بسم الله الرحمن الرحيم
#المراهقة و الأربعيني:
#الجزء الأول:
اسمي ليليان عمري 17 سنة صف خامس علمي انا نصرانية و خويا مسلم، علبالي رايحين تتساءلوا كيفاش جاية دوك نفهمكم:
بابا اسمو جرجيس مسيحي تزوج مع ماما و كانوا فرحانين بحياتهم.
7 سنين و هوما من طبيب لطبيب على جال الدراري كان المشكل في ماما و بابا ما قدرش يطلقها و يعاود الزواح لخطر الطلاق صعيب في ديانتو في العراق ما يقدرش يطلق غير بعد ثبوت خيانة بالدليل و في نفس الوقت ممنوع تعدد الزوجات.
قعد بابا حاير كيفاش يديرو هو أملو يكون عندو دراري خمم خمم منبعد قرر يعتنق الاسلام باش يقدر يغير جنسيتو و يسمحولو يتزوج بمراة أخرى بلاما يضطر يطلق ماما لخطر كان يحبها.
كي دخل فالاسلام أهلو تبراو منو و حاوزوه و رحل هو و ماما و تزوج مرا اسمها خالدية، شهرين رفدت الحمل بطفل و جابت خويا يحيى و زادت حملت بطفل ثاني و سمو أمير كان مريض وتوفى يامات برك مور الزيادة.
عامين منبعد حدثت المعجزة و حملت ماما بيا.
خويا يحيى كانت يماه مسلمة رباتو على الإسلام وما قبلتش يكون نصراني و ماما علمتني النصرانية وما قبلتش نكون مسلمة.
بابا مسكين كان قيسو قيس روحو يخدم و يجي يرقد بصح الحق كان يحبنا بزاف و يدللنا.
بحكم جنسيتي كان مقرر عليا نقرا التربية الإسلامية و اطلعت على الإسلام و حفظت آيات من القران ماما فالدار كنت نشوف بابا و مرتو و يحي كيفاش يمارسو الإسلام يعني ماشي حاجة غريبة عليا و حتى صحبتي المقربة و الوحيدة سارة مسلمة، بصح ما اسلمتش و كنت نروح مع ماما للكنيسة.
كبرنا و يحيى تعلم الاسلام مليح و حفظ القرآن و أنا قعدت على دين ماما و بابا ما اعترضش علينا في زوج، منبعد حكمو سرطان الدم جرينا بيه بصح ما فاد فيه والو ربع أشهر و توفى الله يرحمو و خلانا قفة بلا يدين.
لتم بدات حياتي تتقلب، خويا يحيى حب يزوجني مع مسلم باش ندخل فالاسلام، و ماما حبت تزوجني مع نصراني باش نبقى على دينها، و أنا ما كانش عاجبني تدخلهم في حياتي هكدا أصلا كنت مازالني نقرا و عندي احلامي كيما أي طفلة.
ماما كانت شايفتلي وليد خالي اسمو حنا و تقولي بلي يحبني بزاف و حايب يتزوجني بصح أنا ما نحملوش يا ربي ثقيل على العسل مع الماء و ما يجوزش، كرهتلي حياتي بيه في كل دورة تجبدلي عليه و هو في كل محضر يحضر لصقة.
حنا هدا عمرو 21 سنة يقرا فالجامعة و خالعو زينو كي جاي زين أوروبي طويل شعرو صفر و عينيه زروقا أصلا أنا نحب الزين العراقي أسمر و شعرو كحل نحسو راجل ماشي فيس امامو.
وحد النهار دخل خويا للدار جوايه العشرة تع الليل كان هداك وين جا من الخدمة سلم على ماما لي هي مرت باباه و سقسى على حوالها كي العادة قعدوا يحكيو منبعد سقساتو قاتلو حقا وش درت فيها على إقبال قالها و الله يا يما غير كيما هدرت مع خوها و قالي إن شاء الله خير بصح راني خايف ما يعطوهاليش قاتلو ما تقولش هكدا قول ان شاء الله، قالها يا يما ما نغطيوش الشمس بالغربال شكون لي رايح يقبل يمد بنتو لواحد ما عندوش أهل لا عمام لا عائلة قاتلو ما تقولش هكدا يا وليدي ياك خوالك كاينين و كل أمرك لربي سبحانو، تنهد و قالها آمنت بالله رب العالمين قاتلو و نعم بالله.
منبعد قالها حقا وين راهي ليليان ما بانتش قاتلو راهي تقرا في شومبرتها كاش ما تحتاج عندها؟ قالها راني جيعان ميت وين راهي جي ديرلي كاش ما ناكل و بدا يزڨيلي ليلياااااااااان خرجت من الشومبرة مقلقة قتلو اوووووه وش بيك تضبح وش تحتاج ما تخليوش الواحد حتى يقرا في عقلو ما تقولو الواحد راهو عيان ملي توفى بابا الله يرحمو واحد مازاد حس بيا قالي روحي برك للكوزينة ديريلي حاجة ناكلها بركاي ما تزيدي فالهدرة.
سكت و بديت نخرج فالماكلة من الفريجيدار باش نسخنلو و نهدر و نبكي جا ليا قالي مازالك تبلبلي و زيد علاش راكي تبكي وش قتلك ياك قتلك برك سخنيلي ناكل راني جيعان انت ديراكت جيتي تقول محرشة و تهدري برك قتلو عييت واحد ما راهو حاس بيا ما تقولو راهي تقرا ما تقولو ما راهيش قادرة نهار كامل و نتوما دير اعملي حطي ارفدي ..... قالي يا يما راسي شحال تهدري بسلامتك بطلت ما ناكلش ارواحي نوريلك وش جبتلك و سكتينا، بلعت ريقي و قتلو لالا انت برك ما فهتنيش ياك تعرفني نهدر برك و لي في قلبي على لساني قالي شوف اسيدي منين طاحت عليك هد العقالة هدا وين كنتي تشكي قتلو يااا خويا تعيش وريلي وش جبتلي قالي طار الحمام داوها الصحاح ههههه قتلو و الله ما حق عليك كيفاش عطاك قلبك تمد الكادو تع اختك الوحيدة لوحدوخر قالي لخطر تع صلاحها مليااااار بديت نتفشش و نبلعط حتى قالي يمال كملي وجديلي ناكل منبعد نوريلك وش جبتلك قتلو لالا دوك و الله بلخف نكمل ضحك و قالي يا وحد البونديا لي يشوفك دوك ما يقولش انت تع مقبيل دخل يدو في جيبو و خرج صاشي صغير فيها ليزاكسيسوار تع لبنات يعرفني نحب هد العفايس تع السناسل و البراصليات و الخواتم تعرفو البنات في هد العمر كيفاش عقليتهم.
كي عطاهالي فرحت وبديت نصوطي و حضنتو قتلو نحبك بزااف ربي يخليك ليا قالي و انا تان بصح كملي وجدي الماكلة قتلني الشر قتلو طلباتو أوامر خويا لعزيز قالي يااااا صار دوك رجعت خوك لعزيز كملي كملي بركاي مالتبلعيط و ارواحي اقعدي معايا عندي هدرة معاك على حنا قتلو يحيى تعيش و الله ماني حاباتو بصح ماما ..... قالي معليه كملي منبعد نحكيو فهد السوجي.
وجدت السنيوة و ديتهالو و قعدت ناكل معاه قالي ما تعشيتيش؟ قتلو لالا تعشيت قالي يمال علاش راكي تحانكي فيا فاللقمة قتلو مكراشة هههه ناض يضحك.
منبعد قالي وش حكايتك مع ماماك و وليد خالك حنا قتلو يحي تعيش خويا مانيش حايبا ما نحملوش قالي يمال علاش ماماك راهي تقول راهو حايب يخطبك؟ قتلو ما تعرفش ماما تقول وش يخرج عليها سكت منبعد قالي ليليان صاحبي خالد هدرلي لبارح عليك وش رايك؟ قتلو يحي وش راك تحكي مانيش حايبا نتزوج قالي بصح لوقتاش راكي كبرتي قتلو كيفاش كبرت هدا وين عندي 16 سنة و مازالي نقرا قالي و لوين معولة توصلي بالقراية راهم دي ماجور دوبرومو و ما دارو والو و انت تحوسيلي على القراية خمي خمي شويا في حياتك و زيد خالد الله يبارك عليه ما عندو ما خصو و رايح نتهنى عليك معاه أما حنا هدا أصلا مانيش موافق عليه قتلو ما نحوس لا على خالد لا على حنا فهمت و نضت زعفانة قالي ماشي كيما تحبي أنت تتزوجي يعني تتزوجي أنا تان راني حايب نتزوج و نشوف حياتي ما نجوزش حياتي نصرف عليك أنت و يماك قتلو على وش من مصروف راك تهدر استكثرت علينا القضيان ياك خالي لي راهو يبعث لماما الدراهم كل شهر، بصح كي ولينا هكدا ناكل اندومي و ما ناكلش من عندك ارتاح خليتو يهدر ورحت للشومبرة لاقاتني ماما قاتلي وش حب عندك خوك قتلها اخطيوني مانيش حايبة نتزوج قاتلي يا الحابسة حنا يحبك و لي تطلبيها تحضر وش حبيتي كثر من هكدا قلتلها تحبو حبوبة ما نتزوجش ياك ماشي بالسيف اخطيوني.
رحت لفراشي و قعدت نخمم و نبكي و تفكرت بابا الله يرحمو عمرو و ادا سيف عليا حاجة.
أنا هكداك حتى حسيت بماما جات عندي قاتلي يا الجايحة علاش راكي تبكي أنا تهمني مصلحتك قعدت ساكتة لخطر علبالي غير ندخل معاها في نقاش عقيم برك. #يتبع
