المنفى_الغريب

CH/ 9

- أش كاديري هنا أداك لبعلوكة ؟
درت عندو نص دورة كان واقف عريان لابس غاشورط واقلة كان كيعوم فالبير يع مقزز.. درت فيها بنت دارنا
- هييييييييييييي ماما ويلي ويلي ..عريان لبس عليك ألويل شي حاجة .. راني باقا مادموزيل
عاد تفكر راسو ومشا هز المونطو وأنا درت القرآن مابين حوايجي بزربة ودرت عندو بكل براءة
- احم
- أش سرقتي ؟؟
- أنا ؟؟؟ لااااااا ... ماسرقت والو .. هو صراحة صراحة سرقت غير شي حاجة ديال لبنات ... كي شفتي انت لبارح جيتي على غفلة .. ونسيت داكشي وجيت ليوما نديه ونمشي بحالي صااافي
- وشنو هي هاد الحاجة ؟
- شي حاجة ديال لبنات وكان (تزنكت من الخلعة وهو يسحابو من الحشمة )
- واخا هكاك نقلبك عاد تمشي .. حيت راكي بنت شارفة وقلب البرمة على فمها طلع البنت كاتشبه لمها
- لا أنا ماشي بحالها ... أنا معاك دار دارك وبسميتك ومن حقك ..وأي واحد بلاصتك مايبغيش شوافة وشياطينها الملعونين يسكنو فيها .. واخا يعرف يريبها وما يديش السيئة الجارية من موراها
- هه :o زعمة راها مك لا !!!!؟؟
- أه مي ولكن الحق راه حق واخا يكون فراس حمق .. وزايدون مكايشرفنيش هاديك تكون مي ... عافاك عنداك ترجعها تسكن هنا .. شوف غير كي رجعات ليا حالتي .. شوف وجهي كلو مخضر ومزرق .. ديما معدية عليا ومكرفسة عليا .. تخيل انا عندي 24 عام وتاحد عمر ماعتب بابنا يخطبني .. (غادة كنقرب لجهتو ) عمري هضرت مع شي راجل بحال هكا .. وزوين هكا .. وعمر شي راجل شاف فيا بحال هكا ..وعطاني وقت هاكا .. انت أول راجل وحاسة بلي أخر راجل هكا ..(هنا وصلت ليه ) الأخ مزوج ؟؟
- (رجع بخطوة لور) بعدي مني بعدي بعدي
- ( بديت كنتبوحط ودايرة فيها محرومة) شوف أنا راه زوينة وخا هاد لكمات ولكدمات
- لا باااينة
- وقلبي صافي وبيض كي الحليب .. ها ونقدر نولد من عشرة الفوق .. غاجربني
- بقرة صافي .. لا ..لا ... خرجي عليا من داري
- واخا هاهي خارجة .. وعقل فيها وماتنساش تفكر فيا :*
يالاه وصلت الباب وبدا تليفون كايصوني بدا كيقلب فجيابو .. ولكن صوت للأسف كان جاي من عندي على ماجا يهز راسو لقا غاريح ... تبعني ولكن كان فارق توقيت ماشي من صالحو .. وبلخصوص وأنا دايرة كي زواق .. ما وقفت تا وصلت عند زاهية .. عطيتها القرآن وكملت الجري تا لواحد العوينة رويت منها عطشي وجلست كنرتاح وكنعنق ونبوس فتليفون لي شفرت .. الله .. واخا هو لي خرج عليا ولكن بليتو باقا فيا ... الغبي مكانش داير ليه الكود .. وحتى كن كان دايرو نفورماطيه .. (اختصاص الحرامية) .. ركبت نمرة ماما وبديت كنصوني ولكن تا حد مكايجاوب داك الحماس لي كان فيا مشا بغيت نصوني على الواليد خفتو يجي هاد المرة ينفيني للدار الأخرة ... دزت بغيت نحل الفايس ولكن مكانش فتيليفون الكونيكسيون .. تفو تليفون لي بلا كونيكس كي الجسد بلا روح .. دخلت لتصاور كانو غير شي عشرة كلهم فيهم غاوجهو المعبس.. نضت محيتهم كاملين ... وبديت كانوريه كي فاش كايتصورو ناس .. وكيفاش سلفي كايكون .. ضربت أزيد من مائتان سلفي كلهم ببوز تشيييييي و خبيييييز ومعنووووووووووس .. ساليت من سلفيات وتبقشيش ورجعت عند زاهية لي لقيتها كدور كي لحمقة
- فين كنتي ؟؟
- فالعين كنشرب ..
- علاش سرقتي ليه تليفون
- دغيا وصلوها ليك .. وانت مالك ؟؟
- واش أنا قلت ليك سرقي ليه القرآن ولاشري لينا العداوة معاه
- ياك القرآن هانا سرقتو .. إيوا دبا جنونك يديرو خدمتهم ..فاش تهمك العداوة ولا المحبة معاه .. وزايدون التليفون شفرتو لا يكون داير فيه القرآن .. ماكتفكريش بعيييد تعلمي من لالاك دندونة
- تفو جوج مصيبات فسيمانة وحدة .. ماعرفت أش درت فحياتي
- مالا يعد ولا يحصى ..زاهية ؟؟ واش ماقديتيش عليه ؟ اعتارفي
- الباهية قالك عجبها وماناوياش تجري عليه .. وانا مانقدر ندير تا حاجة بلا بيها
- أشنو ؟؟ ههههههههههههه
شديت كرشي وبديت كنتفرشخ بالضحك .. ولكن ماطولتش ملي شفت الباهية محمرة فيا عينيها
- احم لا هو صراحة مابيهش .. كن شفتي أزاهية ملي لقيناه عريان والعضلات وداكشي .. أح أقلبي أخ.. كن كنتي معانا علم الله أش ديري .. أنا وبزز باش تحكمت فراسي اما كن ..
- كن شنو ؟؟
- أودي لي كل مقام مقال
بديت كنغمزها بنص عيني ونعض ففمي بلي راني غير كنمشي على عقل الباهية .. اما انا ماعندي بيه غرض ناقصني غير هو .. كريمة الكوافورة عندها لعضلات كتر منو وحنين ولسانو كي العسل والأهم من دالك سخي مشبعني روشارجات .