بحر الفيروز

صندوق الأمنيات

هابي عيييد كل عام وانتم بألف خير يا رب عساكم من عوادة يا حبايبي يا رب يبقى عيد سعيد عليكم وعلينا 😍💗💗💗

انا كنت قايلة هنزل اول يوم العيد بس قولت بما إن البارت كدة كدة خلصان هستنى ليه وقولت انزله ليلة العيد احلى 💗

عشان زمانكم نسيتوا هفكركم
وقفنا البارت اللي فات عند حدث التلج الاحمر وان مالك اتقدم لـ لينا ، البارت كان قافل على النقطتين دول 💗

يلا بسم الله خلينا نكمل بقى قراءة ممتعة يا رب 😍

*__________________________________*

ما ذُكِرَ مُحمَّدٌ ﷺ في عسِيرٍ إلاَّ ويُسِّر.💜

_________________

س/ ما هو تعريفك للنجاح ؟!

ج/ فمن زُحزح عن النار وأدخل الجنة فقد فاز وما الحياة الدنيا إلا متاع الغرور .💜

*__________________________________*

إذا سَرّها أمرٌ وَفِيهِ مَساءتي
قَضَيتُ لها فيما تُحبُّ على نَفسي .💜

_ العباس بن الأحنف "المحب اللطيف"💜

*__________________________________*

في منزل الحاج عوض

نهض العم عوض منتفضاً بغضب : ايه اللي انت بتقوله ده يا مالك ؟؟ انت مفكرني ممكن اجوزك بنتي ؟ ايش حال ماكنتش عارف انك بتحب واحدة تانية ؟؟

نهض مالك مردفاً بهدوء : آدي حضرتك قولت اهو ، ايش حال مكنتش عارف ؟ انا كنت بحكي لحضرتك كل حاجة بتحصلي في يومي وتفاصيل اللي بيحصل معايا ، حضرتك عارف اني معنتش بحب ندى ونسيتها ، كانت فترة وخلاص راحت لحالها ، وانا فعلا مش شايف اني ممكن الاقي احسن من لينا تبقى مراتي ، انا هبقى أسعد انسان لو حضرتك وافقت وهي وافقت

صمت الحاج عوض ناظراً لمالك بتفكير ، بالفعل كلامه صحيح ، لكنه يخاف أيضاً رغم هذا ، لا يخاف من أن يكون مالك يكذب عليه هو يثق به جداً بعيداً عن أي مشاكل حدثت مؤخراً ، هو يخاف أن يكون مالك لا يستطيع تحديد مشاعره ، يخاف أن يوافق على عرضه فيندم فيما بعد لكن ، هل لديه خيار أفضل من هذا على الأقل حالياً ؟ هو وابنته في وضع صعب ، لا يوجد مساحة للتفكير براحة ولا يوجد خيار في الوقت الحالي أفضل بالفعل من زواج لينا بمالك

لم يكن يتمنى أن يزوّج ابنته بهذه الطريقة ، مجبراً ولا خيار أمامه هو وابنته سوا الموافقة ، كأنهما مقيدان ، وهما بالفعل يُعتَبران كذلك .. لكن ، لعلّه خيراً ! من يدري ؟ يوجد خيرٌ دائماً في كل شر ، الله أرحم من أن يضعك في ابتلاء كله شر وألم لا نفع ولا استفادة ولا خير منه

تنهد الحاج عوض قبل أن يردف : سيبنا فترة نفكر يا مالك في الموضوع ده وبنتي تصلي استخارة وتاخد قرارها

أومأ مالك مردفاً : اكيد طبعاً ، بس انا حابب اوضح لحضرتك تاني .. انا مطلبتش الطلب ده بغرض اني احمي لينا بس ولا اصلح غلطي وخلاص ، ده لإني فعلا شايف اني هبقى محظوظ لو واحدة زي لينا تبقى مراتي وناسبت ناس طيبين وبيخافوا ربنا زيكو ، وانا هبقى أسعد إنسان لو هي وافقت