أنت لي (باللهجة الجزائرية)

💘💘

جازو شهر على هاداك النهار و صوفيا تتفادا في جاد . ولات متحكيش بزاف . متضحكش بزاف . متخرجش بزاف . ولات الخدمة القراية الدار هدا مكان . مايا و أمير حكايتهم راهي تتطور غير بلعقل هي ولات تحبو مي هو دايرها شغل ختو قدام الناس مي واحد معمبالو الاحساس ديالو 😈 . و سامي و سارة ليوم خطبتهم . اما جاد بعد واش قاتلو صوفيا هداك النهار فالبيرو معرفش واش يدير .
ناضت صوفيا صباح على صوت الرافاي بعد دقائق ناضت بسيف بسك ليل كومبلي مرقدتش كانت تخدم . راحت دوشت . دارت شعرها طوماطيشة و لبست هكا 👇👇

دارت غيسيل و غوجالاف و هبطت لقاتهم ياكلو شربت شوية قهوة و ناضت .
- صوفيا: بصحتكم .
ولات هكا تاكل شوية و تنوض و تخليهم . مام هوما مولاوش يشوفوها بزاف . لوكان ماشي وقت الفطور و العشاء مايعرفوش ادا راهي حية و لاميتة . نولو للموضوع . راحت ركبت فالطونوبيل.
- صوفيا مع الشوفور: نروحو ل##### . ( لادراس تاع بلاصة)
بعد خمسة و خمسين دقيقة كانت لحقت دخلت و بقات تستنى في دالتها . شوية و دخلت .
- الطبيبة : صباح الخير .
جوبونس عرفتو بلي راحت للطبيبة النفسانية ديالها .
- صوفيا: صباح الخير .
- الطبيبة: راكي مليحة؟
- صوفيا: لالا مارانيش مليحة ڨاع . راني نموت بلعقل برك و واحد مراهو حاس بيا . حتى هو و مراهوش حاس بيا .
- الطبيبة : جاد ؟! صوفيا احكيلي .
- صوفيا تحكي و تبكي : راهو يقتل فيا بلعقل . واش راهو حاسبني منحسش ؟ راهو حاسبني بلا قلب ؟ حتى مور ما قتلو بلي نحبو محبسش الخطبة . كان صح يحبني كيما كان يقول كان حبسها . صح و لالا ؟ عييت والله غير عييت . كيما سييت ندير مقدرتش . شوفي حالتي كيفاش ولات على جالو . راني نبكي على جالو دم . كل يوم صباح يخزر في وجهي كي شغل انا والو بنسبة ليه . زعما صح انا والو ؟ زعما علاش راهو يصرالي هكدا ؟ ( البنات بيناتنا الحب بزاف واعر سيغتو كيتكونو تحبو بعضاكم مي تجي شغول عفسة في وسطكم و تفرقكم و لا كي يكون حب من طرف واحد بزاف واعر )
- الطبيبة : صوفيا متبكيش علاجالو . هو لي غلط كيما حبسش الخطبة.  و صح كان جا يحبك صح يحبسها . صوفيا انسايه و كملي حياتك . مزالك صغيرة و مزالت قدامك الحياة و الدنيا متحبسش عندو . مزالو كاينين عفايس يوجعو كثر منو . خمي فالناس لي عندك . الناس لي تحبك .
- صوفيا: هاداك هو البروبلام تاع الصح . معمباليش ڨاع شكون يحبني و شكون ميحبنيش ؟ منهار دخل هو لحياتي موليتش صوفيا تاع بكري . بدلني كومبلي . بدلي حياتي .
- الطبيبة : ولي صوفيا تاع بكري.  الطفلة لي واحد ميقدر يطيحها . هي لي طيحهم و زيد تعفس عليهم.  صوفيا كيما قتلك شوفي حياتك . و متكثريش من دواك .
شوية و خرجت صوفيا من عندها . راحت خلصت و حبطت للبحر كانت قاعدة على الرمل و تتفكر في روحها كيفاش كانت و كيفاش ولات . ساعة و هي قاعدة هكاك تخزر في الفراغ . شغول راهي وحدها . طف بدات تحكي مع روحها .
- صوفيا: شكون هو باش يرجعني كيما هكا ؟ سيبون صوفيا مدة و فاتت . كيما هو كيما غيرو . و جامي مراح تلقاي البنادم لي يحبك تاع الصح. دونك ولي لحياتك و اخطيك من الخرا و خاوتو.  بعدي على جاد بعد السماء و الارض . و دوك نوريلو كيفاش هادي خيرها هي عليا انا . دوك تشوف مسيو جاد .
ناضت راحت عند الشوفور قاتلو يديها للمول دير شوبينغ . دخلت و شرات كلشي عفسة مخلاتها.  شرات لبسة بكل أنواعها . الريحة . الماكياج . الجبات . كلشي . موراها راحت فطرت و راحت دير عناية للجسم ديالها . دربت فيها 2 سوايع . و راحت للحفافة قصتلها شويا من شعرها مالتحت و خدمتلها ضفارتيها تاع اليدين و الرجلين و دارت فارني كحل . منبعد راحت تتعشا برا . على 9 دخلت لدار هي رافدة نص صاشيات و الشوفور نص . دخلت للصالون قابلتها لافامي تحكي . غير شافوها سكتو نطق جاد .
- واش لالة كان بتي برا خير ؟ حنا معندناش بنات يدخلو فليل لدار . وين كنتي ؟
- صوفيا: احكم ف خطيبتك برك.  و متزيدش دخل روحك فيا . عندي بابا و خاوتي .هوما و محكاو والو جاي نتا تحكي.  و مدخلش روحك وين كنت و معامن كنت ؟ و تعيش متزيدش دخل روحك فعفايس ميخصوكش . ايه ماما منبعد ارواحي عندي نسحقك .
- سهام: أوكي .
طلعت صوفيا لشومبرتها و خلات جاد يغلي يعني كيفاش قدرت تحكي معاه هكا . طلعت حطت قشها فوق البونك . شوية و زدمت عليها سارة .
- سارة : وشبيك صوفيا؟ علاش حكيتي مع جاد هكاك ؟
- صوفيا: والو . جيست قررت بلي لازم نحبسو عند حدو مانيش لعبة باش يلعب بيها كيما يحب.  راني بنادم و نحس . كيما هو يحس انا نحس . كيما هو ينظر انا تان ننظر.  و دوك قررت بلي راح نحبسو و نولي لحياتي القديمة . صوفيا الضحايكية و المهبولة . لي ماتحب ما تخمم . و دوك قوليلي علاش جيتي ؟ ( حقا سارة و مايا عمبالهم بحكاية صوفيا و جاد)
- سارة : والو . جيست جيت نحكي معاك توحشتك.  عندنا بزاف محكيناش. 
- صوفيا: ايه صح . دونك نوضي خملي معايا هدا القش و نحكو في الوقت نفسو ..
- سارة : شوف مستغلة الاوضاع .
- صوفيا: ههههههه . نوضي و بلعيه .
ناضت سارة و بدات تفتح فالساشيات و تعلق فالخزانة. 
- صوفيا: ايه و وقتاش قرر مسيو سامي يجي يخطبك ؟
- سارة : معمباليش . قالي حكيت مع يماك و خوك و جدك بصح مزال باش نديرو الخطبة. 
- صوفيا: علاش ؟
- سارة : جدو قال مزال باش نديرو .
- صوفيا: دوك نحكي مع جدو و نقولو يديرها هاد السمانة باش الشهر الجاي تتزوجو . أصلا راكم طولتو بزاف .
- سارة : نو مزال باش نتزوجو . حتى وين يخلاص العام ديالي . عمبالك كي نتزوج مراحش نقدر نلتا بقرايتي و سامي فنفس الوقت. 
- صوفيا: وي .
بداو يحكو و يخملو حتى وين كملو.  راحت سارة لشومبرتها باسك عيطلها سامي.  و صوفيا كملت و راحت بدلت لبست بيجامة كحلة و بدات تقرا . موراها راحت وقفت فالبالكون . شافت جاد قاعد فالجنينة يتكيف . راحت دارت جيلي تاع صوف باسك راهو البرد و حبطت . خرجت للجنينة و دارت روحها شغول مشافتوش . شوية و حست بيه واقف موراها و نفسو السخون  يضرب في رقبتها و ريحتو تدوخ فيها.  صوفيا دارت روحها تخلعت دارت و بدات تحكي .
- صوفيا: بسم الله.  تخلع يا زح واش راك دير هنا ؟
- جاد : نتي لي واش راكي ديري هنا ؟
- صوفيا: جوبونس هادي جنينة تاع دار جدي يعني دارنا يسمى راني نتنفس في شوية هوا و نتا واش راك دير .
- جاد : نتكيف .
- صوفيا: اممم .
- جاد : راكي مليحة؟
- صوفيا: وي مليحة. و نتا ؟
- جاد : حمد الله نحمدو ربي .
- صوفيا: حمد لله   . و سكتت شوية و جات رايحة حتى وين تفكرت عفسة .
- صوفيا: تحبني ؟
- جاد : كيفاش ؟
- صوفيا: راني نسقسي فيك ادا تحبني ؟ تحبني جاد؟
- جاد : ساكت محكاش . معرفش واش يقوللها. 
- صوفيا: نظن بلي ديت الجواب ديالي . متحبنيش . وي بون وي .
طلعت و خلاتو ياكل في روحو . دخلت لشومبرة جات راح تبكي حتى وين تفكرت بلي مالازمش تبكي علاجالو سوو راحت طفات الضو و تكسلت فالبونك . شوية و حست بالباب يتفتح.  دارت روحها راقدة . حتى وين شمت ريحة خلاتها تعرف شكون لي جا ليها . حست بيه يحط يدو في وجها و يمشي فيها على عينيها نيفها شواربها شعرها . و هو يحكي
- جاد : نحبك صوفيا معرفتش علاش مقدرتش نقولهالك التحت.  مي حكمني الشوك.  نحبك ❣️ نتي هيا كلشي عندي .و مدابيا نصلح كلشي بيناتنا مي اعطيني فرصة برك .  و باسها من شواربها بوسة خفيفة و بوسة في راسها و خرج حست الباب تغلق . ناضت تجري راحت للدوش تشوف في روحها و تتحسس في شواربها . ولات لبونكها قاعدة تضحك كيما المهبولة و توشي فشواربها خطرة على خطرة .
🎬🎬🎬🎬🎬🎬🎬🎬🎬🎬🎬🎬🎬🎬🎬 هاي ڨايز .
كيفاش راكم ؟
انا مليحة حمد الله.  مي شوية ماشي بزاف . و الله تهنيت من الفروض خرجلي القاطو تاع العيد و الميناج . بزاف و الله .
المفيد البنات راني كتبتلكوم 1179 كلمة . بزاف 🤣 .
ايه البنات احكيولي كاش قاطو . كاش ميناج؟
صحا صحوركم ❤️ و فطوركم تاع غدوة ❣️
و زيد نحبكم بزاففففف ❤️🌺 .
و تعيشو فوت و كومنتار بلييززز 😘😘