المراهقة والاربعيني
الجزء23:
بديت نسخن فالعشا حتى نسمع في صوت صراع و الحاجة يتعايطوا نقصت النار و رحت نتصنت سمعتها تقولو هادي كامل ماشي هدرة، طلعها لفوق عندك و علمها بعقلك ما دام مرتاحلها ما عندها حتى معنى تخليهالي هنا قالها يما مانيش حايبها في هد البريود علاش حتى تفورصيني أنا علبالي وقتاش نقرر قالتلو طلعها ترقد عندك كيما أي مرا متزوجة معليه ما ديرلها والو بصح كي راك مخليهالي هنا لوقتاش و هدوك اللفعات يتغامزو عليها و ديسيدي بعقلك لتم في شومبرتك ماشي عندي قالها يما نعرفك علبالي علاش حايبا طلعيها لشومبرتي، ما تفورصينيش و الله مازال الحال ماشي دوك افهميني و نقولك حاجة نطلع خيرلي نستاهل أنا لي جيت هدرتلك، و فتح الباب صابني واقفة خزر فيا و طلع لفوق، طلعتلو الماكلة و أنا نقول في قلبي هدا وش بيه كيفاش راهو يخمم يفهم روحو مرة يقول مرتاحلها مرة يقول مانيش حايبها؟
دقدقت الباب و دخلت حطيت السنيوة كان مقلق قالي صحيتي روحي و اغلقي الباب موراك، شوكاني و غاضتني عمري كنت دايرة في بالي رايحة نتعشى أنا و ياه يحاوزني؟!
حبطت و الدمعة حاصلة في عينيا صبت الحاجة متكسلة و مغمضة عينيها قعدت، موراها بشويا جا فتح الباب خزر فيها قالي يما راهي قاعدة؟ قتلو لالا راقدة، دنى ليها و سلم على راسها قالها يما... دورت وجهها للحيط و ما حبتش تهدر معاه، خزر فيا قالي اطلعي حبطي السنيوة ملفوق و خرج.
حبطت الماعن غسلتهم و عاودت رجعت لشومبرة الحاجة، تكسلت و قعدت نطلع و نحبط قلت علاش ماراهوش حايبني نطلع لشومبرتو و كامل تصرفاتو معايا تبين بلي يحبني، هو يحبني كيما بنتو حلا و لا حب راجل لمرا؟ قعدت نخمم حتى رقدت.
فطنت على حسو سمعتو يهدر معاها بلعقل يقولها يما بجاه ربي ما ديريليش هكدا علاش راكي تعذبي فيا خلي الحالة تمشي وحدها، قالتلو يا دير حد لهد الحكاية و لا ما عندي ما نديرلك قالها يما و الله غير مازالها طفلة صغيرة ما تفهم والو ما راني لا نتدلل عليك و لا عليها نستنى فيها برك يكبر عقلها شويا، قالتلو يكبر و هي معاك ماشي تخليهالي هنا، أنا ما عييتش بيها مانيش رافدتها فوق راسي بصح الشي لي راك دير فيه ما يحبوش ربي قالها يا يما علاش أنا وش درت؟ معليه اسيدي عاونيني فيها ماشي تفورصيني قالتلو أنا الشي لي عندي قلتو و دوك خليني نكمل قرآن الفجر راح يطلع النهار عليا و حبطت راسها و قالت بسم الله الرحمن الرحيم و بدات تقرا، تنهد و خرج.
كملت رقدت و كي نضت الصباح صبتو راح يخدم كملت شغلي، على ال 4 تع لعشية دخل مقلق طلعت سقسيتو إدا نجيبلو يتغدا قالي لالا احبطي لتحت قلت في قلبي هدا وش بيه يحاوز فيا ملبارح، شويا هكدا حبطت حلا للكوزينة توجد الماكلة قلتلها ليمن؟ قالتلي لبابا و لا ممنوع يطلب مني؟ سكت بصح علاش ياك هدا وين سقسيتو.
رحت لشومبرة الحاجة قعدت نلعب بتلفونها و نخمم ياربي وش درتو حتى راهو يعامل فيا هكدا.
خرج مع العصر و مور العشا كنا قاعدين نتفرجو فالتلفزيون فالهول حتى دخل سلم، قعد و عيط لحلا تسربيلو لاتاي، عرفت الحاجة بلي ما راهوش يهدر معايا خزرت فيا تنهدت و حطيت راسي، نطقت قالت راهي باينتلي نزوج ليليان قالها الحاج علاش حتى تزوجيها أبو حرب ما عمرلكش العين؟! قالتلو ما كاش واحد معمرلي العين قدو بصح ما يتوالموش و هو معتبرها بنتو حرام نظلمو الطفلة و نوقفو في مكتوبها، خليها تدي لي يوالمها خير هكدا يتنهاو في زوج واحد ما نفرضوه على لوخر، و هو غير ينسف و يحرك في رجلو من القلق منبعد رفد روحو و طلع لشومبرتو.
مام أنا تقلقت كي هدرت هكدا قلتلها دوك يخلف فيا زعافو قالتلي ما دخليش روحك خليني أنا ندبر راسي حتى نسمع فيه يعيط و يسمع فينا حلااااا اطلعي وجديلي كابتي غدوا رايح ميسيو سمانة بالاك ربي يديني و نتهنى منكم، الحاجة زادت قتلاتو بالبارد و الحاج قالها علاش تبروفوكي فيه علبالك بلي هدرة كيما هادي تزعفو، ناضت و قالتلي ليليان خرجي الفورنو برا و طفيه أنا رايحة نرقد.
طلعت لشومبرتو دقدقت قال ادخل، دخلت صبت حلا توجدلو في كابتو قتلو عمو كاش ما تحتاج؟ خزر فيا و قالي لالا صحا ما نحتاج والو، تنهدت و خرجت حبطت لشومبرة الحاجة، شويا هكدا جات حلا قالتلها جدة قالها بابا هدا المصروف راني خارج ميسيو سمانة و ادا كاش ما حتجتي قولي لنائل و كي نجي نتحاسبو، شدت عليها و قالت ربي يرجعولي بالسلامة.
موراها جا ليا نائل قالي ليليان ارواحي عاونيني، كي العادة وجدت لاتاي و السنيوة و ديتها وقفت نستنى في نائل يخرج باش يدخلهالهم و صراع حبط جا يدخل صابني لتم قالي وش راكي ديري هنا قتلو باش يديلهم لاتاي قالي مانشوفكش هنا ادخلي للشومبرة و لا نكسرلك راسك خفي قتلو إيه دوك يخرج نائل و نروح قالي جيبي هنا تشوفي و شد عليا السنيوة خرج نائل قالو ما تزيدش تبعثها توجدلك لاتاي للرجال قالو وش بيك أبو حرب راهم لداخل دوك يسمعوك، دار ليا قالي و انت مازالي واقفة هنا روحيييي رحت نجري للشومبرة و قعدت نبكي و نخمم علاش راهو يديرلي هكدا فواش غلطت معاه.
مور الفجر حبط نوض الطونوبيل و راح، الحاجة غاضها الحال كي ما جاش بقاها على خير، نضت نجري من الفراش صبتو لابس كلشي كحل فتح باب الڨراج و ديمارا رجعت للشومبرة قالتلي الحاجة راح؟ درتلها براسي إيه قالت ياااارب رجعهلولي سالم غانم...
شويا و صونا تلفونها كي شافتو صراع ما حبتش تريبوندي كانت مقنوطة منو و هو غير يعاود وليت رفدت قلت ألو قالي جوزيلي يما قتلو راهي راقدة قالي علبالي بلي ما راهيش راقدة اعطيلها التلفون درت ليها قلتلها حب يهدر معاك قالتلي قوليلو قالتلك تروح و ترجع بالسلامة يا وليدي و تنهدت قالت يا خسارة تعبي تنهد و قالي راني نقولك جوزيهالي قتلو ما حبتش قالي قوليلها راكي حايبتني نرجع دوك للدار؟ قالتلي قوليلو يتهلا فروحو و ماني حايبا والو و كوبي التلفون، تنهد و قال مع السلامة، كوبيت و قلتلها وعلاش ما هدرتيش معاه؟ قالتلي ارقدي بنتي بزاف عليك ليل كامل و انت تبكي ما تخافيش ما يصرالو والو سمانة و يرجع إن شاء الله.
جازت 4 أيام كلما ما يعيطلها ما ترفدش عليه و هي مرضت زعفت منو، وليت غير نساعف فيها انا و هيام بصح ما تشكيش دايتها غير رقاد.
في هديك الفترة سعد قرر يخرج بدارو وحدو و يقسمها مابين نساه و ولادو بصح نوال ما قبلتش ولا راح الحاج و الحاجة قنعوها و جابوها و تفاهمو شهرين و توجد الدار.
كنت نساعف في الحاجة و نشوف كي صراع يعيطلها بصح ما نردش رغم أني كنت متوحشاتو موووت حتى لو يعتبرني بنتو معليه لخطر في الحالتين ما شفتش كيما حنانتو معايا.
حلا و أم سعد استغلوا غيابو و آذاوني بزاف بالكلام، كنت كي تغيضني عمري نطلع لشومبرتو نشم ريحتو في فراشو نتونس بيها و نبكي و نشكيلو ما بيني و بين روحي.
غدوا منداك هيام شدت رونديفو للحاجة عند الطبيب بصح ما قدرتش تروح معاها ولات داتني معاها و قالتلي منها تشمي شويا هوا فرحت اوموا نفاجي على خاطري بصح خفت منو قلتلها لوكان عيطتي لصراع شاورتيه قالتلي نهار يولي راجلك تع الصح يجي يحاسب.
لبست و رحت معاها وصلنا نائل و قالها على ساعة نولي ليكم قالتلو ربي يوفقك ياوليدي، هو أكثر واحد من ولاد أم سعد لي يحبها و الوحيد فيهم لي يعيطلها يما تربى عندها.
قعدنا نسناو في دالتنا حتى نطقت وحدة من النسا لي كانو فلاريسبسيو سقسات الحاجة قالتلها هادي بنتك؟ قالتلها لالا مرت وليدي قالتلها اسمحيلي عمبالي بنتك عجبتني حبيت نخطبها، تقلقت الحاجة و كي جات داخلة للطبيب قالتلي اقعدي هنا و ما تحكي مع حتى وحدة درتلها براسي إيه بصح هوما ما حبسوش من الاسئلة دياولهم إدا عندك خياتك؟ وين تسكنو؟ .....
كي خرجت ما حبتش تشقي نائل قالتلي نحكمو طاكسي و عيطتلو قالتلو ما كالاه جي رانا جايين كي وصلنا قدام الدار كانت وحد المرا جارتهم تغسل في باب دارها سلمت عليها الحاجة قالتلها وش راكي أم ضياء قالتلها الحمد لله و انتم قالتلها هادي بنت صراع؟ قالتلها لالا مرتو حطت يدها على خدها و قالتلها وين هي وين صراع راهي قد بنتو الحاجة تقلقت منها و دخلت للدار.
دخلنا من الباب تع الكوزينة قالتلي مرت لوسي جا راجلك و سقسى عليك قلتلو راحت مع الحاجة للطبيب قلتلها وين راهو..وقتاش جا.. صح سقسى عليا؟ قالتلي إيه هو طلع و نتوما دخلتو اطلعي شوفيه يبان عيان.
طلعت نجري كنت بزااااف متوحشاتو، سمانة بلا بيه جازت عليا تقول عام، دقدت قال ادخل دخلت صبتو ينحي في صباطو قتلو على سلامتك هدا وين نورت الدار قالي وين كنتي؟ قتلو رحت مع الحاجة للطبيب قالي و أنا علاش ما علاباليش؟ سكت، رفع راسو و خزر فيا قعدت نشوف فيه و أنا خايفة قالي روحي وجديلي الدوش، هو دخل يدوش و انا قعدت نخمل في شومبرتو و فرغت حوايجو من الكابة حتى دخل عليا بالفوطة حطيت راسي و جيت خارجة عيطلي ليلياااان.. درت ليه قتلو انعم فتح البورطفاي جبد الدراهم و قالي هاكي قتلو لالا عمو الحاجة ماشي مقصرة معايا في والو قالي شكون راجلك أنا و لا الحاجة؟ تنهدت فرحت كي قال هكدا قالي شدي مصروفك تديه من عندي و ما تزيديش تخرجي بلاما نكون عارف فهمتي؟ درتلو براسي إيه.
حبطت سقساتني الحاجة عليه قلتلها راهو يبدل هزت راسها، شويا هكدا و دخل عليها سلم على راسها و جابلها كادو و قعد يدير فالطوايش و يضحك فيها ينحيلها في الزعاف، كان يهدر مع يماه و حلا و حرب و انا متجنبني ما عرفتش علاش.
خرجت رحت نوجد العشا مع نوال كي سقينا الماكلة قالتلي الحاجة روحي عيطلي لراجلك فاقت بلي ما راهوش يهدر معايا،جيت نطلع نعيطلو بصح عزت نفسي عليا علاش نرمي في روحي عليه إدا هو ماراهوش حايبني، وليت بعثت وليدو حرب عيطلو، شويا هكدا و حبط و أنا نتبع فيه بعينيا و قلبي محروق عليه، ملي قعدنا فالطابلة و عينيا في عينيه حس بيا بصح ما دار حتى جاست و هد الشي لي زاد هبلني، حتى نطقت الحاجة قالت ليوم شافو ليليان عند الطبيب خطبوها مني عمبالهم بنتي و هو عقد حواجبو و دار روحو ياكل زادت كملت قالت حتى جارتنا أم ضياء ما أمنتش كي قلتلها بلي هادي مرت صراع عمبالها بنتو كانت حايبا جي تخطب هههههه منبعد خزرت فيه و قالتلو ياوليدي إدا ما راكش حايب ليليان و تقول صغيرة عليا ما تعلقهاش و توقف في مكتوبها خلي الطفلة تفرح. بووووووم كلاشاتو عيني عينك ههههههه
خبط المغرفة و قال الحمد لله قالتلو وين رايح ما كليت والو (تقتل فيه بالبارد) قالها شبعت منبعد دار ليا و قالي كملي تعشاي و طلعيلي لاتاي درتلو براسي إيه و نضت ديتلو قال ادخل، دخلت صبتو منحي قمجتو و رايح جاي فالشومبرة كان يغلي من الزعاف، رحت ليه حاكمة كاس لاتاي في يدي باش ما يطيحش قرب ليا و جبد يدي زيرهالي على الكاس و زير على سنانو قالي راكي فرحانة ياك؟ شفت وجهك نور مقبيل كي كانت يما تقول بلي خطبوك عاجباتك الحكاية بزااااف ... قتلو لالا عمو بصح اطلق يدي وجعتني، قالي الوقت لي نكون حايبك تقوليلي كبير و الوقت لي لازم نكون راجلك و تسمعي كلامي ما ديريليش حساب و تخرجي بلا علمي قتلو عمو تعيش اطلق يدي لاتاي سخون قالي حرقاتك ياك هكداك قلبي راهو يتحرق كي واحد يجيب سيرتك افهميييييي... و نحا الكاس من يدي و خبطو فالقاعة و قالي اخرجي علياااااا
بقيت نحك في يدي و نبكي حرقتني، طبعني اخرجي براااااا ... طحت فالقاعة، حطيت راسي ما بين رجليا و قعدت نبكي و نشهق و هو يروح و يجي و يستغفر و يدعي ياااارب اعطيني الصبر... منبعد قرب ليا قالي خلاص نوضي و ما تزيديش تعاوديها.
نضت وقفت و قتلو وشنو هدا حس بيا روحي رايحة تخرج براكاااات قالي نقصي حسك ما تخلينيش نغلط معاك قتلو تحب تغلط غير اغلط إدا حبيت تذبحني غير اذبح عيييت مدور وجهك عليا أنا وش ذنبي وش درتلك فواش غلطت معاك، غير تتقنط من واحد تحرقني بنار قلبك و حبيتني نحس بيك و ناخذ شورك و ما نخالفلكش الراي عمرك و ادا حسيت بيا و قلت يادرا وش كاين في قلبها، جيتكم كي الأسيرة لا حول و لا قوة ليا ترحموني نهار و تذلوني شهور وش درتلكم، إدا ماراكش حايبني خليني بصح بركا ما تآذي فيا قالي اخرجي برا قتلو ما نخرجش و دوك تعيط لماما جي تديني ما نزيدش نقعد هنا قالي قتلك اخرجي براااا قتلو برك قولي وش درتلك حتى راك تعامل فيا هكدا، رفع راسو للسما و قال لا إله إلا الله منبعد خزر فيا قالي مانيش حايب نسمعك اخرجيييي .. قتلو علاش نخرج و علاش نبقى هنا بوش من صفة؟ بنتك؟ مرتك؟ فارض روحك عليا و تقولي راجلك ما راجلك، تحكم فيا و خانقني و أنت أصلا ماشي معتبرني مرا براكاااات حس بيا شويا، بدا يحك في وجهو و يقولي حبيتيني نحس يااااك ... و قرب ليا قالي حبيتيني نعتبرك مرا .. انطقيييي .. حبيتيني نشوفك مرا؟ ما يكون إلا خاطرك و طفى الضو بالخف ولات الدنيا ظلمة و انا تشوكيت أصلا عندي فوبيا من الظلمة و حسيت بخطواتو كي جا يزرب ليا قلبي تزير حتى رماني فوق البونك و قال وش حبيتو عندي؟ حبيتوني نولي راجلك ماشي مشكل دوك نولي راجلك جيت نوض عاود طيحنى فوق البونك و حكملي يديا ثبتهم و أنا نقول بعدنيييي بدا يشم في رقبتي و انا نتخبط تحتو قالي اششششت حسك ما نسمعوش بديت نبكي و نقولو عمو خليني الله يخليك تعيش ما كنتش عارفة هداك الوقت وش كان حايب عندي بصح خفت منو حتى ريحتو لي كنت نحبها كرهتها في هديك الدقيقة ما حملتوش حسيتو وحش هجم عليا حب ياكلني... وين راحت الحنانة لي ولفني بيها؟ بقيت نتلوى و نجبد في يديا باش نسلك روحي منو حسيت روحي رايحة نتخنق و هو فوقي و وجهو في رقبتي نضرب فيه براسي و نقولو بعدني و الله غير نصوغ و نلم الدنيا عليك، كي ما قدرتلوش صغت مامااااااااااااا... غلقلي فمي بيدو و قالي اششششت و مزير على سنانو ما كانش كامل في حوالو صراع لي نحبو راح و جا في بلاصتو وحش.
كي طلق يدي باش يسكتني ضربتو و طبعتو و نضت نجري غلقت الباب على روحي فالصالدوبا و نبكي بالشهقة ما فهمتش وش صرا أصلا وشنو هداك الوضع؟ ما كانش يضرب فيا و ما كانش يبوس فيا عفتو و قعدت نمسح في رقبتي و نغسل في وجهي و نبكي بدا يطبطب فالباب قالي اخرجي، بقيت نخزر فالباب خايفة و نستر في صدري قالي راني نهدر معاك اخرجي قتلو ما نخرجش رووووح قالي ليليان تعيشي ما تعينيش اسمحيلي اخرجي نهدر معاك برك قتلو رووووح ... تعيش عيط لماما جي قالي و الله يا بابا ما نديرلك والو اخرجي برك قتلو عمو تعيش عيط لماما نحتاجها، طلعت الحاجة و بدات تعيط عليه قالتلو وش درتلهااااا؟ و بدات طبطب فالباب و تقولي قوليلي بنتي وش دارلك، ليلياااان افتحيلي ما تخافيش راني معاك، فتحت الباب و خرجت نجري حضنتها و نبكي بالشهقة و مكروشية في حوايجها و هي تمسح على راسي و تقول باسم الله عليك يا بنتي خلاص ما كاين والو.
قالها الحاج وش بيها علاش كانت تصوغ قالتلو أم سعد بالاك كاش ما خرجلها، و هي تقولي وشبيك خنقتني الدموع و ما عرفتش وش نواجب ناضت تعيطلو صرااااع وش بيها الطفلة كان دخل لشومبرتو ما حبش يواجبها قالها الحاج دخليها للشومبرة تتكالما علاش راهي هنا، جات دخلني و هي محضنتي غير وقفت عند الباب و شفتو بديت نجبد في روحي و هو حاط راسو و ساكت قالتلو انطق وش درتلها؟ كي شافتني ما حبيتش ندخل دخلتني لشومبرة حلا جاو كامل الدراري ولادو و ولاد سعد دارو بيا جا هو دخل قالهم علاش راكم متلايمين هنا سينيما بلا دراهم أيا اخرجو براااااا
نطق الحاج قالو الطفلة مشوكية و انت غير ساكت فهمونا وش كاين؟ دارت ليه الحاجة قالتلو أهدر يا وليدي وش بيها الطفلة؟ ناض يعيط قالها وش حبيتيني نهدررررر ماشي حايبة تكون مرتييييي قتلك ما تفهمشششش ...
عمبالك ما نحسش و أنت جاية قدامي و تحكي بلي مرتي يخطبو فيها قتلتيني يا يما و الله غير قتلتينييييي، كان يهدر بالعياط و يرفد فالدوزان و يكسر، من الخوف غلقت ودنيا و نضت نصوغ و نكروشي في الحاجة، خبط الباب و دخل لشومبرتو
نطقت أم سعد قالتلها ما تقوليليش دخل عليها خزرت فيا الحاجة مخلوعة قالتلي قوليلي يا بنتي دخل عليك؟ و انا غير نبكي ما عرفتش وش نقولها، راح ليه الحاج ما حبش يواجبو منبعد دخلت عليه الحاجة صابتو قاتل روحو بالدخان الڨارو مور خوه قالتلو أهدر معايا يا وليدي دخلت عليها؟ قالها يما خليني في حالي تعيشي قالتلو واجبني برك قالها لالا ارتاحي طفيت الضو برك كي قربت ليها خافت خلاص دوك روحي بجاه ربي خليني وحدي قالتلو علاش انا قتلك تعامل معاها هكدا؟ قتلك روح معاها بلعقل، رفد تلفونو و دخانو و خرج، قالها الحاج وشبيك نورية هبلتي هدي منك انت العاقلة كيفاش تقوليلو مرتك خطبوها ادا ما تديهاش نزوجها حسبتيه حجرة؟
رقدت في بلاصة حلا و فالليل قعدت نتفكر مع روحي وش صرا حكمت رقبتي و كمشت روحي و بديت نبكي، أنا هكداك راحت التريسيتي خفت شديت فالحيط و نمشي باش نخرج نحبط لتحت حتى نشوف خيال واحد مورايا قفزت و صغت نطق نائل قالي ما تخافيش ليليان هدا أنا و شعلي لاتورش تع التلفون و حبطني لشومبرة الحاجة، قالتلي الحاجة ليليان ارواحي و فتحتلي فراشها رقدت عندها باينة محضنتني.
لحق وقت الفجر هي راحت تتوضى تصلي و صراع دخلت نضت نجري غطيت روحي و قتلو بعدني قالي اششششت ما تخافيش ما نديرلك والو جيت برك نطمن عليك قتلو قتلك بعدنيييي قالي بهدلتيني نوضتي الدنيا الله لا تربحك و خرج دخلت الحاجة قالتلي لالا يا بنتي ماشي هكدا علاش العياط هدا راجلك قلتلها ما نحتاجوش رجعوني لدارنا.
مع الظهر جات هيام قالتلي ليونة عميرة مازالكي لدوك خايفة و تبكي علاش وش دارلك آذاك؟ درتلها براسي إيه قالتلي احكيلي ياك أنا اختك حكيتلها قالتلي هدا ماكان؟ قلتلها إيه قالتلي هد الامور تصرا ما بين أي راجل و مرتو برك انت ما تقبلتيهاش، هو راجلك ما يلزمش تمنعي روحك عليه، قلتلها ما نحتاجوش حبيت نرجع لدارنا قالتلي شحال من مرة نقولك صراع هو أهلك بصح علاش حتى تصرف هكدا؟ قلتلها كي حكاتلو الحاجة بلي خطبوني و قالتلو يا تديها يا نمدها فرغ زعافو فيا قتلو علاش مرتك غير باش تحاسبني؟ قالتلي شوفي ليليان انت مازالكي صغيرة و ما تعرفيش ياك ماشي مقصر معاك في والو لي تطلبيها تحضر ماشي باخل عليك بالمصروف ما يخلي حتى واحد يدنى ليك و مطلعلك علامك قدامهم، حنين معاك و يدير كلشي باش يرضيك و يفرحك، مخليك على راحتك و يساعف فيك و يقربك ليه غير بلعقل منبعد جي مع لخر في دقيقة تقوليلو انا ماشي مرتك؟ هو دار كلشي و ما فهمتيش بلي يحبك بقاتلو غير هد الحاجة باش يثبتلك بلي راجلك و يحوس عليك كان برك يستنى في الوقت المناسب و نتوما ضغطتو عليه طرطق، مارانيش ندافع عليه بصح هو كي ينضغط و يتقلق يولي ما يعرفش يتصرف قلتلها بصح انا ما كنتش حايبا هكدا قالتلي وش حبيتي يمال هو صابر و انت تروحي تعيطي عليه و تقوليلو حايبا نكون مرتك تبروفوكي فيه؟ و كي يقبل يديرلك رغبتك تلمي عليه الدنيا و تقولي لالا؟!
قالتلها أم سعد خلعتنا لبارح عمبالي خرجلها جن و هي حكايتها باسها.
سكت و قلتلهم في قلبي إدا الزواج هكدا بناقص بطلت.
قعدت 4 أيام ما قدرتش ننسى هداك الموقف و هوما دارني تحريشة يضحكو و يقولو فضحاتو.
كان كي يدخل ما نخزرش فيه و نروح ديراكت للشومبرة نتغطى، حاول شحال من مرة يهدر معايا كي يشوفني نبكي و ما حبيتش نخزر فيه يولي يخرج.
فالليل كي كملنا الشغل و رقدو كامل جوايه ال12 تع الليل تخنقت نضت من الفراش و طلعت للسطح قعدت نبكي حتى حسيت تفتحت باب السطح نضت نجري صبتو صراع قتلو ما تقربش لياااا قالي وش راكي ديري هنا البرد عليك قتلو تعيش رووووح قالي احبطي و الله ما نديرلك حاجة البرد عليك تمرضي و قرب ليا حطيت يديا فوق راسي و نضت نبكي و نقولو رووووح تعيش رووووح، بقى واقف يخزر فيا تنهد و قالي و آخرتها كيفاش نقعدوا هكدا دوك؟ قتلو تعيش رجعوني لدارنا قالي ريحي 5 دقايق و احبطي ما تقعديش هنا و حبط.
قعدت تكيت على الحيط و نبكي حتى عييت غست ما فقتش حتى صبتو قدامي تعڨنت ما قدرتش حتى نصوغ خزر فيا و رمي يد تحت رجليا و يد مور ظهري و رفدني قتلو حبطني همس في ودني قالي أنت تأمري بصح ما تبقايش هنا نخاف عليك و داني لشومبرتو حبطت و جيت رايحة قتلو ما نرقدش هنا، قرب ليا جيت نبعدو جبدني لصدرو و حضني قالي تخافي مني؟ و الله ما نديرلك والو جابها الشيطان الله ينعلو و يخزيه علبالي أنت ما تقدريش تولي مرا و بعد شويا طبعتو من صدرو ما خفتش منو كان كالم بزاااف، قالي راني رايح برك ريحي هنا و ارقدي انا نحبط نرقد لتحت و رفد تلفونو و البورطفاي ديالو و خرج، تكسلت في فراشو و قعدت نخمم.
الصباح لبس لاتونو ميليتار ديالو و جا قعد قدامي مسح على شعري و باسني على جبهتي و خرج، على قد ما كنت خايفة منو على قد ما عاود حيا في قلبي مشاعر الحب من جيهتو.
شويا هكدا جا محمد وليد سعد طبطب عليا جابلي فطور ملبرا قالي بعثني عمو صراع شريتلك هادو.
لحقت ال10 ونص و واحد ما طلع ليا نوضني على جال الشغل استغربت قلت نحبط نشوف صبتهم كملو الشغل و أم سعد تخزر فيا بنص عين و تتعنكر.
دخلت للحاجة قلتلها صباح الخير قالتلي صباح النور سقسيتها قالتلي بلي صراع داوس صباح مع أم سعد قالها الطفلة ولات صفرة و ما راهيش تاكل و نتوما عڨابها بالشغا ما جبتوهاش خدامة عندكم، تبسمت قلتلها صح قال هكدا قاتلي ليليان بنتي ما تخسريهش هو سندك في هد الدنيا واحد ما ينفعك هو أهلك اطلعي لشومبرتك و ريحي.
طلعت و قعدت نتفرج حتى غفيت ناض راسي ثقيل من الرقاد خزرت صبت صراع مفرش فالقاعة و راقد غاضني حطيت راسي على المخدة و قعدت ندقق في وجهو منبعد مديت يدي و رفدت تلفونو من تحت مخدتو و قعدت نلعب بيه تالمو برونشيت مع اللعبة ما فقتش حتى حسيت بيه ساماني و قالي كيفاش راكي تحسي روحك قفزت رميت التلفون و غطيت راسي، ما هدر والو مسح على ظهري فوق الغطا و ناض خرج.
حبطت قعدت مع الحاجة دخل صراع علينا تبسم و خرج، مرات جوز عليا لحظات نولي مرعوبة منو بصح نرتاح كي نخزر فيه ما نشبعش بشوفتو.
سمعناه يضحك و يهدر مع هيام منبعد هي دخلت متبسمة و قالت السلام عليكم رديناهالها خزرت فيا قالتلي وليتي صفرة علاش ما تاكليش تبسمت و قلتلها ماعطانيش خاطري قالتلي شحال توزني؟ قلتلها ما علباليش، راحت بنت سعد جابت الميزان طلعت صبت روحي 47 كيلو قالتلي شحال طولك قتلها 155سم قالتلي راكي ضعيفة بزاف و طلعت هي صابت روحها 78 كيلو ههههه ضحكت و قالتلي تعلمي ههههههه قلتلها و صراع شحال؟ قالتلي آخر مرة وزن روحو كان 99 كيلو مي دوك ما علباليش ادا نقص و لا زاد و لا مازال هو هو قلتلها بصح بزاااف قريب قنطار ولاو يضحكو قالتلي الحاجة قولي الله يبارك يابنتي ربي يحفظو.
نضت للكوزينة و أنا نضحك باش نشرب الما حتى نشوف فالدنيا برا ولات حمرا قلت ربي يستر قالتلي نوال على حساب الشوفة جاية الشتاء بالتراب غدوا ان شاء الله عندنا ما نغسلو، قالت هيااام ياخاه عليا و أنا خليت التواقي في دار مفتوحين دوك تولي دنيتي غير تراب.
دخلت للشومبرة جات ليا بنت هيام الصغيرة قالتلي ليليان تعرفي تقريني رياضيات؟ قلتلها وش من سنة راكي قالتي رابعة ابتدائي قلتلها ساهلة ارواحي أنا بديت نقري فيها حتى نحس ضاقت فيا النفس ما حملتش لكليما و زيد أنا عندي ربو غير مزمن و عندي شحال ما حكمتنيش أزمة، جيت نايضة ما قدرتش قعدت شايدة في رقبتي و نحاول نجبد النفس عينيا خرجو و جنات بنت هيام تقولي وشبيك؟ ما قدرتش نواجبها راحت تجري ليماها جابتها قالتلي وشبيك درتلها بيدي جاست تع ضاقت فيا النفس، عيطت لنائل مسكين كان هداك وين دخل للدار، جا كي شافني هكداك حبط يجري نوض الطونوبيل و هي رفدتني و حبطتني داوني للسبيطار غير وصلنا رفدني نائل و دخلني ليزورجونس دارولي لايغوسول، كي بدات ترجع فيا النفس جا الطبيب حكاتلو هيام شافلي صدري، قالها عندي حساسية الصدر و بداية ربو و كتبلي الدوا.
جاني فودني صوت صراع فتحت عينيا شفتو داخل، كي وصل قدامي قالي الحمد لله على سلامتك، ملوقتاش و هو عندك الربو جيت نهدر ما قدرتش كانو دايريلي لوكسجين قالي ريحي بابا و باسني على راسي منبعد سڨملي الخمار و حكملي يدي و يخزر في عينيا، عينيه هدرو و أنا فهمتهم تبسمتلو فتح يدي وباسها، دخل الفرملي باش ينحيلي الدم المرة الاولى غلطت ما حكمش العرق مليح راطاني زاد المرة الدوزيام كيف كيف حتى رجع الدم يسيل ناض يعيط معاه صراع قالو وشبيك؟! وين قريت أنت يرحم باباك؟! قالو ليفان دياولها رقاق بزاف قالو صراع ادنى تشوف و زير جبد العرق قالو و هدا وشنو؟ نحالي و راح قالي ما كان والو خلاص جازت.
شفت وحدة ملي قعد معايا ما نحاتش عينيها عليه فصلاتو تفصيل حبيت نضرب لابراي هديك نحيها و نوض ليها نشنشفها نمسح بيها الدنيا، هو راح جابلي الدوا كي جا مولي خبطت فيه قالها بلعقل شوفي قدامك قالتلو اسمحلي ما انتبهتش قالها يمال ردي بالك المرة الجاية وين تحطي رجليك، تبسمت جاتني على قلبي غزالها.
كانت هيام تڨصر مع وحد المرا قالتلها هادي بنتو؟ سكتت هيام خزرت فيه و هو عقد حواجبو و قالها علاش تحوسي تفهمي؟ سكتت و دورت راسها و بنتها قعدت تلوم فيها قالتلها علاش تسقسي.
خزر فيا قالي حجابك وين راهو؟ سكت دار لهيام قالها من نيتكم جبتوها هكدا قدام خلق الله؟ قالتلو ما جبناش خبر كي صبناها هكداك وشمن من عقل يبقى؟
كي جينا خارجين جا يرفدني قتلو لالا قالي تمشي هكدا مفصلة قدام هد الأمة كامل يشوف فيك لي يسوى و لي ما يسواش؟! حطيت راسي ما عجبنيش كلامو، حس بيا زعفت رفدني و قالي غير لبارح و أنا رافدك دوك طاحت عليك الحشمة؟ و تبسم
رفدني و انا كي زيتونة مرت باباي و هو بسلامتو قد بلوتو هههههههه
مشى بيا و أنا شديت في رقبتو، الناس تشوف حشمت غطيت وجهي بصدرو و درت روحي راقدة و خلاص هعههه
قالي ماشي تبروفوكيني دوك قدام الناس رايح نطيح ههههه وليت نضحك قالي اواااه انت ماراكيش معولة ترحميني و قال لهيام أنا نديها معايا في طونوبيلتي و أنت روحي مع نائل تبسمت معاه و راحت...
