#المراهقة و الأربعيني:
#الجزء الثاني:
ما فقتش لروحي كيفاش رقدت حتى نسمع فالرفاي يصوني على الستة و نص تع الصباح طفيتو و نضت وجدت روحي، أنا ماشي موالفة نفطر الصباح، ديت مصروفي من البورتموني تع ماما و خرجت، جزت في طريقي على صاحبتي سارة باش نروحو كيف كيف نقراو كيما موالفين، انا و إياها صحابات ملي كنا في البريمار و مازالنا لدوك جامي تفارقنا هي مسلمة كيما خويا يحي و ما عنديش صحابات من غيرها في زوج ما نحبوش نخالطو لبنات و كامل يشهدوا علينا بلي عاقلات و خاطينا المشاكل حدنا حد رواحتينا.
فالطريق قاتلي كاشما ريفيزيتي للامتحان قتلها ما تفكرينيش قالتلي علاش قلتلها علاش ماما و يحي يخليو الواحد يقرا قالتلي علاش وش صرا؟ قلتلها خالد صاحب خويا حايب يخطبني و وليد خالي حنا تان و راني حايرة ما بيناتهم ما عرفت شكون نرضي شكون نخلي قاتلي خليك منهم التهاي بقرايتك و لي كاتبها ربي سبحانو تلحق قلتلها و نعم بالله.
وصلنا للمسيد و قبل ما تصوني قعدنا نراجعو شويا أنا و إياها منبعد جات الشيخة بدات تفيريفيي في ضفارتينا و شعورنا و لبستنا.
دخلنا للكلاصة و كنت شويا مقلقة كنت حاسة روحي ماشي حافظة مليح و كان عندنا امتحان في الكيمياء الحصة الأولى بصح تبدل البروڨرام دخلت الشيخة تع رياضيات قالتنا نقريكم أنا الحصة الأولى و في الحصة الثانية باش ديرو الامتحان تع الكيمياء.
قعدت خايفة ما ارتحت حتى شفت السوجي.
كي خرجنا قالتلي سارة وش درتي فيها قلتلها صافا درت شويا غلطات بصح خدمت خير ملي كنت متوقعة قالتلي أيا مليح أيا نروحو نشريو.
شرينا و قعدنا ناكلو و كانوا قدامنا وحد البنات يحكيو قالت وحدة فيهم سمعتو بنورة لي كانت معانا العام لي فات ياك ماتت مسكينة ليلة عرسها قالولها كيفاش حتى ماتت وش صرالها قالتلهم علبالكم بزاف بنات ليلة عرسهم يموتو ما يقدروش يتحملو الزواج يقولك الرجال يوليو كيما الوحوش و كاين بنات ما يتحملوش و يموتو..
انخلعت أنا و سارة و قعدنا نشوفو في بعضانا، جامي حكينا في مواضيع تع الكبار و ما عندنا حتى معلومات على الزواج، و الشي لي نعرفوه غير من المسلسلات و الأفلام المصرية في بالنا كي يتزوجو الراجل يبوس مرتو وبعد فتره تولي حامل هدا ماكان.
كي سمعنا البنات يحكيو هكداك قلتلها سارة كاش ما فهمتي قاتلي راني كيما أنت ما فهمت فيها والو قلتلها يتسمى المرا تموت كي تتزوج و لا كيفاش قاتلي لالا ما تموتش بصح سمعت مرت عمي خطرة قالت بلي كاين شي رجال كي يشوفو مرا يوليو كي الوحوش، يوليو وجوههم حمورا و يزيرو على سنانهم شغل رايحين ياكلوها ..
قلتلها أول مرة نسمع بهد الشي ما نتزوج ما نموت قاتلي ماشي كامل يموتو كاين لي يقدرو يتحملو.
قعدنا نحكيو حتى صونات و دخلنا نقراو.
لعشية كي كملنا القرايا خرجت أنا و سارة و قعدنا نمشيو موليين لديورنا كنا دايمن نجوزو على وحد الكازيرنة و هوما يبداو يتبلاو فينا و يتغزلو بينا و حنا نحبطو ريسانا و نجوزو و نوليو نرجفو من الخوف.
كي وصلت للدار صبت دار خالي عندنا سلمت عليهم و دخلت للشومبرة بدلت حوايجي و جيت رايحة نرقد حتى نسمع في ماما تزڨيلي قاتلي ليليان ارواحي تاكلي منبعد ارقدي، رحت قعدت معاهم فوق قلبي ما نحملهمش و مرت بابا قاعدة و تڨصر معاهم و عاجبينها و أنا تقول قاعدة على الجمر كي بداو يحكيولي على حنا تقلقت قاتلي ماما روحي لبيتك قلتلها في قلبي احسن.
كي لحق وقت المغرب كانت ماما تخيط بالماشينة و مرت بابا في شومبرتها تصلي، دخلت للكوزينة سخنت الماكلة و قعدت نتعشى حتى دخلت عليا ماما قاتلي علاش راكي زعفانة قلتلها انت علبالك ما نحملوش علاش جايبتهولي للدار قاتلي يجي النهار وين تكبري و تفهمي بلي نحوس على مصلحتك، ديري حسابك نهار الجمعة جايين يخطبوك قتلها تعيشي ماما ما نحبوش قالتلي ماشي كيما تحبي خلاصت الهدرة.
قعدت نستنى في يحيى كي جا حكيتلو زعف و راح لماما يهدر معاها بدات ماما تعيط و هو يعيط حتى سمعتو خارج و قالها بصوت عالي ليليان مديتها لواحد اسمو خالد خلاص و الله ما تتزوج مع حنا لو على موتي قتلو وشنو مديتني لواحد ما نعرفوش حرام عليكم وش راكم تشوفو فيا قلتلكم ما نتزوجش، حكمني من شعري و قالي نسمع حرف زيادة نذبحك تقبلي بالسيف عليك فهمتيييي و طبعني، قعدت نبكي و ندعي حتى جات ليا ماما قالتلي غدوا صباح بكري تروحي معايا لدار خالك قلتلها ما نروح ما نتزوج و ادا سيفتو عليا نقتل روحي و نهنيكم مني و خليتها و هي تدعي عليا و على بابا الله يرحمو و على يحي.
قعدت في بيتي نبكي و جوايه الطناش تع الليل دخلت عليا ماما قالتلي مازالكي تبكي افهمي يا راس الشحم راني نحوس على مصلحتك دار حنا لاباس بيهم و رايح يخرجك من هد الفقر لي راكي عايشاتو، لوقتاش يقعد خالك يبعثلنا دراهم باش نعيشو، مادابيا نزوجك و نطمن عليك يا بنتي قلتلها ماما لوكان جيتي صح تحوسي على مصلحتي ما تزوجينيش، تحملي معايا و تخليني نكمل قرايتي و نسافر أنا وياك و نعيشو بعاد على المشاكل قاتلي بواش نسافرو و حنا المعيشة ما لحقناهاش صح هو مازالو يقرا بصح عندو منظومة انترنت في الشهر يدخل بيها العجب و هو راهو قاعد يقرا، يقدر يسفرنا للخارج و نعيشو حياتنا خمي معايا شويا قلتلها يا ماما أنا ماشي سلعة تبيعيني باش تسافري و تعيشي حرام عليك افهميني ما نحملوش افهميني و زيد حايبا نكمل قرايتي تعيشي قالتلي ماشي كيما تحبي من غدوا ان شاء نطمو قشنا و نعيطو لخالك يجي يدينا و نتهناو من يحيى و عريس الغفلة لي جايبهولك قلتلها قتلك ما نروحش و ما نخرجش من دار بابا قالتلي خلاصت الهدرة كلامي لي يجوز ماشي كلامك فهمتي و خرجت و خلاتني نبكي حتى داتني عيني و رقدت.
كي رقدت على البكا بايتة نخلط في المنام لقيت روحي نجري و هاربة من ناس ما نعرفهمش حتى خبطت في راجل طويل دخلت في جسمو و تخبيت بصح اتخنقت، نضت مخلوعة و نعرق شربت الما و كالميت روحي و نضت وجدت روحي و رحت لعند سارة كي كنا فالطريق حكيتلها على المنام ناضت تضحك قالتلي بالاك الراجل لي راهو جايبهولك خوك ضربتها قعدت تهبل فيا حتى وليت نضحك هي كامل باش تنحيلي القنطة لي كانت حاكمتني.
كي لحقنا للكازيرنة واحد فيهم بدا يتبلا فينا و يرمي فالكلام كي العادة و حنا و حنا سكتنا و حطينا ريسانا و بدينا نغاولو فالمشية و كي كانت الطريق فارغة تجرأ و حكملي يدي قتلو احشم على عرضك نحي يدك بصح هو ما حبش يطلق جبدت يدي و ضربتو للراس بالصاكادو و هربنا قاعدين نجريو و مخلوعين انا حتى وليت نبكي من الخوف.
كي لحقنا للمسيد ما جيت نكمل هداك النهار غير بالسيف ما كنتش كامل مركزة مع القرايا قاعدة غير نخمم كيفاش نرجعو للدار و هو لتم و كي خرجنا تفاهمت أنا و سارة نبدلو الطريق و خلاص.
كي دخلت لعشية للدار كان يحيى و صاحبو لتم و يماه طيب فالغدا و ماما واقفة و تحكي معاها.
سلمت عليهم و دخلت قبالة للشومبرة لحقتني ماما قالتلي عجبك الحال دوك ارتحتي راهو دار خوك لي فراسو و جا صاحبو يخطبك قلتلها و أنت وش قلتيلو قاتلي وش رايحة نقول أنا خليه هو يدير رايو و أنا ندير رايي دوك نبداو نطمو في قشنا و نهربو و هاي ليه يشبع بيها.
قلتلها كيفاش نهربو هدي دار بابا و يحيى ماعندوش الحق باش يزوجني كيما يحب قالتلي ما تفهميش حنا زوج وليات ما نقدروش نواجهوه بصح خالك يقدرلو خليه هو يتفاهم معاه قلتلها قولي لخالي هو يجي أنا عندي امتحانات ما نقدرش نخليهم و نروح قالتلي راكي تتمهبلي عليا و لا وشنو انا نقولك هكدا و انت تهدريلي على الامتحانات؟! يمال ديري في بالك حتى قرايتك و رايح يحبسك منها.
حنا هكداك حتى دخل يحي سكتنا قالي ليليان ارواحي معايا قتلو وش تحتاج قالي خالد حب يشوفك قتلو كيفاش يشوفني علاش أنا سلعة و زيد قلتلك ما نتزوجش حكمني من شعري و قالي اسمعي و الله غير نذبحك ارواحي معايا خيرلك، قتلو اطلقني حرام عليك و بديت نبكي قالي قتلك امشي قدامي قلتلو صحا اصبر نبدل حوايجي قالي ما كالاه، مسحت دموعي و مشيت قدامو و تشوكيت فالراجل لي جايبو شعرو و لحيتو طوال و لابس قميص رمادي و وجهو كحل كي شفتو طاحوا دموعي و هو كي شافني حبط راسو و قالي أهلا بالاخت ليليان جعلكِ الله من البنات المؤمنات المسلمات إلى الله ورسوله، قلت في قلبي هدا وش بيه يهدر بالفصحى و زيد محبط راسو و يحكي، قالي أنا على بينة أنكِ مسيحية ولا ترتدين الحجاب الشرعي و سيهديك الله بهدايته ان شاء الله، فكل دين غير الاسلام لا صحة له يا اختاه، قتلو وش راك تهدر انت عيط عليا يحي ليلياااان قالو خالد اتركها يا أخ يحيى أنا اريد ان اسمع ما تفكر به لكي اهديها الى الايمان بأذن الله و تكون من بنات الدولة الاسلامية.
خليتهم و نضت نجري جا مورايا يحيى حب يحكمني دارتني ماما موراها قالي و الله غير نذبحك لوكان ما نعاودلكش التربية ما نتسماش، قالتلو ماما غير بنتي لي ما تتزوجش هدا فهمت قالها و الله غير نقتلك أنت وياها و حكمها حب يضربها و يماه تحاول تبعدو و قوا الحس دخلت للشومبرة و قعدت نبكي لحقتني ماما و غلقت الباب وقعدت تبكي حضنتها و قلتلها يا ماما تعيشي سلكيني منو قالتلي قتلك يا بنتي هيا نهربو و نواعدك غير نخليك تكملي قرايتك.
خبرت ماما خالي قالها غدوا ان شاء الله مع العصر يجي يدينا لخطر كان مسافر هداك النهار.
كي خرج خالد من الدار يحيى قلبها على ريسانا بدا يعيط و يخبط فالبيبان و يحلف فيا أنا و ماما و يماه تحاول تهديه و ماما قاعدة تدعي عليه.
حتى لليل باش قدرت ماما تخرج للكوزينة و جيبلنا باش ناكلو أنا و ياها و عاودت غلقت الباب.
بقينا ليل كامل و حنا نخمو كيفاش نسلكو من المصيبة لي بلانا بيها يحيى... يتبع
