المخلص "باللهجة العراقية "

البارت السادس والعشرون

المخلص.. 
البارت السادس والعشرون..
بقلمي رسل..
rasolaa7

انستا Rasolaa7

اراضيك بـ ولك يا بعد هاي وهاي
واتعذر سنه و ما تقبل اعــذاري

عريان السيد خلف..

-ما اعرف شنو حجوا ابتعدوا وهو يدور بين الخيم
الى ان مر وقت شوي وسمعت شخطت السيارة ها زمرد ليش تبجين مو هذا الي ردتي مو ردتي كرامتج مو ردتي تخلصين من الكلام الي ما ينحمل تحملي بعده
اقنع بروحي وعيني على سيارته الي تبتعد ودموعي
تصب امسح وحده وتنزل الثانيه كلما يبتعد اكثر كلبي
ينعصر بقهر اكثر وروحي تحترك..

-عيوني حركني ودموعي ما اسيطر عليهن بعد الدموع حجبت الرؤيا عني وكلبي جمره واستوطنت بي بهاي اللحظات..

-خليت ايدي على كلبي مو هذا الشيء الي يريده مو هذا والله بس اخ من قسوة البشر وجع صار بصدري شوكت ارتاح اتمنى كون اهج بمكان مابي بشر مكان منعزل وانام براحة بال مثل نومة الطفل ساعة الي تشبعه امه ويوصل لمسامعه صوتها الي يبث الهدوء والراحة..

-مسحت دموعي والتفتت على مصدر صوتها لام عكاب الي فزت من نومها كالعادة وقلق بعيونها شمكعدج بهالساعه منو الي تعاينين عليه؟!..

-ذبيت حسره من اعماق روحي اريد اتنفس من خشمي ما اكدر من كدما بجيت رجعت يمها.. مجد ختنكت وشميت هوا حجيتها ومددت بفراشي بدون ما احجي شيء تغطيت وراسي يريد ينفجر عيني
على علاوي واتمنيت كون ارجع بهذا العمر لا عقل
الي يتعب من التفكير ولا كلب الي يحترك..

-غفيت وبعز نومتي حسيت على ايد تتحسس حرارتي
وشيء بارد نوضع على كصتي اريد افتح عيني ما اكدر بس صوتي كوه يطلع.. بردانه غطه اريد..

-ورجعت غفيت يومين اني ما ادري بالدنيا راسي ما اكدر ارفعه وبس متمدده وخاله ام عكاب حايره بيه خطيه كم مره تروح تطلب منهم علاج وكوه اخذه وما يفيد معدتي ما داخلها غير المي والعلاج بعد ما اجاهد
نفسي يلا ارفع راسي وعلاوي حايره بي جنتها الله ينطيها العافية ما قصرت ويا..

-وهو حبيبي يريدني اخذه لحضني يزحف يمي وايده
الترفه تضرب على وجهي شبيدي عليك يبعد روحي
اخاف عليه لا بيه فلونزا وينعدي مني وهو بس جرح
راسه كافي عليه..

-لليوم الثالث واني متمدده واون من بطني ومعدتي كعدت ام عكاب يمي عصرت الوصله ( قطعة قماش) ورجعت خلتها على كصتي سندتني وشربتني شوي شوربه واني احس عيوني تطلع منها حراره..

-رجعتني وعدلت نومتي واجاني صوتها.. منو المخلص يمه؟!..

-فزيت وداخلي ارتعد تخربطت احوالي وكانو اني عايزه حتى تذكرني بجروحي وبعملتي.. ها شنو كلتي
خاله؟!..