LOYAL HEARTS #3: WHILE ON THE OTHER SIDE

THREE

Nagsimula na sila sa pagsusulit nang dumating ako sa classroom.  Sinundan ako ng tingin ng proctor namin pagkapasok ko. Pinakita ko sa kanya ang resibo na may tatak na valid for midterm.

"O Ms. Claravel, akala ko hindi ka makaka-take ng exam? Saan ka nakakuha ng pambayad?" tanong niya habang inaabutan ako ng test paper.

"Nang-holdap ako ma'am."

Nagtawanan ang mga kaklase kong nakarinig sa aking sinabi. Huli ng aking pandinig ang maarteng tawa ni Tori.

Napailing na lang ang proctor namin, sanay na sa ugali ko. Pumihit na ako't tinungo ang aking pwesto sa tabi ni Tori. Dinukot ko ang aking baon na bubblegum, binuksan at ninguya upang pawiin ang gutom. Hindi pa ako nag-agahan.

"Saan ka nang-holdap?" bulong ni Tori habang kunwaring binabasa ang papel niya.

"Diyan lang sa baba." Bulong ko pabalik. Tinakpan niya ang bibig upang itago ang kanyang tawa.

Sinita siya ni Nolan na hindi nag-aalis ng tingin sa kanyang testpaper.

"Stop talking. Eyes on your paper," sita ni Ms. Silvano.

Sa amin siya nakatingin. Tumikhim ako at umayos ng upo. Binasa ko ang unang question, hindi ko maintindihan kaya nag-skip ako hanggang umabot ako sa question number eleven, doon ko pa lang nakuhang sumagot.

Babalikan ko rin ang mga hindi nasagutan. Importante eh. Ganyan naman talaga, babalikan ang mga importanteng bagay. Iiwan naman ang mga hindi.

"Bumalik na si mom, may dala ulit mga lipstick. Bigay ko sa 'yo yung tatlo," bulong ulit sa 'kin ni Tori.

Tinatapik niya ang ballpen sa armchair niya upang hindi mahalata ng iba ang sarili naming discussion.

"Ang dami mo nang binigay na hindi ko pa nagagamit—"

"I said quiet! The examination is on-going so focus on your papers. Stop talking."

Nag-angat ng tingin ang mga kaklase ko upang tunghayan kung sino ang pinaparatangan ni Ms. Silvano. Kailangan pa ba nilang itanong? Obviously. Do I have to point a finger to myself?

"Iyan, mag-shut up ka nalang kasi," bulong ko kay Tori.

"Final warning, Ms. Claravel." Mahigpit na anunsyo ni Ms. Silvano.

"Wala pa ngang semi-final, final na agad," bubulong-bulong ko. Narinig iyon ni Nolan at nagpakawala ng hagikhik.

Nag-behave na ako pagkatapos noon. Nakapatong ang isang binti ko sa isa at ginagalaw-galaw ito habang sinasagutan ang testpaper. Masyado akong inaantok upang sipaging basahin ang mga tanong kaya ang iba ay diretso kong binilugan ang sagot.

Tumayo ako upang magpasa ng papel.

"Hintayin ko kayo sa labas," ani ko kina Tori. Kapwa sila tumango ni Nolan.

"Ang bilis, a."

Nilingon ko si Angelov na sa pinakalikod ang silya. Matangkad kasi, kaya diyan siya nilagay. Kinakagat-kagat niya ang dulo ng ballpen niya habang ningingisihan ako.

"Inggit ka? Bilisan mo rin."

Iling siyang nagbalik tingin sa papel niya.

"You're done Ms. Claravel? Nag-iingay ka na ulit."

Hinarap ko na si Ms. Silvano. Ang igsi talaga ng pasensya ng matandang 'to. Natitigang na yata eh.

Ako ang unang nakatapos. Pagkatapos ilapag ang testpaper ay lumabas na ako, Walang panghihinayang sa mga maling sagot ko. Idadahilan ko ba ang antok ko? Iba naman kasi ang katamaran kaya masasabi kong hindi ako tinatamad.