#المراهقة و الأربعيني:
#الجزء 19:
خرجت الحاجة تعيط تحوس على كاش واحد يجي نائل ما كانش فالدار و الحاج و سعد و إخلاص راحو مع حلا صابت غير محمد وليد سعد قاتلو اجري عمك راهو مصروع، طلع يجري حب يرفدو بصح ما قدرلوش، هيام شافت شافت قاتلي ارواحي اقعدي منبعد حطت راسو في حجري و أنا نخزر فيه و نبكي، جابت كوفيرطا و فرشتها و تعاونا حطيناه فيها و تقابلنا رفدناه و حبطناه، دخل نائل مخلوع وش بيه أبو حرب؟ و جا رفدو على كتافو و جرا بيه للطونوبيل راحت معاه الحاجة و هيام.
بقيت فالڨراج وحد نص ساعة نبكي و ندعي منبعد دخلت جيت طالعة جات مورايا أم سعد قاتلي ارتحتي دوك يا وجه الهم من نهار دخلتي لهد الدار و حنا فالمشاكل قلتلها كلشي من تحت راسك بصح ربي بين الحق و برأني بصح و الله لوكان كاش ما يصرا لصراع بعيد الشر غير تخلصيها غالية ما سناتهاش مني قاتلي ارواحي لهنا طوال لسانك و رجعتي تهديني و جات تضربني دبعتها صاغت قاتلي يا وحد ..... طبعيني؟!!! ناضت تجري مورايا حكمتها يمات نور و هي تسب و تعاير، طلعت لشومبرة صراع و قعدت نبكي قلبي يغلي عليه قمجتو كانت فالقاعة و معمرة دم حضنتها و نشم فيها و نبكي دخلت عليا أم سعد و تقولي عمبالك تخرجلك سالامات و جات باش تضربني شدتني من شعري و أنا تالمو كنت مقنوطة و خايفة على صراع شديتها من الشعر و نجبد جبت نصو في يدي و زدت عضيتها و هي تعيط و تقول شوف العيدارية تقابض فيا، دخل علي وليد هيام جبدها عليا قاتلو تحاميتو فيا حبيتو تقتلوني اليوم نرميكم في زوج برا قالها كي تكون دارك و حاوزينا رانا في دار خالي و هو لي يقرر إدا نبقاو و لا لالا قاتلو وصلت بيك طيح القدر معايا ليوم يسلخو جلدك و جات تضربو طبعها طاحت تشوكات دار ليا قالي امشي نروح أنا وياك للسبيطار قتلو لالا خويا تعيش صراع ما يحبش قالي و نقعدوا هكدا نستناو؟ روحي البسي نلحقوهم قتلو لالا يزعف نزيدو نصبرو شويا بصح عيط ليماك سقسي وين راهم واصلين و كيفاش راهو صراع قالي هي لي عيطتلي قاتلي روح لدار جدك اقعد مع ليليان اصبري نعيطلها قاتلو صراع راهو مليح دارلو دوا و ما حبش يبات رانا جايبينو و جايين، طلعت نجري خملت الشومبرة و سڨمتلو فراشو و حبطت صبتو واقف و يقولها وجديلي حوايجي ندوش قربت منو بصح ما عرفتش وش نقولو خزر فيا طاحو دموعي قالي علاش راكي تبكي؟ قتلو خفت كاش ما يصرالك قالي راني مليح ما تخافيش برك وجديلي حوايجي نطلع ندوش و نرقد راسي قتلني، هي خليتها تعاون فيه يطلع و انا سبقتهم وجدتلو الدوش و حوايجو و شعلت الشوفاج باش تدفالو الشومبرة.
قالتلي هيام ابقاي معاه ما تخليهش وحدو انا نحبط نشوف هديك اللفعى تع أم سعد وش بيها قتلها الله لا تردها جات ضربتني ضربتها قالتلي علاش يا ليليان ناقصين مشاكل قلتلها هي ما حبتش تحشم على شيبتها حتى علي و حبت تضربو طبعها قاتلي وشنوووو؟!! علي ضارب معاها؟ قتلها لالا بصح كي حاوزاتو قالها دار خالي و هو لي يقرر قاتلي اواااه نحبط نشوف وين راهو خير ما يديرلي مشكل فوق مارانا فالهم، جات تحبط دخل صراع قالها هيام عيطي لسعد شوفي وين راهو، عيطتلو قالها وحد الساعة و نجيو حلا عندها شويا جروح و دارولها السيروم و تخرج.
دخل في فراشو طفيتلو الضو قالي اغلقي الباب قتلو مكسر قالي حطي موراه كاش حاجة، كاليتو بمخدة و هو غطى وجهو بيدو و رقد شويا هكدا عاود ناض قتلو وش بيك قالي نسيت باش نصلي، راح توضى و صلى و قعد غايس و يخمم منبعد عاود دخل في فراشو و قاعد يدلك في جبهتو راسو كان يوجع قتلو نديرلك ماساج؟ نحى يدو و قرب على المخدة ديالي حطيتلو راسو في حجري و بديت نديرلو ماساج و هو مغمض عينيه قتلو عمو تعيش ما تزيدش تزعف فتح عينيه و خزر فيا قالي علاش؟ بديت نبكي قالي تخافي عليا؟ درتلو براسي إيه حكملي يدي لي فوق جبهتو و باسها قالي ما تخافيش بابا شويا زعاف و راح راني مليح دوك قتلو كي شفتك طحت خفت نخسرك. عمو تعيش ما تخلينيش، ناض من حجري و سند راسو على يدو و قالي علاش ما راكيش حايبا نخليك قتلو ما عندي حتى واحد من غيرك في هد الدنيا بابا ميت الله يرحمو و خويا سمح فيا و ماما ما سقساتش عليا و إدا كاش ما صرالك بعيد الشر و الله غير ياكلوني قالي اششششت ما تهدريش هكدا بابا انتي بنتي و جبدني لحضنو و تكسل، حط راسي على صدرو و يكاريسيلي في ظهري شاف يدي مجروحة قالي وشنو هدا قتلو أم سعد غير خرجتو ضربتني جا نايض رايح ليها قتلو ما تخافيش مام أنا ضربتها تقعد و عقد حواجبو قالي ضربتيها؟!!! كيفاش قدرتيلها و أنت قد الزاوش قتلو طلعت باش تضربني شدتني من شعري شديتها انا تان من شعرها قطعت نصو و عضيتها كان قلبي محروق عليك و هي جات تخلط فيا تبسم و قالي أنت ما تقدريش تقعدي طرونكيل و رجع حط راسو على المخدة و انا ساميتو و رقدنا ما فقتش حتى حسيت بيه يغطي فيا و خرج حبطت موراه كانت غير الحاجة قاعدة فالهول أنا بقيت واقفة فالدروج و هو راح ساماها قالها جا سعد؟ قاتلو إيه و حلا طلعوها لفوق، علاش تفضح بنتك هكداك و تهينها قدامهم كامل صح غلطت بصح كنت تعاقبها بينك و بينها، تنهد و قالها وش حبيتيني ندير يما نستر عليها و نفضح بنت الناس؟ لوكان ما سمعتهاش صدفة ماكانتش رايحة تستعرف و لدوك مازالها مخبية على لي مشارك معاها مالڨري علابالي شكون.
شوفي يما حلا كي مام فضحتها قدامهم بصح يصيبولها عذر و يقولو طفلة صغيرة و غارت من مرت باباها بصح ليليان لوكان تلصق فيها الكلمة تبقى فيها طول عمرها ديجا شفتي أم سعد وين ما تصيب فرصة تهينها و تقول للغاشي سرقتنا.
ليليان ربي قدر أسباب و حطها في رقبتي أمانة، طفلة يتيمة و قلبها نقي ما تعرفش الحقد كامل وش صرا و قاعدة تشد فيا و تحلل باش ما نضربش حلا، ملي تهمتها و أنا ماشي في حوالي حياتي تقلبت و نهار درت لاكسيدو و صرالي هداك المشكل عرفت بلي ظلمتها و ربي عطالي انذار، مرات نحمد ربي كي عيطت لخوها يحي باش نرجعها و سمح فيها سينو لوكان راهو باعها لكاش ارهابي من صحابو.
قالها ليليان نية و قلبي ماشي دوني حتى كي تهدر ما تحسبش تقول كلشي قالتلو صح و ملي جات عندنا ماشفناش الأذى منها.
حبطت قلتلهم صباح الخير خزر فيا منبعد دار ليماه قالها حقا يما ماشي الحاج جاب الكباش باش يذبحهم على ولاد عابد الله يرحمو واش مازال ما ذبحوا؟ قالتلو علاش انت خليتنا نذبحو بعد وش صرا خلاهم باباك حتى لغدوا و عرض عمومك.
قلتلهم تغديتو؟ قالي كلينا و شربنا لاتاي قتلو اعطيني نبعث نشري اندومي نتغدى بيها دار للحاجة قالها يا يما اهدري معاها و خزر فيا قالي اندومي و انت بلانيمي؟! قتلو و الله تشهيتو عمو جاتني عليه تعيش، راح شرالي و جا قالي شدي هد المرة برك بصح ما تزيديش تاكليه ماشي مليح، طلعت باش نعيط لحرب حتى نسمع فالعياط تع نوال و شفتها خارجة من شومبرتها، عيط صراع قال وش كاين هنا؟ قاتلو نوال ليلة مانزيدهاش فهد الدار اديوني لدارنا و لا نروح وحدي قالها بصح فهميني وش كاين؟ قاتلو شفت يا خويا على آخر عمري نعرف بلي راجلي متزوج عليا و عندو 3 دراري، صراع فشل قال هااو زاد بانلي مشكل وحدوخر و الله ماني قادر، خرج سعد من شومبرتو قالها لوكان تفوتي عتبة الباب ورقتك توصل موراك، خرجت أم سعد و أم نور وش كاين وش صرا؟ عيط صراع على سعد قالو خليني نفهم منها انا نتصرف قالتلو نوال تعيش أبو حرب و الله ما نزيد دقيقة فهد الدار، قالها معليش أنا نديك بيدي برك اقعدي دوك و الله ماني قادر و غير مقبيل وين جيت من السبيطار و هي تبكي و سعد يسب فيها عيط عليه صراع قالو اخرج برا بركا ما تضبح عند راسي، قالو سعد لوكان تديها يا أبو حرب نطلقها قالو نديه و ادا كنت فحل طلقها و تشوف، روح اخرج برا أنا دوك نتفاهم معاها قالتلو تعيش ابو حرب اديني برك لدارنا و الله ما نزيد نقعد هنايا عندي 13 سنة و أنا قاعدة هنا متحملة الكبير و الصغير و مع لخر يجيب عليا وحدة .... فواش قصرت معاه يفهمني برك لي هانت عليه العشرة ما عندي ما ندير بيه قالها خلاص يا ختي هدني روحك روحي وجد روحك أنت و ولادك نديكم ريحي 4 ايام في داركم منبعد نجي أنا و الحاج و الحاجة و لي طلبتيه يصير قالتلو مانديش ولادي قالتلها الحاجة معليه خليهم راهم معانا و ما تقلقيش روحك بنتي ما يكون غير لخير إن شاء الله، نطقت أم سعد تعوج في فمها قالت علاش هد الشي كامل غير هي لي تزوج عليها راجلها ياك ربي محللو ربعة، قالتلها الحاجة حنا رانا نهدنو فالحالو و انت تشعلي فيها! دار ليها صراع قالها انت بالدات سكتينا صوتك ما نسمعوش.
صراع دا نوال و بنتها الصغيرة برك و الباقي قعدو و أنا طلعت لشومبرتو نخملها سمعت صوت اخلاص في شومبرة حلا، كملت و حبطت نوجد العشا مع أم سعد و هي كي العادة ترمي فالهدرة و تبيكي بالكلام درتها فالثقيل كملت شغلي و رحت قعدت مع الحاجة حتى نشوفو في سعد دخل مع مرتو الثانية و يقولها ادخلي نعرفك على ماليا و أم سعد لاقاتها بالأحضان، جات سلمت عليا أنا و الحاجة و قعدت فالهول تضحك و تڨصر تقول هي مولات الدار و حنا نخزرو في بعضانا.
جوايه ال10 ونص هكداك دخل صراع قال السلام عليكم و عقد حواجبو كي شاف مرا براوية في وسطنا دخل للكوزينة و عيطلي ليلياااان ... رحت نجري ليه قالي شكون هادي؟! قتلو مرت سعد الجديدة عندو وحد زوج سوايع هكداك ملي جابها قالي و الله ما يحشم على عرضو و دوك هدا وش رح نهدر معاه و هو راجل بشلاغمو قتلو عمو ما عجبتنيش مرتو نوال خير ناض يضحك قالي روحي بابا راني جاي، أنا سبقتو منبعد هو لحقني خزر في سعد و قالو وشنو هد الحكاية؟ قالو مرتي عندكم اعتراض؟ قالو شوف تتزوج ما تتزوجش ربي يسهل عليك راك كبير و تعرف صلاحك بصح باش جيبهالي للدار و الله ما صرات دوك ترفدها و دبر راسك وين تديها قالو بصح يا صراع خلاص أنا نوال رايح نطلقها قالو ماشي كيما تحب أنت نوال تعاود ترجعها و أنت تقول يا سبحان الله و هادي ما نحتاجهاش في داري دوك تخرجها و ماكالاه نعاود الهدرة و طلع لفوق لشومبرتو.
سعد ما قال والو دا مرتو و خرج وقفوا شويا في الڨراج يهدرو و انا نتصنت عليهم قالتلو هد السحارة سحرتهم كامل حتى خوك قالها اطلعي في الطونوبيل دوك نحوس على دار قريبة وش رايح ندير، انا اون بلان تقرعيج و مركزة فواش راهم يهدرو حتى نحس واحد يدغدغ فيا بصباعتيه في كتفي درت صبتو صراع تلفتلي الهدرة ما ... ما .. ما ...قالي ما تمأمئي عليا ما نمأمأ عليك صح كي سمعتي هد الزوج كلمات لي قالوهم رتحتي؟! بلعت لساني و حطيت راسي قالي اطلعي ترقدي يا الله السهرة ماشي مليحة للقراعجيات ينقص السمع عندهم.
جامي حكمني واحد نقرعج من غيرو هههه جيت طالعة قالي قالي وجدلي لاتاي قبل ما تروحي دوك نجي، حطيتو على النار وهو خرج، شويا هكدا رجع و جابلي معاه سقايط و اندومي داخل و يقول كاين وحد الزاوش طلب على اندومي و تخلطت الحالة و ما كلاهاش و يضحك، فرحت كي تفكرني و ضحكت، جبتلو كاسو تع لاتاي غير شرب ناض يعيط و يبزق و يمسح في لسانو وش درتي فيه ملح؟!!! قتلو لالا سكر قالي ارواحي دوقي ادا هدا سكر ذقت نضت نضحك قتلو غلطت قالي و تزيدي تضحكي وين راهو عقلك؟!! قتلو دوك نجيبلك وحدوخر قالي بطلت ما نشربش ماكاش حاجة بعثتلك ليها و ما درتيش ديڨا قتلو عمو والله غير تخلطولي قالي اطلعي ترقدي لوجه ربي اطلعي قتلو دقيقة نطيب اندومي و نطلع.
هو سبقني و انا وجدها ديتها معايا و لحقتو قاعدة ناكل و نشوف فالتلفزيون حتى سمعت الدقديق فالباب قال ادخل دخلت إخلاص و حلا و قالتلها اطلبي السماح من باباك قالهم صراع اخرجوا برا قاتلو اخلاص انت قلبك كبير يا أبو حرب و الطفلة طايشة و غلطت ما عندهاش غيرك اسمحلها جا يحاوزهم رمات حلا روحها عليه و حضناتو و تبكي و تحلل فيه و هو واقف كي الخشبة ما دار حتى جاست، انا نشوف فيها و نبكي غاضتني و هو كي سكتت قالها كملتي؟ خزرت فيه قال لاخلاص اديها و اخرجوا عليا خليوني نرقد، جات حلا تجري لعندي و تبكي حضنتني و قاتلي اسمحيلي تعيشي قوليلو يسمحلي و الله ما نزيد نعاود قتلو و أنا نبكي عمو تعيش اسمحلها هد المرة ما تزيدش تعاود ناض يعيط قالهم انت وياها اخرجو براااااا حسكم ما نسمعوش واخلاص جات تهدر معاه ناض من فراشو رفد الدخان و التلفون و خرج خرجو موراه، أنا رجعت للفراش قعدت نتفرج فالتلفزيون و نخمم فالشي لي صرا حتى دخل قتلو عمو علاش ما سمحتلها قالي ما دخليش روحك جيت نهدر قالي ليليااان.. ارقدي و لا احبطي لتحت سكت تغطيت و هو طفى التلفزيون و الضوه و رقدنا.
الصباح وهو يبدل صونا تلفونو رفد سمعتو يقول ماعلاباليش حاليا ما نجيش ماعندي حتى خدمة لتم ... محتاجة دراهم نبعثلك بصح ما تزيديش تعيطي وين ما نفحتلك و كوبا، عرفت بلي راهو يهدر مع مرا بصح ما عرفتش شكون، توسوست قلت في قلبي الضربة ادا خرج متزوج كيما سعد.
كي كمل خزرت فيه قتلو ما تخدمش ليوم؟ قالي صباح النور قتلو صباح الخير اسمحلي نسيت نقولها، قالي ياك ليوم الجمعة ما نخدمش، غسلت و حبطت نوجد لفطور.
حطيتلهم قعدوا يفطرو نطقت الحاجة قالتلو ياك جات طلبت منك السماح علاش حاوزتنا هادي راهي بنتك يا وليدي قالها خليها تتربى باش تتعلم خطرة أخرى ما تزيدش تتستر على وجوه الشر، و لوكان ما تكشفش شكون لي شاركها فواش دارت نخليها هكداك.
هوما يهدرو و انا تخمامي عند المرا لي عيطتلو خممت نغفلو و نفتح تلفونو نعرف شكون هادي بصح خفت لوكان يحكمني خلات عليا.
كملو رفدت الماعن هو ناض يغسل و خلا تلفونو جبدتو و خبيتو في حوايجي و قلت لأم سعد راني رايحة نخرج لابوبال، ديتها كي وصلت لمور الدار فتحت نشوف ليستوريك صبتو فاصا كلشي زدت دخلت الفايسبوك دوموندولي المودباص خرج و دخلت واتساب اول اسم صبتو فيه ميمو فوكال فتحت باش نسمع ادا صوت مرا و لا راجل انا حطيتو في ودني حتى جات صوتو مقلق من مورايا معمن راكي تهدري؟! و جا ليا خطف التلفون من يدي فتحو و عقد حواجبو قالي و انت وين تعرفي النقيب علاء؟! قتلو و الله ما نعرفو حكمني من دراعي و يزير على سنانو قالي انطقي وين تعرفيه وش كاين ما بيناتكم؟ علاش حتى تدخلي للديسكوسيو معاه و تسمعي الفوكال؟ انطقي قتلو و الله ما نعرفو قالي اطلعي قدامي تشوفي دوك نتفاهم معاك، طلعت نجري لشومبرتو و انا نعض في فمي و ناكل في صباعتيا يا ربي دوك وش رايحة نقولو طبع الباب برجلو و دخل قالي اقعدي قدامي تشوفي قعدت و حاسة قلبي رايح يحبس من الخوف قتلو عمو اسمعني .... قالي اشششت دوك تفهميني علاش دخلتي المحادثة تع نقيب علاء قتلو و الله ما نعرفو و عمري ادا سمعت اسمو قالي يمال علاش كنتي تقلبي في تلفوني اهدري قتلو عمو... عيط انطقييييييييييييي .. قتلو كنت نحوس على النيميرو تع ماما خرجلي هو قالي علاش يماك عندها واتساب؟ ياك قلتيلي تلفونها قديم حسبتيني دراري راكي تقولبي فيا و جبد عليا بكف حتى صونات ودني حبطت راسي و نبكي قالي شوفي فيا و قوليلي علواش كنتي ناوية كي رفدتي تلفوني رايحة مور الدار و خايفة كاش واحد يشوفك علاااااش ... خزرت فيه غطيت وجهي خفت يعاود يضربني و قتلو و لا ما كنت ناوية على والو و بديت نبكي طلع راسو للسما و بدا يقول ياااااااربي ... استغفرك الهي و أتوب إليك الصبر ربي الصبر.. منبعد خزر فيا و قالي اخرجي عليا ما توريليش وجهك براااا ..
خرجت نجري و حبطت لاقاتني الحاجة قالتلي ليليان .. قلتلها وش تسحقي عندي؟ قاتلي وش بيك معاه؟ جيت نواجبها حتى نحس واحد حكمني من شعري قالي يما تقوليلها وش تسحقي عندي؟!! خدامة عندك؟ قتلو و الله ما قصدي والله جات تجري الحاجة قاتلو يا وليدي اطلقها حرام عليك قالي دوك تبوسيلها رجليها خفييي و هي تقولو لالا وشبيك استغفر الله و أم سعد و إخلاص يخزرو فيا و يستشفاو، سلكتني الحاجة من يدو و دارتني موراها قاتلي راهي بنتي و انا نعلمها ما دخلش روحك ما بيناتنا خزر فيا منبعد عاود طلع و هي دارت ليا قاتلي وش بيكم علاش كان يعيط عليك مقبيل؟ قلتلها زعف على جال تلفونو و بديت نشهق حضنتني و تحلل فيا قاتلي دوك يجوزو الزعاف ما ديريش عليه راكي تشوفي فيه بعينك هد ليام ما صاب عليها وين كل يوم يخرجلو مشكل، و داني نغسل شافت إخلاص مازالها تخزر فيا ملفوق رفعت راسها ليها قالتلها في عوض ما راكي واقفة احبطي انت و حلا عاونوهم راكي بنت الدار علاش راكم مخزونين في هديك الشومبرة قالتلها تأمري الحاجة علبالي بلي الدار داري و الشغل ما يتعبش كنت برك قاعدة مع حلا ما هنانيش خاطري نروح و نخليها بصح دوك ندير كلشي وحدي حتى ليليان ادا حبت ما دير والو.
حبطت و أم سعد تقولها ايه اخدمي و نجيبك عروسة و تولي صح دارك و يضحكو زعما يغزلو فيا و يستشفاو، خبرتني الحاجة قاتلي ما تعمريش راسك كوني فحلة و روحي راضي راجلك زكارة فيهم.
غسلت وجهي و طميت شعري ودخلت للكوزينة كي كملت رحت للڨاراج نسيقو كانوا الرجال راحو يصليو صلاة الجمعة، انا هكداك حبط صراع صابني نخدم كي وصل لطونوبيلتو خزر فيا منبعد طلع راسو يشوف ادا كاش واحد من الجيران راهو يطل ما كاين والو منبعد قالي اسمعي .. خزرت فيه قتلو راك معايا؟ قالي لالا مع خيالك ... شحال من مرة قتلك ماشي انت لي تسيقي الڨاراج؟ قتلو و أنا علاه أهدر مع أم سعد حرت ما بيناتكم أنت تقولي حاجة و هي حاجة قالي زيدي زيدي في الصوت راهو ناقص هكدا باش يسمعو الجيران حسك مليح منبعد كامل يمشي و يخزر فيا تقلقت حطيت البالي و قتلو راني داخلة و انت أهدر مع أم سعد قولها ما تزيدش تبعثني نسيقو قالي طوال لسانك اه قتلو عمو ما طوال ما والو بصح ماشي غير أنا لي كاينة فالدار حلا حاكمة شومبرتها و ما تمس والو حقا حقا غايضها الحال و أنا واحد ما يحس بيا ننضرب و ننسب و نبكي نمسح دموعي و نوض للشغل يا غريب ليك الله قالي زيدي زيدي طولي لسانك قتلو ما نزيد ما نطول بجاه ربي ارحمني عييت و الله غير بزاف خليني نروح نعيش برا ناكل نشرب نرقد ما نقلق واحد ما يقلقني واحد و دخلت نبكي جا مورايا قالي اييي حبسي حبسي كيما راكي خرجت ليه يماه قاتلو وش بيك تان يا وليدي قالها ليليان نزيد نصيبها فالڨاراج تغسل الدار نقلبها خليه يزنجر ادا حب و لي كلاها قلبها تخرج تسيقو هي و ما نعاودش الهدرة قاتلو خلاص يا وليدي بلعقل على صحتك ما يكون إلا خاطرك قالها و اطلعي لهاديك مو الزبايل لي راهي حاكمتلي الفراش و غضبانة تحبط تخدم الشغل كيما هي كيما هوما سينو هد المرة مانبعثهاش للسبيطار نبعثها للجبانة و خبط الباب و خرج.
رحت غسلت وجهي حبطت حلا جات ليا قاتلي انت لي رحتي شكيتيني لبابا؟ قلتلها روحي اخطي جرتي قاتلي اخلاص يا المسمومة ياك حبطت نخدم معاك أنا علاش حتى تحرشيه على بنتو قلتلها روحي بعديني خير ما نفسدلك خليقتك يخي لصقة قاتلي عليمن راكي لصقة يا بنت الإرهاب راني في دار عمي و خالتي و ختي الله يرحمها و لوكان نجي ليك نمحيك قالتلها أم سعد وش قالت وش قالت؟!! قالتلها سمعتيها؟ طوال لسانها قالتلها ليوم انا نربيها، في هديك الدقيقة هي دخلت هيام و لوخرى جات تتلاح فيا قالتلها هيام وش بيك وش خداك هدا؟! قالتلها انت ما عندو ما دخلك، دارت ليا هيام قاتلي وش كاين ليليان؟ حكيتلها قاتلي وش بيك انت بلخف يبكيوك !! يا بنتي راكي في دار راجلك وحدة ما تسالك و لي جابتها يماها توقف في وجهو و تشوفي كيفاش يفرجك فيها قالتلها إخلاص دفنتي خويا تحت التراب و طلعلك الشان وليتي تهدري قالتلها أم سعد انا دوك ما عندي حتى هدرة معاها كي يجي باباها يتفاهم معاها، خزرت هيام فيهم ملفوق لتحت و قاتلي ارواحي معايا ليام نروحو لعند نور نشوفو الدراري خليهم يندبو ريسانهم بالسيف عليهم يكملو الشغل و كي يجي صراع نحكيلو يحط كل وحدة في بلاصتها.
إخلاص كملت الشغل و عيطت لنائل باش يديها لدارهم و حلا كملت الڨاراج و انا دخلت دوشت و بدلت و قعدت مع هيام.
جاو الرجال من الصلاة كانت إخلاص خارجة غير شافت عمها عنقاتو و تبكي و شكاتلو مني ما هدرتش على هيام، صراع و نائل وسعد واقفين و هي تقولو يرضيك تحاوزني هاديك من دارك و تقولي يا اللصقة يا البايرة راكي رامية روحك علينا و انا مشوكية عيط عليا الحاج قالي صراع ليلياااان اطلعي لفوق قتلو عمو والله ما قلت هكدا هي جات تتضارب معايا كي أنت قلت على حلا تحبط دير الشغل هي قاتلي بلي أنا لي حرشتك، دار ليها قالها إخلاص وش دخلك أنت فهد الأمور؟! جات تهدر رفع صوتو قالها ألف مرة قلت واحد ما يدخل روحو في أمور داري، ما تزيديش دخلي روحك مابين حلا و ليليان و ديري الفتنة ما بيناتهم فهمتي جات تهدر ما خلاهاش و دار ليا قالي و انت اطلعي لفوق، طلعت نجري سڨمتلو فراشو كي دخل صابني مازالي نخمل فالشومبرة، بدل حوايجو و حبط و أنا كملت و لحقتو.
إخلاص ماراحتش ما خلاهاش عمها، دخلت للكوزينة صبت أم سعد كملت الطياب وجدت الطابلة و خبرت الحاجة قلتلها تعيشي خليلي بلاصة نقعد قدام عمو صراع زكارة في إخلاص، رمات هيام ودنيها سمعتني ضحكت و قاتلي اسمعي اقعدي قدامو و ديري حرب ما بيناتكم و خلي الباقي عليا قالتنا يماه نتوما الزوج ربي يخرج طراطقكم على خير و حنا نضحكو، درت وش تفاهمنا و هي خلاتهم حتى كامل قعدو و قالت لحرب ارواح عمتو تقعد عندي خلي ليليان تسامي راجلها مسكينة راهي طايبة من الشغل.
أنا قعدت و هو حط قدامي الخبز و دنالي الماكلة، كي كملنا الغدا راحت إخلاص تجري سبقت وجدت لاتاي و سربات لصراع و داتهولو قاتلو هاو ليا لاتاي ديالك و في كاسك كيما تحب علبالي ما تشربش في غيرو قالها يعطيك الصحة.
كملت شغلي و رحت قعدت مع هيام و الحاجة و نور و ولادها و قعدت نلعب معاهم حتى نعست رقدت في شومبرة الحاجة، غدوا منداك الصباح حبط صراع و قعدوا يحكيو على الذبيحة و العرضة و العقيقة، كي خرج قالتلي الحاجة اطلعي خمليلو شومبرتو و ادا دخل عليك سقسيه كاش ما يحتاج اكسري الشر يا بنتي، مع لول ما حبيتش كي أصرت عليا وليت طلعت انا بديت نخمل و هو دخل عليا ما هدرت معاه ما هدر معايا رفد الفوطة و دخل للدوش، جبدتلو حوايجو حطيتهملو فوق البونك و حبطت.
الدار تعمرت بالغاشي جاو كامل بنات ام سعد لساناتهم طوال كثر من يماهم و ولادهم قباح، جداتهم غير تشرشيلي تقول قتلتلها والديها، الرجال كانوا قاعدين فالصالو، هيام قعدت لداخل في شومبرة يماها مع نور و الدراري.
كملو الغدا و راحو يغسلو كانت التاقة تع الكوزينة مفتوحة شفت صراع ملبعيد لابس قميص تبسمت عجبني بيه جاه شباب مالڨري كنت نكره كي نشوف واحد لابس قميص يفكرني بصحاب خويا يحي.
قعدت نتبع فيه بعينيا كنت زعفانة منو و في نفس الوقت متوحشاتو ماشي بيدي حبيتو، كنت نتمنى نتهنى من الوضع لي راني عايشاتو في هديك الدار بصح بلاما يخرج هو من حياتي والفتو.
غلقت التاقة و هكداك و كان صوت ضحكتو مع الرجال واصل لوذني ميزتو من دومهم كامل.
وقفت مع البوطاجي نكمل الماعن و تخمامي كامل عندو حتى دخل للكوزينة و هو يضحك قرب ليا و قالي ادناي شويا بنتي ملت شويا و هو مد يديه باش يغسل و ريحتو في نيفي ما علبالوش بلي راهو ساحرني بيها قلبي يخبط و هو ماشي حاس بيا، صح عندي قرعتو تع الريحة بصح كي نشمها فيه و لا في حوايجو نحس بحاجة اخرى.
نسيت روحي و قعدت نخزر في وجهو، كمل و قالي جيبيلي سربية رحت نجري جبتهالو ما علاباليش علاش فرحت كي هدر معايا، بكلمة منو سامحتو و نسيت كلشي تمنيت غير يفتح يديه و يحضني.
هو نشف يديه و خرج و انا كملت نغسل و تخمامي عندو.
