المنفى_الغريب

CH/14

وصلنا لبلاصة العرس ونزلنا من طنوبيل .. هو مشا حل الكوفر باش ياخد الكادو..أما أنا عقلي كلو خداتو الفيلا لي قداامنا واااو دهشرت صافي .. ولكن أنا ماشي من ناس لي كايهموني المظاهر الله يخلينا بصباغتنا
- غالي ياغالي على قلبي .. شد فيا راني مكانعرفش نتمشا بطالو .. ومنها نيت نبانو كي ناس الألبة
- لا ... البنت لي كنبغي كاينة لداخل
- ممم وهي كاتبغيك ؟؟؟
- (بقااا ساكت وبعد تفكير وبأسى ) لا
- إيوا دير العز على راسك .. وفقصها راه من الغيرة كايتعرف الحوووب .. زيد زيد أشكاتعرف
شديت فيه بز منو ودخلنا .. رحبو بينا واحد راجل ومرأة ودخلنا شربنا الحليب وكلينا تمر
- نشربوه فعرسنا إن شاء الله .. مالك كاتخزر .. كل واحد بوحدو .. مالي مبجقلة نتزوج بواحد بحالك
وانا مزال كنشرب الكاس رابع سمعنا شي صوت بنت من مورانا
- غاااااالي مرحبا (بكل رقي)
- أنا : ترحب بيك جنية أأ جنة أحبيبة (قرست فغالي وبديت كنهضر ليه فودنو بابتسامة) سد فمك يعطيك العكّر شوهتينا
- هو : احم شكرا
- هي : تفضلو مرحبا بيكم ( وكاتشووووف فيا معذورةعمرها شافت زين)
دخلنا لداخل كان كلشي متيك ومأنتك بقيت غير مبهورة كان داكشي مزوق بحال الحفالات ديال نصارى مهم جلسنا فواحد طبلة بوحدنا وبقينا شوفيا نشوف فيك أطجين لحوت
- إمتى يحطو العشا ؟؟ (بدا كايخنزر فيا ) قصدت إمتى دخل العروسة ؟؟
- واش بنت ليك أنا هو نكافة
- ومالك خصك غير المضمة .. أجي واش هاديك لي مخلياك حال فمك هي العروسة ؟؟؟
- لا اختها
- إيه علم الله كي تكون العروسة إلى كانت هاديك غير ختها ... بيني وبينك باينة موكلاك لسان الحمار ... كن شفتي فمك كي تحل ملي شفتيها .. يدخّل لاندوشين والعسكر ديال المزنبيق
- واش غاتندميني حيت جبتك .. واش بغيتي نوض نردك منين جيتي ؟؟
- وانا غي كّلت
- ماتكّوليش
- تكّالك انت وياها
رجعنا لسكات حاضيين لغادي وجاي ...وبدات الموسيقى .. وحتى الموسيقى فيها الفرق كلااس .. ماشي شعبي لي كايبرد الهوايش.. ولكن لله الحمد كنعرف الكولشي .. يالاه نضت نوضها وهو يحبسني الحقير
- فين غادة ؟
- غادة نفركع لقنبول.. غادة نشطح فين عندي نمشي ؟؟
- واش باغا تشوهينا ؟ جلسي الأرض
- ويلي علاش نجلس الأرض والكرسي كاين ... غالي ؟؟
- نعم
- عاودها راسك
مشيت لوسط ناس وخليتو كايغلي .. إيوا صاف يتحكم فيا عاطيني فلوس صداق .. بديت كنشطح وانا مكايسة زعمة بحال ناس الكلاس .. ولكن مارتاحيتش فشطيح .. ماعرفتش علاش ؟ .. بديت كنتلفت فجنابي .. وماتجي عيني غير فعنين واحد راجل .. كان تا هو كايشوف فيا ..بحالا درتي ليا بوص .. ناري قلبي وليت كنسمعو كيضرب فودني .. ماعرفت ما ندير ..ارتابكت .. وليت كنقلب غير على غالي .. لي مشيت كنجري عندو وانا لون مخطوف من وجهي
- مالكي ؟؟
- والو
والو وانا عقلي بغا يطرطق بكترة الأفكار .. مايمكنش يكون داك الراجل هو عادل .. حيت ماشي غير هو راجل لي عندو ندوب فالوجه فالعالم .. مستحيل كن كان هو شنق عليا فالبلاصة .. دنيا تهندني ماشي هو ماشي هو ماشي هو ماشي هو صااااافي ماشي هو تهدنت أوف
-غالي : عادل · · · 
حسيت بدمي جمد وقلبي وقف وحلقي نشف ملي شفتو قدام عيني كيخنزر
- عادل : ممكن نجلس معكم؟؟
- أنا : لا (بداو بجوج كيشوفو فيا) احم كانتسناو شي ناس
- غالي : (باستغراب) إينا ناس ؟؟
- أنا : (بديت كندخل ونخرج فالهضرة) مك زاهية ومي الباهية وختك الغالية وخالتي الهاشمية وعمتك صفية وبنتها رقية و بدرية
- غالي : أأأ؟؟؟
- آآآه راه دابا وهما جاو يكونو فطريق
- عادل : أوكي نجلس معاكم على مايجيو
هاد المرة قبل مانطق زرب عليا لغالي
- أه تفضل
هو جلس وانا نضت بحال شي ميزان
- غالي : فين غادة ؟؟
- أنا : نهرب أأأ نشرب
- غالي : هالما قدامك
- أنا : لاهدا لما ديال طواليط أنا بغيت ديال لكوزينة
- غالي : دن..
- أنا : (زربة عليه قبل مايكمل سمية) ينصر دين مك .. هانا جالسة (بنفخة) شت العروسة تعطلات؟
- غالي : بصح هاني غادي نشوفها
- أنا : ديني معاك
- غالي : جلسي تجلسي على شوك.. واش باغا تفركعي ليا المرارة هاد نهار
هو مشا وأنا رجعت جلست .. أخخخخ شيطان حاصرني بشوفاتو ماعرفت ماندير .. أش داني .. لاش جيـــــــــت .. ماكرهتش تشق الأرض وتبلعني ولا نقلب عليه طبلة ونهرب .. يخخخخ خرج عليا أكشاي كومار
- انتي من عائلة غالي ؟
- أ ؟؟
- مالكي مخلوعة مني ؟؟ واش شايفة وحش ؟؟
- لا
- ومالكي كاتفتفي ؟؟
- أأأا للللا لا لا أنا ؟ لا
- (باستهزاء) هه أصلا ماشي نتي لولى ولا لخرة لي تخلع مني .. ولكن حساب وباقي غانصفيه ؟
- أ ؟ غاتصفيه ؟؟؟
- نساي غير كنت كانهضر مع راسي
- أأ؟؟ غالي تعطل ؟ لا ؟
- غانمشي نشوفو ؟
- (بلا شعور) ديني معاك ( تفوووو أش قلت ... يخ على ترابي لي قالي غادي كنقول ليه ديني معاك .. هادي هي نتيجة الحرمان من صغر فاش كانو كايهربو ويخليوني )
- يالاه
مالقيت مانقول من غير نمشي معاه .. وأول مرة نرد للبال للعكاز الأنيق لي كان فيدو
مشيت معاه .. وبقينا كانتمشاو فواحد لكولوار ما عرفتو كولوار ولا دروبة منين شفت الحجم ديالو .. ناري عنداك غير يمشي يخشي ميمتي فشي بيت ويسد عليا ويخشي فيا شي جنوي ويقطعني طراف طراف ويرميني فطارو ديال زبل ولا لكلاب يمششوني و شكون شافني فهاد العرس هدا إلى مدارش كتر .. رجلي بداو يخويوا بيا ملي كانتفكر لمنظر ..وهو واخا كيعرج غادي بتقة .. لا لا فهادي مانغامرش .. ضرت عندو ابتاسمت ليه تا أنا بكل تقة ...تعجب .. وضرت للخلف وعيطت جبد "وااااااااا لحفيظ الله'' ماوقفت تاوصلت لطنوبيل لي لقيتها مسدودة تخبيت من موراها فواحد القنيتة مكانبانش وبيقيت مكمشة كانتسنى رحمة سيدي ربي .. اللهم الخوف ولا الشجاعة الخاوية .. بقيت شي نص ساعة مكمشة تا بديت كنشوف كلشي خارج من العرس ..آآآو دغيا سالاو .. انا غير ديسير إلى بديت ناكلو خصني ساعة .. عاد دجاج لمحمر ولحم لحمر والحلوى وأتاي .. خصني ليل كامل عاد نتشارجا .. ولكن يقدر يكونو الناس الألبّة كيجمعو ليهم فميكة ياكلوه فدارهم .. وشكون عرف ؟.. شوية شوية بان ليا غالي جاي مع جوج بنات .. أسيد طلع مساهلش جوووج فخطرة ؟؟..
- حلي لباب بزربة
- مالها كاتبكي ؟ (أول مرة نشوفو محمر فيا عينيه )
حليت بزربة لباب لورانية ودخلو داك جوج وحدة فيهم كانت غاتفركع بالبكا .. ولوخرا هي سارقة قلب ولد مي زاهية .. وانا وياه ركبنا لقدام .. والجنازة نايضة فطنوبيل.. بغيت غير نسول ولكن خفتو يخرجني من سرجم .. شحااال خايبة يكونو عندك بزاف ديال الأسئلة ومامنحقكش تسول تا سؤال .. أنا بعدا كنحس براسي كي شي نفاخة باغا تفركع .. وصلنا لدار بمشقة الأنفس حيت طريق سبحان الله تجبدات وطوالت ...طلعهم غالي لفوق وأنا بقيت عاسة ليه حدا بيتو كانتسناه يجي يعطيني التقرير .. وبعد دقائق مرت كأنها أعوام نزل ولكن ولد شارفة نخلني وبحالا كاع مشافني .. وخرج عند كارلو لبرا ..
- غاااالي .. أش واقع ؟؟
- راكي عارفة
- بالعمى معارفة شي حاجة .. واش بنت ليك كانشوف فالكارطة ..قووول ؟
- العريس هرب من العرس .. وانا جبت العروسة واختها تسكن معانا شي مدة بعد ماتنسى القصة .. ومنها نيت تنسى المصيبة شوية ماشي ساهلة
- وعلاش هرب ؟؟
- نسولوك انتي لي كنتي عارفة
- أنا ؟؟
- (شدني من قبي) أجي أجنية باش كاتعرفي أش كايطرا ؟؟
- أ؟؟ فطرة .. موهبة فطرية
- اهاه ... واقولي ليا أنا أش غايوقع ليا باش نتيق
أش تيْق ولا تسيْق أنا غير قلتها على الله .. من بعد ماقالي تخربي العرس .. مالقيت مانقول من غير هو أصلا مخرب كحجة للإقناع .. ولكن بما أنها صدقات ماخصنيش نشوه سمعة ديالي .. تحسبا للمستقبل
- مممم كنشوف ؟؟ أأأ لا كنسمع صوت ضحك دراري صغار مالي لمكان ... وانت مع مراتك لي كرشها لفمها كاطلو عليهم وفرحانين... ولهيه قبر زاهية محفور والباهية كتندب عليها وعليك
- شكون لباهية ؟؟
- أ ؟؟ هه وعرفتي شكون لعروسة بعدا ؟
- شكون ؟
- خت لعروسة أووووه .. يالك من محظووووظ
- وانت ؟؟
- مالي أنا ؟؟ آآه أنااا فدار مهجورة وشتا كتصب مجهددددة وانا كنخبط راسي مع الحيط
- وعلاش ؟؟
- صافي ماشي شغلك .. ياك عرفتي شغايطرا ليك أنا خليني عليك فتقار
هزيت راسي ودخلت لدار وهو خليتو ضرسة العقل كاتبان ليه تيق راسو مسكين .. وانا غادة وكنكمل لحلم .. كانخبط راسي مع الحيط وكرموشتي داير ليا المخدة باش مانتفلقش وكيحزر فيا نحبس ونا كنحلف ليه والله مجاب ليا دلاح تا نحكها فولدنا ... أخخخخخ · · ·