في منتصف شهر ديسمبر بداية اجازة الشتا .. طلعت حمده من المبنى الخاص فيها ودخلت المبنى الرئيسي مع ولدها احمد وشافهم حمدان ولاحظ ان حمده لابسه عباتها
حمدان : هاا وين ؟
حمده : بنسير ياس مول احمد يبا كيدزانيا
حمدان : تريونيه انا بوصلكم
حمده : ما يحتاي ما نبا نكلف عليك دقيت ع الدريول
حمدان : مافيها كلافه انا بوصلكم
حمده : وينها حمده ؟ بنشلها ويانا
حمدان : حمده عند هل امها
سار عنهم حمدان اما حمده نزلت لمستوى احمد بتلبسه جاكيته لكنه تم يعاندها ما يبا يلبسه وشرد طلع الحديقه .. في الحديقه اليد احمد و اليده فاخره يتقهوون وحولهم عيالهم واحفادهم واحفاد عيالهم .. ياهم احمد ومن شاف يده احمد ركض صوبه ولوى عليه واليد احمد متفاجأ من هالحركه
اليد احمد : سيف ؟ ولديه سيف ؟
مسح على راس احمد وحس ببرودته .. حمده واقفه وراهم تراقب حركات ولدها بصمت
اليد احمد : شيما الولد بردان دخليه داخل
قربت حمده وشلت ولدها لبسته جاكيته ودخلت وعيونها غرقانه دموع ، اليد احمد بعد وفاة حفيده سيف وايد تعب ضعفت ذاكرته وصار مقعد
في شركة بو حامد .. طلع حمد من مكتب حامد متهندق ولحقته شما
شما : شي مستوي !
حمد : عندنا نقص موظفين والاخ حامد مب راضي يقبل يوظف حد مادري شو مشكلته
ياه واحد من الموظفين في ايده ملف
الموظف : استاذ حمد لو سمحت ممكن تشوف هالملف
خذ حمد الملف يشوفه
حمد : شو ملفه هذا
الموظف : الحسابات فيها مشكله ومش عارف وين المشكله بالضبط
سكر حمد الملف وحطه في يدين الموظف
حمد : انا مايخصنيه في هالشغله .. تدل مكتب حامد ؟ تفضل .. هذي شغلته
بعد ما سار عنهم الموظف .. فتح حمد تلفونه يشوف الساعه وابتسم وهو يشوف صورة ولده في الخلفيه
حمد : يالله يارب انك ما تطلع على سميّك
وصلهم صوت زعيج حامد الي محتشر على الموظفين
شما : آمييين
توجه كل شخص لشغله قبل لا تحل عليه السلطه .. نرجع للعايله الكريمه .. اليده فاخره مستمتعه بالمنظر الجميل في الحديقه محد عنها الا شيخه تسحب العلوم
شيخه : ويه الليل مالها حس اليوم
اليده فاخره : مسافره الله فكنا منها
قصدهم لولوه حرمت حامد .. لولوه انسانه انانيه تبا كل شي لها بروحها .. ابوها له مكانه عاليه في المجتمع و حامد خذها كـ وسيله عشان ابوها يتوسط له في شغله .. في بداية زواجهم كانت تحاول تقنع حامد انه يطلع اهله من القصر تبا القصر يكون لها بروحها او ياخذلها قصر بروحها وكان رافض الفكرتين رفض تام فصارت تضايق اهله عشان هم بنفسهم يطلعون بس حامد وقفها عند حدها وتزوج الثانيه لاكنها تمردت اكثر وصارت تسوي مشاكل لزوجته الثانيه
