Uljhe Dor

15. Dusra Insaan Kaun Hai?

  Bela Di kal se, nahi parso sagai ke baad se hamare pichhe padi hai. Kya karoon? Aise chalta gaya to baat bigad jaayegi. Shaivi ke muh par achanak ek haath aata hai aur use ek andhere kamre mein kheech ke kamra band kar deta hai.

  "Lagta hai tumhe pyaar se kahi gayi seedhi baat samajh nahi aati hai. Is liye abhi tak wo Bela tumhare ird- gird mandra rahi hai."

  "Main kya- aah!" Adhij Shaivi ko diwar pe dhakelta hai zor se aur wo chauk jaati hai. "Main kya karoon? Wo bohot ziddi hai, meri baat maan hi nahi rahi hain."

  "Ek aasaan sa, chhota sa kaam hai tumhara, Bela ko mujhse door rakhna aur use kuchh pata na chalne dena. Lagta hai tum chahti hi nahi ho ki tumhara secret secret rahe. Chalo, main tumhara yeh kaam kar deta hoon-"

  "Nahi! Nahi, main unhe door karne ki koshish karungi-"

  "Koshish nahi, karna hi hoga tumhe. Koshish karne ka risk nahi le sakte hain. Ab jao yahan se!" Adhij chillata hai.

  Shaivi wahan se bhaag jati hai. Mujhe usse darne ki zaroorat nahi hai, wo mujhe kuchh nahi karega. Main use pehle se jaanti hoon. Wo bhale hi ameer, aur bigda hua hai, lekin wo paraadhi nahi hai. Zyada se zyada wo sabko meri secret bata dega. Lekin main use wo mauka nahi doongi. Shaivi apne aap ko dilasa dilane ki koshish karti hai.

  "Yeh Shaivi ko kya ho gaya?" Veer Shaivi ko store room se bhaagte dekhta hai. "Kal bhi aayi thi lekin mile bina chali gayi."

  "Achha? Tujhe badi problem ho rahi hai."

  "Of course, problem ho rahi hai- Ansh. Aap yahan kya kar rahe ho?"

  "Mera chhod, tu bata tu yahan kya kar raha hai?"

  "Main? Main to, main yahan pani lene aaya tha."

  "Veer, mere bhai, kitchen us taraf hai."

  "Haan, to ja raha hoon na."

  "Theek hai, to ja."

  "Haan, ja raha hoon." Veer chala jata hai. Dusri ore se Maan aati hai.

  "Ansh, tumne Kunal ko dekha?"

  "Hello Maan, tum kaisi ho? Uncle ji kaise hain?"

  "What? Ansh, maine tumse kuchh puchha hai."

  "Chalo ek game khelte hain. Guess who I am. Clues deta hoon, I am not a scurity guard or body guard, main Kunal ka PA bhi nahi hoon."

  "Uh, I know that. Tumhe kisi tarah ka sadma laga hai kya ki tum kya kaam karte ho wahi bhool gaye? Tum Inmiro Co. ke CEO ho."

  "Ting ting ting, sahi jawab! Aap jeet ti hain ek chocolate ka hamper!"

 "Ansh! Mere paas games ka time nahi hai."

  "First of all, it's Anshuman. Second, tum mujhse do din mein daswi baar puchh chuki ho. "

  "Mujhe laga tum uske bhai ho to tumhe pata hoga-"

  "Uska bhai hoon, body guard nahi."

  "Whatever. Nahi pata hai to seedhe seedhe bata do." Maan wahan se chali jaati hai.

  Pata nahi kya ho gaya hai logon ko aaj kal. Shaivi aur Bela, phir Veer aur ab yeh. Nahi, yeh to pehle se hi pagal thi. Ismein koi nayi baat nahi hai. Pata nahi Veer aur Badi Maa ko kya dikha ismein. 'Whatever.'

  "Ansh! Tu yahan hai? Dadi dhoondh rahi hai tujhe." Kunal kehta hai.

  "Tune suit-wuit pehen liya hai. Kahin ja raha hai kya?"

  "Haan, Guptas ki file office mein reh gayi hai. Mom mujhe office nahi jaane de rahi hai to maine socha saare files le aata hoon taaki ghar se kaam kar sakun."