المنفى_الغريب

CH/15

طلع نهار جديد ولكن مافيه تاجديد من غير العروسة عاطياها البكا وختها وغالي كيصبرو فيها .. وأنا كنتسخر على سيادتهم جيبي الما جيبي سكر جيبي لملحة تجيكم فراس كاملين .. وانا مزالا غارقة فالكوزينة جا عندي سيدهم غالي الله يغلغليه الضلوع
- بنت شارفة ناقصاك شي حاجة ؟؟
- حاجة ؟؟ والله اخويا إلى حوايج هما .. ماكرهتش شي تسافيرة للجزر المانديف وشي شوبينغ فلوس أنجيلوس وشي تبحيرة فالهواي .. وشي مسارية فالمنطاد فوق أندونيسيا أووو أووو مكرهتششش
- تشويك العافية دجهنم لا؟؟ .. واش أنا كنسول على الكوزينة ولا على أوهامك تافهة
- (بالغوات) إيوا قول لكوزينة .. تفو على مرض .. ناقصك كلشي ومكاين تاحاجة
- غانطلعو أنا ومنال لمدينة ونشوفو شنو نجيبوا
- شكون منال؟؟ أه خت العروسة .. فينك ألباهية
- شكون الباهية ؟؟
- شوف عنداك تنسى صوفا ... غزل البنات عزيز على العروسات لي هارب ليهم راجل .. وبولفاف احتياط لا تكون كتوحم
- عرفتي شنو ؟؟
- شنو؟؟
- كنكهرك ..وكنكره هضرتك الخاوية .. وصوتك كيجيب ليا ردان
- وانا عرفتي شنو؟
- شنو ؟
- وااااقلة راك انت لي كتوحم .. مكاتجيكش دوخة ؟؟؟ (مزادش معايا الهضرة ومشا) أجــــي وسخفة ؟؟ خخخههههههذ
مشا هو ومنالتو .. وانا ضرت بالدار .. ومشيت نطل على العروسة حيت صوتها تقطع وانا خايفة لاتكون انتاحرات وتسبا عليا .. دقيت عليها الباب ومن بعد ما سمعت إذن دخول دخلت كانت جالسة حدا سرجم كاتمحي فدموعها .. جلست حداها ومالقيت مانقول ماعنديش مع المواساة
- ناقصاك شي حاجة ؟
- لا
- مشهية شي حاجة نطيبها ليك ؟؟
- لا
- ممم فكرتيني فيا ايام زمان تا انا كنت بحالك .. نهار خلاني ربيع الجباص .. تخيلي كان جا من العروبية مايكساب مايعلام ... وخدم عند واحد الجباص .. وكان كل نهار كايقول ليا مقادرش على هاد الخدمة نهرب نرجع منين جيت .. وانا كل نهار نصبر فيه ونوعيه .. إلى خرج من الخدمة با راه مايقبلش بيه .. وشغانوكلو ولادنا ملي نتزوجو .. كل نهار نجيب ليه حجة جديدة وإقناع جديد.. تاولا حرايفي ودخلوه الفلوس .. ومشا تزوج عيشة بنت عمو ... وانا كبيت الما على كرشي وجبت فالجهوي جوج ودوبلت فالباك تلت سنين
- هههه
- كنشكي عليك همي ماخصكيش ضحكي ..
- هه واخا
- نعاود ليك على قصتي مع مهدي سيكليس ؟ ولي كان سباب فسقوطي فالباك لول .. ومروان الجزار ... ونبيل الفرملي .. وسعيد جدارمي تي راني مدوزة حرف المغرب
- هه واخا
بديت كنعاود ليها عليهم واحد بواحد وسيدة كاتفرشخ بضحك ... تاداز الوقت ورجعو عصافير الحب من سوق .. وقالك جايبين الكروفيت نطيبو ليهم .. الله يطيب ليهم القلب .. انا عمري شفتو تا مباشرة بقالي غانطيبو .. لداكشي تطوعات منال طيبو وهو من الحنية لي فيه قاليها نساعدك .. وانا من سعدي نرتاح شوية .. ولكن إينا راحة ودقان غايهرس الباب .. مشيت كنطير يسحابني زاهية .. ولكن زهري هو لي زاهي هاد ليلة .. كان عادل الشيطان ومن تحت صباطو واحد راجل كلو دمايات وسنة لقدامية طايرة
دار كلها تجمعو بسرعة البرق حيت الغوات ديال ضحية خانق دار .. من بعد عرفت بلي هو العريس .. وسيدهم عادل هو ولد عم العروس وخدا ليها الثأر ديالها .. أش هاد زهر ياربــــي .. من بعد العروسة الرقيقة وطيوبة قالت ليهم بلي مابقاتش باغاه والله هو لي غايخلصو .. صراحة أنا كن كنت بلاصتها الله غايخلصو بيديا أنا نيت .. من بعد المسلسل درامي لي طرا .. ارتمت العروس بين احضان ولد عمها من بعد مارمى العريس برا... أح انا با غير إلى شافني مديت يدي لولد عمي باش نسلم يقطعهم ليا ... ولكن المشكلة الكبيرة هي قالت ليه بقا معايا ماتخلينيش ... وهو وافق .. تفو على جنوسة .. خليتهم يكملو دراما .. وطلعت بزربة لبيتي وبديت نغوت على العريس من سرجم
- بسبسبسبسبس تسنى
- (بصوت مبحوح) أث بغيثي ؟
- وراك مغاتعرفش طريق بوحدك فهاد ليل تسنى نمشي معاك نوريك
لحت ليه الميكة ديال حوايجي .. وقلت ليه يتسنى هانا نازلة من سرجم لاخور لي من جهة لوخرا ساهلة نزلة من تما وحيت بيتي جا على شوكة ... ترددت فلول حيت الأرض كاتبان بعيدة .. ولكن نغامر بحياتي .. حسن مانجلس نتسنى فموتي .. قلت بسم الله وبديت فالمخاطرة وجاب الله دار كانت عامرة حفاري .. نحط رجل هنا ورجل لهيه ... ولكن صدمة هي من بعد ماضربت نصف لمسافة مالقيتش فين نحط رجلي واااع وإلى طحت للأرض غانتهرس مائة فالمائة .. مابقى تاحل قدامي من غير نرجع منين جيت ولكن نزلة ماشي هي طلعة .. زلقات ليا رجلي فأول خطوة وجيت مكسلة فالأرض .. ومع الحلة ديال عيني لقيت غالي وعادل عند راسي وانا حابسة فيا الغوتة.. غالي كان مخلوع ولاخور ماعرفتش حيت ندوب فوجهو مكاتبين تا ردة فعل
- غالي : أش كاديري هنا ؟؟ وعلاش نقزتي من سرجم ؟؟
- أ ؟؟؟ آآآآآآآآآآآآآآآآآآآآآآآآآآآآآآآآآآآ (مالقيت مانقول من غير الغوات حيت بصح كنت مقسحة )
هزوني وداوني وانا كنغمز فالعريس يعلق ...من بعد ساعة من الألم والغوات تهدنت شوية .. ولكن غالي والأخرون مزال كايتسناو تفسير
- مشيت نعس ماعليا مابيا ... وسمعت شي صوت كايقول ليا نزلي لبير داااابا .. خفت و مابغيـــتش .. وماحسيت براسي غير كنتهز وكنتخبط مع سرجم ...بسم الله الرحمان الرحيم .. تسلييييم
درت راسي غانسخف .. وتا واحد ماتيقني من غير غالي .. من بعد ماخلاوني انرتاح سمعتو كايعاوليهم بلي أنا مسكونة .. وشحال من مرة لقاني واقفة عند البير فنصاصات ديال ليل .. الله يمسخو جوج مرات ردهم بزاااف .. ولكن حسيت بيه قنعهم .. وانا أهم حاجة عندي عادل يقتانع... حيت عندي معاه سوابق فالهريب · · 

وصل لوحدة ديال ليل وتقطع الحس فدار .. إلا فبيتي جالسة كنغوت غير بشوية ملي كانحرك رجلي وكانتعكّر .. لا ديالي بقا لا وجهي تنقى .. درت غير الفضيحة فراسي وزدت الخل عل الخلول .. توحشت الزاهية المسخوطة علم الله فين صادة دابا ..وانا باقا كنفكر فيها وهي تحل الباب ناري قلبي وقف يسحابني عادل ولكن كان غير غالي جايب كاشتو وجاي

- آه آه أ سيدي داخل لحمام .. فين جاي بمانطتك

- جاي نبات هنا معاك الالة

- ويلي على معايا شوف غاتمشي لبيتك ولا نجمع عليك جوقة

- خايف عليك ألالة دنيا لا يضربوك جنون تاني ويلوحوك فلبير

- ياك عندك الكاميرات ملي تشوف شي حاجة جي كاتجري

- على أنا غانبقى حاضيك من لكاميرات ليل كلو .. اللهم نبات هنا وتاإلى كانت شي حاجة نسمعها ونفيق .. وزايدون قبايلة لكاميرات مابينو لا جنون لا وحوش .. بينو ليا غير انتي لايحة لميكة ومنقزة برجليك كي القردة

- حاشاك .. ومن حيت عارف بلي ماكاين لا جنون لا والو إيوا تلاح

- بغيت غير نعرف لاش كنتي باغا تهربي ؟

- وانت مالك .. طلعتي ليا فراسي وجرحتيني فصباح ملي قلتي ليا كنكرهك .. وسيد قبيلة كان غادي غادي قلت نمشي معاه .. فيها شي حاجة .. إيوا عرفتي إوا دك

هو عاد مزاد جلس سيد مصمم يبقى عاس ليا عند راسي

- لا أش غاديري؟؟

- كاتفرج فالمسلسلات تركية بلا قياس .. لمريوة لاخور ..اجي دبا تشوفك منال وطيح من عينيها وتبقى أصكع بلازواج

- نتزوج بيك انت .. ياك تانتي تا حد مدايها فيك .. وحتى من ربيع الجباص خلاك

- الله يخليك بالخلا .. تفو على مرض .. غير طالق ودنيك .. الله يغبر ليك الشقف انت وهاد الكاميرات ديالك .. ولكن هاهي غاترجع زاهية ونشوفو

- أهاه نشوفو ..وبالمناسبة تشوفي العمى

- تشوفو غير انت .. واش دابا غاتبقى مقرق هنا .. ياك انت باغيني نخرج ليك من دار .. إيوا أش فيها إلى هربت .. ولاباغيني نبقى خدامة عليكم فهاد دار .. انت وضيافك

- سكتي ونعسي .. من بعد وتعرفي علاش .. وزايدون ملي ترجع مك ديري لي بغيتي

- أش غانعرف ؟؟؟ نعستي تنعس ماتنوض ..

سد عينو وتكى فالقنت ديال البيت ... ولد حرام خلا راسي ضارني ونعس .. بقيت تا أنا كنشوف فيه تانعست .. كيشبه لزاهية ههههه وشويــــة للباهية