ကိုယ် မင်းကို ဘယ်လိုဖွင့်ပြောရမလဲ (ရှောင်ကျားရှု) BL (IQ Team ကစာစဥ်တစ်ခုပါ)

191 - 193

Chapter 191

ဝန်ထမ်းများက လက်မြှောက်ပြကာ အဆင်သင့်ဖြစ်နေပြီဖြစ်ကြောင်း အချက်ပေးလိုက်သည့်တိုင် ရွှယ်မြောင်ကမူ မိန်းမောနေလျက်သာ တုန့်ပြန်လိုက်သည်။ ဘေးနားတွင် ရပ်ကြည့်နေသည့် သရုပ်ဆောင်များ ပို၍ပင် များပြားလာကာ လူတိုင်း၏ အမူအယာမှာလည်း နားလည်ရခက်မှုတို့ဖြင့် ပြည့်နှက်လာတော့သည်။

ဆိုတော့ ဇာတ်ကောင်စရိုက်ထဲ နစ်ဝင်သွားတယ်ဆိုတာ ဒါမျိုးကို ဆိုလိုတာပေါ့ ဟုတ်လား ရှောင်ကျားရှုက တကယ်ကို အင်အားကြီးတာပဲ သူ့ကိုယ်သူ နာမည်ကြီးအောင် ဖြတ်လမ်းနည်း မသုံးဘဲ အရည်အချင်းကို အားကိုးပြီးပဲ ဒီအဆင့်အထိ တက်လာနိုင်တာ ...

"အက်ရှင် ..."

ဒါရိုက်တာ၏ စကားသံအဆုံး ကျိမြန်က ချက်ခြင်း မျက်လုံး ပြန်မှိတ်လိုက်ကာ ရှောင်ကျားရှုလည်း စိတ်ရူးဖောက်သည့် အနေအထားသို့ ပြန်လည်ရောက်ရှိသွားတော့သည်။ တံခါးကို ကန်ကျောက်ကာ စစ်သူကြီး၏ ခါးတွင် ချိတ်ဆွဲထားသည့် ဓားကို ဆွဲယူပြီး ထွန်းညှိထားသည့် ဖယောင်းတိုင်အားလုံးကို အပိုင်းပိုင်း ဖြတ်ကာ ရှိုက်ငိုလိုက်သည်။

"မင်းက နောက်ဘဝကို လိုချင်တယ်ပေါ့ ဟုတ်လား ငါကိုယ်တော်က အဲဒီ့ကိုရောက်ဖို့ တံတားတောင် မလိုဘူးကွ နောက်ဘဝမှာ မင်းနဲ့ တွေ့ကြမယ် ..."

အစေခံအိုကြီးက သူ့အနားကပ်ကာ ဖြောင်းဖျလိုက်သော်ငြား နားမထောင်။ ဓားကိုသာ အရူးအမူး လွှဲယမ်းရင်း သူ့ကို မောင်းထုတ်လိုက်တော့သည်။

မီးတောက်က အဖြူရောင် နဖူးစည်းမှတစ်ဆင့် အရာအားလုံးကို တစ်စစီ ဝါးမျိုပစ်လိုက်တော့သည်။ ဧကရီဘုရင်မက သက်တော်စောင့်များအား အထဲသို့ အမြန်ဝင်ကယ်ရန် စေခိုင်းလိုက်ချိန်တွင်မူ ဈာပနခန်းမမှာ မီးလောင်နှင့်နေပြီဖြစ်ပြီး ဝင်ပေါက်နှစ်ခုလုံး လောင်ကျွမ်းပျက်စီးသွားတော့သည်။ သူမ၏ တစ်ဦးတည်းသောသားက မီးတောက်များအကြား ရပ်နေကာ အဝတ်အစားနှင့် သရဖူတို့ကို တစ်ခုချင်း ချွတ်ပစ်ရင်း အဖြူရောင်ဝတ်ရုံတစ်ထည်သာ ဝတ်ဆင်လျက် ကျောက်သားခေါင်းတလားထဲ ဝင်သွားလိုက်သည်။ လှဲမချမီ ဧကရီမယ်မယ်ကို နောက်ဆုံးတစ်ချက် လှည့်ကြည့်လိုက်၏။ သူ့အကြည့်တို့တွင် ကြောက်ရွံ့ခြင်း၊ လေးစားအားကျခြင်းတို့ မပါ၊ စိတ်သက်သာရာ ရမှုသာလျှင် ထင်ဟပ်နေတော့သည်။ နောက်ဆုံးတော့ လွတ်မြောက်သွားချေပြီ။