#المراهقة و الأربعيني:
#الجزء 14:
خزر فيا منبعد قالي انت تسمعي الغنى قتلو إيه مينداك قالي ما نحبش هدو ما يجي منهم غير المصايب علاش حتى ندخل الشياطين لداري و نطير منها البركة، قتلو في قلبي ما شفتش الشواطن تع الصح لي راهم في دارك إبليس و يتعلم منهم بصح ما هدرتش قاعدة غير نديرلو براسي إيه.
هو يهدر حتى دخل الحاج قالو صراع ربي يتقبل قالو منا و منكم يارب بصح علاش ما جيتش للجامع ما شفتكش قالو واحد ما يسعى فالدار كيفاش نخلي الطفلة وحدها قالو يا درا كملت الغدا جعنا قالو اصبر شويا يما راهي جايا فالطريق و رايح نجيب هيام تتغدى معانا.
غير خرج صراع دخلت أم سعد و بنتها لي زيدت و وحد المرا ما نعرفهاش.
قالتلي أم سعد روحي جيبي الما و بنتها قالتلها شكون هادي قالتلها ماعرفتيهاش؟ هادي لي دارت بخوك و عشات في هد الدار قالتلها مادام صراع من موراها وش رايحة تستناي قالتلهم هدي المرا هادي هي مرت صراع ؟ قالتلها أم سعد خليني ساكتة خير راني بالعة الهم وش حبيتيني ندير لوكان جات بيدي ناكلها بعظامها قالت هديك المرا الله يرحمك يا وجدان طمك التراب و جات بنت الشارع دات بلاصتك.
هوما يهدرو هكداك و قعدو حتى دخلت هيام قاتلي وشبيك ليليان قلتلها شكون هدو لي جاو مع ام السعد قالتلي نازك ختي من بابا و سوسن مرت المرحوم راجلي خت وجدان قاتلي كاش ما قالولك درتلها براسي إيه قالتلي وش قالو حكيتلها قاتلي ما تعمريش راسك بيهم هدا كامل من الغيرة و الحقد ما بيهم والو.
جات الحاجة رحت انا و هيام حطينا الغدا قالت الحاجة الله يسلم يديك ليليان الحوت جا يشهي كيفاش تقولي ما نعرفش نطيب خزرت في صراع قالها درتو انا و ياها انا نوريلها و هي دير ضحكت هيام قالت الله يسلم يديكم نطقت سوسن قاتلو سبحان الله يا أبو حرب خلاصت عليك توقف فالكوزينة المطبخ و طيب مع المرا نسيت وش كنت داير في اللولانية هدا إدا ما وليت تخدم عليها وزيد فرحان كي طيبلها قالها هادي مرتي ما نخدم عليها ما تخدم عليا ديسيديت نفتح صفحة جديدة في حياتي بعد ما شفت اشكال و الوان تع النسا كاين لي تكرهلك معيشتك و كاين لي تهديلك البال الحمد لله و حط يدو على كتفي و قال عاشت يدك و ناض و خلاهم يغليو و هيام تضحك و تقولو الله يريح بالك يا خويا و يبعد عليكم كل عين حسود بجاه الحبيب المصطفى..
هو راح غسل و طلع لشومبرتو و أم سعد قالت هدو هوما الرجال يموتو على الشطاحات و لي عينها خضرة و شعرها صفر حتى و لو كانت خارجة طريق ما يحبوش بنات الفاميلية، قالتلها هيام راكي تشوفي هدي لي راهي قاعدة قدامك منا على سنين تقعد هي هي ما تحول ما تزول لخطر بنت أصل ما خطفتش راجل من مرتو و ولادو و خلاتهم للجوع و وليدو يدور فالزنق باش يوكل يماه و ختو، قالتلها أم سعد وش قصدك؟ قالتلها ما قصدي والو برك حبيت نقولك بلي ذاك الشبل من ذاك الأسد و لي خلف ما مات الفرق ما بيناتهم انو صراع قعد مع مرتو رغم كامل وش دارت فيه وما جراش موره النسا بصح وش يقول الواحد ربي لي يسامح قالتلها وش راكي تمعني قالتلها ما تبقايش تشبهي ليليان بوجدان لخطر لوكان نبداو نفتحو الدفاتر القديمة نبداو نقولو كلام ما يعجبش يمال خلي الحالة مستورة خير قالتلها قالتلها انت على حساب الشوفة لي ماراكيش ناوية على الخير قالتلها الخير لي يجيني منكم الله يقطعو ربي يحفظلي خويا لعزيز أبو حرب حتى في اللقمة و ما ينساش يعرضني ماشي مخليني محتاجة مزية حتى واحد قالتلها واقيل ما علابالكش بلي مصروف الدار على باباك ماشي على خوك قالتلها بابا و لا خويا د الخير خيرنا ما كلينا من جيب حتى واحد نطقت سوسن قالتلها مازالكي مسمومة خبيتيه تحت التراب و طوال لسانك، قالتلها لساني هدا هو ملبكري ماشي هو لي كان حاكمو هديك تربيتي لي خلاتني نحمل الظلم و ما نهدرش لخطر علبالي ادا هدرت وش راح يصرا تشفاي اختك وش دار فيها خويا نهار حكيتلو ياك موراها رجعتو تبوسو يدي باش ما نحكيلوش كي تغلطو معايا، الحمد لله جامي حاوزوني دارنا ماشي كيما شي عيباد غير ضيق بيهم يرميو بناتهم و يجيو يحلو نسيتي نهار حاوزتوني لدارنا و رجعلكم اختك و قالكم كيما رميتو اختي ما نحتاجش بنتكم ياك غدوا منداك جيتو تحلو فيه. نطقت الحاجة قالتلها يا هيام وش خداك يا بنتي هدا انت العاقلة قالتلها يما بزاااف عليهم لوقتاش يسمعونا فالسم في دارنا و حنا ساكتيلهم هادي لي قالك في عشنا و ينشنا.
هيام تهدر و أنا غايسة في كمية العداوات و المشاكل لي ما بيناتهم حتى سمعت صراع يعيطلي ملفوق ليلياااااانن قاتلي هيام نوضي ليونه لراجلك حبيبك حب يرتاح يستاهل أبو حرب..
طلعت نجري قالي شكون لي غسل حوايجي؟ قتلو أنا قالي شوفي راهم غير صابون ماشي مشلين مليح ياربي وشنو هدا وش نديرلك دوك شكون سلطك عليا ما تزيديش تدناي لحوايجي قتلو عمو و لا ما انتبهت دوك نعاود نشللهم و نشفهم ما تقلقش قالي روحي خفي قتلو معليه راني رايحة.
غير كملت صبتو في وجهي تقول كان يحسبلي بالدقيقة قالي كملتي؟ قتلو ايه قالي تعرفي تحدي الحوايج؟ قتلو ااااه قالي ادا ما تعرفيش قولي و إدا تعرفي حديهملي و دخل يدوش بديت نحدد فالقمجة عادي كي لحقت للكول تحرق يبست في بلاصتي ياااااا ربي و ما يهدر والو انا هكداك حتى دخل غير بالفوطة دورت وجهي تخلطتلي الخوف و زادتلي الحشمة قالي اسمحيلي و الله غير نسيت بلي راكي هنا لبس حوايجو الدخالة كي جا يرفد القمجة شاف الحرق قال ياااااااربي حسيتو قريب يبكي تشوكا قتلو عمو والله ما بلعاني هي تحرقت في يدي و بكيت قالي وعلاش وعلاش كاش واحد حرشك على حوايجي كي زاد شافني نبكي قالي أسكتي ما تزيديهاش عليا حبطت نمسح في دموعي و أم سعد كانت رايحة خزرت فيا هيام و قالتلي واش؟ عينيك راهم يبرقو ديجا حسدوكم قلتلها حرقتلو قمجتو بالحديد قالتلي ردي بالك ما يحبش على حوايجو قلتلها و أنا وين علابالي و دخلت للشومبرة
دخلت مورايا قلتلها وين راهي ام سعد قالتلي لاتية ببنتها لي زيدت قلتلها و سوسن وش جيها؟ قاتلي حماتها لخطر نازك خادية خو المرحوم راجلي..
شويا هكدا دخل صراع يتبختر تقول ما نعرف وشنو قالها يما راني خارج كاش ما تحتاجو؟ قالتلو يحرسك الرحمن يا وليدي روح راك محفوظ ان شاء الله من عيني ومن كل عين ما تصليش على النبي.
فالليل دخلت أم سعد و بنتها خلاو الشغل كامل على راسي.
جاو ولاد هيام زاد جا صراع مع ولادو، حرب حكم تلفون باباه و قعد يلعب و انا نلعب معاه، حنا هكداك حتى خرجت أم سعد تعيط خاتمي تع الذهب وين راهو؟ قالولها حوسي مليح ما كاش لي دخل لشومبرتكم، انا مبرونشية مع التلفون و نلعب مع حرب، صراع يقولها حوسي مليح و هي تقولو حوست زيد شوف انت جامي تبحرتلنا حاجة من الدار هادي أول مرة.
طفى التلفون قالي حرب نطلع نشرجيه قتلو اوكي دخلت للشومبرة لقيت صراع فاتح فاليزتي و مزربع دوزاني فلرض حتى حوايجي الدخالا رحت نجري لميتهم حشمت و قتلو على واش راك تحوس عمو قالي على وحد الحاجة مهمة ما علاباليش وين راحت قتلو وش بيكم اليوم كامل تبحرولكم حوايجكم؟ قولي كيفاش دايرة نحوس معاك قالي خلاص ما كالاه و خرج.
فالليل طلع حلا وحرب رقدوا لفوق و غدوا منداك صباح مور ما استقهوينا قالي اطلعي لشومبرتي خمليها و نقيها قتلو معليه، طلعت بديت نخمل فيها شفت دارهم مربوطين بلاستيك و قدامهم سلاح اتيراني شكلو رفدتو و بديت نقلب فيه حطيتو و كملت و حبطت غسلت الماعن و بديت نخمل فالدار كي لحقت للصالو سمعتو يعيط ملفوق ليلياااااااان ... طلعت نجري قتلو انعم عمو قالي الدراهم لي كانو هنا وين راهم؟ قتلو خليتهم في بلاصتهم قالي وين راهم انطقيييي قتلو عمو والله غير كانوا هنا صح رفدت السلاح شفتو بصح الدراهم و لا ما دنيت ليهم، قالي ليليان اطلعي بيهم واحد ما دخل من غيرك و غير خرجتي دخلت موراك قتلك اطلعي بيهم و يعيط و انا نحلف و نبكي طلعت الحاجة و أم سعد يجريو كي سمعو صوتو، جبد عليا بكف حتى صونات ودني و حكمني من شعري قالي قتلك اطلعي بيهم ماشي دوك وحدة كيما انت في عمرها يومين تعفسهالي بدموع التماسيح و انا نقولو و الله ما ديتهم قالي ما ديتيش ياك يمال ارواحي و قعد يكركر فيا من شعري حتى لتحت و الحاجة تعيط و تقولو اطلقها يا وليدي حرام عليك الطفلة يتيمة ما تظلمهاش امشي على دين محمد صرااااااع.......
