"2025 အတွက် ကျန်းမာရေးအသုံးစရိတ်ကို ဝမ် ၉၀ ထရီလီယံ၊ စစ်ရေးအသုံးစရိတ် ဝမ် ၈၀ ထရီလီယံနဲ့ ပညာရေးအသုံးစရိတ်ကို ဝမ် ၈၀.၅ ထရီလီယံအထိ လျာထားပါတယ်"
"၈၀.၅ ထရီလီယံ ... နောက်နေတာလား။ အရင်တခေါက် အစည်းအဝေးတုန်းက ပညာရေးဝန်ကြီးကို နှစ်ကုန်ဘတ်ဂျက်တိုးပေးမယ်လို့ ကျွန်တော် ကတိပေးထားခဲ့ပြီးသားလေ"
"ဒါက ဝန်ကြီးဌာနအားလုံး တောင်းခံလာတဲ့ ဘတ်ဂျက်ပမာဏတွေအပေါ် မူတည်ပြီး အချိုးကျခွဲဝေပြီးသားစာရင်းမို့လို့ ထပ်တိုးမယ်ဆိုရင် ဘတ်ဂျက်မလောက်တော့ပါဘူး ဝန်ကြီးချုပ်"
ညရှစ်နာရီကျော်နေပြီဖြစ်သော်လည်း ဝန်ကြီးချုပ်ရုံး ပင်မအစည်းအဝေးခန်းတွင်တော့ မပြီးပြတ်သေးသည့်ဆွေးနွေးမှုများစွာနှင့် အခြေအတင်ငြင်းခုံနေဆဲ။
"ဒါဆိုရင် စစ်ရေးအသုံးစရိတ်ကို ဝမ် ၆၀ ထရီလီယံအထိ လျှော့ချပြီး ပညာရေးအတွက် ဝမ် ၁၀၀ ထရီလီယံအထိ တိုးပေးလိုက်။ ပြီးတော့ အမေရိကနဲ့ ဒေသတွင်းပူးတွဲစစ်ရေးလေ့ကျင့်မှုတွေကို ပုံမှန်အတိုင်းဆက်လုပ်ပြီး ပြည်ပက လက်နက်တင်သွင်းတဲ့ပမာဏကို ရှေ့တစ်နှစ်ကထက် ၃၀% လျှော့ချလိုက်ပါ"
"ဒါပေမယ့် ... "
"ဘတ်ဂျက်လျှော့ချလိုက်တဲ့အပေါ် ကာကွယ်ရေးဝန်ကြီး စိတ်ကျေနပ်အောင် ကျွန်တော်ကိုယ်တိုင် ညှိနှိုင်းပေးမှာမို့လို့ ညွှန်ကြားရေးမှူးချုပ်က အဲဒီစာရင်းအတိုင်းပဲ ဘဏ္ဍာရေးဝန်ကြီးဌာနကိုပြန်ပို့ပြီး မနက်ဖြန် လွှတ်တော်မှာ အတည်ပြုခိုင်းလိုက်ပါ"
"နားလည်ပါပြီ ဝန်ကြီးချုပ်။ နောက်ထပ် နိုင်ငံခြားရေးဝန်ကြီးဌာနက တင်ပြလာတဲ့ အစီရင်ခံစာက ဂျပန်နိုင်ငံနဲ့ ရေပိုင်နက်အငြင်းပွားတဲ့ကိစ္စပါ။ ဒီပြဿနာပြန်စလာတာက .... "
တဖန်ပြန်ဂယက်ထလာသော ရေပိုင်နက်အငြင်းပွားမှုမှာ နှစ်နိုင်ငံအကြား၌ ဆယ်စုနှစ်နှင့်ချီ၍ဖြစ်ပွားခဲ့သော ပြဿနာဖြစ်၍ အစီရင်ခံစာ၌ တင်ပြထားသမျှကို ဟန်ဘင်း အာရုံစိုက်၍ နားထောင်နေစဥ် အတွင်းရေးမှူးယူက အနားသို့ ခပ်သွက်သွက်ချဥ်းကပ်လာသဖြင့် အသာခေါင်းငြိမ့်ပြလိုက်သည်။
