المنفى_الغريب

CH/5

دازو يوماين على فاش جيت .. وانا غير فشقا وتمارة دار كبيييرة والبيوت فيها كتار .. ظهري عواج .. اهم حاجة هي جمعت أي حاجة تعد من ديكور زوقت بيها بيتي باش نحيد غير الوحشة لي فيه .. أما واحد زاهية الله يكحل ليها سعد .. ولات دايراني كي جفاف تحت رجليها من بعد داك البونية لي باقا مخضرة ليا العين .. غير تقول سميتي تلقاني نحضر قدامها فالحين .. وهاد المرة عيطات ليا باش نحل الباب .. واااو شي حد جا عندنا يقدر يكون با جا يردني .. هاد الفكرة دارت فيا الحماس ومشيت كنطير كي الفراشة لباب .. وانا كنزيد نخضر فعيني باش تبان لبا المعاناة لي كادوز منها بنتو .. ولكن خابت ظنوني كالعادة كانت واحد المرأة لابسة جلابة فلحمر .. في مقتبل العمر وزويونة .. وخا ماشي هي المنتظرة ولكن سلمت عليها بحماس بحال لا كنعرفها من شحال هادي .. أودي لمهم غير نبدلو وجه زاهية لي ولا كايجيني تا فلمنام على شكل كوابيس .. أعوذ بالله .. المهم رحبت بالمرا لداخل ..وغير شافتها زاهية وقفات بلا عكاز
- الباهية ؟؟ أش كاديري هنا فوسط نهار ؟
أنا بقيت غير مبرقة عيني وأنا كلي أمل تقول ليا زاهية نجلس معاهم نتجمع ... راه شحال هادي ماتجمعت وكنحماق على جماعة ديال الناس لكبار
- (شيرات ليا) أجي انت كاتشوفيها ؟؟
- أ أ على مالي بعبولة مانشوفهاش .. راكم خضرتو ليا غير عين وحدة (الله يغرق ليكم الشقف)
- الباهية علاش بنتي ليها ؟؟
- وعلاش ماتبانش مالي حولة ولا هي جنية
- وراها نيت جنية
هنا طاحو ليا الما فركابي وخواو بيا رجليا .. وجيت على راسي فالأرض .. ومايجي عيني غير على رجليها لي على شكل فراقش معزة ..أويلي وحدي وليت نشوف جنون بنهار لبهار .. ومسلمة عليهم من الفوق
- هااااا مقلنا .. علاش بنتي ليها
بقات كتهضر معاها .. أنا كنشوف غير تحراك شنايف ... أما صوت بحالة دايرة ليه سيلونسيوز
- واش غاتبقاي مكسلة ليا انتي نهار كامل .. سيري وجدي لينا أتاي مسوس
- تسليييم أرجال البلاد .. حسبيه واجد
نضت ضربتها بكعطة وانا كلي كنقفقف .. ناري واش أنا كنحلم ولا بصح .. زاهية لاعبة معاها ولكن شي حاجة واخرى الله يصبرني والله يربح .. وجدت ليهم أتاي وديتو ليهم ورجعت ضربتها بجرية لبيتي ورديت عليا الباب لي غير مكالي ... وبديت نطلب الله يرحمني وينقدني ماعندي حد من غيرو .. كلشي نكرني وهاهية زاهية باغا تحمقني وتزادت عليها الباهية باغا تصطيني وغدا علم الله شكون .. وصل ليل ويالاه بدينا شريب ديال صوبة لي حلفات ولا بغات دوز أنا وزاهية ولالة الباهية تسلييييم .. وحنا نسمعو دقان بجهد بحالا باغين يفرعو الباب انا صافي حسيت بوجهي مشا منو لون وقلبي وقف .. غاتكون غير شي قشلة ديال جنون هاجمة .. وقفات زاهية وتبعاتها الباهية أما أنا تكمشت بلاصتي .. أصلا ماعندي باش نوض رجلي فشلو .. من بعد ماتحلات الباب سمعت صدااااع والغوات .. جاني الموت ديال لفضول وتبعتهم بعدما فكرت بلي كن كانو جنون كاعما نسمع صوتهم .. وبديت كنطل غير من سرجم حيت كانو فجردة .. كانت زاهية واقفة بعكازها ومجموعين عليها بزااف ديال رجال وشي عيالات .. فينك أبا تشوف رجاااال يالي قلتي ريحتهم مانشمهاش.. نرجعو لجقلة .. بدا واحد راجل منهم كايغوت على زاهية
- أشوفي أداك شوافة لي دايرة الفتنة فدوار .. ليوم نريبو عليك هاد دار .. ونرجموك بالحجر .. تاتشهقي أخر شهقة فحياتك
- زهزوهة : هاي هاي على عبيبيس تحل للوالديك الفم ... بعد ماتحلو عينيك من مور مراتك
- امرأة : وزني كلامك أزاهيه
- زاهية :انتي بعدا غير سكتي .. كن كان عندك الدراع كن حضيتي غير راجلك لي براسو مقولباه داك خيتي مع ولد المقدم · · · 
هنا ولا سكات وشي كايشوف فشي .. كلشي شاك فكلشي .. واتاحد ماتجرأ يهضر خايف لا تفضحو زاهية تا هو .. من بعد بعض التمتمات والدعاء على زاهية بالله يغبر ليها الأتر خوات دار وكلها مشا لدارو .. ورجعات زاهية تكمل صوبتها .. واو على خاطر عندها .. أما الباهية غبرات
- زاهية ؟؟ بصح انت شوافة ؟؟
- لا
- كدابة وهاد جنون لي دايرين بيك كتشطحيهم متلا
- واش مابغيتيش تحشمي .. باقا كاتكلك لعين لوخرا لا ؟؟
- لا .. تسليم أرجال لبلاد تسليم .. انا طالبة سماحة .. زاهية .. هاكي زلافتي شوفي كما يبان ليك شي حاجة فطريقي .. ياك ماشي مشكل بلاصة القهوة تكون صوبة
- عطيوها لداك الكمارا
جاتني واحد تصرفيقة ... تلفاتني على القبلة .. خلات وجهي معوق وفمي كلو محلول
- انا ماشي شوافة .. ومكانشوفش أش غايجرا .. حيت جنوني مكايتسنطوش على سما .. ولكن عارفين غير أش طاري .. بحال كريمة لكوافورة ديالك
اويلي ميمتي ومنين عرفاتو .. بغيت غير نرد عليها ولكن فمي باقي معوق ... تا تسبيح ماقدرتش نسبح قبل مانعس الله ياخد فيها الحق وفجنونها تاهما .. تفو عيني خضروها وليوم وجهي عوقوه .. غدا يدفنوني حية · · ·