قررت العايله تقضي اجازة نهاية الاسبوع في مزرعة اليد احمد .. بينما اليده فاخره تشرف على ترتيبات الجلسه الخارجيه سمعت صوت حمده بنت حمدان
حمده : يدوووووو انا ييييت
التفتت اليده فاخره للصوت : يا مرحبا .. يا مرحبا
لوّت حمده عليها .. من يوم زعل حمدان خذ بنته و وداها بيت اهل امها و من هذاك اليوم ماشافت يدتها
اليده فاخره : فيا منو يايه
حمده : باباا ، ينزل شنطتنا لان بننام هني
ابتسمت اليده وهي حاسه بفرحه كبيره
..
طلعت شيخه تمشي بين الزراعه و اتصلت على مريم
مريم : هلا شيخه
شيخه : وينكن انا ييت المزرعه مالقيت حد
مريم : بنيكم باجر
شيخه : اقلج غريبه اشوف آمنه معاها بنات لولوه
مريم : كيف ! لولوه موجوده ؟
شيخه : لاا بس بناتها ، اخوات امنه هني و بعد يدوه تقول عمي سلطان بيينا
مريم : اقلج بسكر عنج حمدان يدق
شيخه : اوكي
بعد نص ساعه كتبت مريم في قروب البنات : يقولكن حمدان ضروري باجر الصبح كلكن تكونن في المزرعه في مفاجئه
شيخه : الله يستر من مفاجئات حمدان
..
عند الجلسه الي صوب المسبح .. نيلا حاطه قدامها لابتوبها و تشتغل على بروجكت يتها ميره وفي ايدها صحن سويت و دلة قهوه
نيلا : انتي وين اختفيتي من ساعه وانا هني ارتياج
ميره : سرت اسلم ع عمي خليفه .. العايله متيمعه في الدجه عند الزراعه و يدوه تسأل عنج
نيلا : اخواتيه هناك ؟
ميره : ماشفتهن .. ماشاءلله الجو فناان اليوم
نيلا : هيي والله الشتا يودعنا
ميره : قومي بنمشي
نيلا : والبروجكت ؟
ميره : لاحقه عليه عقب كمليه
خلت اغراضها وقامن يمشن صوب الزراعه
ميره : بسألج علومه هذاك الي اشتكينا عليه من يوم قلتيلي انه في كلاسج مايبتي طاريه
نيلا : والله ماعرف من هذاك اليوم اختفى
ميره : كيف اختفى ! يعني ما شفتيه عقب هذاك اليوم ؟
نيلا : ماشفته
ميره : عيل تحذري .. وعلوم الجامعه وياج
نيلا : الحمدلله لين الحين كل شي اوكي
لمحت ميره باب ع طرف السور وياها فضول تشوف شو هناك
ميره : تعالي شي باب هناك
سارو صوب الباب ودخلو
نيلا : ميرو شكلنا دخلنا مزرعة ثانيه
ميره : عادي خلينا نستكشفها .. ماظن حد هني شوفي مسكرين الليتات
الباب عطول دخلهم عند الزراعه .. ميره تصور النخل و نيلا تتلفت تشوف المكان مشن وايد لين وصلن اخر المزرعه
نيلا : اشم ريحة ضو
ميره : هي هذي يدتيه شابه الضو تسوي قرص
نيلا : تسمعييين ! صوت رياييل
ميره : تتوهمين انتي ماسمع شي
نيلا : والله شي اصوات
قاطعهن صوت ريال غلييض ياي من قرييب
: منو هني ؟
نيلا عقت نعولها شلتهن في يدينها وركضت صوب الباب اما ميره تمت واقفه مكانها
ميره : السلام عليكم
: وعليكم السلام
ميره : انس ولا جن ؟
: جني فديتج
مايشوف الا غبره قدامه
...
في الصاله .. حمده و المها يغياضن بعض و شيخه منزعجه منهن
شيخه : حمده انقلعو لعبو برا
حمده : عيب عليج انتي انقلعي
بطلعت عيونها بصدمه : نعممم ! ماعليه
حمده : انتي بديتي
شيخه بنظرة حاده وابتسامة فيها خبث : قالولج ؟ ابوج بيعرس وبيعقج عند يدوه بيروح عنج وبتعيشين بدون ام و ابو نفس المها
حمده : كذابه .. باباه مابيتزوج
شيخه : اذا ماتصدقيني سألي يدوه
تحقرت حمده وتمت ساكته وثواني وطلعت عنهم
...
في صالة حمدة
شما : بنات احس امنه فيها شي لان صدق حركاتها مب طبيعيه
حمده : كيف
شما : استغفرالله مابحطها في ذمتيه بس بقوللكم الي صار ، من اسبوع كلمتني امنه على اساس بنتقهوى ويا بعض في الحديقه العصر و ادق عليها العصر ما ترد حتى سرت لين قسمهم دقيت محد رد عليه استغربتت قلت يمكن طلعت و لا حامد عندها وماقدرت اتي بس حامد من من الصبح في الدوام مارد الا عقب المغرب يعني مب عندها و مب طالعه وياه وهي اصلا مايخليها تطلع بدونه
مريم : يمكن حامد مايباها تطلع و مستحيه تقول لج عشان جي ما ترد عليج
شما : لالا صدقوني في شي مب طبيعي قاعد يصير طول الاسبوع مختفيه مع ان اخواتها موجودات و كذا مره اسأل اخواتها عنها يقولن انها في قسمها بس ماترد عليه معقوله زعلانه منيه !
مريم : تقولي شيخه شافتها يتهم في المزرعه اليوم
شما : غرييبه
....
تبطلت الشيله وهي تركض ومسكتها قبل لا تطير عنها اول ماقربت عالباب خفت سرعتها .. خصلات شعرها تتطاير وراها و مع هبوب الهوا دخل الرمل في عيونها وماصارت تشوف شي من الدموع ومن الحرقه .. تمسح دموعها بطرف كمها وماحست بنفسها الا وهي داعمه شي وطاحت على شي
ميره : نيلاا !
