المخلص "باللهجة العراقية "

البارت السابع والثلاثون

المخلص..
البارت السابع والثلاثون..
بقلمي رسل..
rasolaa7

انستا Rasolaa7

اعله يا ذمة توصيني
وحياتي انت ونبض يمشي بشراييني
ويضل اسمك علامة ايوسم اسنيني
ولونك مو دمع ما شالتك عيني
ويلوموني احسك تكبر بروحي
ويلوموني ونه بلا شوفتك شينفعن عيوني
يشوگي ورجوتي ودنياي ولوني
وعذابي ولهفتي وشكواي وضنوني
يخي عونك عليه وبيك خي عوني
يواهس تضحك الدنيه على شفافك
يبو الليل الحلو اليلعب على اجتافك
احس روحي تأمن بيك وتخافك
وتوصيني لونك مو دمع ما شالتك عيني..

-فتحت عيني الغرفة ظلمة و الكهرباء مطفية وبس صوت الرعد والمطر الي يضرب على الشبابيك حاولت اكوم بس اخاف مديت ايدي على الميز حتى اخذ تليفون واشغل الضوه شغلته باوعت على علي نايم واصلاً ما يدري بالدنيا وين ياربي شنو اسوي والله اخاف من صوت الرعد خليت المخدة على راسي بمحاولة انو ابعد الصوت بس فجأة اجا صوت عالي كلش من رعبتي ضميت راسي بصدره بسرعة هو فتح عينه مرعوب من شافني شلون محتميه بحضنه رفع حاجبه ويحاول يخفي ابتسامته بعد راسي عن حضنه..

-كل هذا الخوف من المطر تحجين صدك منوم طفلة بصفي..

-الا يفشلني هسه شسوي غير اخاف نوب ظلمه وهيج اصوات ابتعدت واني مبرطمه شفافي يعني فوك الخوف الي بداخلي يجي هو يضحك عليه درت وجهي عنا واني بصراع  بين الخوف وبين الكبرياء بس مادامه كعد الخوف شوي اهون..

-قربني عليه وايده على خصري لفحتني انفاسه القريبة على اذني وهو يهمس.. هسه شكو زعلتي عمي نعتذر طبع بوسه وره اذني..

-ليش ما كعدتيني اذا تخافين؟!..

-مو انت تعبان ونايم شلون اكعدك..

-اخذني لحضنه ورجع نام..هذا مكانج بويه ماعاش الخوف واني موجود هذا امانج ويأشر على صدره هنا
اضمج لو جاسچ خوف..

-حضنته وممنونة من ربي الي خله كل الامان بشخص واحد شوفته وقربه كفيله تبدد كل خوفي..

-هدوء وعبالي هم رجع نام رفعت راسي شفته صافن بالفراغ خليت ايدي على خده.. وين صافن..

-تنهد.. بالي يم النازحين تشوفين هذا المطر احنا كاعدين هنا وتحت هذا السكف بس الي تحت خيمة ونايلون هسه شنو وضعهم الاطفال الي يخافون من الصوت والشياب ذول شلون حالهم ويا البرد والله نورا حالهم يكطع الكلب لو تشوفيهم معاناتهم ماتنتهي لا صيف ولا شتاء والمي ينكلونه من بره والاطفال الي تلعب بالمي الوصخ لو وجباتهم الي ياكلوها بيومهم كلها عبارة عن مساعدات وقليلة يعني اكو عوائل جبيرة بلا منو يعقلها هذول عراقيين وعايشين ببلد الخيرات
هسه ويا هالمطر والجو شحالهم..