#المراهقة و الأربعيني:
#الجزء 17:
كي خرجت الحاجة و نائل حطت هيام يدها على كتافي و قالتلي قوليلي وش راكي متشهية نطيبلك؟ جات تصوطي بنتها سارة و تقولها يا ماما ديريلنا بيتزا تعيشي قالتلها و أنت شكون سقساك؟ دارت ليا سارة قاتلي تاكلي البيتزا؟ قلتلها إيه.
مسكينة دارتلي من كل خير و فاجيت على روحي غير الضحك و الحكايات معاها هي و بناتها نسيت شويا الهم لي كنت عايشاتو
كي كملنا غسلنا الماعن تع العشا تكسلت انا وياها في فراشاتنا و قعدنا ساهرانين نحكيو، حنا هكداك حتى سمعنا الباب طبطت راح وليدها على يشوف و هي لبست خمارها و راحت موراه و انا وقفت عند الباب تع الشومبرة حتى نسمع فيه يقولو ادخل خالو مرحبا بيك و عيط ليماه قالها ماما جا خالو صراع انا فشلت مازالو متبعني حتى لهنا.
راحت هيام تجري استقبلاتو و تقول مرحبا بيك خويا لعزيز زارتنا براكة، دخلو قعدوا في الصالو و أنا قعدت فالشومبرة ما قدرتش نخرج ما كنتش حاملة نشوفو أصلا هربت منو.
سمعت هيام عيطت لبنتها قالتلها ساااارة جيبي لاتاي لخالك خفي قالها لالا يعطيك الصحة راح الحال وين راهي ليليان؟ عيطتلي قاتلي ليلياااان ارواحي راجلك يحتاجك رحت و خزرت فيه بالخوف، قالي وجدي روحك نوصلك غدوا نصبح خدام بلاما ناقشو قتلو إيه و الدمعة حصلت في عينيا من القنطة، خزرت في هيام فهمتني قاتلو صراع خويا تعيش خليها الليلة تبات عندي ماواجبهاش و قالي خفي البسي ما عنديش الوقت هي فهماتو تع غير ماكالاه واحد يناقشو، انا دخلت نلبس و هي جات مورايا قالتلي راكم مداوسين؟ ضربك؟
ما هدرتش قعدت برك نلبس و نبكي غاضتني عمري حسدتي حتى باش نرقد ليلة مرتاحة جا يجري في نصاص الليالي تقول رايحة نهرب و هي حكايتها بايتة عند ختو قعدت تحلل فيا منبعد راحت لعندو و قالت لولادها يقعدو لداخل في شمبرتهم و قالتلو أبو حرب وش كاين؟ قالها شكاتلك؟ قاتلو لالا هي لدوك ما هدرت والو جيت نستفسر منك كي نسقسيها تقعد ساكتة و دموعها جراية قالها ما كاين والو جابها الشيطان الله ينعلو و يخزيه قالتلو الله يهدي سركم بصح ياخويا بلعقل على الطفلة و الله غير راهي مجروحة منك و مخليا كلشي في قلبها قالها ان شاء الله.
كملت و خرجت خزر فيا قالي راكي واجدة؟ درتلو براسي إيه دار لختو قالها كاش ما تحتاجي؟ قالتلو غير تكون مليح برك ربي يحفظك خويا، جبد من جيبو دراهم و حطهملها في يدها قالها مصروف للدراري أيا تصبحو بخير سلمت عليا و قالتلي ما يكون غير لخير إن شاء الله ما تقلقيش روحك قلتلها إن شاء الله
طلعت فالطوموبيل و هو ديمارا بصح ما راحش للدار قعد يدور و البرد برا يقتل كان مشعل الشوفاج و غالق لي كارو و يسوق.
كنت قاعدة قدامو مدورة وجهي عليه و متكية راسي على الكارو و نخزر لبرا، ڨارا قدام وين يبيعو مرطبات و قالي وش راكي متشهية نجيبلك؟ استغربت من سؤالو بصح قتلو والو رجعني برك لقبري نندفن، طفى الطونوبيل و رجع ضهرو للكرسي و قالي اهدري ليليان قتلو علاش طفيت الموتور و وش نهدر؟! تكى على الفولو و قالي ما دام ماراناش فالدار و واحد ما رايح يسمع فرغي قلبك احكي وش حبيتي راني نسمع، قتلو لوكان نهدر ما رايحش يعجبك وش رايحة نقول يمال اديني للدار أحسن مانيش حايبا نهدر باش نزيد ننضرب قالي ليليان و الله غير راني عيااااان مانيش مرتاح كامل ما تزيديهاش عليا تعيشي، في راسي ألف حساب .... قاطعتو قتلو و تصفي حساباتك بيا؟ الحاجة لي نديرها ما تعجبكش تضرب تسب تعاير تعيط كي شغل مانيش بشر ما قلت نوجعها كي نضربها ما قلت نجرحها كي نسبها ما قلت ركبتلها الرعب بعياطي تامن رجعت كي نسمع اسمي بصوتك حتى و تكون في حوالك نقفز وحدي وحدي
قالي اسمحيلي بصح ..... قتلو في بالك كي قلت هد الكلمة رايح داويلي جراحي؟ ما كاش وحدة رايحة تقدر تتحمل معاك ما علباليش كيفاش يقدر الواحد يعيش معاك و الله غير صعيبة بزاااف خليني فحالي تعيش اعتقني... قالي علبالي صعيبة بصح يا ليليان انت تان الشي لي درتيه ماشي ساهل قتلو وش درت؟ سرقت الدراهم؟ ياك انت مسلم و في الاسلام يطلبو على السارق 4 شهود باش تثبت تهمتو أنت تهمتني بلا دليل لخطر ظالم قالي أنا تهمتك بلا دليل..!!!!.. صح و الشي لي صبتو في فاليزتك؟! قتلو قسما بالله العلي العظيم ما عندي حتى علاقة بهديك الحكاية ياك انت بنفسك عيطت ليحيى وتبرى مني و زاد ظهر محاوز ماما و زيد وش عندك انت فالدار حتى نتحسس عليكم؟ آذيتوني بزاااف و اتهمتوني في الباطل تنوضو كيما راكم باش تصليو الفجر بلا عجز بصح واحد فيكم ما يعرف وش يقول لي راكم تصليولو ربي ما يقبلش الظلم.
سمعتك شحال من مرة جود فالقرآن ما قريتش (فاصفح الصفح الجميل) ما قريتش (فأما اليتيم فلا تقهر ) صلاة ما تفوتكم بصح ربي ما تعرفوهش، ماكاش واحد فيكم رحمني و هو ما يرحمكمش لخطر ظلمتوني.
نقولك حاجة و ادا حبيت تضرب اضرب خلاص والفت كامل وش راهو يصرالك انتقام من ربي ذنوبي خرجو فيك و مازال تزيد تخلص قالي والله ما كنتش حايب نضربك معزتك من معزة بنتي حلا بصح انت تبروفوكيني قتلو وش درت حتى ننضرب و ننذل يوميا و بكيت جبدلي راسي لصدرو و باسني طبعتو، قالي يا ليليان و الله كي نشوف دموعك يطيح مني النص.
تعرفي كيما وقفتي في وجهي و قلتيلي ما تزيدش تضربني قتلتيني خرجت من الدار كي المهبول دخلت فطونوبيلة السيد ما جبتش خبر كان غير وجهك مابين عينيا و انت تبكي ما نحملش نشوف دموعك و الله غير راني نتعذب ما تيماجينيش شحال قتلتيني بسكاتك أنا نعيط و نجرح فيك بالكلام و انت ساكتة تمنيت لوكان طرطقتي في وجهي قابحتيني اعترضتي بصح والو كرهت روحي مانيش مرتاح، قتلو حقرتني كي جيت يتيمة خويا سمح فيا ماما ما علباليش علاش ما حوستش عليا لوكان جا بابا الله يرحمو حي ما يخلينيش ساعة عندك، لوكان جا عندي أخ كيما أنت كي توقف مع هيام لوكان ماخلاكش تآذيني بصح كي جيت وحدي في هد الدنيا استقويت عليا، جبدني لحظنو ويبوس في راسي..قالي ما تقولين هكدا ساعة شيطان و الله غير عزيزة عليا كثر ما تيماجيني، قتلو بعدني بجاه ربي بعدني قعد محضني ما حبش يطلقني قالي انت تان كلما نقولك ديريلي حاجة ديريلي ديڨا، قتلك اغسليلي حوايجي جبتيهم غير صابون، قتلك حديهم حرقتيهم، نقولك جيبيلي ناكل تكوريلي و طبعيلي و أنا ما نحملش بصح نقول معليه خلي مازالها صغيرة دوك تتعلم مع الوقت، بصح الضربة لخرانية عميتيها تغسليلي كوارطي؟! علاش ما تفيرفييش الحوايج قبل ما تحطيهم فالماشينة؟ قتلو كون هاني ما نزيدش نخدمك بحتى حاجة ياك عندك بنتك و لا جايبها باش ظل مع التلفون قالي هي كاش نهار نحيهولها نقسمو على ربعين و انت إدا تخدمي و تعميها غير ما تخدميش قتلو يا عمو افهم مانعرفش ماشي موالفة رقدت نضت صبت روحي في دار وحدوخرا و بمسؤوليات كثر من عمري ما قدرتلهمش قالي دوك تتعلمي بلعقل قتلو نتعلم بالضرب و العياط؟ ارحمني الله يخليك عمو زاد زيرني عندو قالي ان شاء الله تتكسر يدي ما تبكيش ليليان تعيشي و الله غير دموعك راهم كي المواس في قلبي، و الله معزتك من معزة بنتي حلا غلطت و راني مستعرف جوزيهالي و اسمحيلي على وجه باباك فالقبر هزيت راسي تع إيه باسني و قالي استنايني هنا دوك نولي، حبط راح لوين يبيعو المرطبات شويا هكدا نشوف فيه جاي رافد صاشي كبير فتح الباب عطاهالي و طلع فتحتها ضحكت.. باتيسري على شكل قلب احمر و مكتوب فيها Sorry ليليان ..
قرصني من خدي قالي واش عجباتك تبسمت و درتلو براسي إيه، نوض الطونوبيل و دخلنا للدار حبط فتح الڨاراج و قالي علاش راهي الظلمة فالدار شعل لاتورش و حط يدو على ظهري و مشاني من باب الكوزينة و عيط يا سعدددد خرجلو قالو انعم أبو حرب قالو ماكاش تريسيتي؟ قالو إيه راحت عاود رجع ليا للكوزينة و أنا واقفة في بلاصتي شد عليا الباتيسري و قالي تاكليها دوك و لا تخلي للصباح؟ قتلو خليها لغدوا مانيش قادرة دوك دارتلي هيام وحدة مقبيل، حطها فالفريجيدار و قالي أيا تروحي ترقدي قتلو اعطيني لاتورش نروح نغسل، عطاني دخلت للصالدوبا غسلت منبعد جزت لشومبرة الحاجة ديت حوايجي و بدلت كي خرجت صبتو في شومبرة يماه غير فالحوايج تع لداخل خفاف حطيت راسي و قتلو البرد عليك حتى الدار راهي باردة كي ماكاش التريسيتي و الفورنوات طافيين قالي معليه تطلعي جيبيلي تريكو ملفوق راني ميت بالعيا و ماهيش نافحتلي نرقد لفوق و تكسل في فراشي قلت في قلبي وشنو واقيل معول يساميني!! قتلو نخاف وحدي قالي حرب راهو فاطن دوك يطلع معاك و هو تكلاطا بالضحك عمبالو ما فاقلوش، طلعت انا و حرب جبنالو تريكو و 3 كوفيرطات زيادة صبتو راقد في فراش حرب و مخلي لحرب بلاصة قدام اختو و بلاصتي فارغة بصح داي منها شويا لخطر هو بسلامتو جايب روحو قتلو عمو هاو تريكوك مارجعليش كان رقد من التعب، حطيت التريكو و تكسلت قدامو طفيت لاتورش تع التلفون ما قدرتش عندي فوبيا من الظلمة قعدتلي شوك من نهار توفى بابا الله يرحمو، موالف يدخلنا الضو من الڨاراج و لا الهول.
بداو يجيوني الخيالات خفت مديت يدي نحوس على التلفون فالظلمة باش نشعلو نتونس بيه حتى ننعس جات يدي في وجه صراع فطن قالي وش بيك قتلو نحوس على التلفون باش نشعلو نخاف من الظلمة، مد يدو حوس عليه شعلو و عطاهولي و رجع رقد، بقيت نلعب حتى نعست داتني عيني طاح التلفون من يدي على وجهي فطنت مخلوعة ناض قالي وش بيك قتلو حسيت واحد ضربني قالي أنا تقلبت قستك بيدي قتلو حتى في رقادك و تضرب ناض يضحك قالي ارقدي ارقدي ملتم طار عليا النعاس ما رقدتش.
ناضوا صلاو الفجر و عاودو رقدو نومو شحال ساهل غير يحط راسو يرقد انا رقادي صعيب.
الحاجة قعدت تسبح و تقرا القرآن على الضو تع التلفون كي كملت غطاتنا بهدوك الثلث كوفيرطات لي جبتهم انا و حرب، وحدة رماتها على حلا و لوخرى على حرب و الثالثة عليا أنا وصراع.
نطق صراع قالي علاش ما ترقديش من مقبيل و انت غير تخزري قتلو خفت قالي من واش تخافي و جبدني لحضنو حطلي راسي على يدو و رمى يدو لوخرى مور ظهري و رجلو فوق رجلي و قالي ارقدي راني معاك ما تخافيش، ما سنيتهاش منو جاني وحد الشعور ما فهمتوش تفرفشت بقيت مخشبة ما بين يديه نفاسو في شعري و وجهي في صدرو.
كان حضنو دافي و ريحتو عجبتني جيت نبعد عليه عاود شدني و قعد يلعبلي بشعري قالي ارخي روحك و ارقدي.
صح كنت مفرفشة و حشمانة بصح ما ننكرش حبيت هداك الاحساس كي كنت مابين يديه ارتحت بزاف ما فقتش كيفاش حطيت يدي على صدرو و غمضت عينيا باسني في شعري و همسلي قالي و الله غير عزيزة عليا بزاااف الله يكسر يديا اسمحيلي، ارتحت لكلامو كثر و رقدت عندو.
جوايه السبعة و نص جات الحاجة عند راسو قالتلو أبو حرب نوض وليدي باش تروح تخدم، دار على ظهرو و أنا على يدو قالها يما ياك ليوم السبت ما نخدمش، قالتلو اطلع كمل رقادك في شومبرتك علاش راك في هد الضيق و الحشير قالها يما خليني نرقد هدا وين غمضت عينيا، دارت عليا قالتلي يا بنتي و انت محضنة الراجل و راقدة في وسط ولادو كي ينوضو و يشوفوك هكدا وش يقولو، دورت وجهي عليه و عطيتو بضهري و بعدت على يدو و كملت رقادي نسمع فيها رايحة و تقول راحت الحشمة و الحيا من وجوهكم، عاود جبدني لعندو و رمى يدو على كرشي و هي قالت يا خااااه وش بيكم زاد عليكم الحال أنا عجوزة و حشمت في بلاصتكم، تقلق من كلامها جبد الكوفيرطا و عطا راسو و راسي و كملنا رقدنا.
شويا هكدا و سمعت الدقديق في الباب تع برا دخلت اخلاص تقولها عمتي حلا مازالها راقدة؟ و جات داخلة شافت صراع راقد قالت أبو حرب راهو راقد هنايا؟ قالتلها إيه راهم كامل راقدين هنا تقول نوم أهل الكهف قالتلها و هادي شكون لي راهي راقدة قدامو؟
قالتلها مرتو شكون حبيتي ترقد فحضنو من غيرها قالتلها ماشي كان رايح يطلقها؟ قالتلها بعيد الشر عليهم علاش حتى يطلقو كل راجل و مرتو يداوسو و يتصالحو.
هي خرجت و هي قاتلي يا بنتي نوضي راهي الحداش تقول عروسة راقدتلي حتى للظهر، أم سعد من الصباح و هي رايحة و جاية ما صابتش كيفاش جوز ليك خافت من أبو الحرب ليوم وش يسلكك منها، قلتلها أووووه مازالها تالب فيا صباح لله هادي موتها خير من حياتها على الأقل نستفادو نشبعو لحم و.طعام في جنازتها، حسيت بيه يضحك تحت الفراش و عينيه مغمضين منبعد دار على ظهرو و خزر فيا بنص عين قالي حبيتيها تموت و لا تشهيتي اللحم قتلو في زوج بصح هادي وش يموتها حتى تاكلنا ريسانا قالي يمال ليوم اقتليها بالبارد و ما تنوضيش ركبيلها الريكيكي و عاود جبدني لحضو، آااااواه الراجل ليوم راح فيها زاد عليه الحال و الله حتى حشمت قدام الحاجة يدير هكدا.
نطقت قاتلو أيا نوض اديها لشومبرتك و حضن براحتك ماشي في وسط ولادك قالها يا يما علاش راكي جايبتها عڨابي ليوم وش درت خلينا ننڨبرو قاتلو قتلك نوض يا الله ضحك بصوت عالي و ناض سلم على راسها و خرج من هديك اللحظة عرفت بلي راحتي عند صراع ادا رضى عليا شكون قدي و ادا زعف عليا يكرهلي معيشتي.
نضت سڨمت شعري و لبست خماري و خرجت لاقاتني ام سعد قالتلي ما تحشميش راقدة حتى لهد الوقت جات تضربني رفعت يدي نكوفري وجهي عيط صراع ايييبييي يبست في بلاصتها منبعد قاتلو فهم مرتك بلي يلزمها تنوض بكري عندها خدمة تستنى فيها قالها ما عندها حتى خدمة انا واجبها و مادام أنا راقد و هي راقدة معايا واحد ما عندو الحق ينوضها، لحق عندي قالي بابا وجديلنا نستقهواو أنا وياك، درتلو براسي ايه و دخلت للكوزينة صبت اخلاص لتم لوكان صابت تاكلني دخل يغزل فيهم و يقول ليون البيض طايب مليح و لا نص طياب و دار لعند اخلاص قالها ااااا بنت عمي صبحت عندنا وش راكي قالتلو صباح الخير يا الغالي قالها الحمد لله حمدا كثيرا في نعمة.
وجدت الفطور صبتهم خدمو الشغل و أم السعد بدات توجدت فالغدا و ترمرم، أنا رحت ناكل معاه جات حلا وحرب كلاو معانا.
انا قاعدة نقب قالي كولي بابا وجهك راهو صفر و عطاني لقمة شديتها عليه نطقت أم سعد قاتلو ما تعرفش تاكل وحدها حتى توكلها انت؟ قالها و انت وش جيناك انا و مرتي نوكلها توكلني هداك الشي شغلنا و زيد ما عنديش غيرها و بدا يمسدلي في كتفي حتى حشمت قدامهم.
قعدو يبيكيو في بعضاهم بالهدرة و يمعنيو عليا بصح ما برونشيتلهمش كنت مرتاحة لخطر علبالي ما يقدروش يدناو ليا يخافو منو.
كي لحق العصر خرج و.رجع قبل المغرب دخل يعطلي ليلياااااااان....
خرجت من الشومبرة كانت قاعده اخلاص و يماها و أم سعد و الحاجة و هو كان رافد صاشيات قتلو انعم عيطتلي؟ قالي ايه ارواحي تشوفي هدو كامل ليك افتحيهم ما امنتش فتحت اللولاني صبت فيه روبة موف كلاغ بالأبيض فيها سبتة كحلة تبريي اسود مع فيستا قصيرة موف بلكحل قتلو شحال شابين خزرت فيه حضنتو و قتلو صحا ضحك و قالي بصحتك شحال عندنا من ليليان. كملت فتحت لوخرين صبتو جايبلي خمس جبب الوانهم فونصي بصح فصالتهم شابة، و جابلي اكسسوارات و صبابط و صيكان ... حسيت قلبي رايح يحبس من الفرحة نشوف و نحظن فيه و الحاجة فرحانة و تقولي تلبسيهن بالهنا يا بنتي الله يهدي بالكم ويصلح ما بيناتكم بجاه الحبيب المصطفى ويبعد عليكم العين.
قالتلها ام سعد شكون هدا لي راهو حاسدهم؟ قالتلها راني ندعيلهم عاود جبدني لحضنو و قالهم هادي بنتي العزيزة، حبطت حلا قالتلو وشنو هادو بابا قالتلها يمات اخلاص جات بنت غير يدللها انت وليتي قديمة دارت ليه قالتلو و انا علاش ما جبتليش قالها شوفي فيا مليح كاش نهار قصرت معاك ياك غير دخلت الشتا مديتلك الدراهم و رحتي شريتي انت و خالتك، قاتلو و دوك علاش ما تفكرتنيش و لا غير ليليان و زيد ماما الله يرحمها ما كنتش جيبلها هكدا قالها حلااااااا شدي لسانك خيرلك قلتلها عادي حلا ما بيناتناش فرق لي عجباتك اديها قالتلي يا وحد اللفعة قدام بابا تقولي هكدا و موراه ديري رايك ما جوزيش عليا هد العقلية نعرفها قديمة، قالتلها الحاجة وش بيك وش خداك علاش جيتي محرشة على الطفلة وش قالتلك.
صراع رفد روحو و راح يتوضى و انا رفدت وش شرالي و ديتهم للشومبرة.
دخل لشومبرة الحاجة و قعد يقرأ القرآن بيدما يلحق وقت الصلاة و انا طويت الحوايج و حطيتهم فالخزانة و قعدت نخزر فيه يعجبني كي يكون يجود هو بلاش عندو هيبة و زاد.
قعدت هايمة فيه منبعد انتبه بلي راني مركزة في وجهو ختم السورة غلق المصحف باسو و قالي كاش ما تبحرلك في وجهي؟ قتلو لالا قالي الباتيسري ديالك كليتيها؟ قتلو نسيتها و رحت نجري للكوزينة فتحت الفريجيدار صبتهم كلاو نصها قعدت غير الجهة لي مكتوب فيها كلمة Sorry رحت ليهم للهول قلتلهم شكون لي كلا الباتيسري ديالي؟ قاتلي ام سعد هديك ديالك؟ و حنا وين علبالنا قسمناها و كلينا قلتلها كيفاش ما علبالكش كان مكتوب فوقها اسمي..
قالتلي إخلاص و منبعد وش صرا كلاوها كلاوها وشنو هد العقلية قلتلها بصح هو جااا.... قاطعني صراع من داخل الشومبرة قالي ليلياااان خليك منهم منبعد نجيبلك وحدوخرا قتلو بصح ديالي قالي جا لعندي قالي هديك معمرة غير ميكروبات جات من صلاح مزيا ما كليتيش منها لوكان مرضتي هوما موالفين عندهم المناعة و هوما خزرو في بعضاهم و أنا نضت نضحك و دخلت للشومبرة، قالهم هي كانت حايبا تخبيها سوفونير قاتلو إخلاص من نيتك موسخة؟ قالها ايه يمال علاش انا ما خليتهاش تاكل منها لبارح خفت عليها المهم بصحتكم و ان شاء الله ما ضركمش. شويا هكدا و نسمع في يتڨاوعو و يقييو في رواحتيهم وسوسهم ههههههههه
جا وليد يعد قالنا أهل نور جاو خبرت نوال قلتلها شكون نور؟ قالتلي مرت عابد الله يرحمو، دخلت فمها لكرشها سلمت و قعدت و ماليها قعدو فالصالو بيدما يجي الحاج.
جات أم سعد للكوزينة قالتلنا يلزم العشا كيفاش نديرو قالتلها نوال نبعث هم يجيبولنا واجد من برا راح الحال قريب يأذن المغرب، حكمت حرب قاتلو روح عيط لباباك يجي، جا قالها دوك أنا نجيب زوج جاجات و زوج كيلو كباب والباقي نتوما وجدوه هنا.
درنا وش يلزم في الدار و هو صلى المغرب و راح يجيب،
دخلت نور مرت عابد حضنتها أم سعد وبدات تبكي على وليدها
و نور هم تبكي غاضوني بكيت معاهم حتى قالتلها أم سعد شوفي بيمن ساومو دم بابات ولادك هي خزرت فيا و يماها قالت الطفلة ما عندو ما دخلها حتى البكا و بكات معانا.
نور ما هدرتش معايا قاعدة تبكي و تقولها ليمن نجيب زوج يتامى بلا أب هدا مكتوبي قالتلها أم سعد ان شاء الله نائل يلم ولاد خوه و يكونلهم اب قالتلها ما تقوليش هكدا أنا صح شربت المر من عابد بصح ما نحبش حابة لا نتزوج لا نجيبلهم بابات قالتلها ماشي كيما تحبي هد ولادنا حنا لي نلموهم ما يترباوش عند البراوية و بدات تيري فالهدرة برك مزيا الحاجة عرفت كيفاش ترقع الحالة.
زادو جاو دار عزام عم صراع الكبير، دخل صراع عطانا الماكلة و قالنا خفو شويا، قالتلي أم سعد سربيلهم لاتاي وجدتو و ديتهولهم نطقت وحد العجوزة كبيرة جداهم قالت شكون هادي قالها الحاج يما هادي هي المرا لي ديناها على دم عابد، قالتلو هادي لي خداها صراع؟ و جاي تسربيلنا فلاتاي؟ بدل صراع السوجي قالها جدة العشا راهو واجد شرلي بحواجبو تع روحي، دخلت أم سعد قدامهم تقولي ما تحطيلهم لاتاي قبل العشا راكي تحاوزي فيهم؟! قلتلها ياك انت لي قلتيلي قاتلي ياخااااه و تزيدي تحصليها فيا صح أنت وجهك صحيح بصح لوكان جيتي تحشمي ما تسرقيش دراهمنا غاضتني بصح سكتت و هوما بداو يسقسيو و الحاجة كروشات معاها كي العادة فالكلام.
وجدنا الطابلة و قعدنا نتعشاو حتى دخل نائل من برا سلم عليهم و عطى للحاجة الريزولطا تع ليزاناليز لي درتهم و قعد قالتلو الحاجة وش قالك فيهم ياوليدي انا ما نعرفش نقرا قالها قالي لانيمي راهي حابطة عندها بزااااف قالو صراع شكون؟ قالو ليليان خزر فيا مخلوع، كليت شويا و نضت رحت قعدت في شومبرة الحاجة ما حملتش قاعدين يهدرو و يسبو في خويا يحي و انا ما بيناتهم صح هو غلط بصح على الأقل يديرولي شويا اعتبار مهما كان راهو خويا.
جا ليا حرب قالي قالك بابا ارواحي خرجت و رحت وقفت قدامو قالي اقعدي تتعشاي قتلو ماعطانيش خاطري شرلي براسي قالي روحي للشومبرة رحت بعثلي صوندويش مع حرب كليت نصها و حطيتها و هو كمل تعشى و جا لعندي قالي علاش نضتي من الطابلة قتلو عمو ما شفتهمش كيفاش كانو يهدرو على يحي قالي ما تقرمدينيش و انت وش دخلك في يحي إدا يهدرو عليه علاش انت قليل ما دار فيك قتلو حتى أم سعد قاعدة تقول للنسا هادي لي سرقت دراهمنا و الله ما ديتهم علاش ما حبيتوش تامنوني و بكيت، قالي خلاص حبسي البكا و ما تقعديش حابسة روحك هنا انا ندبر راسي معاها.
رحت للكوزينة صبت نوال موجدة الكيسان و نور تهدر معاها غير دخلت سكتو درت لنور قلتلها و الله ما عندي حتى علاقة بتيتيم ولادك صدقيني ما آذيت واحد فيكم و تغرغرو عينيا قالتلي مانيش حاقدة عليك ياك انت ليليان نعرفك كان يهدر مع صحابوو عليك و يتوعدلك علبالي هو لي كان يجري موراك ماشي انت دخل صراع حكم الكلام في فمها قالها يتسمى كنت علبالك بلي عابد كدب؟! علاش ما قلتيليش يا نور؟ قالتلو حبيت نهدر بصح .... سكتت كي شافت ام سعد هنا صراع فهم الحكاية و هز راسو و خرج.
حطت نور لاتاي كي كملو عيطلنا الحاج قالنا ارواحو ارفدو الماعن رحت أنا جيت نرفد صراع قال لمحمد وليد سعد نوض ارفد الكيسان و شرلي نقعد قدامو، قعد خبرني قالي لوكان نزيد نصيبك تتصنتي راسك نكسرو، جيت نروح قالي اقعدي قالتلو جداتو صراع خليني نزوجك بمرا جيبلك أخ لحرب يكون في كتافو، كي قالت هكدا تقول واحد ضربني بكف هدي علاش تحوس تزوجو و أنا وش نكون؟ قالها مانيش حايب و رفد تلفونو و طلع لشومبرتو.
رحت لشومبرة الحاجة صبت اخلاص و نور و نوال قاعدين يحكيو و ام سعد دخلت قالتلها إخلاص سمعتي جداتك وش قالت لصراع قالتلو نزوجك قالتلها صح فتحت الموضوع معاه؟ قالتلها إيه قلتلها باين ما يقبلش و زيد هو يكره النسا تفكرو بمرتو ناضت تعيط قاتلي ردي بالك تزيدي جيبي سيرة المرحومة و أم سعد حكمتني من دراعي و بدات تعيط عليا قلتلها ماشي أنا لي هدرت انا ما عنديش حتى شهر معاكم هو لي قالي هكدا و يقولي انت نحسك غير كامل النسا، دخلت الحاجة قلتلها الحاجة الليلة الشومبرة راهي معمرة صراع ما يقدرش يرقد هنا رايحة نطلع نرقد معاه وش رايحة ندير و هي ما فهمت والو، ديت روبة قصيرة من الخزانة قدامهم و طلعت حتى انا ما علاباليش علاش تصرفت هكدا.
فتحت باب شومبرتو بلاما ندقدق هو تفاجأ من تصرفي، دارلي براسو وشنو غلقت الباب و قتلو عمو اسمحلي بصح و الله غير عييت و نعست و ما نيش حايبا نرقد لتحت كامل راهم لتم قالي مرحبا بيك وين والمك ارقدي، جبدت الفراش و درت ليه قتلو عمو رفع عينو من التلفون قتلو جداتك علاش حايبا تزوجك؟ شد الضحك و قالي علاش راكي تسقسي؟ قتلو هكداك برك حط تلفونو و قالي ماشي قتلك حبسي التقرعيج؟ قتلو اسمحلي
فرشت و تكسلت شفت حوايجو محطوطين على جنب بونكو نضت باش نخبيهم في الخزانة قالي خليهم ماشي محدين، جبدت الحديد و فتحت السروال جيت نحدد قالي يا بنتي خليهم معولة تحرقيهم؟
قتلو لالا عمو والله ما نحرقهم حايبا نتعلم، حط تلفونو و جا ليا قالي و كيفاش حبيتي تتعلمي؟ قتلو نشعلو و نريقليه على حرارة خفيفة باش ما يحرقش و نكسل السروال و كي يسخن نبدا نحدد بلعقل، تبسم و قالي روحي نشوف، شعلت الحديد و ريڨليو و كي جيت نبدا قالي لالا عينيا ماشي هكدا اصبري تشوفي و وقف مورايا و بدا يسڨم فالسروال كي قالي عينيا و قرب ليا حاجة تحركت في قلبي و قعدت مركزة مع الملامح ديالو قالي وين راكي غايسة تبعي معايا قتلو نعرف قالي يمال جربي قدامي نشوف انا بديت نحدد و هو قالي لالا ماشي هكدا و شدلي يدي و يعلم فيا، سمع الباب قال ادخل و قعد كي راهو دخلت اخلاص تبكي قالتلو أبو حرب... رفع راسو و نحى يدو قالها اخلاص غير لخير؟ قالتلو يرضيك هادي تقول على ختي كلام زايد و تقول صراع ما يتزوج بلفعة تفكرو بمرتو؟ دار ليا مشوكي قتلو لالا انا ما قلتش هكدا قلت يكره النسا لخطر يفكروه بمرتو طرطق عينيه فيا حطيت راسي خفت يضربني منبعد دار ليها قالها ما ديريش عليها طفلة صغيرة ما تعرفش تهدر تعاود وش تسمع كي البيروكي دوك انا ندبر راسي معاها قاتلو راك دافع عليها؟ قالها ما تكبريهاش ختيتو ديريها كي بنتك كيما هي كيما حلا جاني الضحك بصح شديت تقلقت منو قاتلو صار هكدا يعطيك الصحة و خرجت.
قرب ليا و أنا دايرا روحي نحدد قالي صار أنا ما نحبش النسا؟ غلقت راسي و كملت نحدد، نحاه من يدي و قالي اصبري تشوفي نعلمك بنتي، شوفي المرأ كيما هد القماش إدا ما سڨمتهاش بيدك ما تتكسلش و تبقى مكرفصة و كسل السروال قالي و مرات يتعوج فتضطري تكوي ودنيها باش تبقى واقفة و و حدد الجياب و قالي شفتي هادو وقف مليح، بصح إدا كان مكرفص بزاف و قعدتي تحدي و تعاودي يتحرق.
طفى الحديد و قالي علبالك كاين انواع تع القماش فيه المليح و لي ماشي مليح، الخفيف و الثقيل ، كاين قماش ترتاح فيه كي تلبسو و كاين لي لالا بصح ديري في بالك دايمن الواحد يقدر يبدل حوايجو إدا ما عجبوش و لا ما رتاحش فيه منبعد حط يدو على راسي و قالي خلاص دوك روحي ترقدي.
قعدت نخمم وش قصد بكلامو ما فهمتش منبعد قلت كي جي هيام نحكيلها تفهمني.
جا خارج ما عجبنيش الحال قلت لبارح رقد قدامي و كان حنين معايا و ليوم تقول وحدوخر، خرج موراه صبتو عند يماه كانت لاطونسيو مرة تطلعلها مرة تحبطلها قالها نديك للطبيب؟ قاتلو لالا ما كالاه حبيت نرقد بصح غدوا ادي هد المسكينة لي نشف الدم منها، دار ليا قالي و انت علاش ما تاكليش قتلو راني ناكل قالنا غدوا كي نجي من الخدمة نديكم في زوج يشوفكم الطبيب و قعد عند راسها حتى رقدت خاف عليها.
نعست رقدت بلا فراش و خليتهم يهدرو، فطنت على صوتو وهو يقول بابا حلا فرشي و نوضي ليليان فرشيلها و قالي ليليان نوضي بنتي خليها تفرش.
فرشتلنا حلا كامل حتى نور معانا منبعد قالت لاخلاص تباتي هنا؟ قالهم طفيو الضو و اخرجو قرروا برا خليوهم يرقدو.
مع الفجر نوضني سطر يقتل في كرشي دخلت للصالدوبا لقيت العادة جاتني رجعت لفراشي و سناني يتخابطو من البرد نتبهتلي الحاجة قاتلي وش بيك قلتلها جاوني زادتلي الغطا و جابتلي حبة كاشي رقدت و الصباح نضت مكسرة جات ليا شافتني و عيطت لصراع قالتلو جيب معاك الكبدة لليليان جاتها العادة الشهرية و ضرتها كي راهي بلانيمي قفزت من فراشي وش بيها هادي هبلت قلتلها يا الحاجة علاش قلتيلو عيب، دخلت ام سعد قاتلي وش يا لالة العروسة راكي محنية واقيل و تعلمت الرقاد تع الظهر قالتلها الحاجة خليها الطفلة راهي مريضة جاتها العادة و راهي بفقر الدم دوك يجي صراع يديها للطبيب، زادت عيطت لهيام قالتلها، جات نور زادت قالتلها و انا نسمع و ساكتة رايحة نكلاطي شيعت بيا الدنيا كامل ما كاش لي ما سمعش، جا صراع صابني راقدة مسح على شعري و باسني على جبهتي و خدي قلبي ولا يخبط.
قالي ليليان نوضي بابا تاكلي جبتلك كبدة فريشكا كيما يحب الخاطر، طيبتها نوال و جابتهالي ما قدرتش بصح هو بدا يوكل فيا بالسيف قالي كيفاش حبيتي تبراي كولي معليه بلا خبز، دخلت الحاجة قاتلي كيفاش راكي تحسي روحك دوك قالها بسم الله هدا وين بدات تاكل، دخل الحاج قال شميت ريحة الكبدة رجعتو جيبو و تاكلو بالتخبية قاتلو الحاجة علاش تسبق للعيب الطفلة جاتها العادة الشهرية و راهي بلانيمي باش تعوض، انا هنا خلاص ما قدرتش قلت يا ربي ما كاش واحد ما عرفش علاش حدث غريب؟ غير أنا طفلة؟ شيعتي بيا الدنيا نشوف في صراع غير كتافو يتهزو من الضحك قالي يما راهي دايرا كونطرا إذاعة مونتكارلو دوك تزيد تسمع الفاميليا و الجيران ههههه.
منبعد قالها يما نطلعها ترقد عندي و انت ريحي جا يرفدني قتلو لالا راني قادرة نمشي، رقدت في بونكو و غطاني، سماني و عطاني بظهرو و رقد.
كنت متمنية يحطني في حضنو كيما لبارح، رقدت حتى حسيت بيدو على جبهتي شمخ سربيتة صغيرة و حطها على راسي قتلو لالا و جيت نحيها قالي ماشي كيما تحبي راكي تغلي بالحمى من مقبيل و انت تهترفي، عاود دار رقد و عطاني بظهرو قلت هدا علاش راهو يتهرب مني، كي حبيت قربو بعد عليا؟
رقدت و كي فطنت صبتو خرج، جات هيام غدوا نديك للطبيب راهو وجهك اصفر، دارتلي عصير برتقال و وكلتني الكبدة لي خليتها و عاودت رقدت.
فالليل حسيت بيه كي دخل كان خرج من الدوش و مغطي روحو غير بالفوطة، غمضت عينيا حشمت.
لبس و جا ساماني عطاني بظهرو و رقد، قعدت نخزر فيه قلت علاش ما رقدنيش عندو كيما لبارح غاضتني عمرو قلت بت عندو ليلة وحدة برك دار فيا هد الشي كامل؟
لصقت في ظهرو و حطيت راسي عليه هو حس بيا دار على ضهرو و غطى وجهو بيدو تقلقت قلت انا علاش راني قاتلا روحي عليه حبيت نبكي علاش راني نجري موراه هكدا، حبطت رجليا من البونك و جيت نايضة نحى يدو على وجهو و خزر فيا قالي وين راكي رايحة؟ نحبط نرقد لتحت قالي البرد عليك بنتي ارقدي و صباح احبطي إدا ما كيش مرتاحة نفرش فلرض و نرقد و نخليلك البونك قتلو لالا ماكالاه و جيت رايحة قالي ليليااان ... درت ليه جبدني من يدي و رجعني قالي ارقدي بابا، رجعت رقدت و حسيت بيه كي ناض يصلي الفجر، غطاني مليح و سلم على راسي، حيرني هد الراجل زعما يحبني؟
صلي و رجع رقد و الصباح راح يخدم و انا حبطت ريحت شويا خير ملبارح.
ام سعد كي العادة واقفة عند راسي ديري اعملي كملت الشغل و درنا الغدا كان قعد غير الخبز هوما يحبوه سخون، موالفة نوال وام سعد يعجنوه قبل الغدا بشويا.
جات أم سعد قاتلي شعلي الطبونة و طيبيه قلتلها ما نعرفش و زيد نخاف الطبونة، قالتلي امشي قدامي أنا نعلمك ماكاش لي زاد معلم.
قعدت هي توريلي و انا نطيب و كي ما نعرفش تبدا تسب و تعاير ماحملتش السخانة تع النار و ضاقت فيا النفس ما حسيتش غير و الحاجة تفطن فيا و نوال واقفة عند راسي بكاس ما و قرعة ريحة و صراع يقولها نديها للسبيطار؟ قاتلو ما كالاه دوك تريح حط يدو على خدي و قالي كيفاش راكي تحسي بابا؟ علاش تقعدي قدام الطابونة و طيبي الخبز كي شفتي روحك ما تحمليش السخانة راكي مريضة، ما رجعتلوش قعدت برك نبكي، مسح على راسي و يقولي خلاص سلامات ما كاين والو نطلع نبدل، زدت وليت نشهق بالبكا مانيش فاهمة روحي كي يبدا يديرلي هكدا نحس بحاجة حلوة حس روحي حايبا حاجة بصح ما عرفتش وشنوهيا.
ليلة وحدة من قربو سببتلي دارت فيا هد الشي كامل ... ليلة وحدة زرع مشاعريط جديدة في قلبي و المشكل ما راهوش حاس بوش دار ما خممش بلي أنا طفلة كيما البنات تقدر تغريني الضحكة و نطيح فيه.
من هداك النهار بدات معاناتي مع هد الحجرة الاربعيني لي ماراهوش حاس بمشاعر المراهقة لي تحوس عليه ....
