المنفى_الغريب

ch/4

بديت مع 4 ديال العشية مساليت تال 8 ديال ليل .. جاتني السخفة .. الخناشي ديال الزرع جمعتهم فواحد القنيتة بينما نساليلهم .. البونجة خرجتها لبرة نفضتها أما واحد الوسادة كانت كلها واكلها تونية .. زاوطت باباها .. نمل قلت بسم الله وكبيت عليه الملحة .. الفيترينا رديتها لواحد جهة بعد ماغسلتها ومحيتها وحطيت عليها حوايجي .. وحطيت عليه واحد ساعة ديال دجاجة لقيتها برا ملواحة .. واخا ماخداماش .. ولكن لديكور فقط .. مهم شطبت وسيقت وتسخسخت وتدكدت .. وبقاو ليا غير داك جوج بوبريصات .. حطيتهم قدام عيني وبديت نيش .. وتقول جنون ولا بغاو يتشدو ليا ... ولكن معايا أنا يلعبو ... درست ليهم زاوية لمناسبة للقتل بصندالة .. يالاه قلت بسم الله وبغيت نشير وهي توقف عليا داك المرا كي الموت لي كانت كاتفرج عليا غير من لبعيد وساكتة
- اش كاديري ؟
- كنبيع الحشيش مكاتشوفيش ( ناري على شوفات دارت فيا تخلعت أنا تعزعزت .. درت واحد ضحيكة زعمة البراءة) ..سمحيلي ألالة .. داك جوج بوبريصات بغيت نخرجهم
- (مخنزرة) تخرجيهم ولا تقتليهم ؟
- (بتمسكين) حاشة .. غير نخرجهم
- هاد دار دارهم .. ونتي لي هاجمة عليهم
- أنا !!!!!! :o ؟؟
- ولي ماعجبو حال يبات برا
- يالاه سمعتوها تلاحو فحالكم .. ماعندناش هنا الخيرية
- واش انت عندك شي عقل ولا غير العجينة .. داك ضسارة راه ماعندي ماندير بيها هنا .. راه ماشي باك سمح فيك وانا نحصل فيك ... هادوك جوج تما يبقاو وإلى ماعجبك الحال باتي برا
- (بتدمر) وراه كانخاف منهم
- برا كاين ماكبر منهم .. إيوا لي بغيتي
قالت هضرتها لي بدات كايتعاود صدى ديالها وخرجات .. أميمتي ميمتي على اخر ايامي نبات مع بوبريص فنفس البيت .. آآآآه اهئ اهئ .. سلمت أمري لله ورديت بقدري .. وتبعتها لكوزينة لقيتها وجدات صوبة .. هزيت معاها ربعة ديال زلايف واخا سولتها علاش حنا غير جوج .. قالت ليا دخلي سوق راسك .. وصلنا لواحد البيت كانو فيه جوج سدادر واحد كايضحك لاخور طلامطهم دايزة عليهم هيروشيما وكلهم مقطعين .. جلسنا وبدينا كنشربو فصوبا أنا يالاه درت جغمة لولا وبغيت نرد
- واااع شهادشي مسوووس وداير كي رملة
- بغيتي تشربي مابغيتيش سيري تنعسي وتباتي بجوع
- ت .. أنا نمشي نجيب لملحة
- (يالاه وقفت وهي تغوت ) جلســـــــــــــــــــي
- وراه مسوسة ؟؟
- شربيها هكاك
كنت باغا نزيد فتمرد ولكن شفت شرارات خارجين ليها من عينيها .. وبركت على قلبي وجلست الأرض راه من لبارح مادقتو .. شكون قال لبارح كنت فرحانة بين عائلتي كانضرب فرفيسة العمية.. وليوم كانعميها بصوبة مع مرأة ماعارفة تا سميتها
- سميتي زاهية
ويلي واش هادشي واش كتسمعني ؟ .. ناري جاتني تبوريشة فراس
- وانت ؟
- أ ... دنيا
- سمعي أدنيا داك تبرهيش ديال داركم نسايه .. وهادي هي دارك جديدة .. بغيتي ولا كرهتي .. وكل ماحكرتي وتعنككتي .. غاتجيبيها غير فراسك .. سمعي الهضرة .. ونقصي تسوال .. وغاتعيشي مزيان ومناقصك تا خير
- علاش جابني با لعندك ؟؟ واش غانبقى هنا ديما ؟
- ههه فعايلك هما لي جابوك .. وحيت هنا مكاينش حس رجال تكتب ليك تعيشي هنا تا تموتي .. بحالي .. حاسة بلي انت هي لخليفة ديالي .. وغاتعيشي من بعدي فهاد دار
- (بحشمة) هي غاتكتبيها ليا بسميتي
- يالاه جابك باك وجيتي من المدينة لراس جبل .. وبين ليلة ونهار تقلبات حياتك .. وماهامك غير دار نكتبها ليك بسميتك .. ألالة مايقد عليك غير لي خلقك
- ماشي هكااااك أزاهية أأ خالتي
- يخوي ليك ضراس ماتبقاش تقولي ليا خالتي .. كيما بغات تكون تا تكون دار بسميتي عاد نكتبها ليك انت
- علاش دار ماشي بسميتك ؟؟
- لا
- ودابا يجي مولاها ويتري عليك
- مكاينش ولد ولا بنت لمرا لي يجري عليا من هنا
- غادي يجي أزاهية غادي يجي ... كنشم ريحتو من هنا .. ماليا المكان .. راجل ماشي بحال كاع رجال · · ·

حطات زلافة وناضت شنقات عليا والغضب كياكل فيها
- أي أه أو .. أزاهية طلقي راه غير كنضحك معاك واحق سيدي ربي إلى غير كنضحك.. راه با حرمني من رجال وبديت نهوس .. أي طلقي .. كن كنت غانعرف أش غايطرا .. كن كاع ما تلا بيا ليام عندك
قتانعات بهضرتي وطلقات .. أه يالطيف يديها المعضمة .دايرة كي المسامر الله يحضر سلامة .. يخ على مرض
- أنا لي حمقة دايرة فيك راسي .. شوفي أديك شنويلة هدا أخر نهار دوقي ماكلتي من ليوم انت لي غاطيبي وتخملي .. وبغيت كي رديتي داك البيت كاع البيوت يتنقاو بحالكم .. المالكة نلقا فيها نقطة ديال لملحة نكشف على والديك .. وغدا قبل مانفيق نلقاك فقتي مع 6
- مالك عند شي بقر ولا شي معيز ولا شي دجاج ياك غير تاتا و دبان
هاد المرة تلاحت عليا بالقميش والعضان .. ماحسيتش براسي تا دفعتها وجبتها مكسلة على الأرض .. يخ قفرتها دابا نقتلها ونولي منفية فعكاشة مشيت كنطير لعندها كانطلب سماحة
- زاهية أزاهية قلت ليك ماتقابحيش معايا .. سمحيليا والله ماقصدت ولا ماعرفت كي درت ليها .. وانت لي خفيفة .. أأ قصدت ضعيفة .. (كندهن فيها ) من ليوم أحبيبتي زاهية ايامك تولي زاهية .. نتهلا فيك فالماكلة .. تاتولي كي الخنشة.. ولي قلتيها ماتعاود غير صلاة عل النبي عليها ... واسمحي ليا الله يزوجك .. مزوجة أزاهية ؟؟
وهي باقا كاتشوف فيا جاتني واحد البونية للعين جابت راسي ملصق على الأرض .. ماعرفتها منين صدات والمشكلة ماشي من يد زاهية .. واااع هاد اليد عااامرة .. بديت كندور فيعيني لي مجاتش فيها البونية مبان ليا حد .. أما لعين لي تلكمات حسيت بيها دخلات تلعب فالمخ لبي .. ناضت الزاهية من حدايا
- هادي غير البدية .. ولي جاي كتر جمعي طبلة ونوضي تركدي قبل مايجمعوك بنص
- شكون هما ؟؟
- موالين المكان
مشات بحالها وصدى ديال موالين المكان كايتعاود .. جمعت الوقفة بزربة .. وجمعت طبلة وانا كنترعد .. ومشيت نعست وانا مبنجة .. تا بوبريصات لي كيلعبو فوق راسي كاع ماتسوقت ليهم .. كل همي هو شحال من جن بسم الله الرحمان الرحيم داير بيا حاليا