المنفى_الغريب

CH/ 16

وجاء صباح أخيرا كان غالي مزال ناعس ومشيت كنتسلت لجيهتو غير بالحس .. وتاقربت ليه وعاد غوت على مافحر جهدي
- واااااااااااااااعتقو روووووح
- (حل عينيه واقف) هيي أش واقع؟؟
- جنون كيبيعو لكيف .. فيق باش تسقي ليا من لبير راه رجلي ضارني وماعندي باش نصاوب ليكم لفطور
- وهاكدا كايفيقو ناس ألهمجية
- (ببراءة) وانا أش عرفني كي كايفيقو ناس وانا عمري كلو ساكنة غير مع زاهية
- (معفر) زيدي قدامي
مشا سقاليا من البير وجا عاونني فالفطور ولا يدخل ليا القلبي هاد سيد .. ضريف غير هو معنكك .. فطرنا وانا غير كاتجي عيني فعين عادل ضعمة كاتوحل ليا ... من بعد ماسالينا الفطور تافقو يديرو جولة بما أنه الجو معتدل ومكاين ما يدار .. مابغيتش نمشي ولكن لصقات فيا العروسة .. ووافقت من بعد ماشفت الشكوك فعينين سيهم عادل .. ولكن مناش هربت طحت فيه .. لعروسة لي هي سارة وغالي ومنال مشاو القدام وأنا وعادل لي كنعرجو بقينا تابعينهم من لور
- بغيت نسولك علاش هربتي داك نهار ؟؟
- (بعفوية) خفت
- مناش؟؟
- كان احساسي كايقوليا شي حاجة ماهياش .. ونيت شفتي أش وقع
- واش بصح ؟
- اه
باينة لعمى ماتيقش ولكن ماعندو تا شي حجة عليا وصلنا لحدا واحد شجرة كبيرة وجلسنا انرتاحو
- منال : أش بان ليكم نلعبو شي لعبة ؟
- غالي : أهاه فكرة زوينة
قرد كن قلت ليه أنا نلعبو كن عايرني وهي دغيا وافق القزقاز لاخور
- منال : بما أننا كبار أش بان ليكم نلعبو كرسي الإعتراف
- غالي : أهاه .. نلعبوها هاهيا عندي قرعة ديال لما ندوروها بيناتنا ولي جات فيه الفتحة هو لي يسول شخص لي مقابل معاه
كلشي وافق .. دور غالي وماتجي غير فاختكم دنيا وسي عادل وهو لي يسول
- عادل : شنو هو أكبر جرم درتيه ؟
أهيا ناري أش هاد سؤال .. هدا كيدق عليا نيشان .. ولكن ماعمرو يحلم بالجواب لي باغي حيت داكشي لي درت فيه يستاهلو .. دورت وجهي عند غالي
- أنا : غالي اسمح ليا أنا لي سرقت القرآن من بيتك
- غالي : أشنو انتي ؟؟
- أنا : اه كنت مرغمة سوريييي
بدا كايشوف فيا شي شوفات ماهياش ...عاود دور القرعة وجات فيه هو يسول وسارة تجاوب
- واش ليوم كتكرهي أحمد على مادار فيك؟؟
- اه ولكن مزالا كنبغيه فنفس الوقت .. الحب مكايتنساش بين ليلة ونهار .. ماعرفتش شحال ديال الوقت خصني وماعرفتش واش الجرح يقدر يبرا
دارت القرعة وجات فيا أنا نسول ومنال تجاوب
- واش كاتأمني بالحب ؟؟
- أه .. ولي كنبغيه كاين هنا
غالي بدا كيضحك .. وأنا بحالا خشيتي فيا موس .. ماعرفتش علاش ولكن جوابها خلا صدري يتقبط عليا .. وبالخصوص ملي ضحك ليها هو واااع .. دارت القرعة مجددا وجات فيا أنا نسول ومابين عادل ومنال وحيت منال سولتها هاد المرة دور على عادل
- عادل أشنو هي أقصى العقوبات لي تقدر دير فعدوك لدود ؟
- (كايمعني عليا) غانعيشها لعداب لي عشتو ... وغانتزوجها باش تكمل العداب لي كنعيشو معايا
- هه مكاتشوفش راسك زدتي فيه ؟؟ تقدر تكون انت الغالط لا؟
- واخا نكون غالط .. غادي نزيد نغلط فيها
كملنا اللعب بشي أسئلة تافهة تا ملينا ورجعنا لدار .. غالي وسارة ومنال دخلو لدار أما أنا عادل ماخلانيش ندخل وحبسني برا سور · · · 

- دنيا ؟؟ واش يسحابك غاتفلتي مني .. يسحابك ماعرفتكش ؟
- عادل بعد مني .. الغلط غالطك .. وداكشي لي طرا ليك .. غير دعوات الناس عليك لي تحققو
- اهاه دعاوي الناس ملقاو علامن يتحققو غير على يديك .. إذن تانتي ليك نصيب منهم .. وغانعيشك معايا فالجحيم
- الجحيم ماشي رجل عرجة ووجه مشوه لي عيشك فيه ... ولكن قلبك الكحل لي مكايعرفش الرحمة هو سباب .. وانا ماعندي تادخل فيه
- القلب !!!!!!؟؟ فاش ناس كيشوفوك من البعيد وكايهربو ولا كيدورو وجههم .. أش عرفهم فقلبك
- ناس لي كيهربو بمجرد ماشافو وجهك .. كن على يقين كن قربو وشافو قلبك وتصرفاتك كن علقو .. وانا غير اختاصرت عليك وعليهم المسافات ... عادل .. انت عارف انني ماقصدتش ندفعك داك نهار .. وكن ما تهجمتيش علينا كاع مايطرا لي طرا .. الغلط غلطك .. ولي طرا قضاء وقدر إلى كنتي مسلم طبعا
- مسلم ؟ أه مسلم لداكشي فكرت نكمل نص ديني .. ونتزوج بيك .. بما أنك انت أدرى ناس بحالتي .. ونتي لي مغاتشمأزيش من وجهي حيت انتي سباب فلي طرا
- تفو .. غانرجعو لنقطة الصفر .. أنا مايمكنش ليا نتزوج بيك حيت كنبغي غالي
- غالي : أشنو كاتبغيني ؟
بمجرد ماقلت بلي كانبغيه خرج هو ومنال وسارة عندنا
- دنياااا جاوبي ؟
- أنا : أه
ماقدرتش ننكر ماشي حيت خوف من عادل .. ولكن حيت شي حاجة فداخل ديالي ماقادراش تكدبو .. ولكن غالي وراني وجهو لاخور .. أقسى من أي وجه وراه ليا .. وبقا كايغوت قدام كلشي وأنا غير ساكتة وحادرة الراس
- واش كاتعرفي أش كاتقولي ... هاد زمر لي كاتحسي بيه غير خرجيه من راسك .. حيت ماعندي ماندير بصداع الراس ديال بعلوكة باقا فسن المراهقة .. وعمري.. عمري فحياتي نديها فبنت شواافة .. داكشي لي بقا قالك كاتبغيني .. تابنت جبل كااتعرف البغا
رما كلماتو المسمومة كالرمح ودخل زادح الباب .. تبعاتو منال .. وانا ماعرفت باش تبليت عمري فحياتي تهانيت بهاد طريقة وبقيت ساكتة.. وعلاش حيت ماعرفتش أش هادشي جديد لي كانحس بيه
- عادل إلى قتلتيني غاترتاح ؟ قتلني هانا قدامك ؟ أشكاتسنى .. تقتلت من داخل يعني غايكون ساهل عليك تقتلني من برا ؟؟ قتلني دابا ولا عمرك تبقى تلومني (الهضرة مابقيتش قادرة نخرجها أش هادشي ياربي )
- ماعرفتش أش غانقول ؟؟ واش كاين شي عقاب كبر من هذا ليك
- سمح ليا والله يسمح لراسي مني ... كن كنت عارفة بلي غايوقع هادشي .. كن خليتك ضربني داك نهار وبلا مانهز راس .. كن غير أنا لي تدفعت ماشي انت كن غير مت داك نهار فكسيدة ولا هاد الحالة ياربي
- كانعتارف بلي تا أنا غلطت وحقدي عما لي العنين
- واش غاتبقى تابعني باش اتنتاقم مني ؟
دور راسو دليل على النفي ودخل هو وسارة لدار .. اما أنا علاش جيت نتخبى منو مابقاش كيقلب عليا .. ومن ليوم مابقى عندي ماندير فهاد المنفى .. درت على دار ولقيت ميكتي باقا محطوطة .. هزيتها ورجعت من طريق لي جابني منها با أول مرة ..تعاقبت كفاية .. لي داز عليا عمري تخيلتو .. وبالخصوص هادشي للخر .. ونعطي قلبي لواحد حقير .. وأخيرا فهمت أش قصدات الزاهية