المنفى_الغريب

CH/ 10

مشيت كنتسلت لحدا دار مافيا لي يشوف داك القندوح .. وصلت لباب وحطيت ليه تليفونو غير بشوية باش فاش يخرج يلقاه .. ولكن كن كان عندي زهر كن كاع مانوصل لهنا .. يالاه بعدت بجوج خطوات وانا نحس شي حد شدني من شعري وجرني لعندو
- والله ليوم ما يفكني منك غير لي خلقك .. ياشفارة بنت شارفة
- آي أي .. راه راااااه تليفونك والله ماشفرتو
- كذابة
- واشوف الله يعطيك لعمى (زاد زير ليا على شعري ) أأ لعز أأ الله يعطيك لعز.. راهو شوف
- علاش سرقتيه ملي ناوية ترجعيه ؟
- وراه يسحابني شكلاط تا ديتو لزاهية ندوقها وهي تقوليا راه تليفون
- هههه عليا ديريها .. واش بنت لي عندي لكرون ؟؟
- لا غير ودنين مطوشين .. أي أح ,, وراني غابنت جبل باش غانعرف
- شكلاط كيصوني أبنت الحرام
- لا ولكن راه تخلعت .. وشكيت يخرجو موالين لمدينة شي شكلاط كيصوني ياك خرجو سبرديلا كضوي
- أهااااه كتعرفي سبرديلا لي كضوي ومكاتعرفيش تليفون أسلحفانة
- لا ماشي هكاك (مالقيت مانقول).. أجي ( قربت ليه وبديت كنشم ونشمشم) هادي ريحتك طبيعية ولا غير مرشوش بريحة ... (بدا كيبعد) ديال لعبار ولا ديال العطار؟؟ .. أجي ماشي ديال جوطيم ..ولا ديال أي لوف يو واقلة ؟؟... لمهم أولد الناس راني بديت نبغيك ونتجوانطة عليك .. (حطيت يدي فوق يدو لي شاد ليا بيها شعري) حك حك ألعمر راه كلاني القمل زاهية من نهار جيتي مافلاتلي
- أشنو ؟؟؟ (هرب يدو فالبلاصة)
- (بتمسكين ) مالك هربتي يدك .. حرام عليك .. انا كل لمسة منك كتعطيني لقوة والطاقة لمحاربة الفقر والجهل والأمية .. ماتحرمنيش منها
- أجي واش انتي مسطية خلوق ولا كتسطاي عليا ؟؟
داك لخطوة لي كان رجع بيها لور دابا زاد بها القدام .. عرفت راسي بلي غادي ندخل فمرحلة الخطر .. لداكشي مانقدرش نزيد نغامر معاه .. لداكشي عطيتو واحد الإبتسامة من بعد خرجت ليه لساني .. وضربتها بجرية... خليت غير الغبرة بلاصتي .. هو كاع ماتبعني حيت ماعندو مايدي مني وعارف راسو مغايلحقنيش .. خصني نلقى شي خطة تبقى تفكني منو من غير الإغراء حيت غايعرفني دافعة غير جبهة.. وصراحة خبرتي مع رجال فادتتني معاه وهو من النوع لي كاتجدبو المرأة الجميلة والمتقفة .. ماشي بحالي وجهي كلو مطبع بضرابي والحبوب ونمش والريش وزيد عليها سخانة كمالت .. هادشي كاع مكان راه غير الخلعة والفقصة ونقص فالملحة لي دارتها ... اما أنا راه كنت زوينة فنة كنلمع والله ولكن صدق من قال ملي حتاجيتك أوجهي قمشوك المشاش ...ولكن دابا باقا مامحتجاهش الحمدلله · · ·
دازت سيمانة على فاش خرجنا داك الحلوف من دار .. وانا وزاهية كندورو من دار لدار فدوار .. كل نهار نباتو عن واحد ..تال نهار لخر فسيمانة لقينا راسنا فزنقة ... حيت لالهم زاهية تقول واش كترصى كلشي شرات ليه صداع تا خروضات دوار كامل ... وبقينا لا بديدي لا حب الملوك .. وحتى داك جنونها ماقضاو ليها والو .. ومول الدار كل نهار مطلع كاميو لراس جبل ماعرفناه كيربها ولا كيعمرها ...واواخا كلشي جرا علينا من دارو وسد علينا بابو ولكن تاحد مامهني تبقى زاهية كادور بين ديور .. لداكشي قررو يديرو خير فيها وفيهم ويطلعو عند مول دار يحزروه ويرغبوه .. يخلي زاهية تكمل ليام لقليلة لي باقى ليها كخدامة عند سيادتو .. هاد الأخير لي مادخلنا تا لدار وحيت هو ماشي مكيلخ رفض رفضا باتا و قاااااطعا بحجة دارو وهو حر فيها وتقدر تمشي تقتلو ولا تحمقو .. أكد ليه لفقيه لي تاهو كان من أعضاء فريق الإقناع بلي إلى وقعات ليه شي حاجة يرجمو زاهية وهي حية
- دابا تا توقع ليا شي حاجة عاد تنوضو ترجموها .. وانا نمشي خلا .. الله يعطيكم الصحة أما العقل غير يتقل عليكم ...أسيدي تعطيني تقار .. بقات فيكم سكنوها عندكم لاش جايبينها لعندي ..
من بعد ماقال كلمتو لأخيرة .. مابقا كلام عند ناس دوار وبدا كيدردبو واحد بواحد .. وملي مشا كلشي بقينا غير أنا وياه طيط أطيط
- أش باقا كتسناي انت ؟
- (غمزتو) زين مانشوفوكش .. عرفتي ملي كاتكون معصب كاتجي كي شي قنبلة كاتخلي ضربات قلبي غير مشتتة ... بلا ماتهضر تا نكمل هضرتي .. داااااك نهار تخاطرنا على لساني واش يبقى قبل ماتشرق شمش .. وشرقات شمش فشموشات ولساني باقي الحمدلله .. نزغرت ليك إلى بغيتي تأكد ؟؟.. دابا أنا لي فزت برهان .. يعني غاتحقق ليا داكشي لي بغيت ؟؟ آ أها
- إيناا رهان كتهضري عليه ؟؟؟ ونحقق ليك زمر .. دركي عليا زلافتك
- إلى مارضيتيش .. راك ماشي راجل
- وشكون قاليك أنا راجل ألالة ..ورأيك كاع مكايهمني من لخر يالاه تلاحي من قدامي
- الله يحفر ليك جدر
- واش غاتمشي ولا نجي نسيب بيك من هاد جبل
- نانانا نانانا
بديت كنعوج فيه وضربتها بجرية ... لقيت زاهية واقفة كاتسناني من لبعيد
- اش درتي معاه؟؟
- والو دار ليه ..لقرد لاخور
- تسناي هنا راجعة
- فين غادة ؟؟
مشات وخلاتني ولكن باينة راجعة عندو .. بقات فيا صكعة .. حاسة بيها.. تا أنا جراو عليا من دار لي عشت فيها حياتي كاملة .. صعيبة والله .. ولكن تا حال مدايم ودنيا فانية ..بديت كنعلب بشي حجر لقيتو قدامي دوزت بيه لوقت تا جات زاهية ناشطة وكتبورد بعكازها ..
- جرا عليك تا انتي
- على أنا هي انتي هزي ميكتك وزيدي راه بغا نسكنو عندو
- كذابة ... وكي درتيليها
- ويالاه دابا لا يرجع فهضرتو
مشينا كا نكسو وهو باينة فيه محاملش راسو .. وقبل مايخلينا ندخلو بدا كيبلبل علينا بالشروط.. أما أنا تخبيت من مورا زاهية حيت باقي سناني كيتغززو عليه
- هو : ليكن في علم سيادتكم راه دار كلها ولات كاميرات ها ولا ها نيشان لزاكي
- أنا : بادو ؟
- هو : لا ديباردو ,, الحبس يا وجه الحبس ... راه رمشة عينكم نقشعها ..إيوا الله يعميها ليكم .. شهر جاي غانبيع دار لدالك ملي يجي مولاها جديد مابغيتش نشوف كمامركم إلى بغيتو تضرقو من البرد وشتا والتلج .. وهاد المدة لي غاتجلسو فيها ماشي لله في سبيل الله
- أنا : على انت فيك كتعرف الله
- هو: غاتجمعي بنتك ولا والله لا عتبتو هاد دار ...
- زاهية :(بدات كتقرص فيا نسكت) كمل كمل
- دار مانلقى فيها نقطة ديال الغبرة .. بغيتها تولي كتلمع ..و الماكلة فلوقت توجد ولما من لبير يحضر .. والأهم .. الأهم وجوهكم مابغيتش نشوفهم .. نحضر أنا انتوما تغبرو
- أنا : (من بين سناني) الله يغبر ليك شقف
- هو : أشقلتي انتي؟
- زاهية : والو
- هو :حسن ليك ماتبقايش تتمتي .. حيت حسابك القديم باقي ماخلصتيه .. يالاه دخلو
- أنا :دخل فحيط
قرصاتني زاهية .. وسكتت أما كنت ناوية نعطيه علاش كيقلب .. على خر ايامي نولي نحني راس لواحد مكايسواش .. ونخدم عليه من لفوق ..أنا لي كنت معززة مكرمة فدار با لي نبغي تحضر وتا ملي سقطت فالباك ماعلاش عليا صوتو .. يجي هاد زمر يجفف بيا الأرض .. أودي زيغة لي دارتها ليا .. يكفيني تحسرا .. نشوف لقدام والله مكايدير غير لي فيها لخير · · ·