#المراهقة و الأربعيني:
#الجزء22:
قعدت نخزر في ظهرو تمنيت لوكان كانت عندي جرأة و قربت ليه بصح ما قدرتش قعدت هكداك حتى غفيت ما فطنتش حتى سمعت الدقديق فالباب هو تكسل على ظهرو و رفع راسو قال شكون؟ و أنا درت روحي راقدة بقيت مغمضة عينيا غير سمعتها قالتلو انا إخلاص درت و حطيت راسي على صدرو لعبتها نشخر ههههه هو تشوكا ما قدر يبعدني ماقدر يهدر و هي دخلت ديراكت بلا حتى ما يقولها ادخلي كي شافها حط يدو على ظهري و حضني و غطى صدرو لخطر كان بلاش ملفوق و ملتحت لابس غير شورت.
قالتلو اسمحلي أبو حرب علبالي راكم راقدين بصح الحاج يحتاجك و عندو ساعة و هو يعيطلك فالتلفون و ما ترفدش عليه، قالها راني دايرو سيلونسيو قوليلو دوك شويا نحبط لعندو و اغلقي الباب موراك، قعد محضني دار و دورني لعندو و رمى الغطا على ريسانا، استحيت كي دار هكداك بصح جاتني على قلبي مليحة ليها.
غلقت الباب و راحت و هو قعد كيما راهو حتى حسيتو عرق و بدا يتنفس بوحد الطريقة ما فهمتش وش بيه منبعد نحى يدو من تحت راسي بلخف و ناض يجري تقول هارب، نضت خزرت فيه صبتو يلبس قتلو اسمحلي لبارح فالليل خفت و حشمت نقولك على هديك رقدت عندك قالي بلاما يشوف فيا عادي عمو و خرج يجري.
استغربت وش بيه هدا يقولي عمو ما كفانيش يعيطلي بابا دوك ولات عمو؟!!
خزرت فالساعة صبتها ال 11 و نص ياخاه عليا رقدت حتى لهد الوقت، كي نرقد عندو في شومبرتو ما نحسش بالوقت تقول نتخذر.
لبست و خرجت شفتهم كل واحد لاتي بحاجة و هو سمعت صوتو قاعد مع الرجال فالصالو، رحت ديراكت للكوزينة وجدتلو باش يفطر و قلت لحرب عيط لباباك يجي ياكل واخلاص قاعدة تتعنكر فيا و تنسف.
جا قعد باش ياكل كنت غير أنا وياه لي نضنا روطار و مازال ما فطرنا و انا من عادتي الصباح نفرغ لاتاي على البسكويت و ناكل، قالي نشريلك سيليلاك خير من هدا أنت قاتلاتك لانيمي و ما صبتي غير هد التخربيط تاكليه، دخلت أم سعد قالتلها على سلامتك العروسة هدا وين تحبطي؟ قالها صراع خلي الطفلة تاكل براحتها تظل تهنبر عيات، راهم النسا على ريسانهم في هد الدار و لا شفتها غير هي، و دنالي الطبسي قالي كولي كولي من هدا خليك من هد التخربيط، و هي قالتلو وين هدا لي تظل تهنبر؟ لي يسمعك يقول بالصح، هداك وش خص قاعد يحامي على مرتو يخي وقت وصلنالو يخي و راحت، سكت عليها ما رجعلهاش منبعد دار لأخلاص قالها كي تروحي ليوم لداركم الطونوبيل لي توصلك ابعثيلي معاها حلا، تقنطت كي قالها هكدا قالتلو ان شاء الله و راحت للكوزينة و أنا قعدت شايدة الضحك ههههه حاوزها بالقدر.
كملنا هو ناض و انا رفدت السنيوة و دخلت للكوزينة صبت هيام سقسيتها على وليدها قالتلي والله يا ليونة غير ربي سترو الحمدلله قلتلها الحمد لله، وقفت مع البوطاجي نغسل الماعن دخلت أم سعد قالت لإخلاص ما تروحيش عيطتلي يماك و قالتلي بلي خاوتك راهم جايين يتغداو عندنا، تغداي و روحي قالتلها إيه، و دارت ليا قالتلي ليليان وجدي الطناجر باش نطيبو، رحت باش نجبدهم جازت إخلاص من قدامي و طبعت الباب تع البيفي على يدي قلتلها وش بيك قستيني قالتلي يا عمري مسكينة ما علباليش بلي رهيفة لهد الدرجة و بلخف تتوجعي، جبت الطناجر و قلت صح شي ناس ما يحشموش قالتلي أم سعد غير لخير وش بيك؟! قالتلها إخلاص ماشي كيما وحدة لعبتها قدام الناس الحشمة و الحيا و هي أكبر .... قلتلها شكون تقصدي؟ قالتلي هوما يعرفو رواحتيهم قلتلها ااااااه بالاك هي نفسها لي ما عندهاش ذرة تع كرامة تعيط للرجال في نصاص الليالي و يدخلو لشنابرهم و يتحاوزو ملفوق قالتلي عليمن راكي تهدري انت؟ قلتلها يعرفو رواحتيهم ما كالاه نوسخ لساني و هوما ما يلحقونيش حتى في ظفري، قالتلي أم سعد انت ولا وجهك صحيح علاش تهدري عليها وش دارتلك قلتلها و شكون لي قالك راني عليها ما عندي معاها والو هي راني نهدر عادي خالتي قالتلي يخلخل عضامك خفي لشغلك و لا شاطرة غير تلصقي فالرجال و ترقدي على صدورهم قلتلها ما لصقتش في غريب رقدت عند راجلي، رفدت القدور و جزت على إخلاص لصقت فيها و طبعتها قلتلها ادناي من الطريق خلينا نخدمو رانا روطار دخلت هيام قالتلها إخلاص راكي قاعدة هنا بلا فايدة لوكان تروحي لداخل تخملي الدنيا ماشي خير بركاينا من المشاكل ماناش ناقصين همك قالتلها اخلاص راني في دار عمي ما جيتش لدارك، تكروشاو بالكلام و تزايدو فالهدرة وليت نسكت في هيام قلتلها الناس راهم فالصالو، حنا هكداك حتى دخل صراع قالهم وش بيكم صوتكم راهو واصل لبرا، دارت ليه هيام قالتلو شوف مع لالة لي راهي قاعدة لا شغل لا مشغلة و جايبتها عڨاب هد المسكينة قالتلها أم سعد وين مسكينة؟! قولي الحق من مقبيل و هي تغلط مع إخلاص فالهدرة ليليان ولا وجهها صحيح و ما تحشمش قاطعها صراع اشتتتتت فضحتينا منبعد خزر فيا و قالي وش بيها يدك؟ حكيتلو قاطعتني إخلاص قالتلو والله يا وليد عمي دخلت للكوزينة ديراكت شغل محرشة عليا و تقولي يا لي ما تحشميش ما عندك لا حيا لا كرامة و يالي تعيطلي للرجال فالليل و لاصقة فيهم عليمن راهي؟ دار ليا مشوكي و تعنكر قلتلو عمو والله غير هي لي بدات ملي دخلت للكوزينة و هي تمعني عليا يالي ما تحشميش و راقدة في حضان الرجال ماشي عيب عليها علاش صابتني راقدة مع وليد الشارع؟ ما رجعليش و دار عيط محمممممممد جا ليه قالو انعم عمو قالو اسمعني مليح تروح توصل عمتك إخلاص لدارهم و جيبلي في طريقك حلا قالتلو أم سعد راك تحاوز في بنت عمك أبو حرب؟ قالها شوفي أم سعد تبعديني و لا تندمي و خرج مشى شويا و عيطلي ليليااااااااان ...
رحت ليه حكمني من يدي و دخلني لشومبرة الحاجة و قالها شوفي يما نزيد نصيب ليليان فالكوزينة ما نتفاهموش و خرج، تبسمت قالتلي خليك منهم اطلعي لفوق و ارقدي ديجا رجلك راهي محروقة.
طلعت لشومبرتو خملتها و قعدت نتفرج فالتلفزيون حتى دخلت عليا حلا زعفانة و ووجها حمر عرفت بلي باباها ضربها، قالتي يا وحد اللفعى المسمومة نهار كامل و انت تحرشي في بابا و تعمري فيه عمبالك ما رانيش فايقتلك و خرجت.
لحق وقت الغدا حبطت صبتهم قاعدين فالطابلة و لي فاجأتني مام إخلاص صبتها معاهم مازال ما راحت حرت فيها كيفاش راهي تخمم.
ساميت الحاجة و بديت ناكل نطقت أم سعد تقول نهار كامل و هوما خليوها عندها فقر الدم و ما راهيش تاكل مليح ما عندهاش زوج سوايع ملي فطرت زادت جات تتغدى دوك، جيت نواجبها نغزتني الحاجة قالتلي ما تبرونشيلهم خليهم يتغزلو زكارة فيهم كولي و عاودي باش ترفدي صحتك ضحكت و قلتلها اسناي تشوفي ههههه حكمت لاسوب كملتها كامل و كليت من واش حطو كامل و زدت بعثت سارة جابتلي اللبن ملفريجيدار خزرت فيا أم سعد و قالت هادي لي قلتو ما تاكلش؟! و انا زدت فيها غير لي ما نصيبهاش قدامي خرجتلها قلبها و هيام نشوف غير في كتافها يتهزو من الضحك، كي كملت قلتلها يعطيك الصحة خالتي أم سعد جات الماكلة تشهي ربي يطول في عمرك و تبقاي طيبيلنا هكدا دايمن قالتلي الله لا توصلك مانيش الخدامة ديالك يا وحد ....
و الحاجة و هيام شابعين ضحك.
كملنا حلا رفدت الماعن و إخلاص غسلتهم، جا جايز صراع شافني قاعدة مع يماه تبسم و رمى عينو للكوزينة صابهم مع الشغل، جا قعد معانا و قالها يما هدي مازال ما راحت؟! قالتلو راك تشوف يا وليدي راحت تبكي لباباك شدها قعدت، خزر فيا قالي و انت؟ قالتلو يماه خلي الطفلة راهي حامل قالها وشنو حامل؟!! ضحكت قالتلو كلات حتى خرجتلها الدوارة ههههه قالها لوكان تحبس عليا برك من البسكويت لي راهي تظل تنقب فيه قالتلو لالا ليوم كلات الحمد لله، حنا هكداك دخل وليد سعد الصغير جابلي كانيطا سفن اب كانت الحاجة بعثاتو يشريلي، حكمها عليه صراع و قالنا هادي ليمن قالتلو يماه لليليان باش تحبط الماكلة فتحها و شرب منها منبعد قالي تشربي منها و لا تعيفي نبعثو يجيبلك وحدوخرا؟ قتلو لالا عادي نشرب منها خزر فيا تبسم و قالي هاكي تشربي.
هو طلع لشومبرتو و أنا لحقتو صبتو يبدل دخلت في فراشي باش نرقد ما قدرتش و هو غير حط راسو رقد، شعلت التلفيزيو و قعدت نتفرج منبعد تأكدت إدا صح رقد صبتو حاط يدو على عينيه جبدت تلفونو بلعقل و قعدت نقلب رحت لي كونتاكت حوست على اسم إخلاص و فاصيتو منبعد دخلت لي ميساج صبتها باعثتلو أبو حرب تعيش واجبني، جيت نطلع باش نقرا لي ميساج لي من قبل حتى مد يدو مورايا و نحالي التلفون يبست في بلاصتني، قالي ماشي عيب تخربي في حاجة ما تخصكش؟ قتلو لالا عمو راني نتيليشارجي فالألعاب قالي راكي تشوفي فيا حابس واقيل و تزيدي تكدبي عليا من فوق هد الشي حطيت راسي و قتلو اسمحلي قالي ليليان ريحي راسك ما تعمريهش بأمور كثر من عمرك، منبعد حط يدو على قلبو و قالي كوني هانية هدا راهو مغلوق و مفتاحو ضايع قتلو علاش راهو ضايع قالي المرا لي تعرف كيفاش تمشي هي لي تصيبو بصح دوك راهو مغلوق، روحي ديريلي لاتاي و ما تزيديش تعاوديها درتلو براسي إيه فرحت كي قال هكدا حب يوصلي بلي ما يحب حتى وحدة، وشنو أنا تان ما يحبنيش؟!! لالا ما نظنش شحال من مرة يقولي أنت عزيزة عليا.
حبطت صبت حلا و إخلاص فالكوزينة وجدت لاتاي و جيت خارجة جات ليا حلا قالتلي اسمعي انت إدا راكي طامعة باش تولي مرت بابا غير أنسايها خزرت فيها بنص عين قلتلها أنت راهم لاعبيلك بعقلك وش حبيتيني نقولك نطقت إخلاص قالتلي وش قالت باباها و هي حرة فيه قلتلها و أنا مرتو و واحد ما سقساك على رايك يخي لصقة، جات تتلاح فيا حلا شدتها إخلاص قالتلها خليك منها هد المسمومة دوك تروح تبيعك لباباك و تولي هي المسكينة، سكت عليهم و جيت رايحة رمات حلا رجلها و عكلتني طحت على ركبتي انا بالسنيوة صغت جيت نسند روحي على يدي باش نوض شفت رجلين صراع رفعت عيني ليه شدني من يدي و نوضني، دارني موراه و دخل حكم بنتو من شعرها قالها تطلعي لفوق حسك ما نسمعوش دوك نطلع نتفاهم معاك و طبعها طلعت تجري و زاد دار لإخلاص قالها إدا أنت الكبيرة ديري هكدا وش نهدر على الطفلة جاية تغرسي فيها السم ديالك، علاش راكي ديري لليليان هكدا وش دارتلك؟ عندك حسيفة معاها؟ جات لدارك و تبلاتك؟ تهنيت من اختك خرجتيلي أنت، شوفي دقيقة ما تزيديهاش في هد الدار براااا انت كيما اختك ما تفهموش حتى يوريلكم الواحد العين الحمرة، و دار ليا قالي و انت اطلعي قدامي تشوفي.
انا طلعت و هو جا مورايا راح قبالة لبنتو للشومبرة و غلق الباب نسمع فيها تقولو بابا و الله مانزيد نعاودها و هو يعيط عليها و يضرب و يقولها حبيتي ترجعيلي كيما هي، غلقت ودنيا نسمع غير فالزڨا و البكا و رحت نجري تخبيت فالصالدوبا و غلقت على روحي قتلني الخوف قلت دوك يجي يزيد يضربني كمل معاها و جا خبط بابا الصالدوبا شكون لي راهو هنا قتلو و الله يا عمو ما هدرت معاهم والو هوما لي تبلاوني و بديت نبكي قالي افتحي الباب بجاه ربي فتحت و أنا نرجف بعدني من قدامو و راح لافابو فتح العين و حط راسو تحت الما و قالي اعطيني سربيتا رحت نجري جبتلو و جيت عطيتهالو نرجف سورتو كي شفت عروق رقبتو منفخين من الزعاف، و الحاجة واقفة عند الباب و تقولو يا وليدي بلعقل على صحتك، غلق العين غطى راسو بالسربيتا و قالها شفت كلشي بعيني سمعت الحس لتحت حبطت نشوف نسمع فيهم يزيدو معاها فالهدرة، كيفاش نبعثها ديرلي لاتاي يتحاماو فيها يطيحوها هي بالسنيوة؟ هدا و عيني تشوف علبالهم بلي راني لفوق يتسمى كي نروح ياكلوها و يشربو من دمها، و هديك نزيد نسمع حسها نوريلها ما ماتت يماها حتى خلاتلي نسخة منها.
هو يهدر حتى نشوف فيه رعف رحت نجري جبتلو قطن دارو في نيفو و طلع راسو منبعد دخل لشومبرتو تكسل و يمسح فالدم و بدا ينهج ضاقت فيه النفس يماه تقولو نوض نديوك للسبيطار نووووض حبيت تموت؟ و أنا كي شفتو هكداك تخلعت تفكرت كيفاش صراتلو المرة لي فاتت حكمتو من يدو و قعدت فالقاعة و نبكي، تخلع تقعد قالي علاش راكي تبكي ما قدرتش نواجبو ما عرفتش أصلا علاش كانوا دموعي يطيحو إدا من خوفي منو ادا يضربني و لا من خوفي عليه إدا كاش ما يصرالو و نخسرو، جبدني ليه و قالي ارواحي لعندي خلاص حبسي راكي قتلتيني و حضني و أنا نشهق ، ضحكت الحاجة و قالتلو دوك طمنت بلي حبطتلك لاطونسيو طفات الضو و خرجت، قعد يمسح على شعري و قالي خلاص ما تبكيش لي يدنى ليك نحرقو، مسحلي عينيا و قرصني من خدي قالي أنا هنا و هد الدموع يحبطو؟ قعد يهدن فيا كي تكالميت تكسل على ظهرو و حطلي راسي على صدرو و يدو على ظهري و يكاريسيلي حتى ثقالت يدو و رقدنا في زوج، ما فطنتش حتى حسيت بيه كي تحرك فتحت عينيا شفت بلي طاحت الظلمة همسلي شحال راهي الساعة قتلو ما نعرف خزر فالساعة تع الحيط صابها ال8 و عشرة قال الله ينعلك و يخزيك يا ابليس فاتني المغرب و العشا، جبد يدو من تحت راسي و رمى الغطا ناض يجري راح يتوضى و عاود رجع صلى كمل و جا قدامي تكسل على جنبو و حط راسو على يدو و خزر فيا و راسي على المخدة قالي علبالك بلي أنا ماشي نوام هكدا و جامي في حياتي و إدا غفلت على صلاتي و كان عندي رونديفو مع واحد و فاتني قتلو عيطلو و روح ليه قالي ما نيش مهبول باش نخلي شومبرتي دوك و نخرج، تبسمت مسح على شعري و تبسم قالي في عمري 43 سنة جامي اتيراتني مرا و دخلت في قلبي و ارتحتلها و قابلتها و خليت كلشي قلتلو علاش مرتك لولانية ما كنتش تحبها؟ قالي الله يرحمها كانت دير غير الكحلة من التوت جور إخلاص و أم سعد فولة و انقسمت على زوج قتلو يتسمى ما كنتش تحبها قالي كنا عايشين على وجه الدراري باش ما يتيتموش و على جال باش ما تصراش عداوة مابين الأعمام حتى كي كنت نبوسها ما نحس معاها بوالو و كانت كي تعري روحها باش تغريني كي نكون زعفان منها نكرها كثر، جني و جن المرا لي تحاول تستغل نقطة ضعفي و غريزتي باش تقضي صلاحها و توصل لوش راهي جايبا، قتلو سمعت بلي ما كانتش مليحة مع الحاجة، خزر فيا قالي شوفي ليليان بالاك أنا الراجل الوحيد في هد الدنيا لي مفتاح قلبو عند يماه، نعشق المرأ لي ترتاحلها يما و تريح قلبها، هي بزاف ناس ملاح و كاين لي يستغلو طيبتها باش يوصلولي هدوك ما نحبهمش قتلو انا مرات نحسها ماما دايمن تحن و دافع عليا حتى كي ما تكونش أنت هنا ما تخليهمش يآذيوني قالي ليليان يما شافت بزاف الظلم في حياتها قلتلو حكاتلي هيام، قالي يما تأخرت في الحمل مع الأول و بابا حب يتزوج بأم سعد هي من فاميلتو كان يحبها و يما براوية عليهم، كي عرف بلي يما رفدت ما حبش يبدل رايو و راح جابها عليها ضرة، كي جاز على زواجهم خمس اشهر يما كانت حامل بيا و كي عرفت بلي عندها طفل في كرشها دارت كامل الطرق باش تخسرلها الحمل وصلت حتى سممتها، و نهار لحقتها الزيادة طحتلها في وسط الزرع حتى حسبتني رح نموت و ربي حمانا في زوج ما صرالي والو لا أنا لا هي و على هديك لي سماتني صراع على قد ما صارعت باش خرجت للدنيا، في هديك اللحظة قالت ليوم زاد الراجل ديالي صراع لي نصارع بيه في هد الدنيا، موراها بابا هجرها و هي كانت تعاني بصح حنا ما كناش نفهمو كنا صغار و هي ما تشكيش.
نتفكر كي كان في عمري وحد 5 ولا 6 سنين هكداك دخلو الناس و قالولو علاش راك هاجر مرتك جا ليها وحد الليلة حب يتوشيها قلبت الدنيا عليه ما خليتوش عمبالي رايح يآذيها كنت نعتبر روحي انا الراجل تع يما لخطر هي كانت دايمن تفكرني بهد الشي و من هداك النهار مازادش رقد معاها بصح رفدت بهيام فهديك الليلة، كي زادت وليت ما نفارقهاش عمبالي لعبة تونست بيها لخطر أم سعد كانت تضربني و ما تخلينيش نلعب مع وليدها سعد، ملتم تعلقت روحي بهيام بابا عمرو ادا لعب معاها ولا حوس عليها لاتي غير بولادتو لوخرين كنت نوقف نبكي كي نشوفو كيفاش لاتي بيهم و هاملنا، حتى اللقمة كانت بالحساب حنا في ثلاثة انا و يما و ختي نتقاسمو خبزة و إدا صحتلنا مينداك كي ما تصيبش يما بيها وين و تشوفنا جعنا تروح جيبلنا الخبز اليابس باش ما نقعدوش للشر كبرنا بقدرة ربي سبحانو.
كي دخلت للمسيد خرجت يما تخدم علينا عجنت نسجت غسلت دارت كلشي على جالنا تبات سهرانة تخدم ليل و نهار، كنت مرات نبكي بالتخبية عليها نقول علاش حنا هكدا بابا عندو الخير و خاوتي لوخرين معيشهم فالقطن و حنا تقول ما ولادو و يما تسوفري.
كي كان في عمري 11 سنة فرشتلي يما السجادة و قالتلي صلي قلتلها ما نصليش علاش ربي خلانا نعيشو هكدا قالتلي استغفر ربك يا وليدي إن الله إذا أحب عبدا ابتلاه و حكاتلي على قصة سيدنا أيوب عليه السلام كيفاش ربي سبحانو ابتلاه في كلشي منبعد جازاه على صبرو و فهمتني و وقفت على صلاتي، سمانة منبعد جا ليا خو صاحبي قالي ادا تخدم في وحد لاتوليي شاورتها و قبلت بشرط ما نخدمش في وقت القراية، و بديت نخدم بلا ما نهمل قرايتي و بدا يتحسن وضعنا وليت نجيب كلشي ليما و ختي و هوما يحسبولنا و يعسوا فينا.
خياتي البنات من بابا ما نحبهمش ملبكري و لدوك ما عندي حاجة فيهم لخطر ملي كنا صغار يحڨرو هيام تحرشهم يماهم و قعدو بهديك الطبيعة حتى لكبرهم بصح الذكورة لالا نحبهم من صغري مقادرين يما و مقادريني لخطر أنا الكبير جامي كسروا كلمتي و لا طيحو معايا القدر لا انا لا يما لا اختي و قعدنا هكداك لكبرنا.
عام من بعد سمحت في قرايتي و بطلت المسيد بالتخبية على يما و رفدت مسؤليتها هي و ختي و كي لحقت 18 سنة دخلت للجيش و زاد تحسن وضعنا كثر بصح يما زاد خوفها عليا كل شهر تقول وليدي مات، خطرة طولت ما جيتش للدار 4 أشهر نذرت لربي باش تعتزل الدنيا كامل برك نرجعلها سالم غانم و من هداك الوقت و هي حاكمة غير صلاتها و خاطية الناس ما دخل روحها في حتى واحد، منبعد تقلبت الدنيا بابا فقر و طاح فالديونات و حط الأرض للبيع قالتلي يما اشريها، أنا ما كانش علبالي بلي هي كي كنت نحط الشهرية في يدها تخبيها و تصرف من خدمتها هي و هيام و دراهمي كانت تخبيلي فيهم، عطاتهملي رحت لعمي الكبير عزام شاورتو قلتلو حبيت نشري الأرض تع بابا و خفت ما يقبلش قالي راني في كتافك ما توليش للور، و صح كيما توقعنا أم سعد ما حبتش تخليه يبيعهالي بصح عمي قال واحد ما يديها من غير صراع و وقف معايا شريتها و كتبتها على اسمي، تعرفي ليليان هي نفس الارض لي طحت ليما فيها نهار زدت دمي ساقيها تخلط بترابها في هداك النهار.
وكلت مسؤولية هديك الأرض ليما كي نروح نخدم و وقف معاها عمي عزام لخطر علبالو وش سوفرات شاف كلشي بعينو حتى أنا يقادرني بزاف و دايمن يقولي يماك جابت راجل.
بابا طاحت بيه لدرجة ما صابش حتى باش يصرف على ولادو، يما قالتلي كون خير منو و ما تشردش خاوتك و دير في بالك كيما عطاك ربي و رزقك في لحظة يقدر ينحيلك كلشي، سمعت لكلام يما و لايمتهم كامل وليت انا السند ديالهم و مدفي كتافي بيهم.
مرة جيت برميسيو دخلت على غفلة صبت أم سعد متقابضة مع يما و رايحة تضربها جبدت السلاح رايح نفرغو فيها حتى شدوني من هداك النهار تخاف تتدنى ليما و لا لختي.
الحاج عمري ادا اعتبرتو اب لخطر هو لي كان السبب في كامل وش صرالنا.
تنهد و قالي يما تاج على كامل النسا و ما كان حتى وحدة تدي بلاصتها في قلبي قتلو ربي يحفظهالك
قالي الحاجة الوحيدة لي ما قدرتش نرضي فيها يما هي خدمتي، هي من خوفها عليا كانت ديما تقولي حبس و ارواح تخدم معايا فالأرض بصح انا ما قدرتش كنت نصيب روحي غير فلاتونو ميليتار ديالي عمري ادا تخيلت روحي نخدم فالفلاحة بصح حاط خادمين فالأرض و الحمد لله يما عيشتها ملكة و اختي هيام أميرة.
حتى نهار حبيت نتزوج بدات أم سعد ترطبلي كي شافت ربي فتح عليا و هدرتلي على بنت عمي وجدان و عفستهالي هي مكتوب الله على كل حال.
هيام تزوجت مورايا بشهور حبيت نخرج بداري بصح يما ما حبتش تروح معايا ترتاح غير في دارها كيما حاولت معاها ما حبتش جي معايا للعاصمة بصح كنت كل يوم نجوز عليها منبعد وجدان ولات تغير من يما و حبت ديرلي الشونطاج بعت كلشي لتم و عاودت رجعت لعند يما غضبت و حبت توقف رايها و انا ركبت راسي حتى جابها باباه و رجعت وحدها.
كي مات راجل هيام و تيتمو ولادها دارتها وجدان و أم سعد ما بين العينين شريتلها دار هي و ولادها قدام دارنا باش تبقى على عيني و حاجة ما تخصها لا هي و لا ولادها و مصروفهم يوصلهم كل شهر و في نفس الوقت تتونس هي و يما ببعضاهم.
قتلو و وجدان كيفاش ماتت؟ قالي كي رفدت بحرب صرالها نزيف قاوي استأصولها الرحم و هي ما تحملتش و ماتت، نكدب عليك لوكان نقولك ما بكيتش و ما حزنتش عليها رغم كلشي العشرة ما تهونش، الطفل زاد مريض و عاش بقدرة القادر كنا حاسبينو ما يعيشش و على هديك لي سميتو حرب لخطر في هداك الوقت كانت الحرب نايضة و ماتو زوج خاوتي فيها و هو كان ما بين الحياة و الموت كي سلك رباتو يما و ختي و من هداك النهار رافض الزواج حبو يلصقولي إخلاص قلتلهم ما تهنيتش من ختها باش نجيبها هي و المشكل ديالي ما نحبش البراوية حتى جيتي أنت و طيحتني و علقتيني نضت نضحك قتلو علاش وش درتلك ههههه قالي كنت براسي و دوك ما ظهرت براسي ما ظهرت متزوج قعدت معلق ههههه قتلو يعني وش راك حايب باسني من راسي و قالي سلامتك بنتي.
نندب على راسي انا كنت مسنية يقولي نحوس عليك نحبك و مع لخر يقولي سلامتك بنتي 🥺
قالي علبالك بلي راهي الحداش تع الليل شوفي ادا كاش واحد جا و حوس علينا بالاك رانا متنا ههههه قتلو يخافو منك، ناض يضحك و قالي نوضي نوضي شوفيلنا كاش ما ناكلو لقمة راني جيعان ميت.
أنا حبطت للكوزينة و هو جاز لشومبرة الحاجة، فتحت الفريجيدار صبت مازال كاين الماكلة من العشا قلت نروح نسقسيه وش ياكل نسخنلو، أنا جيت داخلة نسمع فيه يقولهم كنت نحكيلها على حياتنا كيفاش كانت قبل ما نجيبوها ، دخلت قتلو جيت نسقسيك وش تاكل قالي جيبي برك المهم ناكل راني هكداك ملي شربت الكانيطة ديالك ضحكت و رحت سمعت الحاجة تقولو من الظهر و انت تحكيلها حتى لدوك؟ فالظهر طلعت نار و دوك حبطت ثلج وش حكايتك معاها فرغ قلبك وليدي ترتاحلها؟ قالها يما ليليان بعثهالي ربي كيما هداك الطفل الصغير لي عيا من البكا عطاولو لعبة باش يسكت و ينسى، ربي عالم بيا بلي ما نحبش خبث النسا بعثلي طفلة ما تعرف والو نية و صافية لدرجة مرات نسقسي روحي وين كانت عايشة حتى حلا واعية للدنيا كثر منها، انا ما نحوسش تكون ليا غير زوجة، حبيت نربيها على يدي و نعلمها من الألف للياء نهار نحس بلي بدات تفهم عليا في داك الوقت نديها ...
