Uljhe Dor

16. Sangeet Aur Siyappa

  "Bela, zara idhar aana."

  "Ji, Sonia aunty."

  "Aaj koi siyappa na karna. Jo bhi hai, baad mein kahi- suni ho sakti hai, lekin sabke saamne tamasha nahi hona chahiye. Aur tune sab dekh liya hai na? Sagai ke din ki tarah is baar koi mushkil to nahi hone wali hai na?"

  "Ji, Sonia aunty. Hamne music system check karwa liya tha jab sab tayyar ho rahe the. Bijli aur lights bhi check ho gaya hai. Starters aur welcome drinks ab shuru hi hota hoga. Sab theek hai."

  "Tu jaanti hai mera kya matlab tha. Mujhe bolne ki zaroorat nahi hai na?"

  "Main koi galti nahi karungi, Aunty ji. Aap aaraam se sangeet enjoy kariye." Bela embarass hote hue bolti hai.

  "Yaad rakhna, tumhara janglipana baahar nahi aana chahiye. Agar tumhe nahi aata hai to Shaivi ko dekh ke seekho." Sonia chali jaati hai aur Dadi Bela ke paas jaati hai.

  "Puttar, Sonia ke baat ka bura mat manna. Ghar ki badi bahu hai, pure ghar- baar ka, parivar ke maan- izzat ka bohot khayal rakhti hai taaki ham mein se kisi pe bhi koi kabhi ungli nahi utha sake. In sab mamlon mein thodi sakht hai."

  "Koi baat nahi, Dadi, ham samajhte hain. Apne parivar ki chinta sab ko hoti hai. Koi nahi chahega ki unke parivar ka mazak bane. Ham aam, sadharan se ghar se aate hain. Hamein pata hai izzat kitne mayne rakhti hai." Kaise na jaanenge ham, 15 saal pehle jo hua, uske baad hamein pata chal gaya maan- sammaan ki kya ahmiyat hai. Ameer log paise wale hote hain jiski wajah se unhe apne aap bohot izzat aur sammaan milta hai. Lekin ham jaise aam logon ke liye paisa ho- na ho, izzat hi sab hai. Samaajh mein auda ho, ek sthaan ho, yahi zaroori hamare liye. Hamne Papa ko apne aankhon ke saamne toot-te hue dekha hai, bikharte hue dekha hai. Hamse zyada behtar kaun samjhega is baat ko.

  "Lagta hai tumne apne jeevan mein kaafi kuchh saha hai."

  "Bura daur to sabke zindagi mein aata hai, Dadi. Ham koi alag nahi hain."

  "Mushkilein aayingi, lekin pyaar aur pyaar karne wale ka saath himmat deta hai unse guzarne ka aur unpar vijay paane ka."

  "Lekin jab wahi pyaar dhokha de? Jisse ham jitna zyada pyaar karte hain wahi sabse pehle dhokha deta hai. Kisi pe bharosa nahi kar sakte hain."

  "Kabhi kabhi hamse cheezon ko samajhne mein galti ho jaati hai. Kai baar cheezon ko ham jitna jaante hain wo usse bohot bada hota hai, ham jitna samajhte hain usse zyada gehra hota hai. Insaan ke har kadam ke pichhe koi na koi wajah hoti hai jise ham samajh nahi paate hain aur koi galti kar baithte hain. Phir yahi zindagi bhar hamein satati hai. Achha to yahi hoga na ki use bhool ke aage badhein? Ek dhokhe ki wajah se pyaar ko kyun badnaam karna? Ek insaan ne dhokha diya, lekin koi to hoga tumhe sambhalne ke liye jab tum us dhokhe ki dard se guzar rahi thi.  Pyaar to bohot pavitr ahsaas hai. Tum yeh jaanti hogi. Tum apne Papa se pyaar karti ho na. Wo bhi tumse pyaar karte hain. Rab pe bharosa rakho, wo achhe insaanon ke saath kabhi bura nahi karta hai."

  "Aapki baat sunke ek alag sa sunkoon milta hai, Dadi. Hamari Nani aisi hi hua karti thi. Ab nahi rahin wo."

  "Main hoon tere liye, puttar. Jab bhi zaroorat pade ya yaad aaye, aa jana mujhse milne. Main na to teri Dadi se kam hoon, aur na tu bhi mere liye meri Aarohi se kam hai."

  "Shukriya, Dadi. Achha, isse pehle ki ham ro pade, ham jaake Aarohi ko dekhke aate hain. Aap use dekhenge to uski nazar utaarne se apne aap ko rok nahi payenge."

  "Achha, jao."

  Bela Aarohi ke kamre mein jaati hai aur wahan teeno bhaiyon ko dekhti hai.

  "Hamari Aaru kitni sundar lag rahi hai." Ansh bolta hai.