في قروب البنات على الواتساب
شيخه : حمدوه بنركب خيول ولا حامد مابيخلينا ؟
حمده : استأذنت منه قال عادي بس المدربه مابتكون موجوده
شيخه : عادي ما نحتاج مدربه
شما : حمد حالف عليه ما اركب خيل
شيخه : احسن عيل قد شفتو عاقل تركب الخيل بدون سرج وهي حامل !
مهره : متهوره الاخت
شما : تراكم وايد مبالغين ماصار فيني شي
شيخه : بنات فخاطريه هوت جوكلت حد بييب الاغراض نسويه في العزبه ؟
امنه : انا باييب بسويلكم هوتجولكت سويسرا
حمده : وانا سويتلكم جيز كيك بالبلوبيري
مهره مطرشه صورة بنتها مديّه
مهره : لو هالدوده هب مريضه جان سرت وياكن
حمده : حياتي تقوم بالسلامه انشاءالله
مهره: الله يسلمج
شيخه : فكه بنرتاح من صياحها
مهره : يعلج تفدييينها وتفدين صياحها
شيخه : وع
سكرت امنه تلفونها وحطته عالجرج وشلت ولدها وسارت قسم اخواتها في مبنى حامد .. اخوات امنه لهن قسم خاص فيهن يتكون من ثلاث غرف نوم وصاله ومطبخ تحضيري .. في صالة القسم .. عقصت امنه اخواتها مي والمها ولبستهم ملابس مرتبه
امنه : نيلا اذا بتركبين ويا البنات الخيول لبسي بنطلون تحت الكندوره
نيلا : نزين
امنه : لبسن جاكيتاتكن وسيرن مع يدوه
المها : ليييش ؟ وانتي بتسيرين مع منو ؟
امنه : انا بسير ويا حامد
المها : بسير معاكم
امنه : يصير خير انتو الحين تجهزو انا بسير اجهز عامر
ردت قسمها بتبدل ملابس ولدها ودخل عليها الغرفه حامد وشكله معصب
حامد : طلعيليه كندوره نظيفه و الجاكيت الاخضر
ودخل الحمام .. ونفذت امنه اوامره وبعدين بدلت لولدها .. طلع حامد وشاف امنه تجهز شنطة عامر
حامد : وين الضو ؟
امنه : الحين بسويلك
حامد : بسرعه .. ( اشر على شنطة عامر ) ولا تعبين روحج تراكم هب سايرين مكان اليوم .. الجو بارد ماريد ولديه يمرض
وبدون اي رد طلعت امنه من الغرفه وهي ميته قهر وسوت لو الدخون ودخنته وبعد ما طلع كتبت للبنات انها ما بتسير بعدين كلمت نيلا
امنه : الوو نيلا ها سرتو عند يدوه فاخره ؟
نيلا : الحين بنسير
امنه : زين .. انا وعامر ما بنسير العزبه
نيلا : لييييش !!
امنه : مادري حامد قال عشان البرد مايبا ولده يمرض
نيلا : حوو عادي نزين تراج بتلبسينه جاكيت .. وبعدين كلهن بييبن عيالهن
امنه : شسوي بعد حامد قال ماشي سيره
نيلا : عيل حتى انا مابسير
امنه : لا نيلا سيرو انتو غيرو من جو البيت
نيلا : لا والله ! اصلاً انا ومي ماكنا تبا نسير
امنه : اللي يريحكن
..
في العزبه .. البنات كل وحده على خيل وحامد واقف يوصيهن
حامد : هالله هالله ف عاماركن وهب تبعدن
حمده : انشاءالله
شيخه : يلا عاد بتغط الشمس ونحن ما سرنا
حامد يكلم حمده وعينه ع شيخه : انا هذي هب متطمن منها شكلها ناويه ع بلا
حمده : ماعليك منها
شما تراقب حمد الي واقف بعيد ويسوي نفسه مب مهتم وهي تدري انه معصب من داخله لانه خالفت امره وركبت الخيل بدون رضاه .. حركن البنات وطلعن من العزبه بالخيول وحامد ابدا ماكان متطمن لانها اول مره يطلعن بالخيول من العزبه من دون المدربه فـ ركب سيارته ولحقهم بدون لا يحسون .. اليده فاخره قاعده في الخيمه ومتهندقه ليش البنات سارن وخلن عيالهن وخداماتهم عندها وحمدان قاعد عالارض يلقم اليهال من القرص اما اليد احمد مستانس على احمد بن سيف وحمده بنت حمدان وهم يسولفون عليه .. في البيت .. ميره من درت ان نيلا مابتسير العزبه قررت انها هي بعد ما تسير وتقعد عند نيلا .. في الحديقة الداخلية علي يزن ع راس ميره يبا يسير العزبه لان عمار ومايد راحو بدون لا يخبرونه
علي : عيل بروح ياس مول
ميره : ومنو بيوديك انشاءالله ؟
علي : الدريول
ميره: ماشي
علي : اففف لو قاعد عند ابويه في دبي ابركليه
نيلا : حرام عليج ميروه الدمعه ف عينه
ميره : ماقدر اخليه يروح بروحه .. نسير معاه ؟
نيلا : صدق ؟ عادي .. بشوف امون جان بتخلينا
بعد ما استأذنت نيلا من امنه ووافقت تجهزن البنات وقعدن عند الباب يترين الدريول .. مي تسحب طرف عباة نيلا عشان تنتبه لها
نيلا : هاااه
مي تأشر على جوتيها : ماعرفت اربط الحبل
سمعها علي : تعالي انا بربطه
وقفت مكانها مستحيه وهو سار صوبها وقعد عالارض يربطلها حبال الجوتي وهو مبتسم
في العزبه .. ردن البنات قبل لا تغط الشمس وقعدن في الخيمه اشتد البرد وقعدو عند الضو يتدفون بها .. شما ياها اتصال وبسرعه بعدت عنهم عشان ترد .. حمدان يتلفت ويشوف الموجودين ولاحظ ان مريم محد .. كل حد يدري حمدان ومريم ما يتواطنون ان قعدو عدال بعض لازم يتناقرون ويتضاربون بس الي محد يعرفه حمدان من داخله وايد يهتم لمريم ويخاف عليها .. من تطلقت والناس صارت تنقد عليها وتسمعها كلام وهو قلبه معورنه عليها حاول اكثر من مره انه يتكلم وياها وهي كانت تتهرب وعزلت نفسها .. وفجأه انتبه ان بنته مب موجوده !
حمدان : بنتيه وينها ؟
قام يدورها في الخيمه وبرا بس مالها اثر
حمدان بصوت عالي : حد شاف بنتيه ؟
تلفتو حوالينهم وقامو يدورون معاه ومع الربشه سمعو صوت اليده فاخره العالي
اليده فاخره : الولد ! الضو
