أنت لي (باللهجة الجزائرية)

❣️❤️

جازو اليامات البنات مع القراية و الرجال مع الخدمة . سامي راح يخطب سارة مي مزال مقاللهاش حاب يديرهالهاsurpris . أمير مزالو سيليباتار. و صوفيا عرفت بلي تحب جاد و بزاف مي متقدرش تقولو. و جاد سيبون فقد الامل من ان صوفيا تولي تحبو . اليوم جدهم دار حفلة في الشركة فليل . ناضت صوفيا على 1:30 تاع العشية . غير ناضت حبطت للكوزينة تجري لقات مرت عمها فوزية و مرت عمها الدوزيام بسمة .
- صوفيا: صباح الخير ❤️
- فوزية : صباح الخير بنتي .
- بسمة : صباح الخير. راكي مليحة؟
- صوفيا: حمد الله و نتوما ؟
- فوزية : نحمدو ربي .
- بسمة : نحطلك تاكلي ؟
- صوفيا: آخخ يا بسومتي شغول طليتي على قلبي . راني ميتة بالجوع . علاش منوضتونيش صباح ؟
- بسمة : جدك قالنا خلوها ترقد.
- صوفيا: آوااه انا نخاف منو . الهدات تاعو راهم غير يزيدو .
- فوزية : غير خافي .
حطت بسمة لصوفيا الماكلة و صوفيا بدات تاكل و تحكي .
- صوفيا : وين راهم اوخرين ؟
- فوزية : البنات خرجو باش يشرو لبسة .
- صوفيا: الكلبات. علاش منوضونيش؟
- بسمة : بلاك نساو .
- صوفيا : اوو ماما و عمتو مريم و كهينة ( مرت عمها اللخر) و بابا و عمومي وين راهم ؟
- بسمة : هادوك راحو يشرو كيفكيف .
- صوفيا: و نتوما علاش مرحتوش ؟
- بسمة : حنا عندنا لروب شريناهم جدد بصح ملبسناهمش. 
- صوفيا: مليح . يسما دوك انا راني وحدي .
- بسمة : وي . مزال جاد مخرجش برك . شوفي معاه بلاك يديك تشري .
ناضت صوفيا غسلت هاداك الطبسي و المغرف لي كلات بيهم و خرجت طلعت لشومبرتها . فتحت الخزانة و بقات تشوف ماعندها حتى روبة شابة . أيا خرجت راحت وقفت عند الباب تاع جاد و بقات تسيي كيفاش تحكي معاه .
بعد مدة طبطبت . فتحلها الباب . و قالها : وشنو . ؟
- صوفيا: جاد معليش تديني نشري ؟
- جاد : مانيش فارغلك . كاين الشوفور قوليلو يديك .
- صوفيا: أوكي . صحا . باي
راحت صوفيا زعفانة . زعفت كيفاش كان يحكي معاها . دخلت لشومبرة راحت غسلت وجها و بقات تحكي مع روحها في المراية .
--- صوفيا: جياحة هادي . و الله . رحت ليه كيما العباد و قالي لالا . دوك يشوف كان منخليهش فليل ياكل في روحو . دوك يشوف ---
راحت لبست

و خرجت راحت للشوفور باش يديها . 2 سوايع و هي تحوس . حتى وين لقات لاروب لي راهي تحوس عليها . دخلت لدار على 4 . راحت لشومبرتها ديراكت . دارت دوش الله الله و بدات تماكيي بلعقل . دارت مكياج خفيف و قعدت تستنا لحقت 7:30 لبست لاغوب . الحفلة تبدا على 8 مي هيا راح تروح روطار شويا . لحقت 8:00 حبطت كانت لابسة هكا 👇👇

لحقت للحفلة على 8:45 . غير دخلت تشوفو كامل الانظار عليها . حوست بعينيها على جاد لقاتو واقف مع جدها و باباها . راحت عندهم .
- صوفيا: هاي.
- الجد: راهي شرفت لالة مولاتي . وين كنتي ؟
- صوفيا: كنت فدار جدو .. طولت بسك ملقيتش شكون يديني نشري . و خزرت في جاد .
- كريم : معامن رحتي؟
- صوفيا: رحت مع الشوفور .
- كريم : راكي شابة .
- صوفيا: ايه عمبالي . ليوم نخرج مخطوبة .
-الجد : شكون لحمار لي راح يديك .
- جاد و هو يتمتم: انا هو لحمار .
- جاد : صوفيا معليش تجي معايا نحكو في عفسة ؟
- صوفيا: باينة .
راحت معاه لجاردان . غير لحقو شاف بلي مكاين حتى واحد . حتى لسق فيها و خزر فيها خزرة تخوف .
- جاد : واش راكي لابسة ؟
- صوفيا: روبة .
- جاد : راكي تسمي فيها روبة ؟
- صوفيا: ايه . روبة .
- جاد : شوفي صدرك كيفاش راهو يبان .
- صوفيا: مهوش يبان .
- جاد : و رجليك .
- صوفيا: جاد تعيش حبس . مقبيل قتلك ادا تديني نشري . وش قتلي . لالا منيش فارغ شغول . دوك بعد مام انا منيش فارغة شغول .
- جاد : صار هكا .
- صوفيا: ايه .
- جاد : مالا باش نقولك . سيبون . ديري واش تحبي . عييت منك . شحال من خطرة نقولك نحبك و نتي شغول حجرة . سيبون . و متزيديش دوري قدامي و لا بيا بسك راح نخطب و خطيبتي متحبش. 
- صوفيا قلبها وجعها في ديك الدقيقة .
- صوفيا: وقتاش درت بيك انا ؟ و زيد كي راح تخطب روح احكم في خطيبتك ماشي فيا انا . و بالباراكة عليك . لعقوبة لزواج نشاء الله .
و راحت . دخلت للصالة شافت مايا . راحت ليها سلمت عليها و منا و داتها بلاصة وحدها .
- صوفيا: مايا ندوموندي منك عفسة. 
- مايا : وي . واش كاين ؟
- صوفيا: شوفي كاش نص ساعة عيطيلي بالماسكي . و انا ندير روحي تخلعت و منا باش نروح لدار .فهمتي.
- مايا : ايه . مي علاش ؟
- صوفيا: منبعد كي تخلاص الحفلة ارواحي مع سارة لدار نفهمك . اوكي .
- مايا : أوكي . مي خوك زل
- صوفيا: اما واحد ؟
- مايا: لكبير.
- صوفيا: أمير. عندو بنتو عمرها عامين .
- مايا : خسارة .
- صوفيا: و مرتو ميتة .
- مايا : مليح .
- صوفيا: واقيل راكي معولة طيحي خويا ؟
- مايا : لا كتب ربي ايه .
🎬🎬🎬🎬🎬🎬🎬🎬🎬🎬🎬🎬🎬🎬 - صحا فطوركم 🌺❣️