Unicode
"ကဲ... မနေ့ကအိမ်စာပေးလိုက်တာတွေလုပ်ခဲ့လားလိုက်စစ်မယ်နော်။ စာအုပ်တွေဖွင့်ပြီး ခုံပေါ်မှာတင်ထားကြပါ"
အတန်းပိုင်ဆရာမရဲ့စကားဆုံးတာနဲ့ ရှောင်းကျန့်ကမဆိုင်းမတွပင် spongbobကျောပိုးအိတ်အဝါရောင်လေးထဲက စာအုပ်ကိုထုတ်ပြီး အရှေ့ကစားပွဲပေါ်မှာတင်ထားလိုက်သည်။ သူ့ဘေးကရိပေါ်ကိုလှမ်းကြည့်လိုက်တော့ ခေါင်းကုတ်လိုက်ဖင်ကုတ်လိုက်ဖြင့် ကျောပိုးအိတ်အသေးလေးထဲ မွှေနှောက်ရှာနေလေသည်။ ခဏကြာတော့ ငိုမဲ့မဲ့မျက်နှာလေးဖြင့် ဆရာမကိုတစ်လှည့် ပြောင်သလင်းခါနေတဲ့စာအုပ်ကိုတစ်လှည့်ကြည့်နေတာမို့
"ဘာဖြစ်လို့လဲ ရိပေါ် "
လေသံလေးဖြင့် မေးလိုက်တဲ့သူ့စကားအဆုံး ရိပေါ်ကသူ့ဘက်ကိုဆတ်ခနဲလှည့်ကြည့်ရင်း ပြောင်သလင်းခါနေတဲ့စာမျက်နှာကိုလက်ညိုးထိုးပြကာ
"ငါမနေ့က တီဗီဂိမ်းဆော့ရင်းအိပ်ပျော်သွားလို့ အိမ်စာခုထိမရေးရသေးဘူး"
ရိပေါ်စကားကြောင့် ရှောင်းကျန့်မျက်လုံးပြူးသွားမိသည်။ ဆရာမကအိမ်စာမပြီးသေးတဲ့သူတွေကို ရိုက်တယ်ဆိုတော့ ရိပေါ်ကရောအခြားသူငယ်ချင်းတွေလိုပဲအရိုက်ခံရမှာလား။ အိမ်စာမပြီးသေးလို့ အတန်းရှေ့ခေါ်ထုတ်ပြီးကြိမ်လုံးနဲ့အဆော်ခံနေရတဲ့ သူငယ်ချင်းတွေကိုတစ်လှည့် ကြောက်စိတ်ကြောင့်ငိုတော့မယောင်ဖြစ်နေတဲ့ ရိပေါ်ကိုတစ်လှည့်ကြည့်ရင်း ရှောင်းကျန့်တစ်ယောက်အကြံထုတ်နေမိသည်။ ကြိမ်လုံးနဲ့အရိုက်ခံရရင် အရမ်းနာတယ်လို့သူကြားဖူးသည်။ ရိပေါ်အသားကဖြူဖြူနုနုလေးတွေမို့ သူများတွေထက်ပိုပြီးနာလိမ့်မည်ထင်သည်။
ရိပေါ်ကိုတော့အရိုက်မခံစေချင်ပါ။ ဒါပေမယ့် တဖြည်းဖြည်းနဲ့ ဆရာမကသူတို့ထိုင်နေတဲ့အတန်းနားကိုရောက်လာတော့မည်ဖြစ်သည်။ ရှောင်းကျန့်ရဲ့ဦးနှောက်သေးသေးလေးကအသဲအသန်စဥ်းစားနေရင်း ကြံရာမရတော့တဲ့အဆုံး
"အား... ဆရာမသားဗိုက်ထဲက အရမ်းအောင့်တာပဲ ..... လုပ်ပါဦး ဆရာမ.. သားသေတော့မှာလားမသိဘူး"
