#المراهقة و الأربعيني:
#الجزء 20:
دخل علي وليد هيام قالي جيت ندي لاتاي للرجال قتلو السنيوة راهي واجدة اصبر عليا شويا برك دوك نسربيلهم، شللت يديا و بديت نسربي حتى نسمع في واحد جاي و يقول واش وجد لاتاي و لا مازال؟ درت صبتو واحد في العشرينات هكداك غمز علي قالو شكون هادي؟ دخلت أم سعد واجباتو و تضحك هادي طليان هههه لخطر عشية كاملة و جداتهم تتمسخر و تقولهم وين راهي هديك ليليان و لا طاليان و لا ما نعرف وسمها و يضحكو، دات مغارف و خرجت، عاود سقساه قالو و الله من نيتي شكون هادي؟ قالو هادي ليليان مرت خالو صراع خزر فيا قالي صح أنت مرتو؟ تبسمت و قتلو إيه وعلاش؟ قالي وين انت و وين صراع كيفاش حتى جابك قالو علي وشبيك ياسر هادي لي خوها قتل خالو عابد و زوجوها لخالو صراع، قالو علاش تصافيتو؟ يعني جابها دية؟ قالو لالا ماشي هكداك بصح عمو عابد كان داير مشكل معاهم طلبوا من خالو صراع يستر عليها قالو آاااا دوك تفكرت سمعت بلي عابد تبلا وحدة وشهر بيها هادي هي؟ قالو ايه قالي مرحبا بيك منشرفين بصح علاش أم سعد تعيطلك طليان؟ قتلو تربيتها هكدا وش حبيتني نديرلها ضحك و قالي و الله جواب في بلاصتو، صحا اعطينا لاتاي و البقارج الكبار أنا و علي نغسلوهم في الڨاراج إدا ما قدرتيش قتلو و الله تعملو فيا مزيا ظهري تكسر، دار لعلي قالو حرام عليهم علاش راهم طالقين عليها كلشي.
راح هو و علي داو لاتاي و رجع هو و ياه و معاهم محمد وليد سعد و زوج ولاد وحدوخرين من ولاد عمومهم قالي دوك هوما يغسلوهم و يكملو كامل الماعن، جيت نرفد الماعن قالي خلي انا نرفدهم ريحي.
دخلت حلا قالتلي نعاونك؟ استغربت هادي منين طاحت عليها الحنانة قلتلها مادابيك مام انا عييت وقفت معايا تغسل فالماعن حتى دخل ياسر قالها وش راكي حلا صافا؟ قالتلو الحمد لله و أنت كيفاش راك هادي غيبة ولينا كامل ما نشوفوكش قالها راكي تعرفي حالة الجامعة ما كاش كامل الوقت درت ليه قتلو تقرا فالجامعة؟ قالي إيه علوم سياسية قتلو أنا كان حلمي نقرا هندسة قالي وين واصلة فالقراية؟ قتلو خامس علمي و بطلت جابوني لهنا كي تزوجت.
حنا نحكيو و صراع دخل ضرب على كتف ياسر و قالو وش راك ياسر صافا؟ قالو الحمد لله و انت كيفاش،؟ علبالك ما آمنتش كي قالولي هادي مرتك ضحك و قالو ههههه راك تشوف على آخر عمري صحا كيفاش مع القراية؟ قالو الحمد لله رانا معاها، دار ليا قالي وجدي لاتاي منبعد قالو علاش وش راك دير هنا قالو جيت ندي لاتاي كي شفت الطفلة وحدها عيطت للدراري يعاونوها قالو آاااا منبعد دار ليا قالي سربي لاتاي و ادخلي لداخل قتلو و هد الماعن شكون يغسلهم قالي ما تناقشينيش، سخنت لاتاي و سربيتو و دخلت لداخل جات ليا أم سعد تعيط و هدوك الماعن ليمن خليتيهم؟ خرجت نكملهم صبت حلا حكمة لافات و لاتية تڨصر مع ياسر وليت نحيتها لافات انا نرغون و هي تشلل و تڨصر تهدر كثر ملي تخدم منبعد قالي ياسر عندك انستڨرام قتلو ما عنديش تلفون قالي كاش طفلة فهد الوقت ما عندهاش تلفون؟!! قتلو ماما ماكانش تحب تقولي يفسد لبنات ناض يضحك قالي مليح بصح كيفاش راكي جوزي وقتك قتلو هكداك وخلاص ما عندي ما ندير قالي و عمي صراع علاش ما شرالكش واحد؟ قاتلو حلا بابا ما يحبهاش تشد التلفون مرات كي تحب تسمع الغنا أنا نسلفلها ديالي قالي منبعد نبعثلك mp3 فرغيها و دخلي الكارت ميموار في تلفون حلا و تلشارجي الغنا لي تحبيه و اسمعي براحتك قتلو عمو صراع ما يحبش يقولي الغنا حرام.
كملنا شغلنا و هو راح قعدت نقصر أنا وحلا حتى دخل علينا صراع خزر فيا و قالي أنا وش قلت؟ قتلو دخلت كيما قتلي منبعد أم سعد جات بهدلتني قدام النسا و قاتلي روحي كملي الماعن قاتلو حلا إيه صح بابا قالها انت ما عندو ما دخلك و دار ليا قالي اطلعي لفوق طلعت لحقتني حلا قعدت معايا و تحكي غير على ياسر عرفتها بلي يعجبها.
حنا هكداك نحكيو و نضحكو و هو دخل علينا سكتنا راح للخزانة وقف عرفتو حب يبدل رحت نجبدلو حوايجو قالي بعدي عليا منا تشوكيت هدا وش بيه غير خرج قلت لحلا باباك وش بيه؟ قالتلي زعما يكون سمعنا؟ قلتلها ما نظنش بالاك أم سعد كاش ما قلقاتو لتحت.
خلاصت الوليمة و الناس بداو يروحو و صراع يشرشيلي ما عرفتش وش بيه و حلا هاديها ربي معايا ما فهمت والو.
كي راحو الغاشي حبطنا لعند نور كانو دارهم داينيها معاهم و صراع كان خرج ما نعرف وين راح منبعد جا علي باش يدي يماه عطاني mp3 و قالي ياسر وليد جدو عزام بعثولك فرحت بيه بزاف و قتلو قولو يعطيه الصحة بصح هدا كيفاش يمشي قالي راهو مديشارجي شرجيه و اسمعي.
شعلتو صبت فيه الغنا فيه لي نحبهم فيه لي لالا و حلا زادت طلعتلي فيه وليت نرقد بيه و نخدم بيه الشغل هكدا ما نسمعش تنقريش أم سعد بصح الشي لي لاحضتو منهار الوليمة و صراع يتجنبني و مقلق، جازو زوج سمانات و هو على هداك الحال حتى تقلقت بصح ما عندي ما ندير.
وحد النهار كان قاعد ماشي خدام و أنا ما كانش علبالي بلي راهو فالدار لخطر كي فطر عاود طلع لشومبرتو و ما شفتوش ما فقتش حتى حسيت واحد يهز في كتفي ملور نحيت الكيتمان و درت صبتو هو قالي وين راهو عقلك عندي ساعة و أنا نعيطلك طرشة؟ قالي وشنو هدا لي في ودنك؟ جبدت ال mp3 من صدري وعطيتهولو قالي منين جاك هدا؟ و دار الكيتمان في ودنو كي سمع الغنا ناض يعيط قالي شحال من مرة قتلك ما تسمعيش الغنا علاش تحبي تزكري فيا قتلو عمو ما ..... قالي منين جاك هدا؟ قتلو ياسر وليد عمك بعثهولي مع علي وليد هيام قالي وشنو؟!! عاودي عاودي منين تعرفي انت ياسر و علاش حتى يبعثلك و دايرين الطفل مرسول ملفوق يهدر و حاكمني من ودني و يجبد و خبط هداك ال mp3 على الحيط فتتو قتلو قتلك اطلقني و طبعتو قالي طبعيني؟!! اطلعي للشومبرة ليوم نعاودلك التربية قتلو ما تعلمني ما نعلمك هنا حدها بزااف خلاص مانيش قادرة نزيد نحملك كثر و جيت رايحة قالي راكي تقامري فيا؟! قتلو دوك تديني لدارنا و أنا نقول ليحيى يوصلني لعند خوالي قالي قتلك اطلعييييي خيرلك خرجت الحاجة و تقول استهدو بالرحمن يا ولادي وشبيكم؟ جيت موراها و قلتلها اهدري معاه شوفي علاش عندو شحال و هو قالب خليقتو قالي يا وحد ... عليمن راكي قالب خليقتو؟!! ليوم نربيك و جا يجري ليا و يعيط حب يجبدني من موراها شداتو و أنا نبكي، جا باباه و نائل حكموه و انا نقولهم عييت بزااف جبتوني خدامة تحرثو عليا ماشي باش تستروني ما نزيدش دقيقة عندو رجعوني لدارنا، قالي الحاج نرجعوك للارهابي؟ قتلو إيه نعيش مع الإرهابي و ما نعيش معاه عييت منو ما ينحملش قالهم اطلقوني عليا ما دخلوش رواحتيكم انا نعلمها الأدب، بالسيف باش خرجو نائل و الحاجة قاعدة تحلل فيا قلتلها بجاه ربي رجعوني لدارنا حبيت نكمل قرايتي عندي لتم صحبتي نحكي معاها نڨصرو نضحكو نروحو و نجيو كيف كيف من المسيد ما قدرتش لهد المعيشة خلاص هدا القيس غير لي يتقاوى عليا و هو حب يدفني فالحياة.
عيطت الحاجة لهيام جات صابتني نبكي و حالتي حالة قلتلها عييت منو 24 ساعة و هو غير العياط و الزڨا نقرب ليه يزعف نبعد عليه يزعف ما عرف كيفاش نرضيه قاتلي ساعفيه بالاك شويا مضغوط فالخدمة قلتلها و أنا شكون يساعفني، قاتلي خليه كي يتهدن يولي ليك وحدو قلتلها يتهدن و لا يقعد ما نحتاجوش عييت تفهمي وش معنتها عييت قاتلي علبالي راني حاسة بيك نوضي تروحي معايا تقعدي يومين تريحي مع البنات منبعد ربي يعملها تاويل.
رفدت حوايجي و رحت معاها لدارها لاقاوني بناتها سارة و جنات يضحكو و فرحانين بيا، قالتلي هيام دوك توجدلك سارة الدوش دوشي و ريحي انساي الهم، كي دوشت قالتلي سارة وش رايك نجبدلك شعرك قلتلها ياريت، كي كملت قالتلي هيام خليني نماكييلك يضوى وجهك.
لحق المغرب جات سارة قالتلها ماما وش نديرو لعشا جات تواجبها حتى نسمعو الخبيط فالباب قفزنا قالت هيام يا ستار شكون هدا و طلت قالت هدا أبو حرب فشلت في بلاصتي مازالو متبعني حتى لهنا، فتحتلو دخل سلم و وجهو ما يتفسرش انا رحت نجري لشومبرة الدراري قالها وين راهي عيطيلها جي قالتلو استهدي بالرحمن يا خويا وقت المغرب صلي منبعد كلشي ينحل ان شاء الله قالها أم علي ما تقلقينيش عيطيلها، قالتلو دوك وين اذن صلي و دوك نروح ليها تلبس و تروح معاك بلعقل على صحتك نسف و عيط لسارة باش يتوضى و هيام جات لعندي قبل ما تهدر قلتلها لوكان يموت ما نروحش معاه قالتلي خسارة عليك علاش تفاولي عليه بالموت تعرفيني ما نحبش عليه، شدي لسانك و ما تهدريش معاه كي تشوفيه مقلق، روحي معاه و ادا كاش ما دارلك عيطيلي انا ندبر راسي معاه وليت نبكي لخطر علبالي ما عندي وين نروح ولات تحلل فيا و تنصح فيا كي العادة حتى كمل صلاتو قالها أم علي راني فالطونوبيل 5 دقايق تكون عندي، نضت لبست بقيتهم و خرجت طلعت فالطونوبيل الخزرة ما خزرهاش فيا ما هدر والو كي لحقنا للدار ما حبطش منبا صرعنا بالكلاكسيو حتى حبط وليد سعد يجري فتحلو باب الڨراج دخل بالطونوبيل حبط و خبط الباب
دخلت لشومبرة الحاجة نحيت الخمار و قعدت نبكي دخلت عليا الحاجة قاتلي ما تبكيش لوكان ما جاش يحبك ما يجيش يجيبك سينو لوكان راهو رجعك لداركم و نحى مسؤوليتك من رقبتو، هو صح مقلق بصح و الله غير عزيزة عليه، جات حلا طلت براسها من الباب و قالتلي ليليان ادا ما عندك والو ارواحي اوقفي معايا فالكوزينة راني وحدي رحت معاها نتبهتلي قاتلي راكي ماكيي؟ قلتلها إيه قاتلي هدا وين بان وجهك قلتلها مام شعري جبدتو قالتلي وري نشوف نحيت الخمار وريتهولها قاتلي جاك ما شاء الله بصحتك أيا نديو العشا، رميت الخمار على راسي من و من و ما سڨمتوش مليح و رفدت السنيوة كان قاعد صراع و نائل يحسبو لخطر نائل يخدم كونطابل، قالتلهم الحاجة نوضو تتعشاو قبل ما يأذن العشا عليكم دار صراع قابلتو قعد يخزر فيا و ينسف و يستغفر قلت بالاك على خماري كي ما سڨمتوش مليح رحت للكوزينة بلخف عاودتو حتى دخل عليا و حكمني من يدي و دورني ليه و يزير في سنانو قالي وشنو هدا لي راكي دايراتو في وجهك ليمن راكي تزوقي في روحك قتلو علاش هدا تان حرام؟ قالي ليليااااان ما ترديش في وجهي راني نذبحك، طبعتو من صدرو و نضت نعيط بعدني مانيش حايباتك افهم إدا راك تشوف في روحك كبير أنا مازالني صغيرة و من حقي نعيش حياتي ما تدفنيش فالحياة، إدا شفتني ما نوالمكش رجعني لدارنا سترت عليا يكثر خيرك دوك خليني نروح بركات مليييت، شدني من شعري قالي يتسمى أنا كبير و تحوسي على واحد صغير ياك و انا نقولو اطلقني دخل الحاج سلكني منو قالو بلعقل عليه ياوليدي راهي طفلة بدا يعيط ما تقوليش طفلة هادي ماشي طفلة هادي مرتي.
داتني الحاجة لشومبرتها و انا نبكي و هو خبط الباب و خرج.
غدوا منداك جات هيام حكيتلها سمعتها كي فتحت السوجي مع صراع رحت نتصنت عليهم قاتلو وش بيك معاها ياخويا مازالها صغيرة علاش راك تتعامل معاها هكدا قالها ما دخليش روحك أنا نعرف كيفاش نرجعها للطريق و زيد انت وش خربطتيلها في وجهها قاتلو ماكييتلها برك و سارة جبدتلها شعرها قالها شكون قالك ديريلها هي بلاش كامل يخزرو فيها زدتي كملتي عليها قاتلو ما فيها والو الطفلة متزوجة علاش حتى تطلق الهانا على روحها و لي يدخل يهدر عليها قالها هي بيمن متزوجة بيا و لا بالناس يرحم والديك ما تزيديش دخلي روحك ما بيناتنا قاتلو إدا هكدا معليه جات من عندك حتى أنا ماشي ناقصني تكسار راس بصح قبل ما نخرج نبهك لحاجة الطفلة مازالها مراهقة و هكدا راك تهمل فيها أنت المسؤول عليها.
جازت 3 أيام و حنا على نفس الحال، موراها جا نائل ليا قالي ليوم يجيو يسهرو كيما ديك النهار برك اوقفيلي فالكوزينة على لاتاي و أنا نوجد الرانڨيلات قتلو معليه، وقفت انا وحلا فالكوزينة نڨصرو و نوجدو فماعن لاتاي دخل ياسر، على حساب وش حكاتلي حلا بلي تربى معاهم و كان ما يخطيش الدار غير ملي دخل الجامعة راح يقرا بعيد يجي غير فالعطلة.
قعد يڨصر و يضحك مع حلا و أنا درت روحي مشغولة خفت يدخل صراع على غفلة و نولي فالمشاكل معاه.
كيما كان الحال دخل صراع ملبرا رافد صاشي لاقاه ياسر شد الصاشي من يدو و يضحك و يقصر معاه و هو يتبسم برك قالو خير ما جابكم قالو جينا نسهرو، راني نوجد فالرانڨيلات مع نائل و مرتك راهي توجدنا فلاتاي و دار ليا قالي تعبناك اختي اسمحيلنا تبسمت معاه قتلو ما فيها والو خزر فيا صراع و تعنكر درت نحط الكيسان منبعد ياسر ضرب صراع للكتف يضحك و قالو على حساب الشوفة رايح تتعب على آخر عمرك و غمز لنائل، هو تقلق بصح ما قالو والو، رغم كل قسوتو بصح ما قدرتش نكرهو حسيتو حايب يهدر معايا و ما لقاش كيفاش كي كانوا لتم ما حبيتش نعذبو و انا نشوف فيه مجيني هكداك، درت روحي رايحة نجبد حاجة من البيفي لي كان موراه مديت يدي على جنبو باش نفتح قالي وش تحوسي تجبدي نجبلك و دار باش يفتحو همس في وذني قالي ما نحبش نزيد نشوفك هنا دوك تطلعي لفوق، درتلو براسي إيه و خرجت.
هو راح للصالو و أنا رحت لشومبرة الحاجة و تكسلت في فراشي و قعدت نتفرج فالتلفزيون، شويا هكدا دخل صاب يماه راقدة حطلي الصاشي تع السقايط لي جابها قدامي و قعد عند راسي يخلط في تلفونو، تمنيتو يهدر علبالي ما رايحش يستعرف بلي غلط معايا لخطر أنا تان زدت معاه فالهدرة و طولت لساني، هو الحق كي موالف يظلمني و نسكت يجي وحدو يطلب السماح.
كليت شويا و جيت نايضة لعبتها نتمتم مع روحي قلت هداك هو نوض نغسل سناني حبيت نوصلو ميساج باش يطمن و يعرف وين راني رايحة ما يبقاش موسوس و يجي يتبعني، هو فهم بقى قاعد و انا ما طولتش و رجعت تكسلت نعست غمضت عينيا حسيتو كي جبد عليا الغطا و باس راسي و خدي تنهد و مسح على شعري بلعقل و راح، تبسمت رايح يهبلني بحنانتو و عزة نفسو، صراع راجل وعندو كرامة مام يحن قلبو ما يتنازلش و هد الشي حبيتو فيه.
هو راح و أنا جبدت الريحة ديالو رشيت شويا منها في مخدتي نتونس بيها و رقدت.
غدوا منداك الصباح هو يستنى فيا نقولو صباح الخير و أنا كيف كيف بصح واحد فينا ما تنازل لخطر كل واحد فينا كان يشوف روحو هو لي عندو الحق.
كي تقلق ولا يحوس غير فيمن يفرغ زعافو صاب قدامو غير سعد قالو اسمع انت لوقتاش تبقى هكدا ولادك ضايعين و يماهم غضبانة و أنت هارب عند مرتك الثانية؟ قالو أبو حرب خلينا نأجلو هاد الموضوع شويا قالو نوض قدامي دوك نروحو نجيبوها و تطلب السماح منها و تتفاهمو و قال ليماه نوضي تروحي معانا قاتلو أم سعد و أنا؟خزر فيها و قالها نديك بصح تغلطي بكلمة قدامهم تشوفي.
لبسوا و راحو لعند نوال و أنا قعدت مع الشغل كي العادة كي كملت دخلوا و جابوها معاهم.
و صراع قال ليماه مادامك راكي لابسة نروحو نجيبو هيام و ولادها يتغداو معانا، علبالو بلي راهي زعفانة منو راح يراضيها.
قعدت نعاومن في أم سعد باش نوجد الطابلة حتى دخلت هيام و ولادها رحت نجري ليها حضنتها توحشتها و زيد زعفها بسبتي، صراع طلع لشومبرتو يبدل و هي غمزتلي قالتلي نروح نهدر معاه نشوف وش حكايتو.
طلعت ليه و أنا قعدت نستنى فيها غير وقتاش تحبط كي جات قلتلها وش قال؟ قاتلي قالي زعفان منها كي تخشن راسها و ترجعلي الكلام و أنا قتلو ساعفها دوك تتعلم بلعقل.
فهداك النهار ما قالتليش هيام الصح منبعد باش عرفت بلي استعرفلها بلي يحبني و غاير عليا بصح راهو يتعذب لخطر هو كان حاسب بلي كنت نشوفو كأب و نعوض فالحنان تع أهلي لي فاقدتو بيه، و قالها بلي عمرو و ادا طيحاتو مرا و نهار لي حب جرجراتو مراهقة كانت باينتلو بلي لوكان يستعرفلي رايح يفرض روحو عليا سورتو نهار لي جرحتو بالكلام و قتلو ادا انت راك شايف روحك كبرت أنا مازالني صغيرة هيام ما قدرتش تصارحني لخطر كانوا يشوفوني في زوج مراهقة و نية و ما شكوش و لا لحظة بلي راني عاشقة حتى خيالو.
أنا ما كنتش حاسة بواش كان في قلبو و هو ما كان فاهم بلي حبي ليه ماشي تع بنت لباباها و إنما حب إمرأة لرجل و قعدنا نتعذبو في زوج.
المهم شويا هكدا و حبط و نيفو فالسما قعدت قدامو فالطابلة و كل مرة نخزر فيا و هو ياكل ما خزرش كامل لجيهتي.
نائل كان ياكل ويقلب في ليشان فالتلفزيون جازت غنية قدييييييمة قالو صراع خليها قالو نائل ملوقتاش وليت تسمع الغنا ماشب تبت و ما وليتش تسمع لناظم الغزالي قالو ناظم يفتحلي جروح و زيد هدا موال ماشي غنا خلينا نسمعو شويا، قعد مبرونشي معاه و هو يقول:
