ALL-TIME FAVORITE: Sinner or Saint

CHAPTER 8

NAGULAT pa si Lilia nang pagpasok niya'y nakahiga pa rin sa sofa si Vince. He was tossing and turning, moaning at the same time. Nananaginip ba ito?

"V-Vince..." pukaw niya rito.

Subalit patuloy sa pag-ungol ang lalaki. Yumuko siya at hinawakan ito sa braso upang yugyugin at gisingin subalit mabilis niyang binawi ang kamay. Mainit na mainit ang braso nito.

"Vince?"

Nagmulat ng mga mata ang lalaki. At kahit iyon ay nakikita niyang hirap nitong gawin. Namumutla ito at nanginginig ang buong katawan. His mouth twisted in pain as he struggled to sit up.

"M-may sakit ka ba?" It was a stupid question.
Nanginginig ito na tila ginaw na ginaw pero basang-basa ang suot na T-shirt sa pawis.

Bigla'y bumangon ito at tumayo, his flesh rippling with fine tremors, at bago pa siya nakahuma'y nakapasok ito sa banyo sa halos pasuray na paraan. Mayamaya'y may bumagsak sa loob.

Mabilis siyang sumunod dito, itinulak pabukas ang pinto ng banyo. Sa ibaba sa tiles ay nahulog ang lagayan ng toothpaste at toothbrush, ganoon din ang baso na nabasag
at bote ng shampoo.

Nakayuko ito sa lababo at hinihilamusan ang mukha.

"Get out... iwan mo ako!" marahas nitong sabi,
nangangatog maging mga tuhod sa pagsisikap na humakbang palabas.

Kung iniisip ng lalaking ito na nag-e-enjoy siyang makita ito sa ganoong kalagayan, he was wrong. Ang kahinaan nito'y tila patalim na humihiwa sa puso niya, opening it to a wave of tenderness that was a sharp, sweet pain.

He was ill. Maghapon itong nasa ulanan kahapon. At kagabi, matapos nilang mag-away ay lumabas din ito ng bahay at sino ang nakakaalam kung anong oras na itong
nakabalik.

At namamangha siya sa sarili dahil hindi niya gustong iwan si Vince sa ganoong kalagayan. She wanted to help him. Wanted it with a magnitude that suprised her-for it brought out all that was tender and maternal in her. And
it surprised her, too.

Kinuha niya ang towel sa rack at ibinalabal iyon sa pawisang mga balikat ng lalaki. "K-kailangan mong pumanhik sa itaas."

Gumawi ang isang kamay niya sa siko
nito para alalayan ito. He was burning!
"Leave me alone, dammit!" Isinalya nito ang kamay niya at napasandal siya sa dingding ng banyo. Lumabas si Vince at tinungo ang hagdan.

She held her breath habang pinanonood ang bawat paghakbang nito papanhik. Kinakabahang anumang oras ay sumala ang paa nito at mahulog. Saka pa lamang kumilos si Lilia nang makitang tuluyan na itong nakapanhik.

Mabilis siyang nagtungo sa dirty kitchen at nagsikap sindihan ang pugon. Isinalang niya ang takuri upang magpakulo ng tubig.
Pagkatapos ay nagtimpla siya ng kape at ipinanhik sa itaas. Nakahiga sa kama si Vince at nakabalot ng kumot.

Nagmulat ito ng mga mata nang maramdaman siya.

"Hindi mo ba ako naririnig? Get out of
my sight! Kung gusto mo'y umalis ka na... This is your chance to escape, Miss Serrano!" humihingal nitong sabi, tila hirap na hirap magsalita. Ang buhok na basang-basa ng pawis ay nakaplaster sa ulo, maputlang-maputla ito.

Walang kibong ibinaba niya sa night table ang mug ng kape. "Kailangan mo ng doktor. At marunong akong mag-drive, kaya-"

"Hindi ko kailangan ng doktor!"

Napaatras siya. He still intimidated her sa kabila ng kalagayan nito. "Inumin mo ang kape habang mainit."

"Leave me alone, Miss Serrano!" Nanginginig ang tinig nito but the menace was still there. Na marahil ay nadagdagan pang lalo sa kaalamang nakita niya ito sa ganoong kalagayan.