الساعه ٢ من الليل .. مرت امنه على حامد بتتطمن عليه وارتاحت يوم شافته راقد عشان ما يطردها .. قربت منه وبتردد حطت ايدها على يبهته تتحسس حرارته وارتاحت لانه مب حار بس قالت احتياط بتشوف كم درجة حرارته عشان تتطمن .. وهي راده قسمها اتيب مقياس الحراره ولمحت شي اسود مر بسرعه من وراها وهني حست بالخوف وسرعت لين وصلت القسم خذت مقياس الحراره و تأكدت ان ولدها نايم بس ماكانت متطمنه تخليه فشلته وياها عند حامد .. قاست حرارته وكانت 37 .. بتفكيرها الشي سوته واجب عليها كزوجته .. قعدت عالارض وسندت راسها عالكرسي وولدها نايم في حضنها وكل شوي ترجع تشيك على حرارة حامد لين غفت عينها بدون لا تحس
...
ومثل ما تعودت حمده في كل صباح يوم جمعه تشغل سورة الكهف على تلفزيون الصاله بصوت مشاري العفاسي وترفع الصوت وهالعاده اكتسبتها من سيف .. مشت صوب الصاله بالمدخن وفي هاللحظه دخلت اليده فاخره
اليده فاخره: السلام عليكم .. زين يوم لقيتج
حمده : وعليكم السلام ( قربت وحبت راسها ) آمري يدوه
اليده فاخره : ابغي ارمسج
قربتها وقعدو في الصاله
حمده : آمري فديتج .. شو الموضوع
اليده فاخره: اسمعينيه يابنتيه .. انا خلاص كبرت ومابقى شي من عمريه وابغي اتطمن عليكم قبل لا الله ياخذ امانته
حمده : بسم الله عليج يا امايه الله يطول في عمرج .. ليش هالكلام
اليده فاخره : ماوديه اطول عليج .. تدرين انج فخاطر حمدان وترا حمدان يباج ع سنة الله .. قبل لا تعطينيه رايج فكري زين .. فكري في ولدج هب حرام يكبر بدون ابو ؟ وبنت حمدان تراها في حاية ام .. ليش ما تكملون بعض ؟ .. (طاحن دموعها ورا بعض وكملت كلامها بصوت مبحوح) ياحمده طمني روحيه والله اني هب مرتاحه وانا اشوفكم في هالحاله
عورها قلبها على يدتها .. يت بترد عليها ودخلت عليهم حمده بنت حمدان
بنت حمدان : خالووووه
اليده مسحت دموعها بيدينها بسرعه وقامت
اليده فاخره : يلا بسير اشوف يدج .. فكري زين يابنتيه.. خذي وقتج
وصلتها حمده لين الباب ولفت ع بنت حمدان
حمده : ها حمده ؟
مدتلها بنت حمدان الشيله : حجبينيه
حمده مبتسمه : ان شاء الله
...
الساعه 3 الظهر .. دخل الصاله ومالقى غير يدته وشيخه قاعدات .. سلم على يدته وقعد عدالها
اليده فاخره : بلاه حايبك ؟
حمدان : مابلاه شي .. شبخه بسيطه
اليده فاخره : هييي
لف حمدان وشاف شيخه تطالعه
حمدان : استغفرالله
شيخه : ليش تستغفر ؟
حمدان : الواحد ما يستغفر يعني
شيخه : ما عرفت تستغفر الا يوم شفت ويهي ؟
..
في الحديقه عند الجلسه الخارجيه .. اليد احمد واليده فاخره والاحفاد
حولهم ويتهم مهره وعيالها
شيخه : اكتملت .. حضانه هب بيت
راحت عنهم وهي متنرفزه من كثرة اليهال .. مر عليهم حامد بالخيل شل ولده وركبه قدامه وحرك بيحوطه شويه وهني خليفه بن سالم ( ولد مهره ) سحب ايد امه يحركها عشان تنتبه له
مهره : ها حبيبي ؟
خليفه يأشر على حامد : ابا اركب هورس
مهره تعدل جاكيته : لا حبيبي ممنوع .. وايد برد بعدين بتمرض
خليفه مد بوزه : لييش عامر عادي وانا لا !
تأففت مهره : يوم بيي قول له يركبك وياه بس هب تخبر بابا مافينا ع حشرته
ابتسم خليفه : اوكي
ووقف يتريا حامد
مهره : شميم خلوف امانه عندج انا بدخل داخل مافيه تمرض عليه مديّه
شما : ان شاء الله
شوي و ياهم حامد وركب وياه خليفه .. حمده بنت حمدان غارت وقعدت تحن على ابوها يركبها خيل
حمدان يأشر على حمد الي ياي صوبهم بلبس الفروسيه : هذوه عمج خليه يركبج وياه
حمده : مابا .. اباك انته معايه
حمد : السلام عليكم
الكل رد عليه السلام
قرب حمد من حمدان : الحمدلله ع السلامه بوحمده .. خطاك الشر
حمدان : الله يسلمك ماتشوف شر .. عاد ماعليك امر جانك بتركب خيل ركب بنتيه وياك
حمده تطالع ابوها بغيض : انت اركب معايه مب عمي
خذ حمدان نفس عمييق : انا تعبان ماقدر ( قام من مكانه وبصوت شوي عالي ) يلا شي في الخاطر ؟ بدخل ارقد
اليده فاخره : تعال تعال شو مستوي عليك ماتركب ويا بنتك
حمدان : تعباان
اليده فاخره : شو تعبه هذا ؟ خل عنك البزا وقم يلا
حمد : يدوه خليه الريال مسوي حادث تعبان .. انا بركبها ويايه
اليده فاخره طاح قلبها : حادث ! شو حادثه بعد
حمدان تجاهلهم وراح غرفته
حمد : امس مسوين حادث هو وواحد من ربعه الحمدلله هذاك ماياه شي وحمدان انطر حايبه
اليده فاخره : اكيد بس حايبه ؟ مافيه شي ثاني ؟ بسم الله ع ولديه
قامت وايدها ع قلبها بتلحق حمدان تشوفه
حمد : يدوه تعالي الريال توه عندج مافيه شي
حمده : عميي ؟ باباه سوا حادث !
حمد يبا يسكر الموضوع : لا امزح ويا يدتج حليلها صدقت .. يلا قومي بنركب الخيل
ابتسمت حمده بحماس : يلا
..
دخل حامد غرفة المكتب وقعد على القنفه وقدامه الايباد بيكلم زوجته لولوه وبناته على زوم ولكن وقفه صوت دق الباب
حامد : منوو ؟ ادخل
فتحت عاملة لولوه الباب ووايقت
: mr hammed ?
حامد : yes ?
: may I enter ?
حامد : تعالي تعالي
: sorry but i saw something yesterday and I think it's important that you know about it
حامد : خير ان شاء الله
قام حامد وقعد على كرسي مكتبه وقعدت العامله عالكرسي الي قدامه
