خبص
...ماماااا تعاي بدلي عسوقة راح تسلهف

وغير عن هذا كلة لمن صدمتنة وهي تكول
...اريد ارضع عسق

طيناها الممة شمرتها صاح بيها وسام
...ليش شمرتيهاا تتجرثم
...مو ممة مو ممة منا
وأشرت ع صدرها

وهو انتفض بغضب ويحجي من عقلة
...انجبييي انتي منيلج حتى ترضعينهااا وتتوجعين وين تكدرين انجبي احسن

دارت عيونها مدمعة لعمتي
...بيبي حبابة اريد اسوي نفس ام قديرة
...ياهية ام قديرة
...ترضع سمورة منا اني شفتها وتعلمت اسوي لعابة بعدين عسق بنتي

ووسام يشيل روحة ويدكها حسيتها غيرة أكثر من كونها خوف ع نيار

لأن لاحضت بالفترة الأخيرة هواي زايدة غيرتة وتحفضة عليها وبعد ماعرف

بس هي ضلت معاندة وتبجي كالت عمتي ...بلا رغد خليها تجرب هسة تتوجع وتبطل تعوف هاي السالفة خاف تغافلنة وماتعرف وتختنك عسولة

اني هم حسيت الموضوع بي خطورة كلت خاف نيار وحدها تتمعمر أقلها تعرف ماتخنكها

بس وسام جان رافض بشكل قطعي ولمن ردنة نطلع صدر نيار صاح
...هووو شنو كدامجن مجد كاعد هنا ؟؟؟

...اي واذا كدامنا شكو ومجودي يطلع
...لا يابة مو حجي هذا مايصير
سكتتة عمتي تقنع بي طلع مجودي وقربنة عسولة ترضع ونيار ميتة فرح
...هاي العسق تتحرك احسن من لعابة بعد العب بيها احسن اي والله

وخلت كلوبنة توكع بكلامها
...يا ماما هاي مو لعبة شنو العب بيها
ردت بجدية
...الا عسق مو لعبة عسق بنتي اني جانت ببطني العب بيها سوة اني وياها

...ها يعني انتي وياها تلعبن بيها
...اي اي صحيح

عمتي صفكت أيد ع أيد ونيار ماهامها ولا حاسة بوجع ووسام محتقن ابد مايقبل ويصير صعب لمن الموضوع يتعلق بنيار

طلع من الغرفة وصفك الباب ماراضي واحنة بالنة يم نيار ونعلمها اهم شي خشمها طالع حتى ماتختنك وهي ماشاء الله حيل حريصة بشكل عجيب

دنكت باستها وحجت بحنية
...حبيبتي عسق شبعتي الو بعدج

بقت منتضرة جواب وماكو حجت بلطف
... عسوقة زعلانة وياي حبيبتي ؟

...يا زعل ماما بعدها عنونة ماتعرف تحجي
هزت راسها وهي تمشي أيدها ع راسها
...ميخالف اني اعلمها كلام